Эрямос совамо/Ташто коесь чумо

From Wikisource
Jump to navigation Jump to search
Ташто коесь чумо  (1933) 
by Раптанов, Тимофей Алексеевич, edited by Лукьянов А.
Т. А. Раптанов. Эрямос совамо. Ёвтнемат. — Мокшэрзянь государственной издательствась, Саранск, 1936. — с. 69—74

[ 69 ]

ТАШТО КОЕСЬ ЧУМО

 

КИЗЭ. Дрига баба умок уш стясь Теке варма, эрьва ков кайсеви. Капши. Тезэнь каподи — ськамонзо, лияс кунды — ськамонзо. Ве тевенть пес а прядсы, омбоцес кунды. Кавто кедь марто коть ков сезевть...

Скалонть потявтомадо мейле кандсь уштомс пенгть. Ертынзе каштом икелев, тусь ведьс.

Ушось сэтьме, лембе. Умарь чувтнэнь кутморясь чевте кошт. Ушосонть парасть скалт. Сеедьстэ морасть атякштнэ. Велесь сыргойсь.

Дриганизэ путызе ведь марто ведранть, нокшстась стадав скалонь панеме.

Пастухось течи такода кувать эзь листь. Скалтнэнь кирдсть окольця вакссо. Аватне промсть куцяс ды евтнить эрьва мень кулят. Мезеяк, костояк кияк чульть-чальть марясь, поладсы, евтасы эсь койсэнзэ, — яла кортамо.

— Я, аля туян, эйкакшом илязо сыргозть, — Дриганинзэ мельс ледсь эйкакшось. Чиезь тусь кудов.

Вере пестэ появась пастухось. Стаданть удало цярадсь локшосонзо, скалтнэ сыргасть ало пе енов, листь велестэнть.

Турбатнестэ лисевть тусто качамось сравтовсь веленть келес. Кардайсэ марявсть стукамот, алашань паркснемат.

Дриганизэ эщо кудонть малав апак пачкодть [ 70 ]маризе эйкакшонь авардема вайгеленть. Скирдавсь мик аванть седеезэ. Жальгак маряви, кежтнэяк састь.

— Тетьк кель варянть! — чиемстэ севнось авась эйденть ды сонсь капшась.

Кудос совамодо мейле, баксордызе эйкакшонть беремазонзо ды севнось:

— И, пей сукс! Ковгак эйстэть а лисеват. Ансяк секень содат — лажат. Ломанень эйкакшост цирцк а молить. Эйсэнзэяк мезеяк арась, коське, лажамонтень виесь косто саеви... — Поля штавтызе мештензэ, эйкакшось кенярдозь кармась потямо. Чевте турвасонзо цямказь нилсь ловсонть. Сельме вановтонзо пезнавтызе аванть чамас. Прок мерят остаткадо ванкшны лангозонзо. Пиштяка эйкакшонь вановтось токизе авань седеенть.

— Ах корминецкем, седей панкскем, верь петнявкскем. Мекс пек пштистэ ванат лангозон? Уту-ту, уту-ту. — Поля кармась верей ертнеме эйкакшонть.

— Апаро истя церам. Ансяк бу кедьсэ аштевлить. — Сон каизе эйкакшонть лавсес. Эйкакшось кармась авардеме, авась туемстэнзэ нурякстызе

— Молян, кором сарастнэнень каян, — пшкадсь ды лиссь кудостонть.

Чись явовсь пандо прястонть. Яла шашты верев. Вановтсонзо нолси валскень правт росанть. Маней. Читькак маней карми улеме, роса прась. Качамось сравтови мастор ежонтень, те пиземень каршо Секс а содави мезе пряват печти чинь-чоп.

Тарка лангсто стясь Дрига. Роботамо молемс аволь эряводеряй, паро завторкс удоволь-бу. Сон евардызе чаманзо, оршизе суманьнензэ ды лиссь ушов.

