Янгамо (2006)/Ламбамо нартемкс/8
[98]
— 8 —
Чипаесь апак визде кекшсь ванькс, якстерестэ артозь менель чиренть томбалев. Чись ютась, кода ютасть сядот, ламо тёжат; прядовсь лиятнекс тевсэ: кудоютконь, кардазонь, тингень, пирень... Ракшатнень андомат-симдемат, пенгтнень анокстамат, вирев молема, ваньксчи кирдема... Уштома, пидема, панема, штердема, кодама, викшнема... Пе арась тевтненень. Мартост кедте кедьс кундазь талномат, кецнемат, сюмордомат, янксемат, пеедькшнемат, мелявтомат... Арась пе [99] сыненсткак. Ды весе тень лемезэ — эрямо. Сынтемест сон аволь уле.
Тевсэ эскелясь эрямонь лувось Юхмань, Кажань, Аржаень, Ураень, Пачаень, Кирдянонь, Чичавонь ды Эрьмезьвелень лия эрицятнень юртсо. Теке ладсо мольсь сон Пиргужонь Элювань кудосояк. Эрьва ломанесь, кудось, буесь «сявордсь» сынст, тевтнень, эсензэ койсэ. Эрьванть эсензэ обуцязо, дошузчизэ, эсензэ койсэ ветявикс тевензэяк. Эсензэкс, лиятнень коряс аламнеде лиякс, мольсть сынь Пичепесэ якстере кирьпецень, лазсо вельтязь кудосонтькак.
— Ну, Элюва-пиципалакскем, ловт, весе. Китне икеленек панжадот, — мерсь, теке чапизе, Виряз чокшнень ярсамодо мейле пенчень-ваканонь ёрвалдомсто, — ванды станцияв. Билетт рамамат.
— Вай, иля ледстнеяк теде! Яла тень а кемеви — кадса чачома ёнксом. Марян теде валт — жу-уйть мери седеем.
Аванть лангсо эрьва чинь покай, пильгсэнзэ понань кемть, лавтовонзо трокс нардамо паця. Ашти сон стядо поланзо вакссо ды апак капша нардтни мельганзо шлязь кедьгетнень.
— Ледстнек-иля, тенень, Элюва, улема. Чачома пизэстэть, мерть, мезеяк эзь кадово. Кудось ансяк. Сеяк уш аволь тонь.
— Каня мон... минь истят уш сюпавтано? Ведькевенек арась, оень чавовтоманокак арась.
— Кевень кудось. Арсить теде? — кевкстизе Виряз вакссонзо котьмицянть.
— А кемевияк. Те кода истя, саемс? Мон жо эйзэнзэ весе виень путынь. Чить-веть эзинь удсе. Ды саемс?! Те кода истя? А кемеви, а кемеви, — пеняцясь, сонськак эзь сода кие лангс, Элюва. Зяроцеде уш марясынзе неть валтнэнь Виряз.
— Вана мезе, ялгакай. Ванды валске, станцияв сыргамодон икеле, варштан Ёколдань Дырнайнень. Сон велесэнть, ёвтнемат коряс, седе эрий-эрьмев ломань. Содамочинь коряскак дока. Паряк, ёвты мезеяк, — мель ёвтась Виряз ды калдорсо каинзе пенчтнень стенас понгавтозь паргинес.
— Паро, паро, варштак, — прась ве мельс азоравась лавтовстонзо нардамонть понгавтомсто. Путынзе кадовикс кедьгетнень шаваняс ды совавтынзе-путынзе каштом икельксэнь лавсяс.
Виряз юксинзе пильгензэ, кузсь каштлангс ды понгавтнинзе цюлканзо-пракстанзо трубанть ёжова чавозь [100] жолганть ланга — коськест валскес. Носкозь валгсь ды кепе ютась икеле кудов. Мельганзо совась «ялгакскезэяк».
Чись прядовсь.
Чись мадсь.
Од валскенть ушодызе ламо иень перть тонадовозь тевесь — чоподава скалонь потявтомо стямось. Сон сезизеяк аванть тантей удоманзо. Стиксэль... Арась, эрязкалемс а ков, кардазось, а кемевияк, ловт, чаво. Ниле-вете ревинеть ды саразт. Авольть улеяк Варма ды Тештине, авольть парнетнеяк сынь, кудотне-читне улевельть урозокс. Превскак эзь сакшно: ютыть ковт, ды нардевстэ, мелень путозь пурназь, урядсо кирдевиця те юрттонть ледстнемакс а кадови саразонь кекердемаяк.
Виряз атянь Инешкипазось эзизе покорда удомасо. Путсы прянзо прялксонтень — корны уш. Валдо, чопода, рангить-арась перьканзо, сонензэ ялатеке. Яла истя мери: «Сисем частнэ улест монь». Ансяк сонгак эрямонзо перть аволь аламо веть ютавтсь апак удо. Сонгак аволь кшнинь. Паксютычень сакшномадо мейле весь а стувтови зярдояк. Мерьказь удома таркась, пуворязь вельксэсь аштесть сестэ сельмензэ икеле веньперть. Эрьва кода сестэ снартнизе вырновтомс превстэнзэ неезенть, мезеяк эзь лисе. Майсевсь ашолгадомс. Истят тевть, истят веть вейсэ эрямост перть лиснесть а весть.
Течи стясь, кода свал, атякштнэнь валскень васень морост марто. «Сон теть авадря куля рангстась, тон яла корнат, карво панго!» — тошказь мерсь эстензэ лангстонзо вельксэнть ахолдамсто. Элювань пувтамо эзь карма. Кадык удоманзо явавтсы. Салавине ютась удалце кудос, ёрвалдызе сакалов чаманзо, амарямга карсесь-оршнесь ды валгсь кардазс: валскень тевензэ, кадык аламолгадстькак, теемат. Сынст прядозь, кудос апак совсе, сыргась чокшне ёвтазь валонзо топавтомо — Ёколдань Дырнайнень варштамо.
...Келейстэ панжовсь кудо кенкшесь, ды тарчксонть трокс эрязасто эскельдясь Ураень Юртай. Пиргужнэнь сонзэ течи кияк эзизе тердтне, кияк эйсэнзэ эзь учо. Седеяк пек — ашолгадозь.
Элювань икеле аштесь аволь сэрей, аволь алкине, ниленьгемень иеде сыре, туторо рунго цёраломань. Лангсонзо кандтнезь-пандтнезь кухайка. Прясонзо шапканть кепедезь пилензэ апак сюлма, тарныть, прок пинень пилеть. Сыцянть чемень тюс, теине, теке сеянь, сакалонзо умок апак нара. Ченькстэ симемадонть сельмекерензэ таргозезь, сэнь сельмензэ эль неявить. [101] «Мазыйть улевельть...» — кивчкадсь «инженть» вастыцянзо превсэ.
