လိမ္မာသူကို အတုယူ
သင်ခန်းစာ (၃၄)
လိမ္မာသူကို အတုယူ
[edit]ယုန်ကလေးဖြူဖွေးသည် စိတ်ကောင်းရှိပြီး အားလုံးကို ကူညီတတ်သည်။
ဘိုးဘိုး၊ ဘွားဘွားများကိုလည်း လိုအပ်သည်များကို လုပ်ကိုင်ပေး၏။ ခြေတစ်ဖက် မသန်သော်လည်း အမြဲပျော်ပျော်ရွှင်ရွှင် နေလေ့ရှိသည်။
ရွှေဝါသည် ယုန်ငယ်လေးများကို အမြဲနောက်ပြောင်သည်။ ငိုအောင်လည်း စတတ်သည်။ ထို့ကြောင့် သူနှင့်အတူ ကစားမည့်သူငယ်ချင်း မရှိပေ။
ဖြူဖွေးကို မနာလိုဖြစ်နေသော ရွှေဝါက ထော့နင်းထော့နင်း လမ်းလျှောက်ပြပြီး ပြောင်လှောင်သည်။ ဖြူဖွေးက ဘာမျှ ပြန်မပြောပါ။ ။
ကြာဖြူက “ဖြူဖွေးကို မပြောပါနဲ့၊ သူရဲ့ ကောင်းတဲ့အကျင့်ကို အတုယူပါ”ဟု ရွှေဝါကို ဝင်ပြောသည်။ ရွှေဝါက ဂရုမစိုက်ဘဲ တောအုပ်ထဲ ပြေးဝင်သွား၏။ စမ်းချောင်းလေးကို ခုန်ကူးလိုက်သောအခါ အရှိန်လွန်ပြီး ချော်လဲသွားသည်။ ခြေထောက်နာသွားသဖြင့် ထော့နင်းထော့နင်း လမ်းလျှောက်ရသည်။
ရွှေဝါသည် ဖြူဖွေးကို ကိုယ်ချင်းစာတတ်သွား၏။ ဖြူဖွေးလို စိတ်ကောင်းထားတော့မည်ဟု ဆုံးဖြတ်လိုက်သည်။ လိမ္မာသောရွှေဝါကို သူငယ်ချင်းများက အတူကစားရန် ခေါ်သွားကြလေသည်။
လူယဉ်ကျေး
[edit]လိမ္မာသူကို အတုယူ၊
ကိုယ်လည်း လိမ္မာသူ။
အမူအရာ အကျင့်ကောင်း၊
တို့လူငယ်အပေါင်း။
မရွဲ့ မစောင်း လမ်းကြောင်းမှန်၊
တို့များ လျှောက်နိုင်ရန်။
ဟန်ပန်မူရာ ယဉ်ကျေးဖို့၊
ကြိုးစားကြပါစို့။ ။