Янгамо (2006)/Янгамо
[236]
| Ёвтнема
ЯНГАМО |
Апак капша эскелязь ютыя велень кувака куронть. Эзия редяяк, кода кадовсть удалов меельце кавтне-кудотне ды икельгаст сэрей рацяня кальтне. Молемс шождыне. Кись вельтязь, кадык таркань-таркань порксневськак, асфальтсо. «Витнема учи, витнема! Ветямодонзо мейле теке стувтызь. Тевтнедеяк аволь ламо — варятнень пандтнемс», — арсезевинь асфальттонть, штавтозь таркатнень лангс ванозь.
Велькскан чивалгома ёндо састо-састо уить куштань тюс тусто пельть. Арсить: тосо, ков бажить, вармат а эрсить, тосто мусызь сэтьмечисэ эрямонь ёнксонть. Монгак сынст ладсо. Яла тень мезе-бути а саты, яла вешнян. Вешнян таркат-чиреть, косо а эрсить сёвномат, сельмень сявадомат, пеень пачк кортамот, кенгелемат, саламот-коламот, косо седей витить морот, мизолкст, косо ушосонть свал панжиков ды цёкордыть цёковт. Содан, истямо мастор эрси ансяк превсэ, ялатеке эйзэнзэ салавань, эсь пачкан бажамотне потстон а лиснить. Вана нейгак. Ков чаван пильгень? Кувать эзия нее ялгам — эринь. Эрявлинь седе товгак. Арась, эзинь аштеве кудосо, сыргинь васоло килангов...
Менелесь, нузякс пельтне ды эйстэнь керш ёнга вастневиця ожинесэ эль токазь килейнетне ледстнить нусманя, ялатеке эсензэ ладсо мазый сёксенть самодонзо.
Пачкодинь ки улос. Вейкесь терди — лиякс кодаяк а эрси — керш ёнов, омбоцесь — витев. Конась пачтясамам Кулясбуев? Кодамо ёнкс саема? Кевкстемскак а кинь.
Лоткинь, арсян. Сась мелезэнь ёвкссто содавикс валмеревксэсь: «Сыргат витев — прят ёмавтсак, саят керш ёнкс...». «Содык азё, кинь косо ды мезе учи ванды! Кершев? Мезе илязо лисе, куш прят ванстови, сонзэ марто кодаяк уш а ёмат, — ёвтынь валон марямга, прок кияк маласон учось сынст. — Кершев тык кершев!»
Кудосто лисемстэ кирдинь мель: машина кодамояк сасасамам. Учок. Допрок стувтыя — шкатне велявтсть ингельёнт. Те седе икеле, колхозонь шкатнестэ аволь аламо цюхиесть тей-тов: усксесть сюро, сывель, ловсо, эмежть, уштомапельть... Те икеле, ней... Ней велестэ эли веле ёнов сталмонь ускиця машина чуросто неят. Аволь келей те киванть седе сеедьстэ «эвтить» эрьва кодамо маркань ды тюсонь шождакайть, кой-зярдо — «автолавкат». Иля снартнеяк кедь кепедемс — а озавттадызь, а варштытькак лангозот. А серьгеди теть [237] кабинастонзо икеле ладсо кодамояк менчевезь черь цёра: «Озак, покштяй! Вармакс ливтявттан». Мезе ульнесь — ульнесь, мекев пикссэяк а велявтсак. Оно зяроце вакскан вешкезь юты! Кинень эряват, озат — машинанзо рудазкавтсак, атянь чине мартот совавтат. А эряват, а эряват, а эрявить чувтонь трёшникетькак. Улевлитькак од тейтерь, од авине, тевесь, паряк, лиякс ладяволь. Иля музгорде, сыре панго! Сыргить — чийть.
Эскелян. А капшан. Ков эрязкалемс? Ютазь иетнень мельга? Э-э-э... седе курок пачкодят кадовозетнень пес. Сынь седе маласот. Арась-арась, атя, Тов саицясь сонськак сы, апак терде. Пилыть човсемс, мельганзо яксезь, а сави.
Кись кувака. Прок эрямонсесь. Максозестэнть, ризнэк-иля, кадовсь тень казнекс пезэ. Саты. Истякояк ветсесь эйсэнь аволь аламо таркава, аволь аламо велень-колхозонь паксява. Ламо мезде ёвтневельть сынь, китне ды паксятне, улевельтькак кортыцят ды кенеревлиньгак мельгаст сёрмадомо.
Молян — котат тапан — ялгань варштамо. Колоньгемень иеть эзинек вастневе. Колоньгемень... Иетне — те онстот неезь нармунть. Ливтить — а марявитькак. Эзть редяво Важдаев Коля марто вейсэ тонавтнемадонок мейле иетнеяк. Прядынек велень хозяйствань институт. Вете иень перть вейсэ печтинек ютазь пингень ведьгеменце иетнень сталмост ды мазычист. Абунгадат! Те ней, неень читнень коряс, маряви, эринек асатыксчисэ, майсевезь. Сестэ... Валске марто кияк цёратнестэ «озавтсы» чайникенть плитка лангс. Шкань ютазь ветенек-котонек пуромтано стувор экшс. Валскень ярсамонок свал теке: верек ойсэ ваднезь ашо кшинь зярыя печтть ды ламбаськавтозь ведь. Истя, «чайде» копорязь, пештилинек пекенек. Мезень, кодамо асатыкс? Тунь кодаткак зыянт, кажочи эзинек маря. Эзть эря ютксонок сельмень сявадомат, эрямонть лангс пеняцямот.
Раужо сатинэнь шароварат, тапочкат, вельветэнь, мештьс стазь кавто зепине марто, сэнь эли раужо курткине. Истя минь, цёратне, якинек кизна. Ней, неиндерятадызь ульцясо, лавкасо-косо кудоютконь тапочкасо, сеске мерить — превензэ велякадсть. Тонськак а лисят — визькс. Ведьгеменце иетнестэ истямо «формась» лововсь паро модакс. Натой сюпавчикс. Аволь аламот — васняяк, сыретнестэ — седе беряньстэ оршнесть.
Тундонь лажныця леекс ютась ды скимемсь, совась свалшкань чирезэнзэ од шкась. Пертьпелькссэнть ды [238] эсь ютксонок эрьва гайтькесь марявсь сестэ цёковонь морокс, чокшнень тештне — ковдонть покшокс, шнасть пря, киштсть перьканок вирень ды паксянь балягатне. Кодат пеняцямот ды ацирьгалемат эрямонть лангс? Косо беряньчизэ? Лекцият, лабораториянь важодемат, практикат, конспектт, книгат, экзамент, экскурсият, чокшне концертт, кино, танцовамонь таркат, тейтерь марто вастневемат... Ютасть сынь ды уш зярдояк а мурдыть.
