Якстере теште/1924/08/Ламу паксень кой Раунь чирива
| ←Эрзянь моро | Якстере теште, № 8, 20 марта 1924 г. Ламу паксень кой Раунь чирива |
Сельско-Хозяйственный Товариществат→ |
| Якстере теште. Еженедельный орган мордовской секции при Ц. К. Р. К. П. (б.). — № 8, 20 марта 1924 г. — с. 2—3 |
| ВЕЛЕНЬ ХОЗЯЙСТВА. |
| Ламу паксень кой Раунь чирива. |
Раунь (Волгань) чирива ряц паксетни веси видизь зерновой сюрусу: розь, пиними, товзюру. Сех ламу видилть тосо товзюру.
Раунь чирива, а седе якшаму пеле эрицетни мереть „алу пеле“, модатни пек парт, тень эйстэ уж веси содыть, но урожайтне тосо а пек покшт эрцить. Кинь сеицтэ вачу астартнисы? — Самарской, Саратовской, Царицинской губернетнень. Тосо сплошь ды рядом кизынь перть ве пизимияк а пры, вицни стяк юмсить, вицниньгак мекив а пурнасызь. Истяяк эрци — десетинасту пурныть кеминьшка пондо сюру и а дивитькак, тонацть.
Истяму коська шкани знама уж сюру иля учик. Васня коськить, палузь палыть, тикшитни и сех икили скотинатнень бедась старцынзе. Сыненст уж сеск кизна жо не мезди ярцамкс.
Скотинась секс жо дешовалгады, а теле лангс кадумкс — не мезди андумкс. Купецтьместь рамаму а капшить. Базарусь пешксе скотинаду, а сынь якить кедест зепка, сыненст еще питний маряви. А мужикинть сюрузуяк арась, сонендэ цяк сась ну и мисы сняруду, зяру купецесь максни.
Миивсь скотиназу, рамась тарказунду сюрыни. Косто вачу, косто пешксе — ютась телесь. Тунда бу анукстамкс видьманень — алашесь арась. А скалт а алашат. Косто теть бедной ломанень рамави алаша? А скотинавтуму колияк а вельмат. Вана месть тейни вачу иесь.
[ 3 ]Васув не месть якамкс. Сельминик икили ютась алу мелень голодось 1921-22 иестэ, пингизыник а стувсыник. Сыри бабине евксонь таркас нуцьканстынь карми евтними, кода семеень-семеень вачуду кулцисть, кудуст—чист каднусть и тукшнусть кше сускумунь вешними. Вана месть эрцить Раунь чирива.
Опытной сельско-хозяйственной станциетни кармасть видними сякой сюрут васня варчамунь кис, конат эйстыст седе цидярдыть коськи кизыни. И улить сюрут, конт чачить коськи кизнаяк. Истяк коист и кадусь: течемс видить сякой сюрут. Улить пизимить — чачить неть, улиньдерей каськи шка чачить лият седе цидярдыцят.
Еще опытной станциетни мереть, что минек бедась еще сень эйсэ, что минь а полавтнитям сюрутнень. Ряц видитям товзюру эли розь ды колмо паксява, а таркань-таркань алу пеле кавту паксява анцяк. Ну кадык тосо модатни виивть, пару шкани кавту паксяваяк кепицызь урожаинть. Но ученой ломатни и опытной станциетни мереть, что кодаму виив модась илязу уль, сон сетики лотки сюрунь чачмуду, если минь карматам апак полавт видними зерновой сюрут. Алу пеле, например, модась еще пек виив, но сондо мелезэ молць товзюрунть и розинть эйстэ, секс сон и чачи неть сюрутнень. Значить, коськи кизызь а ськамунду чумусь, минцькак чумутам, моданть мелендэ а вантам.
Чтобу оймавтумкс модась, сех пару виднимкс чинчарамут, кукурузат — нетна сех парт. Мельгаст молить катфат, секлатни тикшинь таркас скотинанинь арыть. Видиде эйсыст апак пелть, сынь коськи шканияк касыть, убытка эйстыст колияк а ули, модась алуст колияк стяк а юми. Ну, конешна, кармньдерятам минь кортаму, что модась эряви оймавтумкс, то колмо паксяду лоткамкс думаямуяк. Колмо паксява мези иля вить, а ойми.
Зяру эно паксят теймикс? Васня можна нили паксят. Ве паксесь эйстыст озимди мейли виднимкс чиньчарамуду, кукурузаду, секладу — пропашной сюрут мереть эйстыст.
Сестэ лаксесь ули истя явузь:
| 1 | . . . . . . | парина |
| 2 | . . . . . . | озимть |
| 3 | . . . . . . | пропашнойть |
| 4 | . . . . . . | яровойть |
Опытной станциетни неезь, что пропашнойди мейле пек парсти касы яровой товзюру.
Коть ламу паксень койсы эрьва паксенть алу модась ули и седе аламу, напр. товзюру эли розь алу, но теде пельмикс аэряви. Пропашнойди мейле модась пек виими, кочкома тикшитни юмить лангстунду и знама сон чачи сюру седе ламу. Ды чачить еще пропашнойть: катфат, секлат, конат телень перть сатыть скотинанень. Пельмикс не мезди, икилинь снярумсу сюрунк карми улиме, убытка аули.
Тонавтыть жо тынк а сень кис, чтобу тынь сюру пурнавлиди икилинь снярумсу. Тонавтыть сень кис, чтобу сюруду улист пешксе сусикинк, ламине улизэ скотинанк и тынць эрявлиде ломанькс, улис — чисэ.
Волганть чирива эрзетнинень пек бу эрявуль кунцулумкс, месть кортыть и мезис тонавтыть сынст ученой ломатни. Саратовской, Самарской, Царицынской губернетни пек коськи таркасу ащить. А коськи таркава пару виднимкс ве иестэ эрьва кодат сюрут секс, что конаткак ды чачить и ярцамкс ули мезди. Секс и эрявить теймикс ламу паксят. Ламу паксетнинь марту скотинаяк появи кардайсыть, коромот карми улиме—лоткат скотинань микшниме, кармат эсь кисыть печксиминдэ. И пекить пешксе, и орштазят, и карцизят.