Ҡатын хәле

Ҡатын хәле (Шиғыр)
автор Лилиә Һаҡмар

Ижад итеү ваҡыты: 08.05.1993. Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (74-се бит) ISBN 5-295-03798-3

Ҡатын хәле

Үҙем тураһында күптән
Уйлаған юҡ, бармы, юҡмы?
Ҡасан йоҡлай, ҡасан яҙа,
Уйлаған юҡ, асмы, туҡмы?
Балам ғына ас булмаһын,
Сөскөрмәһен, бышҡырмаһын,
Ирем генә, эштән ҡайтҡас,
“Ашарға!”- тип аҡырмаһын.
Килгән-киткән рәнйемәһен,
Йәлләмәһен, әрләмәһен,
Өҫ баштары яҡындарҙың
Саманан тыш керләнмәһен…
Эй, ҡатындар, онотмағыҙ
Ошо ауыр, татлы мәлде.
Бала һөйөп, ир баҡҡанда
Аңланым мин һеҙҙең хәлде.