«Вай, Юртай-какай, мезес пачкодить!» — мериксэль Элюва. Эзь мере. Мезень лезэсь? Зяроксть мернезь? Тевде а пели, превей. Кодамо тевень ветий цёра улевель, аволизеяк максо прянзо идемевсень пельде казезь кренчень ведентень. Ськамонзо велесэнть истямось. Мекс сон чопавтсь те отьмантень?
— Элюва пати, идемак, кулан, кандт куш зярыя петнявкскеть. Прям, секень вант, лазови. Исяк ланга саевсь, — нильтянясто мизолдозь, энялдсь совицясь, аноколь «петнявксонть» кис прамс кумажа лангс.
Элюва, сеедьстэ кев калгодо обуця, эзь кирдеве, совась каштом икелев ды куроксто лиссь тосто пешксе цяркине ды кши печтьке марто.
Юртай глынкадизе кандозенть, ожа песэ нардынзе сакал потсо турванзо ды весть-кавксть никстямодо мейле сусксь кши печтьстэнть. Витизе прянзо.
— Теня, Элюва патяй, сюконян. Вельмевтимик. Ней эрян. Мон, теня, аволь ансяк тень кувалма сынь. Кизэсь прядовсь. Зярыя ярмаккеть эрявольть...
Элюва цяк эзь аймельгадо марязденть. Сельмензэ полгарьгадсть, сельмечирькензэ сёлминекс «кирнявтсть» верев.
— Те истя мезень кис?
— Ды, теня, кода мезень кис? Т-тундо, кизэ кедьсэнк важодинь.
— Тень кис, Юртай, — полавтовозь, седе чевте, валаня вайгельсэ мерсь Элюва, — андынь-симдинь эйсэть тундонь-кизэнь перть. Секскак...
— Те эдь, Элюва патяй, пек аламо, — прянзо нолдазь, теке тейсь кодамояк чумочи, яла пеняцясь Юртай.
— Тон арсят, ярсамопельтне мезеяк а аштить? Маняват. О-о-о... Питнейть сынь.
— Мон, мон истя а арсян, ансяк, теня, куш кухай-кине тень эряви ставтомс. Курок те-теле...
— Содат мезе, Юртай? — мизолкс марто пшкадсь Элюва. — Монь ули кухайкам. Ташто, виде, кандтнемс ялатеке маштови. Теленть ютавтсак. Невтьса?
— Арась, а эряви. Мон, теня, кортынь Каштазонь Дрига марто. Сты тень. Од. Ансяк эряви тензэ пандомс.
— Арасть, Юртай, ярмакон, — мерсь Элюва марямга, эсь пачканзо арсезевсь: «Ялатеке симсынзе...»
— Ко-кода арасть? Скалот миить, маринь, сюрояк мииде, — эсензэ содась, вешсь ярмакт кирьгапарьс кайсемань вечкицясь.
[102] «Вай, авакай, косто соды? Теинек тевтнень салава, ялатеке содыть. Те кода истя? — абунгадсь азоравась. — Педясь эйзэнь педлий тикшекс, а лутави».
— Эряви атянть марто кортамс, — мерсь Элюва, мезе васенцекс сась превзэнзэ. Эзь сода, кода ильтямс безарькс инженть. — Сак ванды, мезеяк тейтяно!
— Монень течи эрявить, Элюва патяй, — эзь арсеяк потамодо Юртай, нардевстэ аштесь эсь мелензэ кис. — Во кода эрявить!
— Ванды, ванды сак! — казякадсь ды пштилгадсь — эзь кирдеве — Элювань вайгелезэ, истя бажась путомс вешицянть тарказонзо. — Седе виде — таргошкань ютазь. Меринь, саик ташто кухайканть, тон марикскак эзить тее.
— Ва-ванды сан.
— Сак, тагояк мерян, таргонь ютазь, — Элюва велявтсь удал ёндо ды ёлк совась каштом икелев.
Юртай прянь нолдазь тохмадизе кенкшенть кутьмерьсэнзэ ды сэпей ёжонь кирдезь лиссь кудостонть. «Паро куш прянть витизе, зярскак эрян», — неть мельтнеде ёжозо седе вадрялгадсь, ды сон валгсь кузтемпестэнть прянь кепедезь.
Ансяк Элюва рожодомсь каштом икеле котьмамо, марявсь совиця. «Те таго кинь канды эвсесь? Атясь? Арась. Эно кие таго?»
Чико-орк мерсь кенкшесь, кува ансяк потазь лиссь Юртай, ды каятотсь баягинекс гайгиця авань вайгель:
— Шумбратадо! Кудосонть кияк ули? А?
— Ули, ули. Ютак, — кедензэ нулынесэ нардтнезь, лиссь каштом икельде Элюва. — Ютак, Олдуш. Талай кедьсэнек араселить.
— Эзимик тердтне. Секс талай. Зяро? Кеменьшка чить ули, маряви, — валонзо ёвтазь, сыцясь эскельдясь икелев ды озась эземпес.
«Теке эчкелгадсь, чей аволь пешксесэ? — редизе Элюва Олдаень чамас варштазь. — Монськак а содан, мезть ремедян. Кодат пекиямкат сонзэ иетнесэ?! Куялгадсь аламнеде — те виде. Лия ёндо эзь полавтово. Кодамо ульнесь — а сэрей, а келей, — истямокс кадовсь».
— Мезть якат-пакат, Олдай ялгинем? — кевкстизе Элюва. Келемтизе нулыненть, сорновтызе ды понгавтызе голландканть ёжова таргазь карьксэнтень.
— Ды кода меремс...
— Мерть, кода мерят.
— Сыргинь лавкав. Видезэнк пачкодинь, [103] арсезевинь: варштамс эряви, зяро уш араселинь. Кода, мерян, эрсить Пиргужтнэ?
— Сюк-сюк валот кис. Пиштетяно, кода неят. Ней мезе... Паксянь тевтне маштсть, кастозесь ладсезь таркава-эземга. Мелявкстнэ ней чарыть кав-кудо перька. Ве таркасо пивттяно, — голландкас аламнеде нежедезь, ёвтнесь неень шкань мелявкстонзо азоравась. Содазь, сёпизе, вал эзь ёвта вейкеде: кардазост Пиргужтнэнь, мерть, чаво. — Кода, ёвтык, тонсь эрят?
— Кода свал, Элюва пати, ськамон яла, ськамочи, — нусманясто пейдезь пеняцясь эрямонзо лангс Олдай. Варштась Элювань сельмс ды поладынзе валонзо: — Монень, Элюва пати, видькстан, зярыя ярмаккеть эрявить. Лавкас, келя, паро метерия усксть.
«Вай, авакай! — эль эзь пра Элювань кургсто «ярмаккеть» валонть марязь. — Верепаз, те мезе истя? Вейкесь сась — эрь ярмаккеть, омбоцесь...»
— Паро материя, мерят, усксть? Пароль моненьгак варштамс. Кой-мезе моненьгак стама. Ансяк вана ярмактне эзть нарваво. Зярс арасть.
— Ну мезе, арасть — арасть. Истяяк эрси. Мон лавкав сыргакшнынь, — мельтеме мерсь Олдай таркастонзо стямсто, — ялатеке молян.
