| پڕ گوڵە و عەنبەر وەتەن خاکی وەکوو جامی بلوور
|
پڕ بە چەشمەی ئاوی ڕۆشن میسلی چاوی پڕ لە نوور
|
| خاتەمی پەنجەی سولەیمانی نەبێ نەمبیستووە
|
کێوی یاقووت و زموڕڕود قوببە قوببە سەوز و سوور
|
| دەشتی فابریقەی گوڵ و سەوزە و ڕەیاحینە بەهار
|
بادی عەتتارە کە دێنی قافلەی موشکین لە دوور
|
| هەوری ڕووی ڕۆژی لە لوتفا وەک نیقابی نازی یار
|
تیرەبارانە لە قەهرا گڕ کە دێنێ وەک تەنوور
|
| وەک بەچەی بەقاڵ ئەگێڕن هەر بەسەر میوە درەخت
|
دەستە دەستە تەپڵە تەپڵە ترش و شیرین مزر و شوور
|
| زۆر کەڕەت ئەموت بەهەشتە موتڵەقەن گۆڕاوە لێم
|
پڕ بە سەحرا زەرد و سوور و پڕ چەمەن غیلمان و حوور
|
| خۆ بە دوو دیدە فەلەک هێشتا کە ئەمسالی نەدی
|
موددەتێکە چاو دەگێڕی گەهـ لە خوار و گەهـ لە ژوور
|
| وەزعی ئاڵەسیاو و بەرزنجەم لەبەر چاوە دەڵێی
|
مەسکەنی فیرعەون و مووسایە مەقامی نیل و توور
|
| وا هەناسەی دایەوە ماوە شوکر هێشتا وەتەن
|
پێم دەڵێ لادە لە وەسفم بۆ دەکەی تەبعەن غروور
|
| عومری نووحت بێ لە ئەوسافی منا سەرفی بکەی
|
کەی دەکەی وەسفی سەفای سوبحی بەهاری شارەزوور
|
| تۆ بڵێ بەو تاقمەی ساڵێ کە نێرن ساڵێ مێ
|
بۆ چی کۆلارەن دەبن گاهێ بە خاڵ و گەهـ بە پوور
|
| یا لە من دوور کەونەوە یاخۆ عیلاجم زوو بکەن
|
تا دیاری لێ نەداوم عیللەتی پیسی عەقوور
|
| یا بەجارێ ئەم دوعایەم بۆ بکەن ئێوە و خودا
|
هەر لە گەورە تا بچووک و هەر لە ژن تاکوو زکوور
|
ڕەببی مووی لێ بێ زمانی پەنجەکانی هەڵوەرێ
هەر کەسێ گوڵشەن بە دەردی کوڵخەنی دۆزەخ بەرێ
|
| کۆتەڵی دەست و قەڵەم تاکەی میسالی ئەسپ و زین
|
بۆ وەتەن حەمدی دەگێڕی بەسیەتی گریان و شین
|
| یادگاری بۆ خەلەف جێ بێڵە عیبرەت بۆ بەشەر
|
چۆن کرا پاماڵی میللەت غەسبی سەروەت هەتکی دین
|
| عالەمێکی بێ سەر و پێ کرد لە قەڕنێکا زەمان
|
دەستی ئینسافی کە دەرهێنا لە چینی ئاستین
|
| بازی چی بازیچەیێ تەمسیلی شاهی پێ ئەکرد
|
سەرسەری بوومی ڕەفیقی سەرسەری وێران نشین
|
| هەر بە دووری تێگەیشتم جا قەلێکی ڕووڕەشە
|
بۆ قڕان و بۆ قڕانی میللەتی کەوتە قڕین
|
| کەوتە تەشکیلی دەوائیر ناوی ئەهلییەت بە فێڵ
|
خەتتی سەر لەوحی زەمان بوو هەروەکوو نەقشی نگین
|
| ڕۆژی کورد شێتانە هەر شەو بوو سەری هێنایەدەر
|
چەپڵەڕێزان بوو بە جارێ عالەمێ ئەیوت بژین
|
| سەیری ئەوزاعم ئەکرد هەر پێکەنینم پێ ئەهات
|
موتڵەقەن ئەموت ئەمانە ساحیبی ئەم عەقڵە نین
|
| تاقمێ ئیغفالی سوێند بوو دەستەیێ حەیرانی زۆر
|
یەعنی قیسمێ شادمان و فیرقەیێ مات و حەزین
