Янгамо (2006)/Ламбамо нартемкс/9
| ←8-це глава | Ламбамо нартемкс (2006) by , edited by Рябова Л. А. 9-це глава |
Ламбамо нартемкс (оглавления)→ |
| Нуянь Видяз. Янгамо. Келей ёвтнема, ёвтнемат, тешкст. — Саранск ош, 2006. — с. 117—132 |
[117]
— 9 —
Вень чопода сэтьменть колызе кузтемпень кенкшентень мезе вийсэ гамаемань зэрть.
Каятотсь пинень онгома.
Тарск сыргозсь Элюва ды ёртозь ёртовсь таркастонзо.
— Вай, авакай! Те мезе, кие?! — вайкснезь чийсь вальмантень. Чопода. Кияк-мезеяк ушосо а неяви.
— Самай се, мезденть оргодиксэлинек, — талнозь мерсь Виряз нинзэ ваксс вальманть каршо стямсто. — Седе курок ярмактнень пштидить.
— Чарькодинь, — тошкстась Элюва, — сынь умок таркасост.
— Панжан молян. Сеске а нолдасынь, — лисемстэ ёвтызе мелензэ Виряз.
— Паро, паро, — марявсь мельганзо чоподастонть лавшо, прок сэредицянь, Элювань вайгелезэ.
Путсь шапка, тонгсь кемть, каясь лавтовонзо ланга фуфайка ды лиссь кудыкелев. Чоподаванть, кавто ёнга токшезь, састыне ютась ушонь кузтемпень кенкшентень.
Кашт.
— Кие?..
— Минь! Панжт седе курок, — каятотсть тона ёндо цёраломанень зярыя вайгельть.
— Ды кить тынь? Паряк, кодаткак орт, — эзь капша панжомо, таргсесь, кода маштсь, шканть атясь.
— Минь теть невттяно орт, панжт теть мерить! — шалнозевсть цёрань вайгельтне, кармасть брикстяеме кенкшенть.
«Маряви, копордазь», — прась мельс Виряз атя.
— Каня стака ёвтамс, кить тынь ды косто?! — серьгедсь кенкшенть удало аштицясь, зярдо тона ёно лоткасть брнкстяемеде.
— Вельсоветстэ минь, панжт! — каятотсь каршо.
— Истя меремальгак. Кие тон? Кода фамилият?
— А-а-а, сон мик фамилият кевкстни! — верьгизэкс урнозевсть вень «инжетне» ды седеяк виевстэ ушодсь чавомо. Равтомадонть, секень вант, пры кенкшесь.
Виряз айгизе тулонть, мельганзо саизе трокс путневиця мандонть ды келес панжизе кенкшенть. Ваксканзо мельцек-мельцек уцор-ацор ютасть вете-кото, мекс-бути прясто пильгс раужосо оршазь, буринашка цёрат. Икельцесь мештензэ икеле кирдсь кирвазтезь фонарь. Мельгаст совась «анолдыцясткак».
Паникудосонть валдо. Элюва кенерсь вельмевтеме тол — кирвазтизе стенас понгавтозь лампанть. Теке кельмесэ чавозь сёксень баляга, авась нусманясто, коня алга вансь совицятнень лангс, эсь велень, истя содавикс цёратнень ёнов. Се оно, ашназа, прок лияназ, нересь — Паргонь Микита, се — Чичавонь Миколь, се... «Мезе тейтядо, ожо нерь озязт, — ульнесь Элювань мелезэ меремс, — понксонь кандтнить?! Кавалокс каявиде лангозон. Инявакс саван тенк, мезе тейтядо? Аваломань лангс кедь кепедиде. А! Визькстэметь!» Эзь ёвта мезеяк. Вал эзь ёмавто. Авидечиденть, покордамодонть прязо увнось: мезе тенст эряви, дюм веть азгондицятненень, мезень чумозо икелест прянь нолдазь аштицянть? Кинень берянь вал ёвтась? Лиякс ульнесь. Оно се, Чичавонсесь, аволь весть сакшнось энялдомо — максомс видьмекс сюро. Мейсэ чумозо Элювань, бути кудосост сисем эйкакшт ды весе тейтерть. Те, ловт, модавтомот. Сакшнось Миколь. Элюва чавонь кедть эзизе ильтне, лездась. Ней вана...
Совицятнеде вейкесь, Вачаень Кирин, велень прявтось, азоркс, тей-тов ванкшнозь, ютась икелев. Озась [119] вальманть ёжос, ужос аравтозь стуворонть пес. Потмо зепстэнзэ таргась нилев мендязь конёв, каштордозь келемтизе ды кармась марямга ловномо:
— Пиргужова Елена Антоновна, родинась 23 марта 1870 года в селе Ремезёнкн. Хозяйствасонзо имеет: дом кирьпецень, пятистеыный, два... нет, одну конюшню, амбар, две лошади, две коровы, десять овец, семнадцать кур... Лиятнень, мезеть улить, Элюва баба, ловносынек ней. Пройдите, Микита марто Миколь, ваннынк весе таркатнень. Чарькодиде?
Кинень мерезель, фонарест марто, теке кельтеме чопачат, лиссть ушов.