— Тон иля майсеве, зыянось аволь покш. Совак таргошкань ютазь, паряк, мезеяк тейтяно. Ужока, тонь арась мелеть варштамс монь оршамопелень парьс? Одирьвакс оршатан. Кеман, кочкатано мезеяк тонь лангс. Кадык аламнеде мондень эчкат-сэреят, мезеяк ды кочкатано. Одирьвакс оршатан. Адя, — кортавтсь Элюва эсензэ коряс од, сэрей меште аванть, кортась — цёковокс цёкордсь.
— Арась. Сан кодаяк, варштан. Монень, Элюва пати, ярмакт эрявить. Материясь уш кадык, кодаяк. Лия зыян лиссь: телензэ лангс каштом турбам каладсь, ковгак а молят, вачкавтома. Качамо сови, — пеняцясь ве авась омбоцентень.
— Кинь арсят сиведемс?
— Черькаень Кечаень.
— Шныть эйсэнзэ.
— Содан.
— Вана мезе, кевкстик, зяро кирьпецть эрявить. Монь зяро-бути улить. Паряк, сатыть. Мерян атянтень, усксынзе, — мерсь ды ледсь мелезэнзэ: «Зярдо?» — Кечайнень, содазь, зярояк пандома, — меельце валтнэнь Элюва ёвтынзе тошказь ладсо, эль марямга.
— Ярмаком монь трёшникак арась, бути стякодо...
[104] Сован седе мейле Черькайнень, кевкстьса, — ёвтызе мелензэ Олдай кенкш пелев ютамсто.
— Паро, паро, совак вете-кото чинь ютазь, вансынек, — ильтизе юртонь прявтось апак терде инженть ды кундась кадозь тевензэ тееме.
Ансяк ильтизе Мазыень — истя ламот «сёвныть» велесэнть Олдаень, — шлыгорк одс панжовсь кенкшесь.
«Истя весе лембенек ёмси», — ютась Элювань прява.
Совась, велявтсь Ёколдань пельде атязо.
— Кодат кулят кандыть, кода эрить-аштить Ёколдат?
— Эрить, кода минь, — учить. Мезе учить — сынськак а содыть. Сыре Дырнай салава тень видькстась — кой-мезть кекшнесь. Мезть неть «кой-мезтне», содавить: чакшт-вакант ды сянгт-ангорят. Ведькевденть кортамскак а мезть. Ков кекшсак? Кие рамасы? Миемскак а макссызь. Келя, чинек-венек ванстыть эйсэнзэ...
— Кинь?
— Кинь, кинь! Аволь уш Дырнаень.
— Ведькевенть?
— Я! Тон пес велязыть. Лован эйсэть превеекс, тон тонськак а содат, мезть кевкстнят, — кепедевсь Вирязонь вайгелезэ. — Содазь, ведькевенть!
— Вантака, ведькевентькак кармить саемензэ! Дырнай пинге карязт яжась сонзэ путомга, ней на, максык кинень-бути. Те кода истя? Стявтськак эйсэнзэ аволь ськамонзо. Вай, Чипаз-Верепаз, мекс зняро авидечи эрямосонть?! Мекс неят ды мезеяк а теят? — пеняцясь, машнететсь ды энялдсь менелень вийтненень лездамодо Элюва. — Лишмест ковгак пштидизь?
— Арась, — мезде-бути арсезевезь мерсь Виряз.
— Скалост?
— Скалосткак кардазсот.
— Те мезе, удыть?
— Арась. Дырнаень бринданзо новольсть. Мезе, келя, ули, се ули.
— Цёранзо кодат ёжост?
— Тетяст кондят. Сон жо сынст алкуксонь ушмодей: кода мери, истя ули. Монень, марявсь, Дырнай натой копордазель.
— Мезе моли, мезе моли! — черькавтызе прянзо Элюва.
— Аволь моли, чии, — кепединзе Виряз чопода сёлмине кондят сельмечирькензэ ды нерьгстазь нерьгстызе валонть кунсолыцянзо пряудемс. — Мон эно станцияв ардтнян. Варштан, тосо кодат тевтне.
— Ужо, ужо... Каня монь пельде саик — кенеремс [105] эрьва ков! Сускт аламнеде. Курок чикуншка. Ужо каян, — эвтезевсь азоравась.
...Часошкань ютазь, лембестэ оршнезь, Пиргужонь содамост ульнесь лазнэсэ чавнозь-стазь, чопода-якстересэ артозь вокзалонть вакссо сэрей топольтнень ало. Козкстнезь стясь таркастонзо, панст ведьмеде сюлмизе лишмензэ човолонтень, нолдызе трокс пикскенть ды каясь ракшанть икелев тикше. «Я, таго аволь истя эскельдинь! Эряволь ялго самс, лишменть тесэ илизь габорда, — совась мекс-бути апаро мелявкс седеезэнзэ. — Кувать а карман, вальмаськак каршо».
Аволь покшке учома залнэсь бизнэсь вайгельтнеде. Ламонень озамо таркаткак эзть сато. Шалттонть ды таргамонь сэнь качамодонть, марявсь, залнэсь эль сезеви эли кепети пельтнень ёнов. Кортасть эрзякс ды рузокс. Рузтнэ мекс-бути сеедьстэ ледстнесть «богост» ды «матест», педявтнесть эйзэст лия «мазый» валткак. «Мекс, мезень кис истя вечксызь неть валтнэнь рузтнэ?» — арсезевсь Виряз.
Стясь атясь кассас меельцекс аштицянть мельга. Учось, майсевсь, псилгалесь, лишмедензэ ялатеке эзь стувтне. Зярдо кадовкшность икелензэ учицятнеде вете-кото, редизе: крандазонзо перька, тей-тов салавине ванкшнозь, велить та-кодат алюхат. Прянь-полдань синдезь ношкстась ушов. Кенерсь. Вейкесь эйстэст уш кундакшнось панст ведьментень. Неизе азоронть.
— Ох, а это не наша коняга! Ошиблись, простите, простите... — лабордозь, нолажа ёзнэкс тусь лия ёнов.
— Кеденк какарьгадост, аломанень понат! — превс путынзе «ошибайцятнень» ды сеске арсезевсь: «Мезе теемс? Кадомс — ицкавтсызь. Туемс чавонь кедть? Аволь монь койсэ. Ужо, ужо, шержей!»
Седе парсте ды нардевстэ сюлмизе панст ведьменть човолонтень, юксизе аеленть ды эйсэнзэ вейке икельце чаронть сюлмизе крандазонь алга жолгантень. Теде мейле луньк-луньк чиезь совась вокзалс.
— Алашам чуть не украли, — стакасто лексезь ёвтызе Виряз мелявксонзо.
— Стоял, стоял он тут!
— Нолдынк атянть! — каятотсь цёрань каргоць вайгель кассанть икеле эвтицятнень ютксто.