|
| گورگ و چۆپان وشتر و قەزاز زین و گای شێت
|
مێروولە و تەختی سولەیمانی عەفاریت و نگین
|
| بوخل و شاهی زوهد و مەستی عەقڵ و شێتی کیبر و زیل
|
سەبحە و فیشەکلغ و داری سیواک و ماڵ بڕین
|
| جەمعی ئەم زددانە چونکە داخلی مەنتیق نەبوون
|
دائیما ئەموت ئەمە دێون درنجن ئاخۆ چین
|
| تاقمێکی تازە کوڕەی ڕووتەڵە جا دەرپەڕی
|
عالەمێ زانی ئەمانە ئەووەڵی ئاخر شەڕین
|
| ئەو شەوی نەحسە کە ئیعلانی ملووکییەت کرا
|
تف کرا ئەمجا لە دەست و هەڵکرا دامەن لە قین
|
| شێتە شیعرم سوارە تاوت لێ ئەدەم خۆت ڕاگرە
|
داستانێکە ببێتە عیبرەتەن لیننازرین
|
| بۆ فڕێت دا کەوڵ و کەشکوڵ و عەسا نەتبیستووە
|
لوقمە نانێکی بە دەروێشی نەداوە ماڵی زین
|
| چاپوکی و هیممەت حەقیقەت قابیلە تەنها بە خۆی
|
حیرەت ئەفزایە کە کەوتە ئەخزی پارە و سەرفی کین
|
| وا وەتەن دیسان ئەڵێ جارێ دوعاکەم بۆ بکەن
|
جا بنووسە داستانی ئەو گرۆهەی سەرسەرین
|
ڕەببی مووی لێ بێ زمانی پەنجەکانی هەڵوەرێ
هەر کەسێ گوڵشەن بە دەردی کوڵخەنی دۆزەخ بەرێ
|
| باسی تەشکیلاتی سانی هەر ئەکەم بۆ پێکەنین
|
کەمترین بوو گەورەتر هەم گەورەتر بوو کەمترین
|
| ناعیلاجم ئیسم و شوهرەت باس ئەکەم عاجز مەبن
|
تا ببینن شکڵی وەزعییەت بە جارێ قارئین
|
| کۆیلی مولازم وەزیری خاسەیی قۆڵی یەسار
|
ئیبنی سەرمزگەوت وەزیری موشفیقی قۆڵی یەمین
|
| کاتبی مابەین بوو تاهیر تەرجەمەی حاڵی بکەم
|
پیس دەبێ دیوان لە پاشا موستەحەققە بۆ دڕین
|
| حەیفە تەعریفی ڕەشە و عەمی و ئەحەی دایەنەکە
|
ناکرێ ئەعزان ئەمانە چونکە عوزوێکی بەرین
|
| خەزنە کیسەی باخەڵ و مەسرەف ڕەشەی حاجی فەتاح
|
حامیلی سینی حەماڵ و زەرفی پڕ ماشێنی شین
|
| تابیعین ئەلوات و هەرزە قاتیل و دز بوو هەموو
|
ئەهلی ویجدان و شەریف و تێگەیشتوو مونکرین
|
| زابتانی عەسکەری زۆرە و زڕە ئەوڵا درێژ
|
هەردوو جلخوار و قڵیش و یونسی باجی هەمین
|
| ئەمری یەومییە هەموو هەر حەپس و زنجیر و جەزا
|
فکری لەیلییە هەموو هەر کوشتن و یغما و دزین
|
| حاکمی شەرع و عەدل مەحکوومی عالەم مارفەشەل
|
موخبیری سادق بوو کازیب سوئی زەن عیلمول یەقین
|
| قەهوەچی و پێش خزمەتی دیوانی عالی دوو سمە
|
ئەم بوو مەشهووری قولی بوو ئەو بوو مەعروفی شەلین
|
| موحتەرەم مەئمووری تەشریفاتی دەوڵەت بوو وسوو
|
نازری فەرشە ڕەحە بۆ خەڵوەتی ئامە ئەمین
|
| جائیزە بۆ میللەت و کوردایەتی بێ ڕەشبەڵەک
|
باجی ڕەحمە بێ قەزابی نایەڵی ڕێک هەڵپەڕین
|
| گەرچی ئێستا مردووە مەوقعیە باسی هەر ئەکەم
|