— Ков бути тусь Поля? — кортазевсь ськамонзо Дрига. Сон ансяк велявтыксэль кардазов, лиссь шаброзо Маря. Кедьсэнзэ эйкакш, кедь песэнзэ омбоце.

— Тон ков, Маря? — кевкстизе Дрига.

— Ды, вана, эйкакштнэнь ясляв кандсынь. Седеемгак эйстэст налкстась. Куть чить сельме икеле а улить. [ 71 ]Роботамскак эряви. А роботат — кшияк а максыть. — Маря эзь лоткаяк, тусь ваксстонзо. Дрига совась кардазов. Такода кежь марто хлопадизе ортыненть.

— Кие марто тон? — авась лиссь латалдо ды кевкстни мирденть.

— Маря ютась.

— Шабрась?

— Да.

— Сон ков те шкане?

— Ясляв эйкакшонь кандомо тусь.

— Эрявольть бу минекненьгак кандомс.

— Лоткак. Мезть а эрявить тапарят. — Машнитезь мерсь Дриганизэ.

— Яслят... — тошказь курго потсо моткодсь Дрига ды совась кудов. Мельганзо совась Полайгак.

Дрига ярсась ансяк потявт ловсодо ды тусь эсь бригаданстэнь.

Полай овси стувтызе, што течи ведь лакавтыксэль Кардайстэ стойкась а совавтови, ношкстась Дрига мельга:

— Дрига! Дрига! Велявтта аламос. — Ве кеденть кепедизе конязонзо, омбоцесэнть яхоесь — тердсь мирдензэ. Дрига велявтсь.

— Месть рангат?

— Совавтык стойканть. Онот гобрек лангсо!

Дрига сельгизе цигарканзо ды чалгизе пильгалонзо. Стойканть совавтомадо мейле авась кантсь ведь ды каштомс путсь чугун.

Каштомсонть пенгтне пакштордозь палсть Сяткинетне ертовсть томба лангов. Толось келес нолсезь-нолси каштом кургонть. Поля саизе заслонкать ды глушизе аламодо каштомонть. Толось нельгсь прянзо ушов турбантень

Поля капши. Сон мольсь остаткадо ведьс, ютамсто сейсь умарь. Сускизе, ризаня сокось чудевтсь сельгензэ. Се шканть кудосонть таго авардезевсь эйкакшось.

— Стядо коть тынь! — Тарка лангсто стявтынзе [ 72 ]Огрань ды Кандрань. Неть эйкакштнэ кавонест вишкинеть: Огранень — сисем иеть, Кандранень — кото.

— Налкседе мартонзо. — Эйкакштнэ кувать езасть пельс уды сельмест. Курксост нартимкс тикшень сэпе.

— Авай, ярсамс мезеяк ули? — авардевть вайгельсэ удомань пачк пшкадсь Огра.

— Аламос аштеде. Пиить модарькатне ды ярстадо. — Поля варштась каштомонтень. Модарькатне лакильть. Бутрав човось кепети, сезеви. Остатка чугун крайтнесэ цирьнесь ведесь, прок, мерят, мезеяк невельсть...

— Тынь налкседе Митька марто. Ванодо лавсьстэнть илязо пра. Мон курок сан. Марянь кедьстэ лопавтнемс очко вешан. — Сонсь капшезь тусь кудостонть.

Митек пеедькшнэсь лавсьсэнть. Кундасы пильгензэ, усксы кургонтень. Потси пильге суртнэсэ. Руцятнень умок уш пстиинзе.

Огра мольсь малазонзо ды токши альксэнзэ. Митек кутстяви, пейди.

— Кандра! — пшкадсь Огра, — дай пицьтясынек Митеконь.

— Кода? — такода нузяксто кортась Кандра.

...Полянь ансяк кулома мельга якамо паро кучнемс. Тусь ды емась. Маряяк ушты кудо. Сонгак капши. Мешицянзо Марянь арасть.