— Паряк, ёвтасынк, мезе моли? Мекс тей сыде, мезе тенк эряви? — эзь кирдеве, венстизе келензэ Виряз атя, теизе прянзо асодыцякс. — Кить тынь?
— Ёвтаса, — кепедизе вановтонзо Вачаень Кирин пшкадицянть пелев, — миеть вельсоветстэ. Элюва баба соды, тонгак, атя, содат: сынек раскулачовамо, лиякс мерезь, сюпавтнень ютксо Пиргужовань фамилиязояк. Чарькодевсь?
— Пестэ-пес.
— Ашолгадозь, те, лиси, колмо-ниле часонь ютазь, сы подвода. Ульть, Элюва патяй, анок.
Тень марязь, Элювань польдерьсэ тусть сельведензэ, авась ильсезевсь. А кежть, а янксемат потсонзо арасельть... Керязь керясь эйсэнзэ а мезень кис покордамось, кельтеме ракшакс улемась.
— Мейсь ан-ан-сяк мон, ськамон? — лайшемань пачк, пупорькшнезь, пшкадсь Элюва Кириннэнь. — Те кода — ськамон?
— Эно кинь марто? — полгарьгавтынзе сельмензэ велень «комиссарось».
— Кода кинь? Мирдем... — невтсь каршонзо стядо аштиця шержей пря Виряз лангс.
— Ха! Ды тынь, Элюва патп, а церьковасо, а вельсоветсэ апак венча, секскак... — келемтинзе кедензэ якстере чама Кирин ды ёлк варштась аванть сельмс.
— Мейле мезе, апак венча, эрятано уш сисем иеть, — пшкадсь Элюва эсь мелень идемга.
— Те а ловови, кие зяро иеть... Спискасонть ансяк тон. Виряз атя ловови, минек конёвтнень коряс, батракокс. Сынь, содак, кажовонь спискасот, пансемест кияк а карми. Мекевланг, сынст лангс кемеманок.
— Охо-хо-хо-о, — эзь кирдеве, граж вайгельсэ лайшезевсь Элюва ды, кедькоморсонзо сельмензэ вельтязь, юрк совась икеле кудос, комадо прась коникезэнзэ. Ильсемадонть рунгозо сорнось, прок ургатень орма [120] чавсь эйсэнзэ. — Охо-хо-хо-хо, — оймень кериця ризкстэнть охордсь авась чопода кудосонть. Киньгак эзь маря, эзь нее. — Охо-хо-хо, охо-хо-хо...
Совась «батракозо». Озась коникенть чирес. Путызе кедензэ лажицянть лавтовонзо лангс, вадяшизе.
— Оймак, Элюва. Саты, саты, паро. Сельведьсэ мезеяк а теят. Сыненст кияк а кеми. Кияк, дугинем, кияк. Лоткак. Эрямось тень эйсэ а прядови. Лоткак, кунсоломак...
Арась. Элюва эзь кунсоло, эзь маря. Марявсь тензэ лия: эйсэнзэ эрийстэ нолдыть кельме, чопода калмос. Кодгемень иеть, ловт, пинге максозь кудонтень, ули-паротненень. Зяро сельведть, ливезь валозь, ней весе тень саить, саить апак кевкстне. Визьксэнь апак сода. Кадык сайсызь. Пештявить, паряк. Ансяк кадовлизь эрямо чачома велезэнзэ. Кодаяк пингензэ ютавтовлизе. Паломась, кортыть, салыцядо апаро. Стенаткак а кады. Нулгодькс, сюдомань тевесь, конань теить ней, паломадояк ламоксть апаро: а кады эрямо таркаяк. Эряк тосо, косо мерить, тейть сень, мезе мерить, ульть пикс вельде ветневиця вазокс. Те кода истя?
— Марят-арась? Энгамт, мекс теке эйкакш ильсят, натой сорнат, саты-саты, — яла оймавтсь, яла важдавтсь, яла лелювась малавиксэнзэ Виряз.
Аламонь-аламонь пачкодсть валонзо. Оймась.
Виряз лиссь удалце пелев.
Самай те шкастонть кардазсто совасть ломанень улипаронть сокарицятне. Паргонь ашо прясь, Микита, кирдсь вал:
— Лишметне кардсот, реветнеде сисем, скалт арасть, ведрекшт арасть, тувот арасть, сюрояк аламо, паряк, кеменьшка кескавт; ламо теленень анокстазь пильсезь-лазнозь пенгть; тингелангсо ниле покш-сэрей копонят тикше; утомсто муинек коцтто, руцядо-палядо пешксе кавто покш парть...
— Сюрось кодамо? — сезизе ловоманть якстере чама Кирин.
— Вете кескавт товсюро, ниле — Пинеме, кавто — розь, — прядызе ёвтнеманзо мучкицясь.
— Косот асатыкстнэ? — ютавтызе вановтонзо, кевкстизе Вирязонь пансицянь прявтось Вачаень Кирин.
— «Батрактненень» ламо содамс а эряви. Мезе содан, ёвтаса: реветнень сэвинек, саразтнэнь сэвинек, тувонок, содат, арасельть.
— Косот скалтнэ?
— Казинек.
— Кинень меленек, сетненень казинек. Тонь кодамо тев?
