زخم ہے اور نمک فشانی ہے

From Wikisource
Jump to navigation Jump to search
زخم ہے اور نمک فشانی ہے
by غلام علی ہمدانی مصحفی

زخم ہے اور نمک فشانی ہے
دوستی دشمنیٔ جانی ہے

نقش اول ہے چہرۂ یوسف
اور ترا چہرہ نقش ثانی ہے

تیرے کوچے سے مانع رفتار
ہم کو اپنی ہی ناتوانی ہے

حسن میں چہرہ اس گل تر کا
نقش رنگین کلک مانی ہے

اس پہ پروانے گو ہجوم کریں
شمع کی وہ ہی کم زبانی ہے

اس سرا میں سبھی مسافر ہیں
یعنی جو ہے سو کاروانی ہے

عالم اس کی صفا کا مجھ سے نہ پوچھ
نظم میں تیری جو روانی ہے

مصحفیؔ شعر سادہ کہنے میں
وقت کا اپنے تو فغانی ہے


This work was published before January 1, 1929, and is in the public domain worldwide because the author died at least 100 years ago.