نانەوا گوێ ڕەپ بوو شەخسی ئەووەڵ و مەجلیس نشین
|
| جەردە شێخ ساڵح کە مورشید بوو لەگەڵ دەروێشەکان
|
من کە وامزانی لە کوڕڕەی حەڵقەیی زیکرا فڕین
|
| سەیری سیرەت کەن کە سوورەت ڕووکەشێکی سەنعییە
|
گورگ دەچێتە پێستی مەڕ زاڵم دەبێتە پۆست نشین
|
| ناوی جەمعییەت موجاهید بوو وەزیفەی جیا جیا
|
دەستە دەستە قاتیل و دز بۆ عیبادی موسلیمین
|
| باسی نەفسی خۆی بە فەزڵە من ئەزانم موختەسەر
|
ئاشکارە قیمەتی گەورە بە تەعریفی قەرین
|
| ناوی ئەو وەختە بە قانوونی تەبیعەت دانرا
|
چەرخی چەفیە و زلف و کاکوڵ دەوری سەر سنگ و سەرین
|
| هاتە دەر بۆ ساڵی تەئریخی «کە وا اخر شری»
|
کەوتە بانەوبان بە یادی بانە بوونە قەل فڕین
|
| وا بە حیددەت چاوی هەڵهێنا وەتەن دیسان ئەڵێ
|
من هیلاکم بۆ خەلەف تۆ چارەجۆی و دووربین
|
| وازحی ناڵێی دەوای دەردم بە تەورییەی بڵێ
|
شینە یاسینە دەخیلە چاری یاسین چاری شین
|
| جا دوعاکەم بۆ بکە ئەمما وەکوو وێردی زمان
|
تا سەراپەردەی فەلەک ماوە هەتا فەرشی زەمین
|
ڕەببی مووی لێ بێ زمانی پەنجەکانی هەڵوەرێ
هەر کەسێ گوڵشەن بە دەردی کوڵخەنی دۆزەخ بەرێ
|
| خەڵقە گوێ بگرن لە فەریادی پەرێشانی دەخیل
|
دەستی عیبرەت زوو بەرن بگرن بە دامانی دەخیل
|
| ئێسکی خان و قەیسەری کوردانە بوونە خشت و بەرد
|
وا لە مەیدانا کرایە قەیسەری خانی دەخیل
|
| هەر نیهالی قەددی مەحبووبانی کوردە نێژران
|
سەیری ئەم ئینسافە باغە و جێگە سەیرانی دەخیل
|
| هەر جگەر پارەی عەزیزی عاریفی قەومە کەوا
|
بۆ دەماغی مار و مێروو بوو بە بریانی دەخیل
|
| نیسفی ماڵ و سەروەت و ڕۆح و حقووقی عالەمی
|
بوو بە نەقد و جنس خرایە تاقە گیرفانی دەخیل
|
| ئەتڵەسی گەردوون کە پێوانەی ئەکا خەییاتی دەهر
|
کورتە بۆ باڵای تەماعی تاقە عوریانی دەخیل
|
| کوڕڕەیی ئەرز تێری ناکا چاوی تەنها برسییە
|
کوا ئەڵێ هێشتا زەمینی هەر بە قەد نانی دەخیل
|
| گوێ لە تەزویر و ڕیا و ئەفسانە مەگرن ئەسڵی دین
|
هەر زەکاتە و ڕۆژووە و حەج فەترە ئیمانی دەخیل
|
| غەیری بەدناوی لە تەپڵ و دەف ئومێدی چی دەکەن
|
فرسەتە ئەمڕۆ لە سنگ و تەوقی سەردانی دەخیل
|
| زەحمەتێکی مەحزە دەوڵەت جێ بمێنێ بۆ خەلەف
|
ئەو کە نەیبێ حەققی ژینی ئەمن و ئامانی دەخیل
|
| فرسەتی ئەمڕۆی نەدی ئەسلاف و نابینی خەلەف
|
ئێمە مەسئوولین بە کۆمەڵ دادی ئەفغانی دەخیل
|
| وا وەتەن دیسان ئەڵێ جارێ دوعاکەم بۆ بکەن
|
جا لە دوختۆری بسێنن تۆزە دەرمانی دەخیل
|
ڕەببی مووی لێ بێ زمانی پەنجەکانی هەڵوەرێ
هەر کەسێ گوڵشەن بە دەردی کوڵخەنی دۆزەخ بەرێ
