Biblia/Nove Testamento/Colossenses/Colossenses 4

Epistola al Colossenses

Capitulo 4

¹Dominos, tracta vostre servos con justitia e equitate, proque etiam vos ha un Domino in celo.

Exhortation a precar pro le successo del ministerio de Paulo

²Engagia vos in precar^[1], sia vigilante in illo^[2] e regratia Deo^[3]. ³In le mesme tempore, preca etiam pro nos, a que Deo aperi nos un porta pro proclamar le Parola, illo es le mysterio de Christo, pro le qual io me trova in prision. ⁴Preca a fin que io lo face cognoscer como il es necessari^[4]. ⁵Comporta vos sapientemente con le extraneos^[5] profitante del opportunitates^[6]. ⁶Quando vos parla, sia vostre disposition semper gratiose, condimentate con sal, pro saper como vos debe responder a quicunque.

Salutationes e instructiones personal

⁷Tychico, carissime fratre, ministro fidel e conservo in le Senior, facera vos cognoscer le situation in le qual io me trova^[7]. ⁸Io le inviava vos pro iste mesme ration, a que vos pote saper lo que concerne nos e a fin que ille consola vostre cordes. ⁹Con ille io inviava alsi Onesimo, fratre fidel e carissime, que es uno de vos. Illes facera vos saper toto lo que nos face hic.

¹⁰Aristarcho, mi companion de prision, invia vos su salutes. Le mesmo face Marco, cosino de Barnaba (circa le qual vos recipeva instructiones). Si ille veni a vos, da le benvenita a ille. ¹¹Jesus, appellate Justo, manda vos su salutes alsi. Tote istes perveni del judaismo^[8] e como tales, illes esseva le soles qui me adjutava in mi labor pro le regno de Deo e me esseva de consolation. ¹²Epaphra, qui es uno de vos e servo de Christo, saluta vos. Ille lucta semper pro vos in su preces, a que vos sia matur^[9] e plenmente secur in tote le voluntate de Deo. ¹³Io pote testificar que ille ha laborate durmente^[10] pro vos e pro illes de Laodicea e de Hierapolis. ¹⁴Le carissime medico Luca, e Dema, saluta vos. ¹⁵Vole ben salutar le fratres e sorores qui es in Laodicea, Nympha, e le ecclesia que se incontra in su casa. ¹⁶Quando vos termina leger iste epistola, face lo leger etiam al ecclesia de Laodicea, e que etiam vos lege illo que essera vos inviate ab Laodicea. ¹⁷In ultra, vole ben dicer a Archippo: “Sia diligente in complir le ministerio que tu recipeva del Senior”.

¹⁸Io, Paulo, scribe nunc iste salutation con mi proprie mano. Rememora mi catenas^[11]. Le gratia sia con vos.

Notas

1. O “Persevera a precar”.
2. O “Non cade addormite durante que vos preca”.
3. O “con actiones de gratia”.
4. O “convenibile”.
5. O “con illes de foras”, illes que es extranee al fide christian, que non pertine al ecclesia de Christo.
6. Litt. “redimente le tempore”, o “usante ben vostre tempore”.
7. Litt. “Tote le cosas que me concerne”.
8. Litt. “Illes es del circumcision”, esseva convertite del judaismo.
9. O “perfecte”.
10. O “ille ha grande zelo pro vos”.
11. O “mi imprisionamento”.