دیوانی کوردی/ۆ

دیوانی کوردی (1850) by کوردی
پیتی ۆ

1[edit]

لە کونجی بێ کەسیدا فەردم ئەمڕۆ	زەلیل و زار و بێ هاودەردم ئەمڕۆ
گەواهی لافی عیشقی تۆیە قوربان	سرشکی سوور و ڕەنگی زەردم ئەمڕۆ
لە سۆزی عیشقی سەردی میهری تۆیە	دەروون گەرم و هەناسە سەردم ئەمڕۆ
وەکوو تەیرێکی گوم بووبێ جەناحی	هێلانەواز و هەرداوهەردم ئەمڕۆ
مەگەر سۆزەی نەسیمی وەسڵی ئەو بێ	موعەتتەر کا دڵەی پڕ دەردم ئەمڕۆ
لە عەرسەی وەسفی ئەو مەحبوبە لەنگە	خەیاڵی وەک سوارەی جەردم ئەمڕۆ
لە بۆ وەسڵی جەماڵی یاری کوردی	ئەگەر ڕۆحم نەدەم نامەردم ئەمڕۆ

دەروون زامدار و دڵ غەمگینە بێ تۆ	سەرم گێژ و تەنم بێ تینە بێ تۆ
خەوم بێ هۆشییە، بەرگم پەڵاسە	خۆراکم خوێنە، شادیم شینە بێ تۆ
لە چاو ئەشک و لە دڵ ئاهم کە دەردێ	دەڵێی تۆفانی با و بارانە بێ تۆ
جێگام سەحرایە، وەحشیم یار و هاودەم	دڕک فەڕش و کوچک باڵینە بێ تۆ
لە ئەشک و ئاهی تار ئاوێنەیی دڵ	جەماڵی زەرد و ڕەش ڕەنگینە بێ تۆ
سەرم سەمتوور و سینەم چەنگ و دڵ دەف	خەفەت بار و مەقام ناڵینە بێ تۆ
کەباب دڵ، خۆین مەیە، ساقی فیراقت	قەدەح چاو و مەزەم ئەسرینە بێ تۆ
دەروون گوڵزار و خوێن گوڵ باخەوان دڵ	فوغان بولبول، جەفا پەرژینە بێ تۆ
ڕەقیب ڕووترش و ئەشکی دیدە سوێرە	حەیات تەڵخ و ئەجەل شیرینە بێ تۆ
زومستان مەیلەکەت، پایز براکەم	بەهاری عومر و دین هاوینە بێ تۆ
ئەوا من بووم بە شا و سوڵتان و والی	تۆ خوا سا کاکە گیانە ژینە بێ تۆ
لە هاوسایان لە تاو ناڵینی کوردی	دوعای مەرگە، لەوێ ئامینە بێ تۆ

شوێنی دڵم هێناوە قوربان تاکوو دەرکی تۆ	یا شوێنی دەرکە، یا بدە دڵ، یا قەسەم بخۆ
تۆ دەس بە تیغ و پەنجە بە خوێن سوور و دڵ قەتیل	لەونیش سبووتی دەعوییە سا ڕاست بێ یا درۆ
چاوت لە عەینی مەرحەمەتا قاتڵی دڵە	وەک لوتفی بەچەیی قاتڵە بۆ مورغی دەستەمۆ
ئەمشەو خەیاڵی زولفی سیات هاتە خاترم	بێچارە مارگەزیدە بوو دڵی زامی هاتە سۆ
بۆی خاکی ژێری پای سەگی دەرگای ڕەقیب دەکەم	چون ڕێ لەجاجب .... دەرکی تۆ دەبوو
ئەی عەقڵ ئەگەر بە تەجروبە بۆ ڕێی عیشق دەچی	مَن جَرَّبَ اْلمُجَرّبت ئەر بیستووە مەچۆ
عەقڵیش دەڵێ وەکوو دڵ دەچمە کۆیی یار	»کوردی» فیراق بەلایەوە ئاسانە تۆش بڕۆ