Кода сон тосо, Коля ялгам? Кода эрси Важдай Миколь, Коля? Содавтома, содавтома. Яла а сыргаван ды а сыргаван. Каня иетне чумот, каня бриндатне новолькшнить. Тевтнеяк, прок кечказт, сялгить — а нолдыть. Окойники лисевинь. Ней уш, кортамскак а мезть, вастовтано. Аштека, аштека! Содави тень? Колоньгемень иеть... Аволь колмо — колоньгемень. Абунгалемс а сави, а содавиндерятано вейкенек-вейкенек туртов. Чить, ковт, иеть... Аволь весть, аволь кавкстькак начтнизь-лопавтнизь паксятнень пиземетне, зняроксть жо менелесь лексесь лангозост пси, пултыця лексемасо. Ламоксть, вельть ламоксть кшинь кастыцятне лиснесть лангозост чоподасто чоподас сюпавчитнень урядамо.
Марсинь, марсинь: Миколь зярыя иеть важодсь васоло районсо агрономокс, мейле — теке велесэнть колхозонь прявтокс. Кувать усксь велень хозяйствань управлениянь аволь шожда улавонть. Апаро куляткак пачколесть эйстэнзэ. Эрямо, ламо мезень пачка савкшны ютамс. Марсинь Микольде, а вана эртевкшнемс мартонзо, кортнемс седейшкава эзь савкшно. Эрси истяяк. Эзинь сода: сон пенсионерэнь меельце «должностьсэнзэ», эри Кулясбуесэ. Паряк, куломазонок неемскак аволь саво, аволь понгояк сельмень икелев газетасо эйстэнзэ ёвтнемась. Та-кодамо Н. Кулавский «цярадсь» лопас эль кельгиця статья. Истя-истя, келя, эри сон, статьянь откересь, Кулясбуесэ. «Вай, — верьгедсь превсэнь мелесь, — ды те шабрасо!» Ну кода теде мейле а молемс инжекс, а варштамс умонь ялгам лангс?
Ки улонть ютазь, эскелинь вайгельпешка. Керш ёнга — паксянь леха. Зярдо ланганзо меельцеде якась плуг? Мезе, кодамо культура — розь, товсюро, паряк, шуж — кассь-кенерсь элесэнзэ? Кшнань келей карксокс таргавозь паксянть товолга — вирь. Эйсэнзэ тия-тува ожолгадыця килейтнеде аволь маней нувазя чись маряви седе валдокс ды оймень эждицякс.
Ней пайстомо, уроз леханть мазылгавтни меште [239] видьга бастыль, идем тикше. Пиземетнеде ды шкадонть лопанзо прасть, нетьксэнзэ-тарадкензэ тюжалгадсть. Эри-раськси лия тикшетнень юткова куронь-куро. «Те мекс, кода истя товсюронь раштыця паксянть максызь лишмень сэрьсэ бастылентень, аэрявикс тикшентень? Кие сонзэ нолдыцязо?» — эвтить превсэнь кевкстематне, лажновты неезесь седеем.
Кинть омбоце ёнга — келей, зярс вановтот саты, лия азортомочи. Тунда эли ютазь сёксестэнть те паксянть сокакшнызь. Истя «дошузызь», истят «валунт», истят покольть велявтнесть — трокскаст, пелян, танк а ютави. Сокизь ды кадызь. Ды вельтявсь соказесь зыян тикшесэ. Варштат кинть лангсто ды арсезеват: паксясь пешксе пиже пона реведе. «Инешкипаз, каня а неят, мезе моли эрямосонть? Каня стувтык, зяро карязт яжасть, зяро ливезь валсть тонь эйдеть, эрзянь ломантне, виртнень паксякс теемстэ? Мекс нолдыть истямо азортомочи? Мекс а лездат?» — перькан ваннозь, пшкадинь сенень, кинь тетям-авам, покштям ды сонзэ покштянзо ловсть весеме лангсо покшокс, виевекс ды превеекс.
Кинтень ялатеке, кить эзганзо якить, кить ардтнить, — чатьмони. Чатьмонить нарьгазь модатнеяк.
Молян — сельмть микшнян — Кулясбуев. Удалов а варштнян. Косо-бути васоло-васоло потсон кирдеви мель: удалов а варштнемс. Те берянь, а эряволь истя тейнемс. Сави, сы шка, мурдамс ды одс онкстнемс ютазенть. Теде а эряви стувтнемс. А эряволь, ды... стувтнетяно. Виде теяк: аволь свал мурдават удалов кадовозентень. Ков-ков, эрязь иетнес зярдояк а совават, кода иля правто.
Васоло икеле сувонь пачка неявиксэкс теевсть кодат-бути латот, ведень таштамо-нолдтнема сэрей-сэрей башнят. «Лисни, аволь ламо кадовсь велентень...» — тешкстыя эськан ды келейгавтынь эскельксэнь. Куроксто вастовинь кинть керш чиресэ кавто палманне юткс-эйс чавозь жестень лопа марто. Чеменденть тень эль ловновсь: «Колхоз «Зори коммунизма». Мазыйстэ ёвтазь лемденть совась потмозон нусманя, теке марто валдо, кецявтыця ёжо. Вадря эли берянь ульнесь «зоряс» бажамонь шкась — сон ульнесь, ульнесь, ютась, эйзэнзэ кемезь, эйкакш пингем, сёлмов арсемадо пешксе од шкам, касозекс-сырекс эрявиця иетне...
Вана латотнеяк.
Лоткинь кинть чирес.
«Вай, авакай! Те мезень, кодамо виень раужо давол ютась тия? — абунгадынь неезденть. — Арась, те аволь [240] даволонь «кедесь». Паряк, бомбамо костояк лия планетасто сакшность? Лиясо мейсэяк истя а яжавить, а калавтовить кирьпецень-бетононь нардев путовкстнэ. Бульдозерсэ? А-а, кортамскак а мезть! Тесэ азаргалесь кодамо-бути эвсень-идемевсень вий...»
Аволь пек умок ульнесть тевень содазь, нардев кедьсэ путозь кардт, утомт, силосонь траншеят, вельтязь тингелангот, сюронь онкстнемань, сортовамонь латот, тракторонь-машинань гаражт... Ней, ков а варштат, — цунамиде мейлень кадовкст! Пандонь сэрьсэ ведьвелявксось лутнинзе ферматнень-мезтнень латосто шиферэнь лопатнень, лондавтынзе потолоктнень, сявордынзе кирьпецень стенатнень. Велявтнинзе натой гусеница лангсо стака трактортнэньгак. Абунгавты теяк: ванстовсть, эзизь максо пряст, эзть сявордово ведень таргиця-явшиця сэрей башнятне. Кирдевсть, эзть пра. А кемевияк! Кой-кона кардотнесэ, утомтнесэ, мерема, кадовсть, эзть сяворе, ашолдыть, теке ирдекст, бетонсто теезь нежетне — «клюшкатне». А уш тикшесь «калмазырьсэнть», тикшесь! Аволь ломань — слон потмозонзо ёми.
Марявсь, эрий, лексиця мезеяк эзь кадово.
Поладыя ким.
