سفر آخر شب
بہت قریب سے آئی ہوائے دامن گل
کسی کے روئے بہاریں نے حال دل پوچھا
کہ اے فراق کی راتیں گزارنے والو
خمار آخر شب کا مزاج کیسا تھا
تمہارے ساتھ رہے کون کون سے تارے
سیاہ رات میں کس کس نے تم کو چھوڑ دیا
بچھڑ گئے کہ دغا دے گئے شریک سفر
الجھ گیا کہ وفا کا طلسم ٹوٹ گیا
نصیب ہو گیا کس کس کو قرب سلطانی
مزاج کس کا یہاں تک قلندرانہ رہا
فگار ہو گئے کانٹوں سے پیرہن کتنے
زمیں کو رشک چمن کر گیا لہو کس کا
سنائیں یا نہ سنائیں حکایت شب غم
کہ حرف حرف صحیفہ ہے، اشک اشک قلم
کن آنسوؤں سے بتائیں کہ حال کیسا ہے
بس اس قدر ہے کہ جیسے ہیں سرفراز ہیں ہم
ستیزہ کار رہے ہیں جہاں بھی الجھے ہیں
شعار راہ زناں سے مسافروں کے قدم
ہزار دشت پڑے، لاکھ آفتاب ابھرے
جبیں پہ گرد، پلک پر نمی نہیں آئی
کہاں کہاں نہ لٹا کارواں فقیروں کا
متاع درد میں کوئی کمی نہیں آئی
This work is now in the public domain in Pakistan because it originates from Pakistan and its term of copyright has expired. According to Pakistani copyright laws, all photographs enter the public domain fifty years after they were published, and all non-photographic works enter the public domain fifty years after the death of the creator.
Public domainPublic domainfalsefalse