Якстере теште/1924/34/Яков атя
| Якстере теште. Еженедельный орган Мордовской секции при Ц. К. Р. К. П. (б.). — № 34, 16 ноября 1924 г. — с. 2—3 |
| ЯКОВ АТЯ. |
I.
Аволь нузякснэде ульнесь Яков атя. Роботамодо сонзэ коряс велесэнть кияк арасель. Знярдояк истяк аштемадо, а нейсак. Семиязо ульнесь аволь покш. Урьвакстозь церазо Вася, ды соньць. Бабазо Яков атянь уш умок кулось. Сонць знярдояк эзь серэле, ды сэредицяткак эзь вечк.
— Роботамост нузялдыть, сэредеме педить — мурнесь сон бабанзо эйсэ, куломадо икеле. Бабась кавто чиде мейле кулось.
Тень кис тензэ мерильть кевень седей.
Калмизе козяйканзо, буто навуз куця ливсь кардайстэ. Вейкеяк сельведь эзь правт.
Семиясонзо севнумат эсть эрьце.
Вася ульнесь тетянзо кондямо роботыця. Анцяк седе ломань юткс лисниль. Яков атянь промкс кудов панезь а паньцак. Вася службадо мейле комитетсэ служась. Эзь тук Яков атень мельс тень кувалт Вася.
— Роботамот нузялдат. — начальниекс эцят — кармасть тетят церат севкномо.
Весть истя чокшне кепетець шум. Ульцянь келес пижнесь Яков атя.
— Варштакая, — пиженесь Васянь ланкс — Негодяй. Тетять грабамо анцяк тонадыть.
— Те апарц — кортасть шабратне, — коли Яков атя лисць терпениясто парт иля учо. Вот теть советской власть.
Вася тетянзо ланкс путьсь контрибуция, тень кис севнозевсть чокшне. Эрьва чине кармасть севномо. Мейле Вася тусь доброволецекс Красной Армияс.
— Кадык, тосо бокатьнень езасызь аламодо. Кудосо нузякснэнь а месть тейнемс ней — кортась сон шабрань икельде Васянь туимадо мейле.
Васянь низэ курок чачтась. Яков атя эзь радуваяк нуцькантень. Пек уш кежензэ Вася ланкс састь контрибуциянть кис.
Шкась ульнесь стака. Маласо ульнесь фронт.
Паньцесть весек сень эйсэ улавс.
— Монь церам тосо Совэтэнь кис служи — кортыль Яков атя, кода евтыльть тензэ улавс.
II.
Ютась ие. Васянь пельде сермат чуросто сакшныльть. Поклондо башка тосо мезеяк арасель сермадозь. Васянь порава цератнень саизь войнав. Васянь низэ лоткась ризнамодояк.
Омбоце кизэ Яков атя роботы урьванзо марто. Покш семиядо а кадовильть.
Кармасть нуевеме нуимат. Остатка пулт уш вачкить скирдас. Ламонь машсть нуимате, Те тосо анцяк кадовсь апак нук лентынеть. Коткудав лацо бузмулдыть ломатне паксясо. Паксясь буто наразь пря. Ки ланга ютыть кудов.
— Ней вачо чиде пелеме а месть, — корты Яков атя шабранзо марто — Анцяк бути саеме ламо кармить. Нетне комунистнэде тюк савкшны. Ков зняро сюронть тейсызь?
Пролка песэ учось эйсэст Ванька, нуцьказо, няньканть марто. Дедазо озавтызе крандайс.
— Вася сермат кучни? — кевкстизе шабрась.
— Умок уш арасель пельдензэ серма. Кежсявсь сестэ — укстазевсь Яков атя.
Машсь течинь тевесь. Пурнасть ужинамо.
Ванька уш вете кото раз полавтызе деданзо марто пеньчензэ.
— Яков леляй! Вана теть серма пронкс кудосто — серьгець вальмалдо Сидор, велень десятник.
— Пакетэнь коньдямо мезе бути.
— Адя совак, монсь ловномояк а маштан.
Васянь низэ весе сорномо кармась, пеньчензэяк правтызэ.
Паньжизь серманть.
