Amur engiadinaisa
| ←Di 14 October 1882 | Fluors alpinas (1883) by Amur engiadinaisa |
Ursina→ |
Amur engiadinaisa.
I.
Ameda spusa! Quaista charta mia
Giavüsch te chatta sauna sü da cho,
Sco ais tar me; sun directur d'buttia .....
Ün directur nun suos-cha gnir malo.
Stögl survaglier la scalitereria;
Il sar patrun sulet m'ho qui lascho
E der ün tschüt aint in bottiglieria;
He brav da fer; sun saimper brav lio.
Bain reramaing eau vegn in compagnia;
Del rest in Frauntscha ais que zuond ris-cho
D'as lascher aint in societed, la via
D'la perdiziun pü d'ün ho spert chatto.
Cur cha he liber sun suvenz la gia;
Sun sü ün valzer u la mastralia.
II.
Sun sü un valzer u la mastralia;
E'm pera d'esser tar mieus munts darcho.
Da't vair, spusina chera, ma Maria,
D'udir tieu amabel pled, usche prüvo.
Il mais chi vain l'imperatur vain quia
E la lavur pü ferm' allur' saro;
La not' inter' avains aviert buttia;
Gnaro bavieu bain brav e bain mangio.
Gulus sun ils Frances da dutscharia;
Sco ova baivan delicat Bordo;
Noss aventuors sun tuots our d'la nöblia.
Glieud chi bain spenda, sainza trer mê gio;
Glieud chi non ho da for cun chüzeria,
Chi raps posseda sainza fer fadia.
III.
Bell' or' avains e las champagnas quia
Sun bellas bain, tuot pera grattagio;
Cun fain avros vus fat in allegria
E tuot saro aint in talvo luvo.
Perche non sun in vossa compagnia
Per as güder sco saimper giavüscho!
Mo l'an chi vain speresch eau, ma Maria,
Con te dad esser, mieu tesor, darcho.
Ed uossa vögl glivrer la charta mia.
Salüda quels chi d'me haun dumando;
Tuots ils paraints e la famiglia tia.
Da me artschaiva, tü tesor' amo,
Üna brancleda our dall' orma mia,
Cun tuott' amur, adüna: tieu Mattia.