|
| ئاگرێ بگری فەلەک ڕەببی ببیتە یەک شەرەر
|
مەنبەعی ئیفساد و فیتنە کارخانەی شۆر و شەڕ
|
| هەردوو چاوت ڕەببی کوێر بێ تا قیامەت هەڵنەیێ
|
خان و مانت وەک ئەساسی ئێمە بێ زیر و زەبەر
|
| دەک بە چاوی چڵکن و تیری قەزاوە بی کە سوبح
|
چاو هەڵێنی چۆن دەکەی ئەم خەڵقە دووچاری زەرەر
|
| بۆیە چاوت وەختی مەغریب لێک ئەنێی بکرێتەوە
|
بابی تەزویر و تەریقی فیتنە مەیدانی خەتەر
|
| بۆ ئەمەی دەستی بنەخشێنی ببێ ئەنگوشت نوما
|
دامەنت هەڵکردووە بۆ ڕشتنی خوێنی هەدەر
|
| عالەمت خستۆتە ژێر داوێنی ڕەحم و ڕەئفەتت
|
هەر لە کوردی بێ نەوا خەسمانە بەستووتە کەمەر
|
| هەر مناڵی بگری فەورەن بۆ ئەمەی ژیر بێتەوە
|
میسلی بازیچە گەهێ شەمسی دەدەیتێ گەهـ قەمەر
|
| هەر بە نازکێشان لە ڕێگەی دەردەکەی منداڵی خەڵق
|
ناوی خۆی نازانی ئاخر ون ئەکا شوێنی پودەر
|
| وا سەرت شێواند لە عالەم کەوتە عەکسی ئیقتیزا
|
دەربەدەر بوو جێ نشین و جێ نشین بوو دەربەدەر
|
| داوەشێی بۆ دەور و چەرخت داڕزێی بۆ هەیئەتت
|
وا دەبێ تەنزیمی دنیا وا دەکەی تەسکین بەشەر
|
| لایقی تەختی سولەیمانی بووە مێروولەیێ
|
خەرقەیی مووسا عەسا عادەت بووە بیکاتە بەر
|
| ناوی پژدەر بۆ چی بۆتە ئیسمی ئەعزەم هەر کەسێ
|
وەک سولەیمان ساحیبی دێو و نگین بێ کردیە بەر
|
| بۆچ تەقیلەی قووچ و لاپێچی کرێشەی داڕزیو
|
ئەو کڵاوەی سەخری جیننە پژدەری نایانە سەر
|
| هەر سەگێ جارێ وەڕی یاخۆ کەرێ نەختێ زەڕی
|
تۆ دەم و ملیان دەبێ پڕ کەی لە لوقمە و تۆقی زەڕ
|
| من عەبەس لۆمەت دەکەم بێ سوودە تەعنەت لێ ئەدەم
|
ئەی سوپەهری بەدسروشت و بەدنیهاد و بەدگوهەر
|
| خۆ وەتەن نوتقی نەماوە وا ئیشارەم لێ ئەکا
|
یەعنی لۆمە و تەعنە بەسیە وا بووە ئەلبەت قەدەر
|
| ئینتیباهە بۆ خەلەف لەم وەختەدا نابێ وتم
|
من لە باسی وەزعی سالیس چۆن بکەم سەرفی نەزەر
|
| جا وتی وەختی دوعاکەی پێشووە فکرت نەچێ
|
گەر ئەنووسی باسی تەشکیلاتی سالیس موختەسەر
|
ڕەببی مووی لێ بێ زمانی پەنجەکانی هەڵوەرێ
هەر کەسێ گوڵشەن بە دەردی کوڵخەنی دۆزەخ بەرێ
|
| جەبری نەفسی پێ دەوێ خەڵقینە کەسری ئیعتیبار
|
ئیعتیبار و نەفس ئەکەن لەم باسە چونکە ئینکیسار
|
| ڕووی زەمان ڕەش بێ لە مەردان ڕوو کە وەرگێڕێ ئیتر
|
دێنە مەیدان بڵح و نامەرد تێک ئەدەن ڕەسم و شیعار
|
| زۆر کەڕەت ئەموت کە بێ عەقڵە کەریمی تازەمین
|
ئەسپ و کەر، گاجووت و ئێستر، پێکەوە دەیکا قەتار
|
| نەمئەزانی وا لە خاتریا زەمان ڕۆژێ دەبێ
|
کیسەڵ و قرژانگ و قۆڕی پێکەوە بگرێتە بار
