رہ گئے اشکوں میں لخت جگر آتے آتے
Jump to navigation
Jump to search
رہ گئے اشکوں میں لخت جگر آتے آتے
رک گئے بحر سے لعل و گہر آتے آتے
تھم گئے قطرۂ خون جگر آتے آتے
رک گئے مجمر دل سے شرر آتے آتے
ہوتے ہوتے نہ ہوا مصرع رنگیں موزوں
بند کیوں ہو گیا خون جگر آتے آتے
تھم گئے اشک مرے آنکھ سے ڈھلتے ڈھلتے
رہ گئے چشم صدف سے گہر آتے آتے
رہ گیا کہنے پہ غمازوں کے سن سن کے مری
پھر گیا یار مرا راہ پر آتے آتے
دے دیا نقد دل اس بت کو بغیر از جانے
ہو گیا راہ میں کیسا ضرر آتے آتے
دیکھتے دیکھتے دیکھیں گے مرے جوہر طبع
آئیں گے آئیں گے اہل نظر آتے آتے
کیا بھرا زنگ کدورت سے یہ آئینہ دل
جو نظر آئے نہ وہ پھر نظر آتے آتے
گردش چشم نے کس کو تہ و بالا نہ کیا
ہو گئے زیر و زبر راہ پر آتے آتے
اشک خونی نہیں آتے ہیں جو آنکھوں سے تری
کیوں رکی منتہیؔ دل کی خبر آتے آتے
|
This work is in the public domain in the United States but it may not be in other jurisdictions. See Copyright.
|