Пельскаладо ве кардонть вакссо вановтом эртевсь, кецнезевинь, раужо-ашо пона тувос. «Те косто истя тон?» Кардо кенкшенть икеле олгонь штеме. Эйстэнзэ, прок норасто, бешоконь, лисськак «раужо-ашось». О-о! Кадовсь, кадовсь ве оймине цунамиденть мейле. Кадовсь! Косто-бути васолдо, килейтнень ды бастыль тикшенть потсто, каятотсь скалонь аволь парамо — лайшема-пеняцямо. Тердсь, чарькодинь, потявтыця. Ловсодо пешксе одарось, теде сэредьксэсь кармавтсть рангомо вирь ды идем тикше потс ваиця паксянть келес. Алкукскак, сюракшонть парамосонзо марявсь энялдома ды сялдома, марявсь сюдомаяк. Ну косто теть муян, превей ракша, истямо ломань? Пижакадовлитькак «Садо «кренч веднеде» копорямо!», тевесь лия улевель. Вайгелеть марявлизь. Аволь ансяк цёрат, аваткак. Теке наксадыця сывель чинес карвот, пурнавольть перькат. Ней мезе — ловсо... Сондензэ вереть а азаргады...
Вана Кулясбуеськак.
Совинь велентень. Кудонзо покшт, мазыйть, вальмаст келейть. Ламот кирьпецень, кевень юр лангсот. Вельтязь, содазь, аволь олгсо. Те теть аволь ведьгемень-сизьгемень иеде икеле. Кудо, омбоце... ветеце... Пельие ютынь — а куш а каш, прок кадозь велес понгинь. Молян седе тов. Окойники, натой кецявинь, неинь [241] куринканть куншкасо лисьманть енов ведьс молиця-такшардыця. Лангсонзо нулат-валат, сонсь эрязь иетнеде мендявсь чирькекс. Кедьсэнзэ ведрыне.
Ютынь лисьмалангс ды пшкадинь ведьс лисицянтень:
— Сырькай, косо эри Николай Петрович Важдаев, а ёвтасак?
— А? — «кецневтимим» эчке, прок таргиця цёрань, вайгель.
— Косо, мерян, Николай Петрович Важдаев эри? — пшкадинь вайгелень кепедезь, чарькодинь: пилензэ ломаненть камажат, мари беряньстэ.
— Я не понимам. Гавари па-русски, — абунгавтымим ды мик ацирьгавтымим кармавтомасонзо «амарицясь».
«Тесэяк сынь», — кивчк ютась пачкан нусманя мель. Савсь пшкадемс рузокс.
— Я тута недавно. Каля-маля, каля-маля... О чём толдычат, бог знает. Не знаю ничего. Вона дом напротив, зайди. Матрёна скажет, она тутошна, — валонзо ёвтазь, рузавась варштась лисьмантень ды калдор-калдор нолдызе барабанонтень рисьме вельде сюлмазь ведранть.
Савсь тень ютамс ды совамс кукорьгадозь аштиця невтезь кудонтень. Эзинь кенере совамо, каршон лиссь аволь сэрей, сень кис келей, трюшня ава. Низельдиця курго ды тюжаня тюс, келей, сормсевезь чама. Лангсонзо аваломаненть лембе, кувака ожа сэнь ковта. Рунгонзо «мазылгавтсь» эчке коцтонь пенксев икельга паця.
— Кодаяк а муса Важдаевень Миколень — Колянь.
— Важдайтнеде минек пельвеле. Конась? — маринь ванькс, дильниця, теке од тейтерень, вайгель.
— Тетялемень коряс — Петрович. Ну кода теть лиякс ёвтамс? Сэрей. Валдо черь.
— Петровиченек колмошка. Конась эйстэст? А содан кода теть лездамскак.
— Ну, кода меремс, низэ сонзэ а тестэнь. Сонсь Коля — агроном. Ней пенсиясо, — мель путынь лездамс чольдерькай келентень.
— Ды кие, кие истямось, Верепаз? — арсезевсь кудазоравась икельганзо чарыця саразонзо лангс ванозь.
— Нинзэ лемезэ Лия, Лияна, — ледсь мелезэнь.
— А-а, истя меревлитькак!.. Чарькодинь. Лиянь мирдезэ, Миколь. Сынь, атя, эрить Бамсо, од куринкасо, — кецнезевсь авась ды апак капша, валтнэнь путнезь, ёвтнизе, кода муемс те самай Бамонть.
[242] Сыргинь вешнемензэ. Куринканть муия. Ансяк совинь эйзэнзэ, вастынь цивторкай сэнь шароварасо оршазь ашо кувака прячерь од цёра.
— Цёра-валдочи, ёвтыка, косо эри Важдаев Николай Петрович? Кодаяк тень а муеви. Келя, тынк песэ, Бамсо, — паро ёжосо, мелень ванозь пшкадинь ашо прянтень.
— Я па-мардовски не понимаю, монь тонь не понимонь, — пиле ланга локштядимим-норгимим згилязь ёвтазь валсонзо «пиже нолгось». Аноколинь сельгемс сельмезэнзэ. Лезэсь мезень? Ней истят «понимонтнеде» эрзянь велетнесэ зняро, а саты сельгетькак. Кирдия мелем, савсь пшкадемс «ломанень» кельсэнть.
— Сказали, здесь живёт Николай Петрович Важдаев. Где, подскажи.
— Теперь другой бакс, — шождасто лекстясь цёрась ды невтсь кедьсэнзэ эрявикс ёнов: — Во-он дом на пригорке! Видить синие наличники? Во, это и есть их дом.
— Сюкпря, цёра, — мельтеме, моткодезь ладсо меринь «рузонтень» явомстонок.
...Лепштия кузтемпень стенас педявтозь баягинень повненть. Аламос аштезь марявсть кашторкст, эскелькст. Панжовсь кенкшесь, ды конядо коняс эшкевинек умонь шкань ялгам марто.
— Коля, Миколь, шумбрат! — панжовозь кенкшканть совамсто лиссть кургстон кенярксонь валтнэ. — Ды тон, Коля, эрзянь цёра, теке крён, прят дух эзик максо иетненень.
— Н-у-у, тон уш... — шнамодонть аламнеде визделгадозь, муст-муст пейдезевсь ялгам. — Неят прястон куш вейке аволь шержей черь? Адя кудос, экше.
Ютынек кувака, сундерькс чопода коридорганть кудыкелев, тосто — удалце кудос. Вастымизь азоронть низэ Лия. Васодекшнесть — мельсэнь, мельсэнь! — студентэкс улема шкастост ды вана вейсэ эризь эрямост сыречис. Коля сэрей, аламнеде куяв ломань, валдо черь-чама, човине турва ды мендявозь, прок нармунень нерь, судо. Сондензэ сэтьме, «аливтевикс» кор куросонок арасель.
Лия — поланстэнь каршочи: алкине, эрьва ков кенериця. А стяко мирдезэ лемдизе Штерекс. Озадо аштема а вечки, яла пильге лангсо. Секс рунгозояк човине, ёлганя, аволь кода аватнестэ ламотнень — кодгемень-сизьгемень иетнес теевить чапакс очкокс, эль лыкавить.