|
| سەیرە حەیوان هەر یەکی خولیایەکی کەوتۆتە سەر
|
بەرخ ئەڵێ بوومە پیرەنس، مەڕ وا دەزانێ بۆتە چار
|
| ئیددیعاجۆن وەحشییان بیلخاسە قورناویلکە ئەڵێ
|
من ئەخوێنم پایز و زستان و هاوین و بەهار
|
| سەف بە سەف قاز و قوڵنگ ئەوجی هەوایان گرتووە
|
بۆ حەرب ئەم دوو گرۆهە لازمە بدرێن قەرار
|
| ڕێوی کلکی دا بە ئەرزا کوا وتی جێگەی چەقەڵ
|
خزمی خۆمە ئەم چەمە وێران دەکەم نەخرێتە کار
|
| شێر وتی ناوی پڵنگ ئەمڕۆ لە ناوایە بڵێن
|
ڕێوی بێدەنگ کەن سیاسەتمان نەکا با ئاشکار
|
| کێ لە یادی ماوە مردووە قازی زوڕناژەن کەچی
|
بوو بە قائیمقامی ئەو ورچێ بە ناوی موستەعار
|
| لازمە بۆ مەجلیسی لەقەلەق بنێرن تاقمێ
|
دەم دڕاوی تێرنەخۆر و هیچ نەدیو و زەهردار
|
| بۆ ئەمە جارێ سەقاقوش بانگ بکەن ئەوسا بڵێن
|
ئۆتومۆبێل حازرە مێروولە بێت و توولەمار
|
| ئیددیعای پڕ پێستی خۆی پارە ئەکا مامە سمۆر
|
ئیرسییە کەوڵی بکەن لەو دارە زەحمەت بێتە خوار
|
| چونکە فامیلیایەکن ئەسڵەن لە جنسی قۆڕییە
|
مەسندئارایی خەلافەت بوو جەنابی سووسەمار
|
| ئەی پشیلەی قوڕ بەسەر گۆڕ هەڵتەکێنە وای لە کوێ
|
وا تلی لیلی دەکەن مشکان لەسەر بانی عەمار
|
| خادیمی پێشووی سولەیمانی دەبوو دێو و درنج
|
چەرخە ئەمڕۆ کیسەڵ و قۆڕی دەبێتە کارگوزار
|
| شکڵی ئەم وەزعەی بە خەو ئەوسا ئەگەر ئەیدی ئەمین
|
شێتە وا ئێستا دەبوو ئەو وەختە بێ شوبهە بەهار
|
| هەر زەمانە ئەم جڕ و جانەوەرانە یەک دەخا
|
هەر زەمانە ئەم گژ و گیایە لە گوڵشەن کا بژار
|
| «قوری نووسیویە لە پشتی کیسەلی» تەئریخەکەی
|
ناتەواوی بۆ فەقیرە تا گونی لێکرد بە چوار
|
| ناوی خەڵقی بۆ بەرم شوبهی گەلێکم پێ وتوون
|
خوێندەوارینە بتاشن شوبهی باقیکەی لە دار
|
| باسی وەحشیم هێندە کرد تەبعم خەریکی وەحشەتە
|
ساقیا لوتفەن عیلاجی شەربەتێکی خۆشگەوار
|
| تو سەری پیری موغان و تو ملی مینایی جام
|
تو نیگاهی چاوی پیاڵەی پڕ لە خەمر و پڕ خومار
|
| تو سەری کوڵمی لەتیف و نازکی گوڵڕەنگی دۆست
|
تو شکەنج و تووڕەیی زولفی سیاهی میشکبار
|
| دەردی من دەرمان بە جام و ڕەتڵی پڕ مەی ناکرێ
|
بمبەرە بەرپایی خوم خم کەم بەسەردا جار جار
|
| دابگیرسێنم بە نووری مەی چراغی فیکرەتم
|
کیمیایی تەبعی مەغشووشم بکەم سافی بە نار
|
| مەتڵەبێکم من بە دنیا نەبووە ئاماڵی بە کەس
|
هەر لە لوتفی تۆ دەکەم ئەمڕۆ ئەمەندە ئینتیزار
|
| ڕابیتەی پیر و سلووکی مەسلەکی ڕەندان ئەکەم
|
تا دووعاکەم زوو بگاتە دەرگەهی پەروەردگار
|
ڕەببی مووی لێ بێ زمانی پەنجەکانی هەڵوەرێ