— Содат мезе, атя, иля менчеве, лиякс мартот карман калякамо, — чирьстэ варштась Виряз лангс велень азорось.
— Тон, ванан, тандавтницятнень эйстэ. Содат, мон — «батрак», секскак... — апак пеле, каштанчинь кирдезь, «озавтызе» Виряз атя набойгалицянть. — Монень сизьгементнень малава, тонь кондят тандавтницят понгонесть тень зярыя.
Кирин, видеяк, аламнеде чевтемсь.
— Элюва пати, сака тей! — рангстась сон верьга вайгельть тона кудо ёнов.
Чикорк панжовсь кенкшесь. Совась Элюва. Ютась ды озась голландка ваксс, мирдензэ ёжос.
— Элюва пати, скалот косот?
— Тон каня эзить маря, мезе мерсь азорось? — сэтьме, калгодо вайгельсэ кевкстизе авась кевкстницянть. — Тосот, косо тенст улема. Чарькодить? Эсеть тетять кевкстик!
Кирин сускизе келензэ. Ушодсь лиядо.
— Тагояк мерян: курок сы усксиця. Ульть анок, мезе мартот кандови, сайть. Велестэнть сайтядызь Симилеев, станцияв. Ков тосто, а содан. Подводанть самс кудонтень кадовить кавто ванстыцят, вана неть милиция ялгатне.
Те шкас чатьмонезь, палманькс аштиця кавто «раскулачниктне» ды прявтост калдор-кулдор лиссть. Кавтотне, прок мукорть, аштесть озадо тарчксонть вакссо эземсэнть. Вейкесь эйстэст седе сыре, эчке, кутьмерезэ чапакс очконь келесэ, ялгазо — од цёрыне. Чатьмонсть. Неявсь, сась удомаст. Нувсесть.
Нить-полат совасть икеле кудос.
— Мезе ней карматано тееме? — пшкадсь Элюва сонськак а соды кинень ды ботадизе пилысэнзэ, прок чумо, анокстазь кескавонть.
— Тон свал ветицякс ульнить, меельце валось свал кадновсь мельгат. Тонсь ёвтык, — мельтеме, чавозь вайгельсэ мерсь полазо.
— Ульнинь... — чарькодизе Элюва, кинь пирес ёртни кевнеть эриялгазо.
— Те виде, — укстась Виряз.
— Арсек, тейть мезеяк! — Паряк, эрязь иетнень перть Элюва васенцеде кевкстнесь превть, энялдсь.
— Вай, Инешкипаз! Лездак, таргамизь те кажостонть, — эль марямга ознозевсь Элюва.
— Эрьга, седе курокке анокстасынек саемапеленек...
Зярс пурнасть-сэрнясть, Виряз ёвтнизе, мезе эряви теемс.
Шка ламо эзь эряво. Састыне, шалттомо путнизь канстнэнь ве таркас. Кадовсь ансяк саемс.
Виряз совась паникудос. Кенкшенть мельганзо допрок эзизе пекста.
— Полай, мездеяк андсамак-арась?! — серьгедсь, тердизе нинзэ Виряз.
Элюва — прок тескель.
— Тон, атя, аволь сырнеме кармить? Зярдояк истямо шкава ярсамо эзить ойсе, — машнетезь вайгельсэ мерсь Вирязнэнь совицясь.
— Стувтык, чокшне кши паморькскеяк эзинь сайне? Пекем потятотсь, — истямо жо кежиявтницянь вайгельсэ мерсь атясь стувор экшс эцемстэ.
Элюва, мезе мусь, мезезэ аноколь, путынзе «вачодо кулыцянть» икелев.
— Тонсь сускат мезеяк?
— Арась. Ярсамскак мелем арась. Прям, секень вант, лазови. Кодат ярсамот...
— Вант, вант... Ней мезе, ськамон карман чевелямо? Маряви, цёратненьгак пекест вачсть. Истя?
— Вай, авакай! — сэрьганзо рукштядинзе кедензэ азоравась ды тердинзе кургонь автницятнень ярсамо. — Дух стувтыя. Озадо, цёрат, озадо. Илядо визде. Тей, тей вана ютадо! Ямоськак вана, сюк Пазонтень, допрок эзь кельме.
Ванстыцятне покшкавтнеме эзть карма.
Озасть. Валгак эзть чулго.
— Вадряль, Вирязнизэ, ченькскеяк петнявкскень-петнявкс каямс, — варштась Элювань сельмс, кончтась атязо.
— Ченькске, мерят?
— Эли а марят... Муят? — аволь сеске, арсезь, таго пшкадсь Виряз.
Элюва, теке нарвицька ципаканзо марто, чарась-велясь стувор экшсэ аштицятнень перька: кинень пенч венсти, кечине, кинь нулынесэ нардасы икельксэнзэ.
— Костояк уш муян, эрявиндеряй, — мерсь ды ювк лиссь кудыкелев. Аламос аштезь совавтсь кавто бутылкат лавкань ашо вина. Путынзе стуворонть лангс.
Икелест бутылкатне лембеденть ливезькадсть, суликань пижесь теевсь куштазакс.
Азорось пештинзе стопкатнень.
— Кинень васенцесь? — кевкстизе каршонзо аштиця седе сыре милициянть. — Васенцесь, яла мерить, седе тантей. Седейгак, келя, седе вити.
