سوڵتان ئیبراهیم و نۆشافەرین/46
Jump to navigation
Jump to search
| ←45 | سوڵتان ئیبراهیم و نۆشافەرین (1765) by 46. مەیموونە خاتوون ئاواتی دیداری شازادە دەخوازێ و دایە بەڕێ دەکا بۆ لای ناوبراو |
47→ |
| جەو تەرەف دیسان خاتوونەی پەری | چەنی کەنیزان بە سوحبەتگەری |
| نیشتەبێ وە ناز شای شیرین جەماڵ | شازادەی چینی ئاوەرد بە خەیاڵ |
| دایە تەڵەب کەرد وات ئەی دەمسازم | ڕەفیق دڵسۆز مەحرەم ڕازم |
| ئارەزووی دیدار شازادەم کەردەن | هیجران دووریش زۆر پێم ئاوەردەن |
| دەخیلم دایە نەکەری درەنگ | مدارات نەبۆ تا شار فەرەنگ |
| باوەر خەبەر سوڵتان پەرێ من | تا خاتر نەدەرد سەودا بۆ ساکن |
| دایە پەرواز کەرد نەو زێد و ماوا | دەردەم دەرساعەت وەفەرەنگ یاوا |
| لوا بە تۆی باغ بەسەد عیز و ناز | تا شی بە نەزدیک شای گەردەن فەراز |
| دیش نیشتەن نەتەخت وێنەی گوڵخەرمەن | مەرێزیۆ بۆی مشک سەرتاپای دامەن |
| دایە سەودای شۆخ خورشید نەدڵ بەرد | ڕاز خاتوونەی پەری خامۆش کەرد |
| بە کێریشم و ناز ئەو خورشید جەمین | نە ڕووی تەخت زەڕ ئاما بە پاین |
| گوڵ تۆتۆ خەفتەن کەفتەن وە هەمدا | شکوفتەن بەشەوق نەحەڵقەی خەمدا |
| سەر بەردەن بە ئەوج درەختان بەرز | سەراوان سوهەیل مدران هەزار تەرز |
| فەرش ئەنداز باغ مەداخڵ بە گوڵ | وەنەوشەی وەش بۆ ڕەیحان و سونبوڵ |
| لالە و یاسەمەن نە ڕووی سەبزەی باغ | بۆی عەتر و عەنبەر مەدۆ نە دەماغ |
| سەوڵ چناران نە ڕووی ئاب ڕەستە | نیگار مەئاب گوڵ بەستەن وە دەستە |
| درەختان بەرز عەرعەر چناران | کەردەن گۆشماڵی سپای ستاران |
| مەلان چەند هەزار نە ڕووی سەبزەپۆش | مرواری جە فەرق کڵاوان مەیۆ بۆش |
| نیشتەن بە ڕووی گوڵ هەریەک نەشاخێ | هەریەک بە سۆزێ هەریەک دەماغێ |
| بوڵبوڵان بە سۆز خۆش ئاوازەوە | هەزاران بەسۆز دڵنەوازەوە |
| هەی هەی دوڕاجان گوڵان وەش بۆ | قومریان گم گم هودهودان پۆ پۆ |
| مورغان هەریەکی بە هەزار ئاواز | مەکەران تەوحید حەق جێلوەساز |
| ئاب وێنەی گوڵاب ساف خۆشگەوار | جاری بییەن نە ڕووی سەبزە و میرغوزار |
| چەند نازەنینان توحفە ئامادە | ڕەعنا قامەتان فەرەنگی زادە |
| گشت نازک نەوهاڵ تازە نەوڕەستە | مدران بەلاوە دەستە بە دەستە |
| نە پێش و نەپەس خدمەتگوزاران | سەف کێشان چون گوڵ ئەوەڵ بەهاران |
| وێش وێنەی شاباز نە ڕووی تەخت زەڕ | زوڵف بە ئاب شۆر گۆناش مەکەرد تەڕ |
| چون لیسک ئافتاب سەرکێشا وە بەر | بەڵکە نەخورشید زەڕئەفشان زیاتەر |
| چون نوور خورشید نەبورج چوارەم | نیشتەن نە ڕووی گوڵ بەو بەرزە تارەم |
| جەلا دا خاڵان شۆخ شەم جەمین | واتی گڕ سەندەن تەمام سەرزەمین |
| ئەڵقەچین تورمە تەمام لاڵدا | مەدرەوشان وە بان ئەگریجە و خاڵدا |
| سێ هەزار کەنیز زوڵفان عەنبەرین | مدران نە خدمەت ئەو شۆخ شیرین |
| دایە نیگا کەرد وە تەنخوای ئەی باغ | مەدرەوشۆ چون شەوق شوعلەی شەوچراغ |
| جە تەرکیو ڕەندیی شۆخ دڵڕوبا | دایە سەرسام مەند هەم نە ڕووی هەوا |
| حەیران بی نە شەوق بەرووی هەواوە | نەپای وەرش بی نە پای دماوە |