Пелькстнезь-музгордезь, Виряз атя эцевсь кассань панжадо вальманть икелев.
— Монень Московов! — рангстась варянтень.
— Нет, нет на сегодня, — серьгедсь билетэнь микшницясь. — Приходите завтра.
— Отправим, приходите только раньше, — неть валтнэнь марязь, уцорсо лиссь ломантнень ютксто ды ношкстась топольтнень алов. Тештине порнесь, сэльгинень-сэльгинень кочксезь, тикшензэ. Мезе сонензэ? Салыцят, пижницят, билетт... ялатеке.
«Кода, ялгинем, идемевсень понатне таго эзть злыдарде перькат? Вант ды вант мельгаст. Тон, Тештине, превеят, прят иля максо эрьванень. Вант. Истя неень шкане, ялгинем, эрявияк, — «оянзо» марто каляказь, Виряз юксизе чаронть, кильдизе лишменть ды кадовозь тикшетнень пурнамодо мейле озась тарказонзо. — Превс путан, яла тонавтан эйсэть, Тештине, ансяк тонеть... весемесь ялатеке, содат вейкеде — ярсамс ды ускомс. А талномат, а ризнэмат-кецнемат...»
— Те мекс знярс? Учан, учан... — ризкс вайгельсэ кевкстизе Элюва атянзо, зярдо тона совась кудос. — Кодамояк зыян эзь лисе?
— Оймак, оймак. Весе лиссь ладс, — оймавтызе учицянзо атясь. Теке басом юксинзе шуба повонзо, кайсесь, понгавтынзе шубанзо ды шапканзо тулос. Озась пильгензэ юксеме.
— Ярсамо кармат?
— Шказо эзь са.
— Ёвтнек эно. Саить билетт?
— Арась. Лишмем цяк эзизь уевте, — ушодсь ёвтнеме вокзалсто сыцясь карензэ-пракстанзо аксялов путомсто. — Венстть лембе кемть!
— Вай, авакай! Ды те кода истя — лишменть салыксэлизь? — абунгадсь каштлангсто кемень максыцясь. — Мерить, мезеяк эзь лисе.
— А-а, стяконь тевть. Ансяк снартнизь. Эзть кенере. Шкастонзо рединь. — Виряз тонгинзе кемтнень — лембть! — ды, мельспаронь кирдезь, мекев-васов ютась кудованть.
— Секс истя седеем китордсь. А манясак сонзэ. «Мезе-бути лиси, мезе-бути лиси», — тарность кельпрясон валтнэ. Эрь вана! Теке ведьс ванынь.
— Седееть эзинзеть маня. Билетнэнь марто мезеяк эзь лисе. Ванды, мерсть, кармить улеме. Седе шкастонзо. Секскак удат эсь кудосо меельцеде. Меельце ве... — ризкс ёжонь марязь ёвтынзе Виряз прядома валтнэнь.
— Вай, авакай! Истя иля корта, атя. Иля разеде седеем, энялдан. Мезенекак паро ладсо апак пурна. Кода истя — тапор-тупор? Килангось оно зярошка, [107] вайвай, — талакадсь Элюва. Куш туемадонть кортазель а весть, ялатеке эзь сода, мезес кундамс.
Совасть нить-полат икеле кудов.
— Шканть иля таргсе, кунсоломак. Эрьва чись — казне, а менстяма сонзэ, — ёвтызе мелензэ Виряз, ансяк кенерсь мельганзо кенкшенть пекстамо. — Кие содасы, зярдо ушодсызь нулгодькс тевест? Паряк, течи жо, те вестэнть? Кинь эйстэ ушодыть? Ёртыть седейстэть кавтолдоматнень. Ванды, ансяк ванды валске. Куш те вестэнть, Инешкипаз, аволимизь сокарда.
— Мезеяк, чис-кавтос а калады!
— Косто содат? Билеткак ванды алтасть.
— Билетт эрсить. Сыргатано вандыде мейле. Весе. Иля кортавто эйсэнь. Ванды пурнасынек курмонок-кармонок ды вандыде мейле валскестэнть чоподава — килангов, — эзь арсеяк полавтомс мелензэ Элюва.
— Тон арсят, мезе теят? Содат, мезес те велявты?! Курмот-кармот... Содат, мезть пурнамотне?
— Содан: зяро кандовить.
— Эно мезть шканть таргсят? Каня вензэ перть а пурнавить? Кувалмозо оно кодамо, аволь тундонь-кизэнь.
— Иля моткоде. Меринь, валскеде мейле, истя улияк. Весе. Мерезь, — путсь Элюва пе кортамонтень. Саизе ушодозь варьганзо, озась вальманть каршо ды кундась кодамо.
Виряз педсеме эзь карма. Мартонзо пелькстамось — вармань каршо сельгенема. Эсь Вишкайнянзо содасы. Аволь аламо вейсэ эрясть.
Весь ютась сэтьместэ.
Сэтьместэ, бути а ловомс атякштнэнь ламо вайгельсэ морамонть-сеереманть. Сынь теке лувсонть поладызь мельганзо сыця чинтькак.
Элюва чинь-чоп якась кардазга, пирева, пачколесь тингелангс, панжтнинзе утомтнень. Якась, сонсь эзь сода мекс. Яла марявсь тензэ: ёмавтсь мезе-бути. Мезе — сонськак а соды. Пельсь мик совамс кардонтень, косо свал марявсь — ды истя вечкевсь — поремань кашторкс, косо шкань-шкань кувакасто таргсесть ойме скалост, козонь валске чоподава ламо иень перть совсесь потявтомост, ламо иеть потявтомань ушодомсто ведрань жойтесь кецневтсь пилензэ. Ней сон чаво. Киненьгак «нёкш-нёкш» а мерят, киненьгак потявтомадо икеле салтозь кши кочом а венстят. Панжсак кенкшенть — а куш а каш. «Эрямо-эрямо! Мекс тон истя, сэредьксэнь апак маря, киньгак апак кевкстне, [108] тапат эсеть вийсэ теезь лувот? Мекс зняро ризкст-мелявкст сравтнят моданть ланга? Мекс?!» — рангсь Элювань седеезэ.
Аванть лангсо якстере-тюжа тюсонь кувака шуба. Течи менельксэсь седе потась. Ялатеке те оршамопельсэнть а псилгадат. Прязо сюлмазь понань шальсэ. Пракстанзо ашот, прок тешкстави покшчи. Яки, теке чопача, сулей. Истя кудонзо-чинзэ юткова-перька яказь-паказь ютась икельганзо пакшонь-пакш весе эрямозо.
...Иензэ ниле эли вете. Шабрань эсензэ шкань тейтернетнень марто панжсть «лавкине». Кудост ёжова аравтозь тумонь эчке чочкось — лавсяст. Лангсонзо тантей ведь (атямарьстэ теезь), сёвоньстэ панезь кши, ламбаськем — раужо, пиже лаймарть. Ярмаккест — теине-кувака каль лопат, седе покшт, вишкинеть... «Лавкинест» рамицявтомо а эрси. Вейке сови, омбоце...