— Как хозяин, так и гость, — ледстизе шинелень кандтницясь, эчке турва ды тюжа пей, келей кутьмере цёрась.
«Мезе теят, сави кепедемс», — арсезевсь явшицясь. Пельсь, илязо лавшомо, ды симизе стопканть пелензэ. Пештизе омбоцеде. Кандызе «как хозяин» валтнэнь ёвтыцянтень. Тона мамштызе малав весе. Мельганзо весть-кавксть копордась однэськак.
Элюва вансь мельгаст, текень содась, яла каванясь:
— Ярсадо, инжеть, ярсадо! Чись кувакаль, пекетне, содазь, вачсть. Ярсадо, цёрат, ярсадо! Илядо визде. Ярсадо, мезе Пазось макссь. Вана товсюронь кши, медне, вана верек алт, пештинк пекенк, илядо визде.
Тевесь а пек мольсь. Каваницясь кайсесь стопкатнева — симицятне симеме эзть правто. Седе сыре милициясь васенцеденть мейле стопканть ансяк токавтнизе турвазонзо. Одось седе лавшомсь. «Ёжов келей лавтовось, тень пулонзо алга ведь а валат...» — тешкстызе эськанзо винань кандтницясь.
— Ну мезе, цёрат, стятано? Пежетькс, монь койсэ, а ули чиремемскак. Куш часошкас сельмтнень конявтомс. Кись учи кувака. Истя кортан, цёрат? — Виряз сайсь мель прядомс каванямонь налксеманть ды васенцекс стясь таркастонзо. — Бути сы удоманк, илядо визде, тыньгак кукшкадодо, каштлангось чаво.
Виряз ютась икеле кудос.
Элюва урядамо эзь карма. Кадызе тарказонзо панжадо бутылкантькак. Палыведтенть алятнень чамаст аламодо якстерьгадсть. Одось яла снартнесь ушодомс кортамо. Стуворонть экшстэ лисеме эзь бажа. Ков сыненст капшамс? Кенерить лужалеме тарчксонть вакссояк.
— Тынь эно кадоводо. Мон сизинь. Мадян аламос. Прялксокс, эрявиндеряй, саинк вана те ташто шубанть, — невтсь Элюва сурсонзо тулос понгавтозь оршамонть лангс ды совиксэль тона пелев, арсезевсь ды мерсь: — Илинк стувто, энялдан мадстемс толонть, лампась гувкаиця, илязо лисе палома.
Валонзо ёвтазь, панжизе икельце кудос кенкшенть.
[124] Часошкань ютазь Виряз стмбарнэ, теке сулей, шаштсь кенкшенть ваксс, кепедизе шапка пилензэ, аравтызе прянзо лазтнэнь ёжос, кунсолозевсь. Мезеяк эзь маряво, кавто ёнкстнэнь юткова варяванть неявсь валдо. «Стувтызь, маряви...»
Састо-састо панжизе кенкшенть ды ютась кечказс понгавтозь ведрантень. «Симеме». Ве сельмсэ неезденть токизе апаро ёжо: милициясь аравтызе эземненть кудонь кенкшенть каршо. Аштесь эйсэнзэ кунст мадезь. Прянзо ало Элювань ташто шубинезэ. Маризе «симеме» совицянть. Гылдорк варштась лангозонзо. «Пе, те пинеденть а оргодят. Пеензэ-сельмензэ верьгиздэ пштить. Паро, совамсто лавтовон лангсто шубам каякшныя, сеске педяволь эйзэнь...» — талнозевсь Виряз.
— Берянть тевтне. Чарькодсь шинелень кандтницясь. Ванстыця кискакс ашти. Эзь маняво кши печтьсэ. Мезе, мезе теемс?! — ёвтась мекев совамодо мейле «симеме» якицясь.
— Вальмава а лисевтяно? — апак учо сась Элювань мельс. — Тейть, тейть мезеяк!
— Э-э, — арсезевсь, чаравтызе тей-тов прянзо Виряз атя, — теленсетне путнезь, эрявить узере ды мушкор. Узере... Ужо, ужо, косо сон монь? А-а... теске, аксяло.
«Паряк, алкукскак снартомс?» — арсезевсь Виряз коник алдо узерензэ таргамсто. Мольсь икельце вальмантень, мендинзе эсктнень ды кедьёнкстомо, сурсо аламонь-аламонь тей-тов пурдтнезь, таргинзе сынст. «Паро, эзинек кенере эцнемс ды педявтнемс конёвсо». Узере неренть нерьгстызе кундонть ды пельцанть ютксо лазкскентень, лепштясь, ды пельцась шаштсь кудопотмо ёнов. Эзь учне атясь, истя шождасто лиси тевезэ.
Свалшкань ушо ёнкс вальмась кавтов панжтневиця. Шпингалетнэ айгевсть верев-алов виень апак путо. Вальмась панжовсь. Совась экше кошт.
— Весе, Элюва, — кенярдозь тошкстась Виряз.
Шкадо икеле кецнесь атясь.
Вальманть мекев пекстамсто кенерепакарьсэнзэ токавсь узересь ды зэрнезь прась эземстэ.