Ансяк кенеринь мельган кенкшенть пекстамо, Лия [243] лекшкадсь эйзэнь, каизе вить кедензэ лавтовом ланга ды колмоксть палымим чамаумарьс.
— Кодамо инже, кодамо инже Пазось тенек кучсь! Седе курок кемевлинь чипаенть лия пельде лисемантень, ансяк аволь тонь самонтень. Косто, кона ёндо Пазось кандынзеть? А? Евтак. Мекс чатьмонят? Мон уш вастовомадо мелентькак превстэнь ёртокшныя. Вай, а кемевияк! Адядо, адядо, ютадо икельце кудов, — Лиянь валонзо-вайкснеманзо чудсть чудикерькскекс, эзь максо панжомс кургомгак. Тейтерькс кортакшоволь, ней — седеяк.
Оймензэ полавтомсто окойники саевсь вал моненьгак.
— Ловнынь «пенсионерэнь пизэденк» газетасто, та-кодамо Н. Кулавскоень статьясто. Саинь мель ютамс, варштамс лангозонк. Вана монь пельде казне, — венстия авантень кой-кодамо ярсамопель марто тапарксом.
— Вай, ды тон мезе, арсят, вачодо пиштетяно, а эряви, а эряви, — эзь сае, кедьсэнзэ ахолясь Лия.
— Кодаткак «а эрявить». Те монь пельде. Монгак аволь вачодо кулыцятнеде, — ютынь вальманть икелев ды путыя туезенть стуворонть лангс.
Миколь аволь кельсэ пивсыцятнеде, совамозонок валгак эзь правто. Вансь мизолдозь, чатьмонсь.
— Мекс стядо аштетяно, адядо эно икелев, — мерсь ды тохмадизе кавтов панжтневиця, ашосто артозь, икельце кудонь кенкшенть.
...Час, омбоце калякатано-ледстнетяно тонавтнема шкань ялгадонок, вейсэнь кудосо эрямодонок, тонавтыцядонок. Вакска эзь ютаво «весемеде покш» темаськак — кие-кинь вечксь. Ламо иеть ютасть институтонть прядомадо мейле, секскак ульнесь мезе ёвтнемс велесэ-косо важодемань шкат-недеяк, эйкакштонок, кудонь-пирень тевтнеде...
— Маряви, ве чияк вейсэнь эрямостонок эзинек кадо апак ледстя, — мерсь кудазорось. — Содат мезе, ули мелеть вастовомс Григорий Александрович Патяев марто? Эзик стувто?
— Ужо, ужо, те тынк колхозонь умонь-умонь прявтонть марто, истя?
— Истя!
— Мон мартонзо эзинь вастневе, эзия некшне. Содан: колхозонк сонзэ пингстэ ульнесь областьсэ васенцетнень ютксо. Шнамонь кулятне тынк «Зори коммунизмадонк» ливтнесть масторонть келес, лововсь «миллионерэкс»... Ульнесть шкат. Марявсь, свал та-косо палы валдо тол, ды кадык аволь пек кемезьгак, бажинек сонензэ.
— Кода-бути авадря... Сынь тыненк — мольтяно лиянень.
— Адя, — путсь пе кавтолдоматненень студент ялгам таркастонзо стямсто, — каршонок эри. Янксеме а кармат.
— Ютадо, ютадо, — Лияяк ёвтызе мелензэ, — кецневтьсынк атянть.
— Мезе, теевемс содавиксэкс истямо ломань марто а берянь, — ёвтыя мелем стуворонть экшстэ стямсто.
...Григорий Александровичень кудозо мейсэяк велень лия кудотнеде пек а явови. Шиферсэ вельтязь лато, пижесэ артозь коняка, икельце колмо вальманзо кундост мазыйстэ керсезь-артозь. Эрямо пизэнть алксозо-юрозо валозь, кевень. Зярдояк наксадомадо а чиреми. Икелензэ пирявкскенть потсо кельмеде апелиця, ламо иень, тештине кувтань, сэнь, ашо, якстертьсэнь сэрей нетькс балягат. «Сонсь? Аволь. Маряви, низэ котьми мартост», — вастовсь вановтом мазый прятнень марто, ды ашо толгинекс ютась удемган мелесь.
— Григорий Александрович, инжеть вастт! — серьгедсь Миколь, эль кенеринек котанок каямо ды кудо кенкшенть панжомо. Каршо — кашт. Удалце кудосонть кияк арасель. Миколь панжизе икеле кудонь пор ашо кенкшенть.
Вальманть каршо аравтозь стуворонть экшсэ тенек копорь ёндо озадо аштесь пря кочомга кокша ломань. Икелензэ конёвт, газетат, башка — книгат.
— Теня, сон беряньстэ мари, — ёвтась тень Важдаев, ансяк совинек ды эскельдинек озадо аштицянть пелев. — Вана инже теть ветинь!
Конёв марто важодицясь стясь ды велявтсь ёнонок. «Оно сон кодамо!» — эль эзь ливтя кельпрястон.
Икелень аштесь аволь сэрей, аволь алкинеяк кирьксаня келей чама атя. Пилетнень велькска кадовозь шержей черть, сормсевезь валдо чама киське — вана сюпавчитне, конат пурнавить ламо иень перть эрямонь паргонтень. Тензэ путынь кавксоньгемень малава. Эждизе седеем мизолксозо: эйкакшонь, кона тейсь кодамо-бути чумочи ды ней виздезь ёвтни эйстэнзэ.
Лепштизе Миколень кедензэ, мейле — монь. «Чевте кедькоморозо, чевте седей...» — редия эськан.
Истя васенцеде неия ней уш аволь аламо иеде икеле ламо ломаннень содавикс «хозяинэнть», конадо эсь шкастонзо сёрмадсть газетатне, сиземань апак сода лодордсть радиось ды телевидениясь.
[245] Умок те ульнесь. Одоль Григорий Александрович, седеяк одолинь мон.
Инжень вастыцясь саинзе стуворонть лангсто «марямкаензэ», аравтынзе-путынзе пилеварязонзо.
— Теня, те монь тонавтнема шкань ялгам, студентэнь ямдо-кашадо зярдо-бути вейсэ ярснинек, — пачтясь эйстэнь Важдаев.
— Паро, паро, озадо, цёрат, — васенцеде мария вастыцянок вайгелензэ. Варштась лангозон ды невтсь стенанть кувалт аравтозь диванонть лангс. Мария азоронть вайгелензэ ды арсезевинь: «Лавшо, аволь пурьгинень. Кода истямо вайгельсэ кармавтнесь важодеме сядот ломанть ды теекшнызе «Зори коммунизманть» истямо содавикс ды сюпав хозяйствакс?» Теке басом ледсь мелезэнь валмеревксэсь: «Аванть виезэ — лавшочисэ». Тень эйсэ, кемезевинь, сайнеськак, лиснесь эрьва тевсэнть изницякс.
— Ванан, конёвтнесэ яла мезть-бути сокарят, — ушодсь Миколь невтезь таркантень озамсто. — Те мезе истя черкстнят?