У-У-Уф... Кода те умок ульнесь!
...Сёксень валскесь манеель. Чинь налтнэ, сырнень рисьмекс жойнезь, чудсть вальмаванть. Элювань удомазо явась. Велявтсь кунст, венстизе рунгинензэ ды панжинзе сельмензэ. Пряпесэнзэ аштесь тетязо. Венстезь кедьсэнзэ — умарь. Покш-покш, якстере-якстере! «Эрь, кирдть!» — мерсь тензэ...
Васов кадовсь маней мизолкссо эждезь се валскесь! Пинге юты, истямо мазый якстере умарь сельмензэ икелев эзь понгоне.
Весемеде ламо ледстнемат лиядсть Элювань превс эрямонь юрттонть. Вановтонзо икелев сакшнось ташто, тетянзо вийсэ путозь, чачома кудозо. Икельде колмо вальмат, бокава — кавто, вельтязь чуказь пултсо, конякшсонзо керязь «седей». Кудо кенкшесь ды ортатне саезь латыне алов... Тесэ, те кудосонть, эризе эйкакш пингензэ, капшавтыця од шканзо, арсесь икелепелень эрямокидензэ...
Ледстнемань нармунесь кивчк совавтызе кирьпецень эсензэ кудос.
«Чипаз-Верепаз, мейсэяк а онкставить эйзэнзэ путозь виень, ливезем, превень. Зяро апак удо веть ютавтозельть, зяро майсемат-стомамот ульнесть! Мезть кортамс, визьксэнь ёмавтнемаскак пачколинь. Каня сестэ Паксютыч лездаволь кирьпецьсэ, аволинь ютавтнеяк мартонзо кутморямонь-налксемань веть? Сындест башка, эрявсть усксемс кевть, вирь, муемс вачкицят, чапицят-лаксицят. Оно зяро иетнеде латкс нолажтсть, мезть ансяк арасельть...»
Кода ёжонзо илязо маря, кансттонть Элюва эзь [109] стувтне. Мезе леди мелезэнзэ, кандсы, каясы икеле кудонь киякс куншкас. Ве таркасо весе улест. Мезе саят эсь лангсот кандозь? Путома ансяк сень, мезе кандови ды эряви васняяк. Чугунт, чакшт, пачалгт... Кармить эрявомо? Содави, кармить, ансяк а сайсыть, варчить саемс. Оршамопельть: шубат, чапант, тулупт, руцят, покайть, пулагайть... Кода сынтемест? Кода эрявольть саемс. А сайсыть. Нетнеяк понгить кинень-бути.
«Вай, авакай-тирякай, мекс а шкастонзо чачтымик, мекс покш мельсэ кастымик, седеяк пек ванстымик?» — ознозевсь Элюва пазава ужонтень варштнезь.
Вить ёно стенас понгавтозь портретстэнть ваны тейтерензэ ды киякс куншкас вачказь «товаронть» лангс Элювань тетязо. Вановтсонзо кевкстема: «Мезе тейтядо, ломанть? Мекс нарьгатадо вейкенк-вейкенк лангсо?» — «Мон а содан, тети», — мерсь эськанзо тейтерезэ, теке басом менстизе портретэнть, таргизе кундостонть, тапардызе ды каизе анокстазетнень юткс. «Мезе таго? Документэнь таркасост, ярмаконгак... Мезе, мезе кадовсь?»
Виряз атянь, Элювань коряс, мелявксонзо седе аламо. Кескавс а нерьгставить аволь ансяк Варма ды Тештине, а тонгат тозонь чирькеяк. А каясыть лавтовот трокс сокатнень-изамотнень. А понгавтсыть мельгат, чарькодеви, штердемань-кодамонь кедьёнкстнэньгак: човарт, чалгамот, лиямо, велямо, чекажа... Ков сынст?
Каясь «кардазонь прявтось» лишметненень Пинеме, симемс ведь. Варштась, сонськак а соды мекс, скалонь кардс. «Ней мезе?» — арсезевсь тосто лисемстэ. Вадяшинзе сурсемень таркас вете сурсонзо сакалонзо, карксызе седе парсте карксонзо ды сайсь ёнкс ушов. «Ёколонь содавтомат, паряк, мезеяк од ёвтыть. Дошузт, марсевсь, цёранзо».
«Вай, лишменть марто мезе теемс? — пицизе молемстэ мелесь. — Сайтяно билетт, озатано поездс, кие сонзэ мекев, Эрьмезьвелев, ветясы? Нолдамс, сонсь кинть мусы? Мхы! Дух стувтыя, Элюва кода-бути ледстнесь: келя, тосо, Симилейсэ, эри сыре патянзо цёразо. Вана теть ильтицяяк. Пря яжан, макшов кандо! Те паро. Ансяк кие тов, станцияв, усксамизь? Кода кие — монсь. Ялго а седе ён ули? Редявомояк истя а карматано. Виде-виде, ансяк вана арсезеват покш-стака канст марто вайгельпетнеде ды чаракадат, а содат мезе теемскак».
Молемстэ, мельтнесэ тапарязь, Виряз эзизе редяяк, кода пачкодсь Ёколс ды эль эзь пупордя кузтемпест вакссо лапужа кшнистэ теезь, рудазов пильгень коцькерямкантень.
[110] Ёколоньгак кудост икельцть-удалцть. Путозь ульцянть кувалт. Мерить истятнэнень «пятистеннойть». Мекс? Косо ветеце стенась? Кияк некшнизе? Паряк, куншкасось? Кудонть кавтов явицясь? Кудось чапозь эчке пичестэ, вельтязь лазсо. Латось иетнеде чополгадсь, таркань-таркань пижелды эзганзо касыця нупонденть. Вальманзо икельга — колмо-ниле рацяня, эчке кальть. Кие карми кекшнеме алост кизэнь пси чипайденть? Кие сови азорокс те кудонтень? Содась теде ансяк шкась. Содась ды зярс чатьмонсь.
Дырнай, кона сизьгеменде ламо иензэ перть эзь сода тевтеме аштема, озадоль эземпесэ ды вансь вальмава сиземань апак сода поксариця саразтнэнь лангс. Шукшпрясь эзь кельмевтеве, ули мезе муемскак. Секс сынь изазь изыть. «Атякшось, атякшось мезе теи! — тешкстызе эськанзо атясь. — Ломантне, седеяк цёратне, улевельтькак истят: мезе а муи — саразтнэнень, мезе а муи — саразтнэнень. Тунь, вант, а ярсы. Мезде эри?»
— Шумбрат, Дырнай леляй! — сезинзе арсеманзо совицянь вайгель.
— Шумбрат, шумбрат, Эрьмезень содамо! Ютак малав. Ульть инжекс. Озак. Мезть якат-пакат, карть калавтат? Кодат кулят сравтнят?
Виряз озась азоронть ваксс.
— Кодаткак арасть. Мекевланг, арсян тынк ёндо мезеяк марямс. Тынь ламоненк, якатадо эрьва кува.
