کبریائی کی ادا تجھ میں ہے

From Wikisource
Jump to navigation Jump to search
کبریائی کی ادا تجھ میں ہے
by غلام علی ہمدانی مصحفی

کبریائی کی ادا تجھ میں ہے
گرچہ تو بت ہے خدا تجھ میں ہے

شوخی و ناز و ادا تجھ میں ہے
یا یہ اک قہر خدا تجھ میں ہے

منہ چھپاتا ہے تو آئینے سے
کس قدر شرم و حیا تجھ میں ہے

خیر باشد کہ مرے خون کی سی
سرخی اے رنگ حنا تجھ میں ہے

پوچھ لیتا ہے تو اوروں سے مجھے
بارے اتنی تو وفا تجھ میں ہے

گل ہے بے حال یہ کس گیسو کی
نکہت اے باد صبا تجھ میں ہے

دل کو کھینچے ہے تری زلف سیاہ
سحر جادو کی بلا تجھ میں ہے

ہو نہ اے خاک کے پتلے مغرور
اس پہ تو یہ جو ہوا تجھ میں ہے

سب یہ نقشہ ہے ترا عاریتی
اک ذرا سوچ تو کیا تجھ میں ہے

تو جو یوں گل کو بنا دیتی ہے
کچھ تو اے باد صبا تجھ میں ہے

مصحفیؔ سے تو ملا دے اس کو
یہ اثر دست دعا تجھ میں ہے


This work was published before January 1, 1929, and is in the public domain worldwide because the author died at least 100 years ago.