هەر کەسی گوڵشەن بە دەردی کوڵخەنی دۆزەخ بەرێ
|
| بۆ هەوا ئاڵۆزە بۆ چی لێڵ و سوورە ئاسمان
|
گێژەڵووکەی نەگبەتە یان فیتنەیی ئاخر زەمان
|
| هەوری قەهرە مەوجی دەریایی غەزەب دێنێتە جۆش
|
یا فغان و دووکەڵی ئاهی هەناسە سەردەکان
|
| ڕەنگی گوڵ بۆ چی پەڕی بولبول دڵی بۆ چی شکا
|
ناکرێ ئەووەڵ بەهاری شادمانی بێ خەزان
|
| بەفرە باریوە لەسەر بەختی ڕەشی خاکی وەتەن
|
یا بە دەم شەستیرەوە مێشکی هەژارانە پژان
|
| بۆ وەتەن زەرد هەڵگەڕاوە بەرگی سوورە شین ئەکا
|
ڕەنگە ئەشکالی شەهیدی بێ نەوامان دانیشان
|
| وەک برێشکە قرچەقرچی جەرگی سک سووتاوە دێ
|
یا گوڕەی مەترالییۆز و قرمەقرمی تۆپەکان
|
| ئەم هەموو لاوە نەمامن نێژران لەم باغچەیە
|
ڕیشەیی کوردایەتی بوو یەعنی بۆمان نێژران
|
| جەژنی قوربانە سلێمانی بە مەزبەح دانرا
|
کورد مەڕن بۆیە بە جارێ هەر لەوێدا سەربڕان
|
| یان کە ئیبلیسی عەلەیهیللەعنە قاورمە بکا
|
کۆمەڵی ئینسان بە جارێ وا ئەبێ بکرێن لە جان
|
| بۆ شەریفی کورد خەڵاتە هاتووە سەر تا بەپێ
|
یا کەلەبچەی دەست و تەوقی گەردن و پێوەندییان
|
| بۆچ مەغۆل هەڵساوە یاخۆ دەوری نەحسی جەنگیزە
|
قەتڵ و عامی ئەرمەنە یا حادیسەی ڕۆمی و بەبان
|
| ناوی خۆی نابوو زەمانی میللەتی کورد خۆ ژیان
|
بۆ چی بەستراوە زمانی وا دەبێ ئاخر ژیان
|
| بۆ نەبوو قەت ئەهلی حاڵێ دەردەدارێ بۆ نییە
|
ئەم وقووعاتە چ بوو بۆ چی کرا بیکا بەیان
|
| جا وەتەن فەرمووی لە پەردەی سینەما وەک سینەما
|
سوورەتی گیراوە فەرموو بۆت بکا یەکسەر عەیان
|
| جارێ تەئریخی بنووسە جا بگۆڕە قافیە
|
تا بەیاناتم بنووسی لێت نەبێ حەرفێ نیهان
|
| بێ هەزار ناوی سلێمانی بە تەئریخ «مشهد»ە
|
ئەم حیسابە عاقیبەت ڕۆژێ دەبێ بیکا زەمان
|
| مەقسەدی ئەسڵی و ئەساسی هەر دوعاکەی پێشووە
|
ئێستە تیکراری بکە بەڵکە بکا مەبحەس ڕەوان
|
ڕەببی مووی لێ بێ زمانی پەنجەکانی هەڵوەرێ
هەر کەسێ گوڵشەن بە دەردی کوڵخەنی دۆزەخ بەرێ
|
| ئارەزوویان بوو لە زنجیری ئەسارەت بێنە دەر
|
سەربەخۆ بەڵکوو بژین دەرچن لە ئازار و کەدەر
|
| عەهد و پەیمانی ئەجانیب ئیددیعای لێ کردبوون
|
تێگەیشتوو بوون نەیاندا تا نەبن تووشی خەتەر
|
| کەوتنە فکری سیاسەت ئەجنەبی وتیان ئەبێ
|
کورد قیامی پێ بکەین بەڵکە ببن مەشغووڵی شەڕ
|
| چەند کەسێکی کورد کە هەریەک ئارەزوویێکی هەبوو
|
بانگیان کردن یەکی نەوعێ تەماعیان نانە بەر
|
| زۆڵ ئیبن زۆڵ دەستە دەستە سەوقی کرد
|
جافی گێل، هەورامی گوێ دیل، بانەیی کەم فام و کەر
|