Удало кудосто марявсь кашторкс, каятотсь вайгель. Келес панжовсь кенкшесь.
— Что здесь происходит?! — рангстась седе сыре ванстыцясь. — А ну по местам!
Вановтозо кивчкаесь валгстозь вальмастонть атянть лангс.
Совась одоськак.
— Мезеяк а моли, — нуварасто, сизезь мерсь Виряз, шаштсь ды озась коник чирес.
Лиссть удало кудов.
Азортнэ кадовсть кавонест. Тевест каладсь.
— Мезес а кундат, парос а прат. Ков ваныть? Зяроксть теть мернинь: мезе саят, лутык тарказонзо! Ней на вана, оргодинек... — кода свал, ушодсь музгордеме, атянть ёжонзо човсеме Элюва.
Виряз чатьмонсь. А мезть пелькстнемс: истякояк потсонзо идемевсть киштсть, мезе лиссь — лиссь. Мекев а витьсак.
Каштмолема.
Пупорькшнезь, валтнэнь башка-башка ёвтазь, колызе сонзэ Виряз:
— Эряви арсемс, кода седе тов тенек улемс: кавонек поладсынек эрямонь кинек эли...
— А содан мезе меремскак. Седеем човорятокшны неть арсематнеде. Арсемскак вием арась, — потмура ёжонь марязь ёвтызе мелензэ Элюва.
— Ули-арась виеть, кодамо илязо уле ёжот, прама тенек ве мельс. Эно кода?
— Видьстэ меремс, а мезть пря яжамс. Молиндерят, нолдындерятадызь — адя. Теке марто... — кавтолдозевсь Элюва.
— Мезе «теке марто»? Прядык ушодозенть.
— Иля покордаво ансяк: тонь иетнеде арсян — сизьгемень, мерть. Ков мартост?.. — видькстась, панжизе мелензэ Элюва ды озась мирдензэ ваксс.
— Те истя. Тон одат, кеман, велявтоват чачома масторозот. Мон жо... Бути тов, Сибирев-ков, пачкодян... пачкодян куломо. Мекев уш Сайнелев а велявтан, Валдонянь ды Лиянань зярдояк а несынь. Кадовомс Эрьмезьвелес? Кинень тонтеметь?
— Истяяк арсян: ве прям седе шожда ули трямс, — калавтсь арсема кирензэ Элюва. — Теке марто, Инешкипаз, марямак, зяро иеть вейсэ эрязь! Кадык ульнесть аладямот, покш сёвномаскак а весть пачколинек. Мезть а эрсить эрямосонть! Ды ней весе тень, эрязенть, — шукшпряв?!
Виряз прянь нолдазь кунсолось нинзэ.
— А карминдеряйть кардамо? Кода улемс? — лия ёндо варштась сон те меленть лангс, аламнеде талакавтызе аванть кевкстемасонзо.
— Тевесь, атя, тонсь содат, аволь кардамосонть, — [126] кирдсь эсь мелензэ Элюва. — Ну, мертяно, нолдатадызь мартон, «батрак». Мейле мезе? Сыргат тов куломо? Тонсеть валтнэ. Иля покордаво.
Виряз чиремсь. Прянзо путызе вакссонзо тодовонть лангс. Марявсь, стомавсь чинь-чоп котьмамонть ды майсевеманть эйстэ.
— Монськак а содан, ков ажиян велявтомс. Сыргамс мартот, нолдындерясамизь, — те педе-пес туема чачома ёнксстот, васолонь калмазырев туема. Велявтомс эсень кудов — тосояк паронть иля учо. Кадовомс теске? Те кудонтень? Иля арсеяк. А макссызь.
— Виде, атя. Ансяк монгак теть а лездыця. Несак, киян мон ней...
— Тон салмукст саить? — лиядо кортазевсь Виряз атя тодовстонть прянзо кепедемстэ, вановтозо прась киякс куншкасо ве таркас пурназь саемапельтнес.
— Саинь, — мельде-валдо, нузялдозь мерсь Элюва.
— Суреть?
— Тонсь а содат мезть кевкстнят, — эзь кирдеве, машнетезевсь авась.
— Сынь васняяк эрявить, истя?
— Тонстеметь а содан...
— Ярмакот таркасост?
— Таркасост, таркасост! Сядоцеде кевкстят.
— Монень зярояк а максат?
— Вантакая! Тон, атя, аволь велязевеме кармить? Монь ве панарсо ильтить та-ков идемевсень пуло алов, тон — ярмакт... Теске, чей, кадоват — а ёмат, — пизякадсь Элюва, мик атянзо ваксстояк стясь; мадсь кунст апак аца, штавтозь тарказонзо.
Виряз атя эзь ёвта валгак. Одс чиремсь коникезэнзэ. Кепединзе карсезь пильгензэяк. Весе, ваньксчись, урядось ней уш кирдемс а мезекс. Мик Элюваненьгак ялатеке. Икеле тень кис истя понговоль!.. Карциганокс яла каявиль мезентькак а тарказонзо путомсто.
«Пароль часошка удомс», — сась превезэнзэ. Истя эзь лисе. Удомазо эзь са, прок тандадсь ды козонь-бути кекшсь. Элювань ярмактнеде покордамонь валонзо, сы шкадонть арсематне карасть Вирязонь удемензэ.