— Ды вана газетас статьянь кондямо анокстан. Сёрмадан, — валтнэнь аламнеде явнозь ды, марявсь, пеняцязь, лавшо вайгельсэ мерсь азорось эстензэ озамо таркакс каршонок стулонь айгемстэ. Беряньстэ марицятне, камажа пилетне, седе сеедьстэ кортыть верьга вайгельть, арсить, лиятнеяк беряньстэ марить. Григорий Александрович, мекевланг, корты эль марямга. Паряк, «марямкаензэ» кардыть — эсь вайгелеть пек маряви?
— Мезде? — кевкстизе Миколь.
— Пежеттем, — ачарькодевиксстэ мизолдозь, теке марто нусманясто, мерсь атясь кевкстницянть каршо.
— Теня, а чарькодян, кодамо пежетте кортат?
— Э-э, Миколь, эрямосон чумочи теинь аонкста-вишка. Колхозонь тевдень содатадо. Тонгак, Виктор Николаевич, — пшкадсь монень, — марсить. Теезель, прянь апак шна, аволь аламо. Ансяк вана эсь раськедень эзинь арсе, сонзэ туртов аламо мезе путокшнынь. «Тон кодамо раськень цёрат? Кодамо лезэ кандыть, мезе теить чачома раськеть туртов?» — кевкстематне потмозон эзть совсе. Истят мельть тень эзть сакшно. Тень эйсэ самай весемеде покш пежетемгак. Чарькодить? — нусманясто ды янксезь ёвтынзе мелявксонзо кудонь азорось.
— Эсь раськем... Эно кинень лиянень бажить теемс паро? Раськентень, эли, кода минь кортатано, народонтень.
— А-а, тон оно мезде, — чатьмонезевсь Миколь.
— Самай сондензэ, Миколь. Эряволь сестэ, од шкастон, зярдо вийсэлинь, седе ламо мель явомс тензэ. Мон натой вестькак эзинь кевкстне тонавтыцятнень: «Кодат тевенк, кодамо ёжозо келенек?» Мон тень таркас фермат-столовойть путнинь. Вельть шкадо мейле чарькодевсь тень, ков ки келятано. Эх, комсешка, куш комсешка иеть ёртовольтькак сявдиксстэнь! Зяро тевть теевлинь!
— А содан кода меремскак... тон жо, теня, Григорий Александрович, аволь школань тонавтыця, парторгокскак араселить. Те тонавтыцятненень, сыненст эряволь лыкамс. Тон жо агроном...
— Эрзя мон, эрзя, ялгат, — вана мезе эряволь мельсэнь кирдемс, вана... — эзть прядово валонзо, козозевсь потмонь чамдыцясь.
— Да-а-а, — кувакасто ёвтызе нурька валонть ялгам, — тевть. Газетас сёрмадат, теня, арсят, лезэ ули? Мезде ёвтнят?
— Потмом чамдан. Энялдан Инешкипазонть нолдамс чумом — аламо мезе теинь раськем туртов. Яла шождалгады мештьсэнь кевесь. Лия мезеяк а учан. Неень прявтнэ, маряви, газетаткак а ловныть. Сёрмадт-иля... Иетнеяк... Пилетне вана потомсть. Седееськак... Шумбрачись аволь колхозонь шкатнень, малавгак аволь. Ялатеке теян, мезе тееви.
Кунсолан. Сыре-сыре, орматнесэ човсевиця ломаненть кургсто марязденть теевсь тень визькс — монгак эрзя. Пенсияв туемазон теде эзинь ледстнеяк, сокамонь-видемань тевтнеде башка мезеяк лия эзинь сода. Олгинеяк эрзятнень лезэс эзинь кепеде. Сыре ломаненть валонзо совасть мештезэнь. Седеяк малавиксэкс, инекс, мельвановиксэкс, мик вечкевиксэкс теевсь тень янксемадонзо кортыця икелень прявтось.
— Майсевти, цёрат, теяк: киньгак эрзянь келенть кижныця-козыця ёжозо а талновты, киненьгак а эряви. Вана тынь кавоненк — эрзят. Мезе теиде сонзэ идемга? Содан, тыненк сон — кода пинентень ветеце пильгесь. Самай те керязь кери седеем. Ськамон...
Марязденть башка, эвтсть превсэнь тей самсто неезденть ледстнематне. Кода сон ваны те лангс? Яжизь сень, мезе сон путсь-тейсь, мезентень макссь зняро [247] вийть, шумбрачияк эзь вансто. Муинь кортамонь лувсонть вальмине ды венстия, кода кортыть, келем.
— Григорий Александрович, тей самсто эсь сельмсэнь неинь истямо — пароль а неемскак. Допрок калавтнезь, тюшумбар тапазь, поркснезь фермат-кардт, тингелангот, кудот-кудынеть, утомт, тракторонь парк... Кода тон тень лангс ванат?
Валон марязь, каршонок аштицясь стясь таркастонзо ды, кедензэ удалов кундазь, мекев-васов яксезевсь икельганок. Теевсь општ. Шкань ютазь тарск лоткась, теке эртевсь мезескак. Нолдызе келей коня прянзо. Арсезевсь. Каштмолезевинек миньгак. Окойники варштась лангозонок ды машнетезь ладсо пшкадсь тенек, икелензэ диван лангсо озадо аштицятненень:
— Тынь мезе, сыде толсо палыця томбавксом лангс салонь почодомо?
Теевсь а ён. Теинь ильведькс. Янксезевинь. Каня эзинь сода, кодамо Сэредькс тензэ канды кевкстемам?
— Нолдык чумом, Григорий Александрович, манявинь. Кодаяк лиякс ушодомаль те кортамонть. Монсеньгак, видькстан, «бомбатнеде» седейсэнь чапамо сэви, монгак модань тевтнесэ пинге ботынь, — каинь вал.
— Ды мон эзинь ордадо, — сэтьместэ, ней уш теке сон вешсь чумонь нолдамо, мерсь кудазорось. — Тевесь, алят, аволь монь ды тынк эйсэ. Велетне марто молиця раужо кажось панезь пани эйсэнь латко чирев. Комсте ламо иеть, самай мазый шкам, максынь колхозонь улипаронь таштамонтень, ней вант вана... Лисни, стяко, варма мельга эрямом нолдыя. Стяко! Кортыть, Мамай ютась. Стяконь валт! Кодамояк Мамайнень калавтомань истямо тев а тееви. Чапинк, атят, судозонк!
— Теня, колмонек минь агрономт, вельхозникть, колмонек атят, кадык тон седе сырят, — ве ёндо ушодсь Миколь, — ёвтык, Григорий Александрович, кода тонсь теевлить, кодамо киява туевлить?
— Кода меремс... Колхозтнэ малав весе ульнесть раксема таркакс, а мекс сёпомс. Тевтне эйсэст мольсть чикор-лакор, мезеяк эрявсь теемс. Мезе? Арсинь аволь аламо. Кевкстемат сакшность тень, ды а весть, мик «Зорянь» кепетема-касома шкастояк. Оно зярдо! Тевтне мольсть, виде, ялатеке мезе-бути эзь сатно. Те «мезе-бутись» удомамгак штавтнесь.