| کەوتنە ناو کوردەوە لایێ بە تەفرە لایێ زۆر
|
کۆمەڵێکیان پێکەوە نا عادەتا وەک بزن و مەڕ
|
| ئیددیعای کوردایەتی مەقسەد بوو ڕەفزی ئینتیخاب
|
زاهیرەن باتین عەرەب فکری ژیان دەرکەن لەسەر
|
| فرسەتی دەسکەوت ئەجانیب ئەمری دا جەیشی عیراق
|
هاتن و کوشتیان ئەمان جا ئەجنەبی بردی زەفەر
|
| چوون بەگژیەکدا لەسەر حەق میللەتی کورد و عەرەب
|
ئەو درەختی نەگبەتە بۆ هەردوو وەک یەک دای سەمەر
|
| سەربەخۆیی بۆ عەرەب هەروەک حقووقی کوردەکان
|
هەر لە خوێنا چوو لە ناوانا نەما باسی ئەسەر
|
| سەیری ئیجابی سیاسەت زابتی موستەخبەرات
|
یەعنی ئیشێکی خراپی کردووە کردیانە دەر
|
| کامیل و مەحموودی جەودەت موتتەفیقیان بوو حەمید
|
زابتی جەیشی عەرەب بوون کردیان سەرفی نەزەر
|
| تەرکی مەوقیعیان کە کرد هاتن بە فکری ئینتیقام
|
لەم بیابان و گەڕانە بێ ترس وەک شێری نەڕ
|
| بۆ پەنا و شەکوە لە پیران چوونە لای سەرداری کورد
|
وەعدی دا من حازرم نە هەر بە ماڵ و جان بە سەر
|
| هەر ڕەئیسی عەشرەتێکیان بانگ ئەکرد جوابی ئەدا
|
چوونکە فەردێکیان لە حیسی ئینتیقام نەیبوو خەبەر
|
| جافری کافر حەقیقەت پشتی ئەم قەومەی شکاند
|
لەعنەتی وەک کەولی نەگبەت تا قیامەت کردە بەر
|
| ئەو حەرامزادە بە نۆت نەوتی بەسەر کوردا ئەکرد
|
ئاگری گرت خویشی سووتا ئاخری ئەما بە گەر
|
| ئەو کەرانە لووشکە لووشکیان کرد نیشانیان دان کە زیو
|
کەوتنە نەعرەی زەڕین ئەمما بە وشکی نەک بە زەڕ
|
| ناقڵیشێ دار پوازی تا لە جنسی خۆی نەبێ
|
پشتی کورد، کوردی شکاندوویە وەها بوو هەر قەدەر
|
| خۆی و ئەتباعی ڕەئیسی کورد ئیلاهی هەر بژی
|
بۆ شەرەف ئەسکەندەرانە دامەنی خستە کەمەر
|
| من سەر و ماڵم لە ڕێگەی قەومما هەر دائەنێم
|
فرسەتە قیڕوسیا فەرزەن سەفەر بێتە سەقەر
|
| لامەدە حەمدی لە مەوزووع و دوعاکەیشت بکە
|
ئەم قسانە لازمە بۆ ئاخری بکرێ حەزەر
|
ڕەببی مووی لێ بێ زمانی پەنجەکانی هەڵوەرێ
هەر کەسێ گوڵشەن بە دەردی کوڵخەنی دۆزەخ بەرێ
|
| ئەی وەتەن لوتفەن تەواوی کە وقووعاتی میلەل
|
ئەم مەراقە با نەکا بۆ ئاخری نەشری عیلەل
|
| تێ بگەن خەڵقینە توخودا بەس ئیتر تەفرە بخۆن
|
ئەجنەبی بۆ نەفعی خۆیانە دەکەن دایم حییەل
|
| نامداری کورد و سێ زابت بە هاوڕێتی سەلام
|
کەوتنە مەردانە سەعی حیرەتم بوو في المَثَل
|
| ڕۆستەمانە گەر بڵێم غەدرە کە ڕۆستەم هەر بە خەو
|
کەی تەیارەی دی بە فیلۆ یا تەقەی تۆپی جەبەل
|
| گەر بڵێم ئەسکەندەرانە غەدرە ئەسکەندەر مەدام
|
ساحبی ئۆردوو و وەزیری وەک ئەرستۆی بوو لەگەڵ
|