— Ох авакай, печат марто Яков леляй, букватнеяк печатнойть.
Тандац атясь: Аволь сюро ли вешить — думась сон. Сидор кармась ловномо.
— 1-й Мусульманский полк... 22 дивизи...
Оймась аламодо Яков, атя аволь налог. Васянь низэ оймензэ як а тарксесы.
Сидор ловны састо, буто пенькат тарги, натой конязо псилгаць. Яков атя веньстизе нерензэ Сидоронь ловтонзо трокс ваны сермантень.
— Гражданину... Якову... Потапычу... Брагину...
Яков атя кармась кирганзо езамо.
— Ваш сын... Василий — Лоткась ловномадо Сидор, буто кирга парензэ трокс мезе бути арась, а нилеви.
Седеньгак пек пильге сур вельде Сидор удалдо ваны сермантень Яков атя.
— Убит под — киргастозь мерьсь Сидор.
Васянь низэ пулт лацо ертовсь. Яков атя нолдызе нерензэ, горбунгаць, буто весе эрязь иетне лепштесть эйсэнзэ. Сидор ертовсь Васянь нинзэ кепедеме. Габордызе ведра веденть мастордо, валыксылизе Васянь нинзэ. Мейле габордызе эзем лангсто узеренть, напустесь ушов. Ванька кармась пижне
ме. Кепидизе Яков атя серманть мастордо, ваны, мезеяк а неи.
Чийсть шабрат, кепидизь Васянь нинзэ, кармасть лацеме Ванькань. Яков атянень яла а сы паро ежо. Кода эри, знярдояк эзь аварьть. Ней гак сельведне эсть листь.
— Кинень мон анокстынь; кинь кис пиньгезэнь вием путые — думась сон.
— Дедай, дедай — усксесь понксто эйсэнзэ Ванька.
Кепидизе Яков атя Ванькань кедезэнзэ.
— Тон пек иля ризна. Месть а эрить... Мезе теят, истя нать эряви — лацесь сон урьванзо эйсэ.
III.
Ютась весь. Таго тевс. Пекесь горя ланкс а ваны. Вейкеде пельсь Яков атя, туи урьвась, сайсы пакшанть, кадови сон ськамонзо.
Кармась горбунгадомо. Чамазо ловташкаць. Прязо кармась седойгадомо. Виезэ кармась маштомо. А эряволь бу знярц сыредемс, думиль сонць. Учомс Ванькань, касы — мейле уш...
Работась кармась токамо. Икелев сизима а содыль, ней весе ловажатне сэредить.
— Тонеть, Яков леляй, комунас бу ней. Урьвась курок пулонзо шлясы: Тонь приматадызь...
Пеедильть лангсонзо.
— Кодаяк уш ськамон эрян. Монсь уш паро чим суфтнеса,
— Сидор марто бу тыненк, Яков леляй, сонзэ мезезэяк арась. Кавуненк ладявлиде.
— Тынь пек илядо пееть. Вейсэ эрямось паро, мезе мон ней ськамон. Шкатнеяк истят сакшныть —
Карчозост пшкадиль сон.
Сидор сеедстэ кармась совсеме Яков атенень, сермадонть мейле.
Стака кармась марявомо эрьва тевесь Яков атянень.
Урьвась сеедстэ кармась тукшномо кудосто, куваць яла а сыль. Ванька тонаць деданзо марто, вакс а кадови. Авазо лангозонзо а варштыяк,
Телесь ней марявсь тензэ якшамо икелень коряс. Кардайстэ ловось как эзь ливтневть тензэ. Яла теке истяк эзь аште, яла работась. Пельсь анцяк урьванть кувалт — кады ськамонзо.
— Эряк уш кодаяк, кулан — мейле олясь тонь ули — кортыль сон тензэ.
Курок тундо, таго ламо тев. Ризны Яков атень седеезэ. Шабрань пельде марцесь, урьвась сыргси мирьденень таркаяк мусь.
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1938 году и был посмертно реабилитирован в 1957 году, соответственно эта работа выйдет в России в общественное достояние в 2028 году.
The author died in 1938, so this work is also in the public domain in countries and areas (outside Russia) where the copyright term is the author's life plus 80 years or less. |