Якстере теште/1924/24/Эрзянь учителень промксонтень
| ←Прявтлопа | Якстере теште, № 24, 14 августа 1924 г. редактор Глухов, Пётр Семёнович Эрзянь учителень промксонтень |
Чопудань панеме велестэ→ |
| Якстере теште. Еженедельный орган Мордовской секции при Ц. К. Р. К. П. (б.). — № 24, 14 августа 1924 г. — с. 1 |
[ 1 ]
| Эрзянь учителень промkсонтень. |
Сентябрь ковон 7-це чистэ Московс пурнави эрзянь учителень промкс. Те промксонть умок учость эрзянь учителть, ды аволь анцяк учителть — сонзэ учость весе, кить роботыть эрзя ютксо. Мекс истя сонзэ эйсэ учость? Кодамо лезэ учить сонзэ пельде? Эрзянь роботникне учить покш лезэ промксонть пельде — сон невцы кинть, кува эряви ветямс тонавтума тевесь эрзя ютксо.
Те шкас эрзянь учителтьнень ютксо арасель ве лад те тевсэнть. Аздан муят ли минек ютксо кавто эрзят, конат бу велацо арсильть эрзянь тонавтума тевденть. Улить минек ютксо истятт, конат мереть аэряви кодамояк эрзянь робута, седе паро ули буди минь карматанок эрзятьнень рузонь кельцэ тонавтомаст, седе курок стувцызь эрзянь келенть и седе курок сынь теевить культурной ломанькс. Эрзянь робутанть сынь ловсызь аразень тевкс. Сынст койсо эрзянь робутась аволь культурантень вети эрзятьнень, а уски эйсэст мекев культурастонть.
Но улить истяткак, конат арсить тееме кодамо бути сынцист эрзянь культура, конат мереть, эрзянень эрзянь эрямодо, ды эрзянь кельде башка мезеяк аэряви содамс.
Кода жо робутамс эрзя ютксо? Кода ветямс тонавтума тевесь? Эрявить ли эрзянь кельцэ тонавтомс эйкакшне учильнясо, эле рузонь кельмцэ? Буди эрзянь кельцэ, сестэ знярц те кельцэнть эрявить тонавтомс и кода кармамс рузонь кельц тонавтомо? Вана не тевтьне эрявить весе решамс промксонтень, чтобу мейле весеменень робутамс велацо, а аволь истя, кода роботынек те шкас.
Промксонть икеле ащить покш задачат. Ялгатьненень, конат сыть промксов, эряви содамс, что промксось пурнави аволь сень кис, чтобу вейке-вейкенек нурнемс ды чумондомс мекс беряньстэ неть эле нонат робутасть; аволь сень кис, чтобу вешнемс кие парсте робутась, акие беряньстэ — сон пурнави сень кис, чтобу муемс и невтемс эрзя ютксо робутыцятьненень виде ки, кода седе курок эрзятнэнь теемс культурнойкс.