— Мезеяк од, Виряз ялаксом, а маряви, мезеяк а неяви. Теке лепиясть тандавтницятне. Несыть, мезе теить? — невтсь атясь какаря, тарвазокс мендявозь сурсонзо ушов, поксариця саразтнэнь лангс. — Тень кис самай минек велькскаяк вадовкс чарыть: тертямонок бажить, а сокарявлинек.
Кулянь кевкстницясь варштась суликанть тона пелев, ков невтсь кичкере, таргамодонть ожо сурсонзо сыре Дырнай.
— Кода теть меремс... Аволь весе истя эрьмест таштакшныть. Лиятне... — ёвтыксэлизе мелензэ Виряз.
— Салазь-колазь, — поладынзе валонзо валаня коня Дырнай, — кой-кить манчезь, кинь-бути ливезь вельде. Истятнэде, мерема, аламо. Саик минек веленть...
— Те виде.
— Истямо куля пачкодсь, — поладызе кортамонзо Дырнай, — исяк Вачаень Киринэнь, велень комиссаронок, тердтнизь тов, районов. Мекс — соды сонсь. Лия [111] мезеяк а содан. Истямо куляяк яки велеванть: неть читнестэ та-кодамо колхоз арсить пурнамо. Мезе те истямось — Пазоськак, пелян, а соды.
— Велень тевтнеде, содави, ламо. Ансяк седеем мари: текеде, колхозс совавтомадо ды пансематнеде тосо, районсонть, кортасть. Талай сёксь, тевтне теевсть, мезе кадови? — арсезевсь ды ёвтынзе валонзо Виряз.
— Видестэ, атя, кортат. Секень вант, неть читнестэ даволось ургати. «Паз», «паз» яла мотордыть поптне ды сынст «ревест»! Улевельгак сон, рузонь эли эрзянь, куломань истямо кезовкс аволь нолда! Истя? — варштась инжензэ сельмс кудазорось.
— Кода а истя. Поптне пазаваст марто — кендялт. Мейсэяк а пештявить, — мерсь Виряз. — Кедест кувакат, коморост келейть... Вельть шкадонзо икеле телесь варштась. Лов арась — якшамось сыре телень.
— Эрси истяяк, монь ледстнемга... — Дырнай стясь, каштом варинестэ таргизе махоркань кескавнензэ, сезсь ташто газетасто конёв панкске ды сювордась цигарка. Курок кудонть пештизе махрань палома чине ды сэнь качамо. Азоратясь таго каизе вановтонзо инженть лангс. — Мертяно, Элювань чочасызь. Апештявикс сельмензэ кис. Меремс, тетязояк истямоль. Сон лавшосто аштицянть вакска эзь ютне... Тонь вана, ёвтыка, мезень кис, а?
Виряз чатьмонсь. Нуваргадсь. Кепедизе вановтонзо потолокс, теке сась превзэнзэ та-кодамо мель, мейле варштась вакссонзо валонь учицянть чамас.
— Видькстан, а содан кода улемскак. Превстэнь а лисни аволь ансяк се, мезе учотано. Седеяк майсевти лиясь... Чарькодить? Эземень аволь песэ — пинесэ аштемась. Беньк — ды улят киякссо. Превень велить.
— Виде. Теветь наволат, — кокша прясонзо нулновтнезь ды кургстонзо качамо кувтань нолдазь, мерсь кудонь азорось. — Вант, атя, вант.
— Сырган аламонь-аламонь. Таркасо аштезь зепеть, кортыть, а пешкедить, — Виряз кепедизе рунгонзо эземстэнть. — Мезе ули, се ули, а мезть пря чавомс, лезэ тень эйстэ а муят.
— Кирдеметь а карман. Куш лембине кучоволь Верепазось. Якшамо вельть. Сыре ловажатне яла тов, сёвонень маронть пряс тердить... Варштак, паряк, цёратне мезеяк од кандыть.
Дырнай, аволь сэрей, теине лавтов коськана ломань, чош-чош пильгензэ ускозь, ютась сакшныцянть мельга.
— Эно вандыс, — мерсь Виряз ды керш кедьсэнзэ эрязасто панжизе тюжасто артозь кенкшенть.
[112] Ушов лисемстэ якшамось тапардызе прясто пильгс, гуекс совась потмозонзо. «Сёксь, алкукскак, якшамось оно кода сускони. Сёксь пуло, мезть лиятат учнемс», — ледсь мелезэнзэ якшамонть лангс Дырнаень пеняцямозо. Кепедизе шуба сивензэ, кавто пиледе ноцковтызе раужо ревелевксэнь кедьстэ стазь шапканзо, седе парсте «озавтызе» прязонзо. Келейгавтынзе эскельксэнзэ. Лембе таркасто лисемадо мейлень сурневтесь потась.
«Дырнай атя седеймарязь, мик нуваргадозь ёвтынзе валонзо: «Теветь наволат...» Умок теде содан, Дырнай леляй, умок, ансяк вана... — ушодсть Вирязонь прясо велямо, прок леень чарамо таркасо ведь, арсематне. Ледстнесь Эрьмезьвелесэ эрязь иетнеде, козонь понгсь. — Мекс истя, мекс истя кодаяк тень пе а путови?»
Виде, Виряз лиясто кежень сазь, кодамояк покордамодо, кой-зярдо мик поланзо марто ве мельсэ эрямо шкастояк путнесь эсь пачканзо чапо: «Весе. Пе. Седе тов эрямс те ломаненть марто виень арасть. Сонзэ эсензэ обуця, монь — эсень. Сон — давол, мон — сэтьме вармине. Сырги-кепети те даволось лиясто собой, тувталтомо. Весе. Валске туян».
Мади пизямомась, юты, а редявияк, «валскесь», ды, вант, ацирьгалемадонть якстердиця седтнень ланга таго таргави ашназа тюс седельма. Таго ушодови вейкень-вейкень марязь-неезь, мелень ванозь, эрьведькстэ пешксе эрямо. Прок арасельтькак оймень наксавтыця валтнэ, превскак эзь совсе «ванды туян» мелесь. Кодамо сон, шкась, превей, кодамо чарксей эрьва тевсэ! Ормат терди, пичкавты, лайшевти, пейдевти... Весементь таркаванзо аравтнесы.
Вирязнэнь кодаяк эзь чарькодеве: косто саевсь виесь, кона педязь педявтызе сонзэ те «коткудавнентень» ды кирди эйсэнзэ оймсемань апак сода. Икеле, сеске вастомадост мейле иетнестэ, зярдо седе одольть, се виенть вешнемс эзь савкшно. Ней эно кодамо апаро кирди эйсэнзэ? Кие? Мезе? Паряк, обуцянь лавшочизэ? Эсь асатыкстэнзэ — лоподемс-лепштявомс, прок сёвонь, куроксто — атясь соды. Мейсэ лиясо тувталось, превс а саеви. Чиить читне, эскелить ковтне, пешкедить иетне, сон яла «туи».