«А эрявить ярмакот! Кудонь рамсемадо ледстнемскак а мезть. Ды мезекс сон? Карть пильгезэнь кодан, шубамгак ули, саты куломазон. Понксон-панаронгак зярскак сатыть. Ярмакось — кежень парго. Эрьвась соды. Ансяк сынтемест кандомс эрямонь канстонть а шождыне. Целковойгак эзь максо, а! Ва теть малавикс, ни. А стяко келем а велявтови пшкалемс тензэ [127] «ни». Пазось неи ды видестэ теи — явовты эйсэнек. Умок уш эряволь. Яла виень эзть сатно сеземс тертенть. Зяроксть снартния — эзь лисе. Кодаяк, кодаяк... Маряви, сонсь Верепазось кундась лездамо. А стяко кортави: берянесь вадрявтомо а яки. Мезть ансяк а лиснить ютксонок. Ламот истя кортыть: келя, беряньстэ теить — пансить сюпавтнень, сюдыть пансицятнень, верьс пачколить. Кода меремс... Кува-кува истя эрявияк. Неть самай сюпавтне аволь весе ангелт, аволь ревелевкскетькак. Кой-кить истя таштызь кудост-чист — визькс ёвтамс: салазь, колазь, манчезь... Вана Элюваяк... Мезеяк а мерят — лишме. Уски чинь-вень апак сода. Виде, виде. Ансяк вана модань онкстницявтомонть, Паксютычтеме... истямо икелькс тензэ аволь саеве. Монь марто, вант, мезе теи. Те ков маштови? Юртай, Олдай карязт эрьва ие яжасть тензэ... Мезе тенст пандсь? Секскак кой-конатне кадык а лажныть. Элюва, кода илязо уле, ютазь мартонзо оно зяро, ды ней — кавто ёнов. А кемевияк. Эрьванть эйсэ идемевсь. Эрьванть. Секскак лопавтнемс сонзэ а мезть. Ков ней ноготон каямс, кона ёнов?»
Виряз стясь. Ютась кисэст «мелявтыцяст» ёнов.
Мезеяк эзь полавтово. Икеле ладсо палсь стенас понгавтозь лампась. Прок празь палмань, мадезь аштесь тарчксонть кувалт аравтозь эземсэнть ванстыцятнеде седе сыресь. Удось мариця удомасо. Виряз ваксканзо ютамсто токизе лавтовс.
— Чо ты? — тарск тейсь ды кургонь автезь кевкстизе сыргозтицянзо пондакш пря цёрась, озась ды ёзынзе — удоманть седе курок панемга — сельмензэ.
— Ды мон мезеяк... Чияк кортыть эрзякс, ней — рузкс.
— Да, русский я.
— А-а... Слушай, русский брат, давай договоримся. Чего нас тут караулить, всю ночь маешься? Помоги нам выйти. А? В долгу не останемся, — салава, кияк илязо маря, пшкадсь Виряз.
— Чо?! — тетькинзе сельмензэ ды абунгадозь варштась ванстыцясь икелензэ аштиця апокш, теине лавтов, шержей пря атянть лангс. «Тон мезе, чаулакс монь ловат?» — сёрмадозель милициянть сельмсэ.
Виряз мельде-валдо ахолдась кедьсэнзэ ды эсь пачканзо мезде-бути мотордозь ютась мекев икеле кудов.
— Мезть тосо? — кевкстсь Элюва.
— Аштить. Ванстыть. Алтнинь тенст венстемс.
— Мейле мезе?
— Аволь эряво келеть венстнемс. Мерить, ярмакост ламо, — седеень марязь мерсь Элюва. Авантень марявсь кудосонть экше, кумажадо верьга вельтинзе карсезь пильгензэ.
— Арсинь, марясамам, понги кечказонтень. Стяко, — ве мельс прась атясь нинзэ марто.
Виряз ютась стуворонть велькссэ потолокс понгавтозь лампанть алов, венстизе кедензэ, кепедизе пузыренть ды омбоце кедьсэнзэ мадстизе штатолкс типельдиця толнэнть. Сеске кармасть редявомо од чинть васень эскельксэнзэ — вальматнева варштась якстертьсэнь ашолгадомась.
Каятотсь кельмевтезь кияванть крандазонь ардомань дорнома. Сон яла виевгадсь.
Жу-уйк — мерсь Элювань седеезэ марязденть.
«Гуесь сыргозсь», — тешкстызе эсь пачканзо Виряз. Эзь маняво. Калдордомась лоткась кудост каршо.
Каятотсть цёрань вайгельть ды дубор-дубор совицянь эскелькст. Тоцк панжовсь кудос совамо кенкшесь. Совасть чокшненсетне.
— Косот?! — рангстась ванстыця милициятненень Вачаень Кирин, велень прявтось, аволь сэрей, колоньгеменьшка иесэ якстере чама цёрась. Чапакс очконь келесэ лавтов милициясь эзь мере валгак, ахолдась кедьсэнзэ икеле кудос кенкшенть пелев.
— Аштеде теске, — кардынзе Кирин ялганзо ды увк совась ней уш икелень азортнэнень.