Састыне панжовсь икельце пелев кенкшесь, ды совась умок уш аволь од ава. Сельмензэ, сельмечирькензэ раужот, чама тюсозо тюжала. Явовкс марто нурькине черензэ зярдо-бути ульнесть раужот, ней — цивтёрдыть [248] сиякс. «Низэ, маряви. Мезе-бути татаронь эйсэнзэ», — тешкстыя эськан.
— Вай, ды минек тесэ инжеть! — кудонть келес гайгезевсь совицянть ванькс, теке од ломанень, вайгелезэ. — Гриша, тон мекс беряньстэ вастат? Куш чайнесэ каванямальть ломантне.
— Теня, миненек, Адиля патяй, мезеяк а эряви, — Гришань таркас кенерсь кургонзо панжомо Миколь, — минь ансяк стувор экшстэ.
— Азорось тесэ, Миколь, аволь тон, — «озавтызе» ванькс вайгелесь ялгань. — Учодо аламнес, теян-лакавтан истямо чай, кодамо а тейнить Индиясояк. А кувать.
Авась лиссь.
— Сезизе кортамонок, — поладызе юртонь кирдийсь. — Превть эрявить аволь ансяк кудонь путомсто, эрявить сынь калавтомстонзояк. А карминдерят чочктнень тешкстнеме, цифрань рисовамо, мерть, чапот одс а вачкави. Истят тевть, содазь, тейнить кудонть лия таркас путомсто, калавтневиндеряй пенгекс, сестэ...
Вере аштиця «кудодейтне-архитектортнэ» колхозтнэнь яжизь-калавтнизь, мерть, пенгекс. Паряк, вельть макшовольть, одкстомтомс эзть маштово? Виде, ламо мезе эйсэст наксадокшнось, кой-мезе эрявкшнось полавтомс. Полавтомс — аволь тюшумбар яжамс! Ламо-ламо триллионт, раськень вийть салась калавтыця-яжиця чадыведесь. Вана апокшке ёвкске, вана мелем. Нолдынк чумом, ламо кортан. Атян... Минь, кокша прятне, вечктяно понжавтнемс валтнэнь, кшиде иля андо.
Чатьмонемань лип. Колызе Миколь:
— Гриша леляй, тон, теня, кевкстемам, кода кортыть, эзик панжо. «Ёвкскеть» чарькодия, ансяк сон кадовсь «пуловтомо», пензэ эзик ёвтне. Мертяно, «чочктнень» колхозтнэнь калавтомсто тешкстнизь, ломанькс тевенть теизь. Мезе вачкамаль сынст эйстэ?
— Койсэнь, Миколь, путомальть-панжомальть колбасань-мезень теема цехть. Содылинь уш предэкс улемстэнь: ютындерятано лезэнь кандыця од технологиятнес, зняро ломанть тенек эрявомо а кармить. Секскак эрявсть муемс, теемс седе ламо важодема таркат. Кадовольть велентень одтнэстэ нилеце-ветеце пелькс, улевель пек паро! Ней... вейкеяк эзь кадово. Лиядсть ансяк кукорька бабат.
— Потат, потат, атя, кевкстемадон! — эсензэ мендясь Миколь.
— Мекс потан? Вариантнэде ламольть, ды саизь а сень. «Теиде, мезе меленк», — яволявтокшность прявтнэ масторонь келес. Ну и тусь...
— Мон? Явовлия моданть, трактортнэнь-машинатнень ды теевлинь-пурнавлинь артельнеть. Эрьванть эйстэст улевельть эсензэ машинанзо, утомонзо, ферманзо... Потамось, Миколь, — аволь калавтома-яжамо.
— Те мезе, вишка колхознэть? Моненьгак вечкеви те мелесь, — витевсь ёжозо Миколеньгак. — Кудонь вийсэ важодицятнененьгак, кода мерить фермертнэнень, китнень панжовлинь.
— Видеть меленк, — монгак арынь ёност. — Кода кортыть, производствань базанть эряволь ванстомс. Сон а чумо — чачтыцязоль социализмась. Эли тосо ашотне-якстеретне. Сонензэ эрявкшнось вейке — важодиця, нардев, превей ломань. Нурькинестэ — азор.
Панжовсь кенкшесь.
— Конференциянк, ванан, куроксто а прядови! — каятотсь Адиля Фяритовнань вайгелезэ. Совицясь кандтнемкайсэ кандсь пси чайде пешксе колмо бокалт. Тантей чинесь срадсь кудованть. — Ютко шка, Гриша, яволявты Чайде, ораторт, копордадо. Безардеме а карман, начтынк эрде кирьгапаренк.
Миколь, псиденть пувсезь-цёрнезь, копордась бокалстонть ды пшкадсь допрок лиядо:
— Гриша леляй, видькстака, те тон кода истя тонавтык татаркат эрзякс кортамо?
Григорий Александрович, мельспародонть турванзо токинзе салавань мизолкс, варштась кевкстницянть сельмс ды скирдызе валсо:
— Тон васня тонсь ёвтык, мекс эзик эрзиявто эрзяват ды рузыявтыть эйкакшот?..
— Истя уш лиссь, теня, руз ютксо ламо савсь эрямс, — пря идесь Миколь.
— Вана истя, марик, кода чоледи? Татаркс истя а ветерди, — атянть вайгельсэ марявсть кенярксонь ды каштанчинь нотынеть.
Марязденть — чайде симдицянок татарава — саимим мельспаро: истя ваньксстэ, ильведькстэме корты эрзякс! Кортавольтькак истя эрзяватне, келенек аволь кувсе, эрямонокак седе мазылгадоволь. Кеняркс ёжом сеске айгизе мелявкс: моньгак, аволь ансяк Миколень, кавто тейтерень валгак эрзякс а содыть. Монсь эрзян — начтынь рузт. Рузтнэнь лангс карязт яжинь. Вейкесэ пря идян: аваст рузава. Ды каня те идема?
— Тыненк мезе, тынь колхозонь тевсэнть эзиде [250] лака, «должностька» якиде. Мон вана... веть эзинь удсе, яла ардынь, вешнинь, вешинь, энялдынь, сюко-някшнынь, яла хозяйства сюпалгавтынь. Миколь соды, тонгак, инже, неик, зяро ды мезе теезель. Эрямось лаказь лакась, прок ошсо. Ансяк те «ошсонть» эрямс тень эзь саво. Ормась саинзе кедьстэнь ведьметнень: ушодокшнось седеесь калдордомо. Савсь валгомс камбразстонть. Тыненк мезе... Ней варштамскак пелян икелень фермань-мезень «ошкенть» лангс. Тыненк мезе... Школантькак, учок, ушодыть калавтомонзо. Эно мезе? Эйкакшт арасть, тонавтомс а кинь. Школа арась — арась велеськак. Эхе-хе... Демократия...