Седеень карыця неть мельтне срадсть апак учо ды апак кармавто. Удемень сормсевкстнэнь пештизь зярыя иень перть эрямстост весть экшелямо якамодост валдо ледстнемат. Истя, ульнесь Вирязонь эрямосо валдо, седеень эждиця, сырнекс кувтолдыця, гайгиця чи. Ульнесть лияткак. Ансяк се чись...
[113] ...Свал ков-бути эрязкалиця леенть вить чирева сэрей пандотне вельтязь тусто сыре вирьсэ, керш ёнганзо сравтовсь келей лайме. Эзганзо тия-тува пижелдыть, прок тикшень штеметь, калень, ламарень, индерень, эрьбань куракшт. Леенть седе малава сынь пурнавить вейс ды сави молемс пачкаст эль неявиця, тей-тов менчевиця янганть, теке чопода вирьга. Те таркантень апак пачкоде, куракштнэнь алга-юткова сравтовозь, кецневти мазычисэнзэ лугась.
Кизэсь лембель, шкастонзо ульнесть пиземеть. Секскак тикшесь сэрей ды тусто — ёзнэ пачканзо а ютави. Эрьва нетькскесь, эрьва балягинесь, лопинесь бажи невтемс ды шнамс мейсэяк эсь прянзо. Якстерди курынень-куро чавканьпрясь; тия-тува невтни палый тештинензэ дёготь тикшесь; сэняжды, мерят прась пель пакшке, чеерень кснавось. Кодат ансяк тюст а вастневить! Ванат вановлить. Кунсолозеват — пилеть пешкедить мекшень бизнэмадонть! Кизэ... А кемевияк, сы шка ды те таркасонть азорокс тееви телень эсензэ ладсо мазый ашо каштмолемась.
Элюва эзь кирдеве. Молемань перть зярыяксть лотксесь, празь пракшнось мастумарень вешнеме. Вана таго полавтызе молема ёнксонзо, таго ванны, козонь кеденть венстемс. Комась. Каштордозь явны-вадяши тикшенть, сезни ды кайси кургозонзо якстере «пештинеть». Тантейть! Нормалень тарка. Дошуз аватне «таргсить» тестэ ведрань-ведра. Тедедень кизэденть кортамскак а мезть, кочкак — зяро мелеть, ансяк иля нузялдо. Нинзэ лангс ванозь, Вирязгак кургонзо ламбавтомга комси, сокари тикшенть потмова. Эртевсь «сюпав» кужинес. Кочкась-кочкась ландязь, озась. Венстизе кедензэ седе васов, савсь мадемс пекекиське лангс...
Аватне — эрьва косо ават, эрьва тевсэ седе ёроковт. Элюва кенери аволь ансяк кургс кайсеме — коморозонзояк кочки.
— Эрь, монь седе тантейть, седе ламбамот, — невтизе сон умарде пешксе коморонзо яннэнтень лисемстэ. Мельспародонть турвасонзо налкси мизолкс.
Виряз сайсь сурпрясонзо зяро-бути.
— Вай, тонь алкукс седе ламбамот! — пеедькшнезь шнызе икелензэ эрязасто эскелиця нинзэ.
Окойники тей-тов менчевиця яннэсь ветинзе «ламбамонь вечкицятнень» эрьва ёндо рацяня куракшсо ды чувтосо пирязь эрькентень.
Чись рестазь ресты. Келейстэ-келейстэ сравтовсь сэняжасо гайгиця потмакстомо менелесь. А куш а каш.
[114] Чуросто колси каштмолеманть кодамо-бути нармунень вайгель ды тастань цийнема. Шкань-шкань лезды тенст лопатнень вельде эль марявикс вармань вечкевикс экше зэхельне. Ш-ш-ш... — тошказевить те шкастонть веденть ёжова касыця казямо лопа чейтне. Веленть эйстэ тей юткось эйбаро. Секскак а марят а атякшонь морамо, а пинень онгома, ломанень вайгельде кортамскак а мезть.
Элюва апак капша валгсь эрькенть вандора, валдо-ожо чуваров чиреванзо веденть малас ды прок чувтомсь: ваны чоподасэнь, ванькс ведьсэнть сэперькань кесаккенть тей-тов укшноманзо мельга. «Кие кармавты сынст истя вейкетьстэ тей-тов кайсевеме? Кие тонавты тенень? Вант, мезе теить...» — ютась ваныцянть превга. Кепедизе вановтонзо: икельганзо сравтовсь суликакс цитниця эрькесь. Ледсь мелезэнзэ умонь-умонь эйкакшпингезэ. Сисем-кемень иесэ тейтернекс сакшнось тей зярыяксть седе покшке ялгинензэ марто калс, ульмамо. Умок, пек умок те ульнесь, васов кадовсть пиже зорява сеть стякшноматне, чинь-чоп веденть чиресэ аштематне, валскень экшеденть сурнематне. Васов оргодсть, а сасасыть.
Ведентень ветиця яннэсь кавто ёндо копачазь лопав тарадсо. Авась мурдась ведьтурвастонть, кузсь эль редявиця яннэванть седе сэрей таркинентень ды ютась псиденть нувсиця рацяня тумонть алов.
— Мезе, атя, экшендтяно? — пеедькшнезь, мельспародонть цёкордозь пшкадсь карксонзо ды сивензэ юкснемстэ Элюва. Апак визде, ливчанясто каизе пряванзо ашо, лияназонь коцтсто стазь палянзо. Путызе лугине лангс. Кадовсь штапо... мейсэ чачтызе авазо.
— Мезе ванат? Каня эзимик некшне? — кольнезь ладсо, пеедькшнезь мерсь атянстэнь.
Виряз эзь правто валгак, теке кургозо потомдавсь. Вансь. Виде, некшнизе нинзэ эрьва кода ды эрьва косо, ансяк истямо таркасо, истямо мазычи ютксо, истямо маней, кенярксто пешксе чистэ несь сонзэ васенцеде. Ваксозонзо, марявсь тензэ, кодамояк лия ава а путови. Иетнеде таштавсть оно зяро, рунгозо яла теке тейтерень: аволь покшке, ёлганя, неяви эрий налкшкекс. Элюва кепе-штапо, берть-берть чиезь, валгсь пси чуварсо вельтязь ютнема таркаванть эрьке чирентень. Зярс-бути аштесь стядо. «Кельме-аволь?» — кивчкадсь превсэнзэ. Ландясь ды нолдызе вить кедензэ ведентень. Кечинекс теезь коморсонзо амольдясь ведь ды начтызе мештензэ. У-у-у... кодамо экшине! Ялатеке вельть кельмекс эзь маряво. Икельганзо укшность вишка калнэтне. «А пельтядо, а? — арсезевсь лангозост ванозь. — Паро эрямонк, укшнотадо, ков меленк!» [115] Видемтизе рунгонзо ды, кедензэ аволь пек келемтезь, экшентень апак тонадо, сурневксэнь марязь, састо-састо совась ведентень — васня кумажава, мейле седе верьга.