— Тон молят течи роботамо? — кевкстизе Маря Полянь.

— Молян. Ве чияк эзинь нолда. Чистэ роботан. Ансяк а содаса мезень кисэ? Улиндеряй меле ладсо...

— Эйкакштнэ кие марто кадовкшныть? — кевкстизе Маря Полянь.

— Ды ськамост. Лиясто авам содавтсынзе, туи. Ды марить, — кенярдозь кармась евтнеме Поля, — Наста мирдезе кадызе. Ней Кулик Иван марто усксеви.

— Правдый? Пигазонь Наста истя?

— Эно...

[ 73 ]Поля озась ды кармась евтнеме, кода Пигазонь Наста кадызе мирдензэ.

Огра ды Кандра тейсть эсь тевест. Састь тенст превть пеелень човамс. Човасть ды раксесть.

— Кандра, сак кирдть пильгт. Повнясак тетям баранонть пицьтизе? Эзь куло ведь?

— Дай мон керясынь!

— Иля, тон пильгтнень кирдть, — аштесь эсь валонзо кисэ Огра. Сон томбам лангсо эщо езызе пееленть кирьпецтненень ды мольсь лавсентень. Кандраяк мольсь. Митек пейдезевсь каршозост. Мерят прок энялды икелест.

— Иля пстие, — Кандра кармась кунсеме пильгензэ. Митек седеяк пеедсь, думась налксить мартонзо. Нельгсь пильгтнень.

Огра каподизе кискенть, нурьги мешоккенть ды цёрцк керизе. Пси вересь прок боцька туло варясто кармась чудеме. Кандра неизе, кода тетязо мейсэ бути почодсь барантнэнь. Сонсь сайсь коморо пси куловт ды почодынзе эйкакшонть альксэнзэ. Митек мик рангстамо эзь кенере. Сеске майшсь мелявксозо. Ульнесь Митек, арась Митек.

— Вай, сон кулось... — сорнозь тандадовт вайгельсэ пшкадсь Огра. Кандраяк чувтомсь. Тандадоманть марто аздыть месть тейнемс.

— Ней авам таго чавсамизь... — авардезь ладсо мерсь Кандра.

— Огра, кекштяно авадонок.

— Козонь?

— Ванат, стойкантень. — Кандра штавтызе мешоксо вельтязь стойканть ды кавонест кукорьгадсть потмаксонтень, прок ойместкак арасть. Стойканть мекев вельтизь мешоксонть.

— Кандра, азе велтик Митеконь, иляссо ней авам! — Канда лиссь, каясь эйкакшонть ланга руця ды мекев стойкантень.

Аватне яла кортыть. Евтнить вейкест-вейкест туртов эрьва мень кулят.

[ 74 ]— Молемс эряви, чей ведем лакась. — Поля тусь кудов. Бойкасто совась кудов, варштась, — эйкакшось уды. Седе курок варштась каштомонтень. Чугунтнэсэ ведесь лакась. Чугун чиретне велькска нельгсь прянзо.

— Ух, чады, чады! — каподизе ухватонть, таргизе томбам лангс чугунонть. Мейле лыйк штавтызе стойканть, каподсь чугунонтень. Эйкакштнэ лекшкадсть стойка потмаксонтень — а лекситькак. Пси ведь марто чугунось капшевсь аванть. Сон жойк каизе лакиця веденть.

— А-а-а-й!.. — кавто апаро вайгельть рангстасть стойкастонть. Поля талакадсь. Се шканть совась Дрига. Поля эзь фатяяк сонзэ совамонтень. Эзь кенерть лаки ведьстэнь эйкакштнэнь таргамо. Новолсть кедьтне, майшсь паметесь. Пильге лангсто прась Дрига тандадоманть марто, а соды мезть тейнемс. Мольсь лавсентень. Митеккак кулозь. Кундынзе прячерензэ ды тусь бригаданть мельга рангозь:

— Еминь! Еминь, брат!..