— Григорий Александрович, умок ёвтазь: весе чуди — весе полавтови. Пек уш а эряви пиемс, — путынь вал, ансяк прядызе кудазорось нусманя кортамонзо. — Кода меремс, прогресс, эйстэнзэ каськас а кекшат...
— Калавтомась прогресс? — эзь кирдеве, кепедизе вайгелензэ каршон аштицясь. — Прогресс — те, васняяк, вадрясто вадряс эскелямо. Минь, паряк, беряньстэ «колхозонь кудонть» путокшнынек. Секскак эряволь арсемс, кода вадрялгавтомс, аволь яжамонзо педямс!
— Да-а-а, — кувакасто ёвтызе валонть Миколь, — чаво паксят, «бомбазь» фермат, кудот, чаво, иредьстэ велеть. Тевть...
— Чавот? Те ансяк неяви — чавот. Сюпавчитне кадозь кувать а кирдевить. Сынь уш умок явнозь кинь-бути превсэ...
— Китаецтнэнь?
— Берянян икелечинь содыцясь... Сыньгак, содави, ве ёно аштеме а кармить. Лиятнеяк... Явносызь моданть, васняяк, «од рузтнэ».
— Мейле мезе?
— Мезе? Серьгедить важодицят, тевень теицят. Мезекс сыненст велетнева кадовикс симагайтне?! Сетнеяк врадыть. «Ярмаконь кескавонтень» ялатеке кинь сиведемс: кореецт, вьетнамт, кабардинт, черкест... ансяк ускост. Ды ламо иляст веше ускоманть кис.
— Да-а-а, — таго «моразевсь» ялгам, — теня, ёвтави ве валсояк — капитализма. А стяко институтсо политэкономиянь лекциятнесэ невтнесть сонзэ уро пей марто верьгизэкс. Виде, цёторсо пори. Ловажатненьгак почтокс велявты.
— Чарькодик? — варштась Миколь лангс, чаманзо каршо кедензэ кепедезь, Григорий Александрович.
— Ды кода! Ульнесь базар, ней — рынок. Пори мезе понги: кельть, койть, морот, виздемачинть, видечинть... Рынок.
— Теня, — стямсто мерсь Важдаев, — рай, мерян, тосояк арасель, ялатеке эсь прям ловилинь ломанькс, ней — чаво тарка. Пенсиясан. Тевесь...
— Вана мезе, атят, меревлинь. Паксятне чавот? Чавот. Велень эрицятне тевтеме кадовсть? Кадовсть. Сень кис чинек-венек ламо лия масторонь фермертнэ важодить. Эно кода! Россиянть эряви андомс! Ды андыть. Наксадо помидоронь пес тенек ускить. Визькс. Визькс — седе а ков. Кажочисэнек сюпалгавттано омбо масторт, — седеень киртыця вайгельсэ мерсь Григорий Александрович ды стясь стулонть лангсто.
— Кальдявт тевтне, мезть кортамс. Ней, теня, «ломанекс» теевсть кавто класс марто нолгартне, ярмактне, ярмактне — вана кить теевсть «ломанекс»! Ну мезе, Гриша леляй, ялгам оно частнэнь лангс невтни, — полавтызе кортамонть Миколь. — Аштезевниек. Шказо, келя, килангов. Тонь марто вастневтяно, калякатано, а сонензэ оно зяро эскеляма.
Лисинек мельцек-мельцек удало кудов. Моргасто каршонок эскельдясь ламарь цицькань артовкссо пургсезь чопода-пиже халатсо Адиля Фяритовна, кудазоронть «эрзявазо», Индиянь чайсэ каванпцянок.
— Вай, мекс истя курок? Кортневлиде. Эли чаем эзь туе мелезэнк? Чапамодонть ледстнеме эзинь карма — тынь кавоненк коське кирьгапарть, колмоце ялгадонк вана а содан, — пеедькшнезь лиссь ильтямонок ванькс, човине вайгель азоравась — икеле шкатнестэ, зярдо школась пешксель эйкакшто ды тундонь ведекс лажнось эйсэнзэ эрзянь келесь, рузонь литературань тонавтыцясь. — Зярдо сави, совадо, илямизь стувтне!
Мельга-мельцек ёвтынек Адиля Фяритовнанень ды вакссонзо аштиця кудонь прявтонтень сюкпря, сювордынек, атятне, ильтемга-явомга кеденек ды кулдор-калдор валгинек кузтемаванть.
Сёксесь ансяк ушодсь лексеме. Лембе. Менелесь пестэ-пес копачазь качамо тюс пельсэ. «А нусмакалить, кольгеме а арсить? А экшелясамизь, почкодиндеряйть?» — арсезевинь лангозост варштазь,
— Теня, адя миненек удомо. Ванды валске лисят. Ков ней — вензэ лангс? — тердимим Миколь.
— Арась, Миколь, Важдай Коля. Эзик стувто студентэнь шкань леметь? Вакулинек байтяк. Шказо. Кись кувака. Часто ламо онкстнемс саты.
— Улевельгак машинам...
— Иля арсеяк... Иля мелявто. Ансяк сизьгемень тень, пильгень зярс эсень. Якамось — эрямо. [252] Истя-аволь кортнесь институтсо философиянь «пазонок»? — паро ёжосо, аламнеде вайгелень кепедезь меринь ялганень.
— Истя, истя! — келейстэ пейдезевсь каршон. — Лемензэ эзик стувто?
— Эзия, Лапин! Сюконяк пельдень нить туртов, Лиянень.
— Ули теезь, Видяй-педяй! Эзик стувто? — кедькоморонзо ушманокс пилензэ ваксс путозь, ледстизе умонь лемем.
Лепштинек кавто шержей прят кеденек, ды сыргинь ней уш аламнеде содавикс кудотнень икельга янганть покш кинть ёнов. «Чачома велеван, — арсезевинь тей-тов ваннозь, — истят даволт эзть ютне. Аволь умок ульнинь. Зняро чавозь вальма кудот эзганзо ютамсто а неят. Оно сень эйсэ, а мезть кавтолдомс, умок-умок кияк а эри. Аволь шиферэнь, лазонь латозо допрок наксадсь ды лондадсь, кузтемнезэ чиремсь, вальманзо чавот, вармась пачкаст яказь яки... Шабразо вана аволь кудо — одирьва! Сэрей, стенанзо лазсо стазь ды артозь сэньсэ. Вальманзо келейть. Латозо вельтязь пиже шиферсэ. Эно мекс а неяви кузтемпезэнзэ ветиця яннэ? Мекс икельганзо вирекс касыть пиципалакст? Вантака, мельцек-мельцек колмо кудот кадозь, экшелить идем тикше потсо. Сынст ютазь — таго чавозь вальмат. Те эно кадык. Кудыне. Баняшка. Эйсэнзэ, маряви, ютавтсь пингензэ ськамонзо эриця».