— Вай, вы-й, кодамо кельме! — серьгедсь цирнезь, сонсь варштась удалов, эйстэнзэ авасоло палманькс аштиця поланзо лангс. — Мезе учат? Кайсек ды бултых тей! Иля пеле, а сусктан!
Серьгедсь Элюва ды эсь прянь кармавтозь чопавтсь кирьгава, тусь уезь. Ботыця пильгензэ алдо кувтань-кувтань верьгелесть чинь пси валдодонть сиякс цитниця тештинеть. Сравтневсть перьканзо кирьксэнь-кирькс ведьсормсевкст.
Виряз вансь укшныця нинзэ, ведь чамасонть оймсиця ашо пельненть ды эрькенть тона ёнга куракшсто-чувтсто пиже пирявксонть лангс. Вансь, ды кирдсь эйсэнзэ ве таркасо мелесь: «Кодамо перьканок мазычи! Паздонть башка истямось киненьгак а тееви. Мекс тензэ питнечи а макстано, мекс а редятано сонзэ?..»
Укшныцясь — прязо сюлмазь ашо пацясо — тейсь, «пинекс» уезь, кирькс ды велявтсь совсема-лиснема мазя таркантень. Паряк, весе эрькенть потмаксозо вельтязь валдо-ожо човине, прок почт, чуварсо. Секс ведеськак истямо ванькс, кода иля бота — а бутралгады, пачканзо неят.
— Фу! — сиземадонть ды мельспародонть укстась, ансяк токасть пильгензэ потмаксонтень, экшелицясь. — Кодамо паро! Ведеськак лембе. Теке ловсо. Те ансяк совамсто марявсь кельмекс. Я, ды тон мезе учат? Аволь матедевить?! Адя вейсэ укшнотано!
Элюва лиссь ведьстэнть кумажа видьга.
Аванть ашо киське рунгованзо кевериця ведьбайгетне чинь валдодонть неявсть сырнень сяткинекс. Кизэнь налксиця чись марявсь Вирязнэнь онокс, менеленть пельде казнекс. Вансь — сырк эзь тее.
— Матедевинь... Кие лангозот истя вановоль, конявлиньгак каракшон. Седеем пештинь перьканок мазычисэнть. Тонь эйсэ. Марявсь тень, сонсь Ведьавась ашти каршон, невтни мазычинзэ, терди эйсэнь.
— А-а, сестэ эно кадык... Ансяк иля сокоргадо!
— Арась, арась! Пелян, илязат кадово Ведьавакс, — эзь кирдеве, пеедькшнезь-згилязь мерсь Виряз.
— Саты лавгамс! — серьгедсь Элюва ды лоцьк озась ведентень кирьгава.
Виряз юксинзе сивень повтнень ды капшазь каизе ашо, сивева ды ожа пева раужосто-якстерестэ викшнезь, пазень сурень панаронзо...
[116] Ледсь Вирязонь мельс се чись ды пештизе мештензэ вечкевикс, кенярксонь кандый лембе ёжосо. Сеске потасть эрьва чинь мелявкстнэ, майсематне, оймень костиця арсематне. Рунгозо шождалгадсь, теке каясь сявдиксстэнзэ кеменьшка иеть, лиякс тензэ неявсть ульцянть кувалт стявтнезь кудотне, утомтне, кальтне.
Совась кудос. Редизе урядонь аразенть. Кияксонть куншкас ёртозь ташто карть, тенсть, вакан, стуворонть лангсо кавто ведрань содов чугун, сядоксть пандтнезь понань кемть ды варьгат. «Зярдо истя ульнесь?!» — макссь питне неезентень Виряз. Ютась икеле кудов. Тесэяк теке: апак аца таркат, ужос айгезь стувор, кудо куншкасо пурназь-сэрнязь зярыя канстт. Вакссост, нурька эземнес озазь, мезть-бути ладси-путни азоравась.
— Кандтни эйсэть тонськак а содат кува, — вастызе атянзо. — Каня а содат — пурнамс эряви?
— Пурнасынек, иля ризнэ, — эрьведезь вайгельсэ мерсь Виряз. Эскельдясь «палаксонзо» пелев ды кутмордызе удалдо. — Шканок саты.
— Тонеть свал «саты», свал а ков капшамс, — эсензэ содась, ботнось авась. — Тонь кодамо укска пупинзеть — цёковокс цёкордат? Мезе мартот теевсь?
— Мезеяк эзь тееве. Ёколонь витизь мелем. Атясь ськамонзоль. Пек а мелявтыть. Мезе, келя, ули — се ули.
— Те а истя...
— Истя-аволь, ней мезе — лисьмас кирнявтома?
— Тонсь а содат мезть пенгедят, — музгордезевсь Элюва.
— Саты теть сувтнемс нулатнесэ. Мельсэть, кода якинек инжекс Ледяйнень? Сыре патять тейтерензэ туртов?
— Мейле мезе?..
— Мельсэть морамонок? Кода уш тосо, ледстика...
Вай, исень саевть одирьвась,
Вай, улконь максовт тейтересь Поланзо марто а яки,
Вастанзо марто а корты...
Истя? Эрьга варчика вайгелеть. Тон верьга сайть, вайгелеть гулькинекс ливтнезэ, мон — алга. Эрь, эрь варчасынек.
— Вай, авакай! Мезе истя теевсь мартот? Аволь таркастост сыргасть?.. Кирдть эрь, морыця!
[117] Виряз сювордызе пешксе кескав кургонть, Элюва ливчанясто сюлмизе карькссэ.
— Дух эзинь азаргадо! Содат мезе ледсь мелезэнь? Экшелямо якамо чинек... Эзик стувто? Вант! Монень зярдояк а стувтови. Кодамолить тон... Кодамоль чись! Вельмесь сон удемсэнь ды казсь тень паро ёжо. Мик, марявсь, аламнеде одкстомтымим. Во кода! Кодамоль чись! Кодамолить тон...
— Саты келеть човсемс. Вачкика кенкшенть ваксс ули-паронок, — макссь Элюва тев ды стясь эземстэнть. — Весе, атя! Куш нейке, вензэ лангс сыргак. Ванды чоподава — станцияв. Азё вешнемизь!
— Адресэнзэ цёрать саик?
— Саия.
— Ярмактнень козонь путыть?
— Алга карксозон стынь юдмине. Эйзэнзэ путыньгак. А муевить. Бути ансяк кайсевтьсамизь.
— Виде. Вант, весе виенек ярмактнесэ. Паряк, зярояк монень максат?
— Арась. Монь «зепсэ» седе ванстовить.
— Вант. Тонь тевесь.
— Адя мадтяно, — кургонь автезь, вал пелькстнэнь нильнезь-нильнезь мерсь Элюва ды оршнезь чиремсь апак аца тарказонзо.
Мадсь, валгак эзь ёвта, атязояк. Нинзэ ваксс.
Мадсть шкадо икеле, чопотемадонзо мейле сеске.