Элюва пурназь-сэрнязь аштесь озадо стувор песэ. Пилысэнзэ понань кемть. Тонговтынзе полазо. Келя, ламо якамо а кармат, зярс ускомонк кармить, пильгеть улест лембесэ, иля вано — лов арась. Кияк авантень эзь максне уликс иедензэ ламо. Чачозо неявсь седе одокс. Неть меельце читнень-тарготнень перть коняванзо, сельмензэ чирева сормсевкстнэ теевсть седе домкакс, редявиксэкс, вановтсонзо менель сэныптесь олась, уло алксозо новольсь. Кода а полавттадызь истят майсематне?..
— Адя, Элюва патяй, сынек мельгат! — апак шумбракстне, шапкань апак кая, сеериця човине вайгельсэ мерсь совицясь.
Элюва сырк эзь тее. Польдерьсэ тусть сельведензэ.
— Ськамон? Атявтомон?
— Ськамот. Кевкстнинь покштнэнь, мерсть — ансяк ськамот, — нулновтызе прянзо валонзо кемекстамга ды келемтинзе мештензэ икельга кедензэ. — Апак сёрмадстозтядо, тувталось теке.
Стясь «мазый» ужосо понгавтозь пазаватнень каршо. Чекизе конянзо. «Инешкипаз-Верепаз, энялдан, илямак кадо, илямак стувто, лездак паронь паросо, шумбрачинь шумбрачисэ. Чангодть изнямс стакачитнень, лисемс ваньксстэ, виень вийсэ кажостонть». Варштась стенасо таркантень, косоль тетянзо фотынезэ. «Нолдык, тетяй, чумом, мейсэ теть берянь теинь, берянь вал ёвтынь. Несак, мезе, кодамо кажочи лиссь тейтереть марто. Ох, тетякай-тирякай, нолдык чумочим а истя прянь ветямом кисэ, а истя кортамосон! Нолдыть пежетень, нолдыть, нолдыть», — турвасонзо чевелязь, эстензэ марямга меельцеде кортась сехте малавиксэнзэ марто. Велявтови-арась зярдояк тиринь, чачома кудонь латонзо алов? Теде эзь сода ды эзь арсеяк. Теде эзь сода кияк. Пазось эзь максо содамс валскеденть. Весе, мезе мольсь перьканзо, авантень ульнесь «ялатекекс». Прядынзе энялдомань валонзо, сюконясь ды лиссь кудостонть.
Икеле мольсь сэрьс вишка Элюва, мельганзо — вете бурина цёрат-ванстыцят, меельцекс — курмонзо-кармонзо марто Виряз полазо. «Мезес пачкодить, — ютась превганзо пельсчопода кудыкельганть молемстэ, — пелить кавто аршинэнь сэрьсэ уш аволь од аваломанде, пелить — оргоди. Лиси, покш вий те авинесэнть! Зярдо те масторсонть эзть сэве виевтнень ды превейтнень?» Истямо седей марямо токизе Элюваньгак. Сон маризе эсь прянзо неть нула, неть лавшо понкс цёратнень коряс седе виевекс, анелицякс ды, кодамокс ульнесь свал, азоравакс. Вете цёрат эйстэнзэ пелить!
Менелесь ванькс, пижеласэнь. Эзганзо, мезде-бути ризнэзь, айги чимадема ёнов ковось, олякстомты тарканть лембень-валдонь казицянтень. Парочинь явшицясь учомо эзь карма: лембе ожосо артызе Мода вельксэнть. Якшамонь коряс ушосонть теле, ковонь коряс, ловонь аразьсэнзэ — сёксь. Эзь маняво Элюва — оршнесь лембестэ.
Виряз каизе лавтовонзо лангсто крандазонтень покш тапарксонть, капшазь совась мекев кудос, ливтизе омбоце канстонть, путызе васенценть ваксс. Колмоцеде [130] совамсто саинзе эсензэ ули-паронзо, кескавс эцезь панаронзо-понксонзо, пенчензэ-ваканонзо. Мезе теде башка шикадят? Телень оршамопелензэ лангсонзот, понань кемензэ путынзе, карень зярыя керьметькак путсь. Лаксемань-инзэдемань кедьёнкскетненьгак эзинзе стувто саемс. Маштовить, кода цёраломаннень сынтемест?
Путынзе таштазь сюпавчинзэ кузтемпес.
Якшамонть ды валскень ушодоманть лангс апак вано, Пиргужонь вальмалов пурнавсть Шорянь Олдай, Ураень Юртай, Кузаень Вияна, Керязонь Валдоня. Ютксост Куляз атяяк. Косто марясть? Кие ёвтась? «Активистнэ» тейсть тевест кекшнезь. Ялатеке салмуксось эзь кекшеве... Веле. Пилензэ келейть. Аватне, Элюва лангс ванозь, носксть судосост, цёратнень сельмсэ неявсь мелявкс, састь прок кулозень ливтема таркас.
Элюва вансь пурнавозтнень лангс, конат аштесть курынесэ крандазонть вакссо, ды маризе, кода седеензэ седеяк пек лепштизе-сювордызе ризксэсь.