| بۆ چی باسی حەربی سوورداش و کاناروێت بۆ بکەم
|
بەم قسانە بۆت تەواو کەم قافیەی نەزم و غەزەل
|
| حەربی ئاوباریک ئەگەر تەسویری بتوانم بکەم
|
وا دەزانم کورد بە خوێنی کوردەکان بیکەن بەدەل
|
| شێخ لەگەڵ پەنجا کەسی مەشغوولی ڕاحەت بوون بە ڕۆژ
|
ئاخیری مانگی بەهار و ئاوباریک بوو محەل
|
| یەک فەوج جەیشی عەرەب سەد نەفەر پۆلیسی تورک
|
پێشڕەوی دووسەد سواری تاڵەبانی بۆ جەدەل
|
| نەفری عامی هاتنە سەر یەک نەفەر سەرداری کورد
|
بۆ خسووفی مانگ وەکوو چووبن شەیاتینی بە گەل
|
| دانیانە بەر تەقە هەر وەک شەیاتین ڕەجم کەن
|
مانگ نەگیرا کەوتنە جامبازە ئەمسالی جەمەل
|
| دەنگی شەستتیر و تەیارە و قرچەیی تۆپ و تفەنگ
|
ڕۆژی حەشرێ بوو ئەباری هەر وەکوو تەرزە ئەجەل
|
| دووکەڵی بۆمبا و تەپوتۆزی سوارە و گوللە تۆپ
|
ئاسمانی گرتە بەر داگیری کرد بورجی حەمەل
|
| گوللە پرشنگی ئەدا ئەکشا وەها زەننت ئەبرد
|
زامدارە بۆ تەداوی هاتووە نەجمی زوحەل
|
| ئەو هجوومانە کە لەرزەی خستە ئەرز و ئاسمان
|
نەیگەیان زەڕڕە بە وەزعی یەک مناڵی کورد خەلەل
|
| وا نەبوو ئەهمییەتی بۆمبا و گوللەی تۆپەکان
|
هەر ئەهات ئەدرایە بەر شەق یا بە پێلەقە و بە پەڵ
|
| من وتم ئەم حەربە تەمسیلی چەناق قەلعە ئەکا
|
سەد ئەگەر بکرایە ئەترافی بە تورپیل و بە تەل
|
| هەر بەلاشە ڕەشبەڵەک گیرابوو لەو مەیدانەدا
|
تاڵەبانی میسلی بەت جوندی هەژاریش میسلی قەل
|
| وەختی مەغریب ڕەجعەتی ئۆردووی کە کرد سەیری هەبوو
|
سنگ و سک گۆڕابوو یەکسەر بوو بووە پشت و کەفەڵ
|
| وای نەنەی پۆلیسی تورک و یوممەیوممەی عارەبی
|
بۆ قەوان هەڵ ناکەوێ جارێکی تر بەو نەوعە هەل
|
| وا لە ناو جەووی هەوادا ئەم قەوانە مەیلتە
|
گوێ لە تەلسز بگرە گرتوویە سەراپا موحتەمەل
|
| وەختی ڕەجعەت ڕەحمی فەرموو مەنعی تەعقیبی کە کرد
|
وا ئەگەر نەبوایە لاشە جێ ئەما وەک باڵی مەل
|
| چاوی هێشتا پیاوی ساغی هەر نەدیوە ئەجنەبی
|
خزمەتی ئەو چونکە ناکەن غەیری لات و کوێر و شەل
|
| سەیرە چاوی موغریزی کورد بەو تەپ و تۆزی شەڕە
|
تەم بەسەریا هاتووە گرتوویەتی دەردی سەبەل
|
| کورد ئیتر بەسیە کە ناوی هەر بە نەختە هیممەتێ
|
زینەتی داوە بەسەر لەوحەی تەواریخی دووەل
|
| یەک بە دە هەرچەندە سەنرا خوێنی منداڵانی کورد
|
زەحمەتە تا ڕۆژی مەحشەر بکرێ ئەو ئیشکالە حەل
|
| لێمگەڕێ فەرمووی وەتەن ئەمجا دوعاتان بۆ ئەکەم
|
پشتی یەک بگرن لەسەرتانە خوای عەززەوەجەل
|
ڕەببی مووی لێ بێ زمانی پەنجەکانی هەڵوەرێ
هەر کەسێ گوڵشەن بە دەردی کوڵخەنی دۆزەخ بەرێ
|