کبھی اے اشک تر آنکھوں سے ڈھل پڑ
Jump to navigation
Jump to search
کبھی اے اشک تر آنکھوں سے ڈھل پڑ
کبھی اے آہ دل منہ سے نکل پڑ
نہ اے پاۓ تصور اتنا شل پڑ
کبھی تو لا مکاں سے آگے چل پڑ
ہوا وہ بت نہ دو دن بھی کبھی رام
جہنم میں تو اے علم و عمل پڑ
وہ رقصاں بزم میں ہیں تو بھی اے دل
کبھی تو وجد میں آ کر اچھل پڑ
کسی دن تو کبھی اے ابر رحمت
مرے بیت الحزن میں بھی انڈل پڑ
گل عارض پہ ان کے مثل بلبل
کبھی او طفل دل تو بھی مچل پڑ
مرے آگے کبھی ہاتھ اپنے دھو کر
رقیبوں کے بھی پیچھے اے اجل پڑ
بہے گو عالم امکاں پر اے چشم
کبھی تو صورت زمزم ابل پڑ
نبھی اک پل کبھی جس سے نہ اے دل
اسی سرکش کے پھر قدموں پہ چل پڑ
کبھی او شعر وصف ساعد یار
مرے خامے کے بھی سانچے سے ڈھل پڑ
وقارؔ اس بزم میں تو بھی صدف وار
دہان پاک سے موتی اگل پڑ
|
This work is in the public domain in the United States but it may not be in other jurisdictions. See Copyright.
|