Элюва аштесь крандазонть вакссо. Ожа песэ секе тев нардтнесь сельведев чаманзо. Седеесь аволь кшни. Лангозонзо ванозь эзь кирдеве атязояк, сювордызе седеензэ кодамо-бути потмовий, лексеманзо кундызе кирьгапарьс кеверезь ал. «Эх, Элюва, Элюва, чивалдынем, ламбамо нартемкскем...»
Шаштсь ёжозонзо, варьгавтомо кедензэ путызе вить лавтовонзо лангс ды важовнестэ лепштизе сыречинь вечкеманзо эсензэ ёжос. Витизе лембе пацянзо, шуба сивензэ. Яла тензэ эзь кемеве: истя малавиксстэ аштить меельцеде.
— Оймак, оймак...
Элюва тень таркас нолдызе прянзо атянзо мештьс, лекшкадсь ды сорнозевсь ильсемадонть, вайгельтеме лайшемадонть. «Мезень кис, мезень кис? — певерсть кургстонзо пеняцямонь салов валтнэ. — Мезень чумом, мезень чумом?..»
— Тон тень сёрмине кучт, ков усктадызь, — нусманя арсематнень кардамга мерсь Виряз, кодамо илязо уле — мирдезэ.
— Сёрмине кучт... Кинень? Косо кармат эрямо, нить кедьсэ? Эли косо лиясо? Сёрмадыцяськак мон... Стувтык, а маштан?
— А содан, монськак а содан, кона ёнов сырган. Оно мезе тейть: кучт шабратненень. Сан — сайса. Кортынек? Куляз атянень. Истя? Адрескеть пачкодезэ.
Элюва саизе прянзо Виряз атянь мештьстэ, варштась сельмезэнзэ ды мерсь:
— Тень кис иля мелявто. Сёрмадан, — оймавтызе Виряз атя.
— Кеман. Манчемат мельгат арасельть. Тень кувалма майсемат эзинь сода.
«Кулаконь» пансицятне, лишменть вакссо аштемадонть башка, совасть ды «ёмасть» зярыя шкас кудонтень. Окойники, мезде-бути эсь ютковаст кортазь, лиссть. Вейкесь эйстэст педявтсь кузтемпень ды кардазонь келей кенкштнес конёвнеть. Мезекс, мезе эйсэст сёрмадозель, Элюва марто Вирязнэнь ялатекель.
— Ну весе, сыргатано, кузть крандазс, — каятотсь кармавтыця казямо вайгель, марявсь, Вачаень Киринэнь.
Виряз атя меельцеде кутмордызе Элювань, палызе турвас, сельведтнеде салов сельмс, чамас ды эрязасто, рестедезь ладсо явизе эсензэ эйстэ. Увол-авол, петькеленть пес чалгазь, кузсь «кулачкась» крандазонтень ды озась канстонзо ваксс. Озасть кавто ильтицят-милицият.
— Ванстт эсь прят, Элюва, пря пек иля чаво, мезентень улемс — улема. Кемть парос! Паз, чангодть Элюванень!
Лишмесь сыргась.
Элюва велявтызе сельведтнеде якстере чаманзо, варштась меельцеде чачома кудонзо, мирдензэ лангс ды зярыяксть ахолдась кедьсэнзэ.
Виряз, прок чаво паксяс стявтозь палмань, аштесь таркасонзо, эзь тее сырк, истя жо нинзэ каршо ахолдась зярыяксть кедьсэнзэ ды вансь, вансь сельмензэ икельде аламонь-аламонь ёмиця крандазонть, эйсэнзэ чопода-якстере тюс шубасо ломаненть мельга. Тусь эйстэнзэ эрязь, лиясто кенярдозь, шкань-шкань ризнэзь, кавтолдозь, сёвнозь, эрямозо. Крандазось, покш мелень путозь, паряк, кодаяк велявтовольгак, эрямонть велявтомс — иля снартнеяк.
«Яла арсинь, яла стака шкатнестэ бажинь туемс те кудостонть. Кинь мезе учи, кияк а соды. Паряк, туемань таркас теске печтявлияяк пингем. Теске. Тевсэ палыця, свал музгордиця те нимилявнесь сельменьгак пекставлинзе. Ансяк эрямонть эсензэ чудильманзо. Эсензэ кинзэ-янонзо...» — вансь Виряз ды лиесть прясонзо, вейкень-вейкень полавтнезь, нусманя мельтне.
Крандазось теевсь крандазкекс, велявтсь веленть [132] трокс ютыця кинтень ды кекшсь сельмензэ икельде кудотнень экшс.
«Весе. Прядовсь. Кавксо, ловт, иетненень аволь Элюва, аволь монсь — путсть пе ломанть...» — яла эзь сыргаво атясь, прок пильгензэ педясть кельме модантень, яла вансь тона пелев, козонь ёмась чопода-якстере тюсось, ков саизь нинзэ марто эрязь иензэ.
Сурсонзо нардынзе сельведтнень, ютась кузтемпес нежедезь кескавозонзо, каизе кавто ведьме вельде лавтовонзо трокс ды сыргась Пичепень кудотнень икельга таргавозь яннэванть.
Ков?
Ков, чачома веледеть башка?
Тов, косо калмазь тетят-ават, косо удыть покштят-иняват. Тов, косо васенцеде варчик коштонть танстензэ, кува чийнесь эйкакш пингеть ды элякалесь од шкат, косо...