Сокоргавтозь кудотнеде... Косот эрицяст, кодамо кандылов салсинзе? Мекс кодаяк а лоткавить, пе а муить ломантне: яла вешнить, яла вешнить та-кодамо «вадря эрямо»? Эрясть ракша марто вейсэ олгсо вельтязь раужосто уштневиця кудынесэ — берянь. Эрясть шифер ды жесть ало, электричествань валдосо — таго берянь! Уштомапелесь ней — газ, ули ведь кельме, ули тол пси. Фу, таго берянь! Ярсамопельтнеде зняро — а лововить, леместкак а ёвтавить, келеть синдьсак. Натой Израильстэ Пазгак усксть! Ознок прамозот. Теяк аволь весемень мельс тукшны. Кодамо эно сон, «вадря эрямось», кодамо танстезэ? Косо те парось? Ошсо, велесэ, мода лангсо, менельсэ? Куш весть варштамс чачозонзо!
Перькан ваннозь, веленть уцяскадонзо арсезь, эзия редяяк, кода лисинь «асфальтонтень». Пачкодинь Патяевень «ошкензэ» видьс ды сыргинь седе ливчанясто, седе келейстэ эскелязь. Бажан а ваномс вить ёнов. Арась мелем неемс «цунаминть» тевензэ, пелян, илязо скирята сыре седеем, илязо коле ёжом. Мельтне [253] ялатеке а кирдевить, эцить прязон. Кодат, алкукскак, эвсть-лецькайть човоризь ферматнень, кудотнень-мезтнень мода марто?
Лиясто ломанденть истя кортнить: ютась, келя, толонь ды пижень почконь пачк — «прошёл огни и медные трубы». Лияяк рузонь валмеревкс ули: ютынзе толтнэнь-ведтнень. Те мезе... Ламот ютыть ков седе ламо стакачинь пачк, ялатеке ламо мезе а неить. Каня сакшнось превс — социализмантень пе путыть? Сонзэ ямонзо-кулаганзо варчнинек. Ней вана ким кавто ёнга идемевсень капитализмась пейсэнзэ клянцькаи, цёторсо пори аволь ансяк кудонок-чинек — пори седеенек, келенек ды масторонок.
Мельтне — прок велькскан уиця пельтне, а ушодкс тенст, а пе.
Визькс ломаненть кис. Теи, чапи, вачки, путы эрьва мезть ды... яжи. Паряк, истя эрявияк? Ней мезе, ванстомальть раужосто уштневиця кудотнеяк? Картнеяк? А калмамс, кадомс эземпряс кулозентькак? Мезесь кулы, наксады, таштоми — полавтови. А вана «Зори коммунизмасо» теезь ферматне одольть. Мекс эрявсть тапамс? А неят ломань ликак. Маряви, поркснезь-синдтрезь пелькстнэнь ды зыян тикшенть юткова-потмова якить ансяк кулозтнень оймест. Шкань-шкань вармань сультне сравтнить сянгора вайгелест: «Ломанть, эрядо эсенк превсэ! Сестэ истямо зыянс а пачкодтядо».
Эсь превсэ эрицясь — пертьпельксэсь.
«Вачкадо, путодо, чаподо, яжадо — те тынк, ломанть, тевесь, — маряви, тошкить кинть кувалт вастневиця, сёксень толнэсэ тия-тува токазь килейнетне. — Минь тынк лангс а вантано, минек эсенек коенек, эсенек мелявксонок, эсенек тевенек. Вана прядынек кизэнь эрямонок, ней ушодынек телентень анокстамо, мейле... Ды свал-свал истя, киньгак апак кунсоло, пингестэ пингес ладявозь лувсонть...»
Виде. Ансяк сынь, килейтне-чувтнэ, алгаст тикшетне-мезтне, эрить эсест эрямосо, эсест превсэ, эсест ёнкссо-масторсо. Ломанесь вана, «сехте превеесь», — парь: кодат кевнеть чукадят эйзэнзэ, истя лодордомояк карми.
Вайгельпе, омбоце... перькан некеть — кадозь, азортомо, нарьгазь — паксятне. Вить пеле, васоло — удомадо арсиця чопода виресь. Паро, а неявить тонол раужо варакатне, а карныть, седей а калавтыть. Бешоконь, прядызь чинь тевест, пештизь тутмаст ды пурнавсть козоньгак венть печтямо.
Вайгельпе, нилеце, ветеце... Арсезь-мелявтозь, [254] аламонь-аламонь изнинь сисемде ламо «петнень» ды сундерьгадома малава, стомавозь, панжия панжомасо пекстазь кудо кенкшем.
«Иля ризнэ, атя, бажак редямс эрямосонть оймень эждицянть, сельмень кецневтицянть», — тошкстась тень кудос совамсто, превть макссь, кузтемпесэ раськсиця сэрей-ёлганя, эсень кондямо сыре пичесь. «Сюкпря паро арсемат кис, сыре ялгинем. Виде, седеем тарди, ёжом аволь пек вадрятнеде. Ялатеке пря а нолдан, сэрей пильге», — меринь тензэ, превс путомань валонзо марязь.
* * *
Кие мель а путы эрямс ды экшелямс кенярксонь эрьксэ, панжовиця чахра-баляга ютксо? Кие а вечки, натой сыречисэяк, ваномс пиземечирьке лангс эли авань мизолдыця, паро ёжонь сыремтиця сельмс?
Эрьвась. Ансяк...
Таргонь ютазь валске чоподава стявтымим телефонось. Венстия кедем ды кепедия почконть. Дирневтсь Важдай Миколь. Содыя сеске.
— Течи пелеведе мейле палсть Патяевтне, — каятотсь талныця вайгелезэ.
— Сынсь?! — сорнозевинь, рангстынь каршонзо.
— Аволь, аволь, — кудост! — оймавтымим Миколь, сынь ёжос. — Кирвазсь пелеведе мейле, дюм веть. Сынсь эль кенерсть лисеме. Толдонть мезеяк эзь идеве. Мадстиця «ЗИЛ»-эсь ёмась колхозонть ёмамсто. Зярдо састь райцентрасто — а те, содат, колоньгемень вете вайгельпеть, — кадовсть кудоюртстонь ченярдыця тонолт ды судос эциця качамо чине.
— Тевесь мейсэ, тувталось? — кевкстия кулянь пачтицянть.
— Эрьва кода кортыть, — маринь каршо. — Мон кеман вейкентень: кирвазтизь.
— Те кода, кода истя кирвазтизь?!
— Эрьва ёнов сёрмалеманзо кис, видечинь вешнеманзо кис. Вельть уш «одонь» пулопес чалгакшнось. Теня, келенек кувалмаяк васов пачколесь. Таркаваст аравтнекшнинзе сонзэ микшницятнень. Пандызь, аломанень понат!
Теевсь тень берянь. Совась оймезэнь нусманячи, сянгоркс. Серьгединь Микольнень:
— Миколь, ёвтак Григорий Александровичнень ды нинстэнь пельдень седейризкс! Кирдест, иляст нолда пряст, паро куш ушо ёндо кенкшенть эзизь тулодо, эзизь машто! Мезе тейсть — те казне тенст!