Эрямос совамо/Скотница Соня

From Wikisource
Jump to navigation Jump to search
Скотница Соня  (1936) 
by Раптанов, Тимофей Алексеевич, edited by Лукьянов А.
Т. А. Раптанов. Эрямос совамо. Ёвтнемат. — Мокшэрзянь государственной издательствась, Саранск, 1936. — с. 75—79

[ 75 ]

СКОТНИЦА СОНЯ

 

КОЛХОЗОНЬ правлениястонь марявсь Сонянь пшти вайгелезэ:

— А маштан. Знярдояк эзинь яка скотина мельга. Эсинек арасельть скотинанок, ломанть эзть кем лангозон, вишкине ульнинь. Колхозос совамодо икеле ломань эйкакшт ванынь. Ков мон тозонь. — Соня отвечась колхозонь председателенть Карпунинэнь каршо.

Карпунин аштесь эсинзэ валонзо лангсо.

— Пандя теть, Соня, пандя. Валске жо содак эсь теветь. Улят скотница. Вазт теть а симдявить штоли? Туво левкст ай андовить? Тонадат. Васень скотница улят колхозсонть. — Карпунин састо шлепадизе Сонянь лавтов ланга, веселасто пейдезевсь.

Соня аламос аштесь прянь нолдазь, мейле кирвайсть штеканзо, кивчкадсть ашо пеензэ, пшкадсь.

— Ладна. Ансяк мон а кеман эсь лангозон, — сон одов сюлмизе пацянзо, арьсезь лиссь правлениястонть.

Кудов мольсь састо, апак капша ды арьсесь вандынь чинь роботадонть.

Тундонь лембе, весела чись палсесь Сонянь чаманзо. Пувась лембе варма. Пацянть алдо лыйнесть Сонянь цють тюжа черензэ. Сон мольсь ды витьнесь эйсэст. Сон мольсь, эзь арьсе мездеяк, ансяк мельсэнзэ ульнесть туво левкстнэ, вазтнэ.

Кода кудов мольсь, евтась аванстэнь, роботамо карми скотницакс. Авась пек апаргадсь.

[ 76 ]— Таго туво юткс... Пингезэнек рудазсто эзинек лисьне, колхозсонтькак парось арась. Минек ялганть ков больше. Кие моли тозонь... Минек ялгантень яла паро, куть рудазс нерьгик. Эх... — сон кувакасто таргизе оймензэ.

Соняяк аштесь прок покордавозь. Каиньзе лангстонзо дешова сицэнь нарядонзо, апак пурна быжновтынзе мей кенерть. Апаро ульнес ялгадо-оядо. Виздсь од церадо. „Мирем туить кочкомо весе вейсэ. Весела. Тон прок кренч ванст тувотнень. Пийть-палт чаво велесэнть“ — арьсесь эсь потмованзо Соня. Авантень пря эзь невте, эзизе чамда а паронть потмостонзо. Авась, кежевстэ мольсь малазонзо ды пшкадсь.

— Эли келеть арасель, кирьдевтеме? Меревлеть а молян ды паро. У, кирьдевтеме.

Яла теке эзизе вачкодть. Коть чавноматне эрсесть пек сеидестэ. Чавнокшнось сех пек, кода нужась порьнесь эйсэнзэ, ломань роботась синтсь аванть Лиясто истя чавнокшнызе, Сонянь телазо мик путкоти, — руми прок пице палакссо невельдявт. А мадемс, а озамс. Аванть седеесь сэредиль, но мезе теят...

Авась яла машнетедсь. Яла апаргалесь, севнось. Севнось эсь эрямонзо, колхозонть, Сонянь ды весе, кие понгсь кель прязонзо. Ваны: Соня местькак каршозонзо а отвечи, — пшкадсь:

— Паро нать уш, сяткинем. Кода ломанть мерить, истя тейть. Почот велькска а кирнявтат, — авась овси чевтемсь, сэтьмелгадсь, паркстомсь, прок мерят мелезэ витевсь севномасонть. Остаткакс кортазевсь:

— Можо алкукс те эстенек, аволь ломаньнень. — Сонянь седейс кеверьс мень бути чевте, но а каладыця поколь. Веселасто отвечась аванстэнь:

— Вадрясто карман роботамо, паряк премия максыть.

Тень сон евтызе овси радовазь ды смелстэ. Авась витнесь плетешканзо ды пшкадсь:

— Паз эно мартот. А содан мон те тевденть.

[ 77 ]Валске авась Сонянь стявтызе рана. Ансяк зорязо лазовсь. Те мелезэнзэ эзь туе тейтерентень. Коть кашт мольсь, яла теке кувать езась сельмензэ. Ушосонть сонзэ кутмордызе экше коштось. Цють аволь чиезь тусь скотинань кардазов.

— Монь кучимизь тонеть роботамо, — пшкадсь старший скотницантень Осянень. Тона кежейстэ варштась лангозонзо ды пшкадсь:

— Роботак, — сеске жо тусь вакстонзо.

Соня арьсезевсь: „берянь карми тесэ улеме“. Васьня арьсесь туеме правленияв бригадирэнтень, эзь моле. Совась Ося мельга скотной кудонтень.

Скотницатне эсь ютковаст кортавсть эйстэдензэ.

Соня вадрясто чаркодсь, фатясь, кортыть соньдензэ. Вастызь а вадря мельсэ. Но тень сон мезескак эзизе путкак. Кармась кевкстнеме, знярдо андыть, кода, зняро максыть ды весеменень ли вейкедьстэ.

Старший скотницась, — Ося а мельсэ евтнесь Сонянень. Мейле тусь невтнеме, косо мезе ашти, косо туво левкстнэ, вазтнэ, сонсь кортась:

— Тонеть, матушка, тесэ а лади роботамс. Комсомолка — кармат тесэ рудазсо пиксеме.

Ося кеместэ кортась тензэ молемс бригадирэнтень Локшиннэнь ды вешемс лия робота. Соня истяжо кежейстэ чаравсь прясонзо ды пшкадсь:

— А молян. Тей кучимизь, теск карман роботамо. — Аламос кашт мольсь, таго кевкстизе Осянь:

— Мек пек рудазовт кардтнэ?

Ося трокс варштась лангозонзо. Нузяксто отвечась тензэ:

— Ней куть коськсть. Тундонть совавлитькак — болотас ваявлить.

Сынь явсть, скотницась совась кудос, мезе бути сайсь ды куроксто тусь кудов. Соня велявсь мекев, эщо весть ютынзе кардтнэнь ды арьсесь, кода бу теемс, штобу кардтэ улевельть ванькст, вазтнэяк истяжо улест куят, веселат. Сон сеске чаркодсь: кирдемс туво [ 78 ]левкстнэнь вазтнэ марто вейсэ а эрявить. Скотницатне некеть, якить мирем туво левкстнэнь, вазтнэнь мельга, сынь жо скалткак потявтыть. Уравниловка, обезличка. Соня укстазевсь, прянзо нолдазь совась скотной кудонтень. Скотницатне ульнесть мадезь коник лангсто ды кашт мольсть. Мелест арасель кортамс Соня марто.

Сон мольсь столентень. Столенть лангсо ульнесь журнал, козонь сермалесть, зняро раштазь вазт, туво левкст ды зняро кулость. Эсь потмованзо ужакстсь. Коть сон теде икелеяк содась, зняро кулость, но ней цифрась кедензэ ало, — токавсь седеезэнзэ. Соня марямга ловинзе:

— Шачтсть кавксонькемень сисем, кулость колоньгемень кавто, — шлепадизе корканть, ушодсь сермадомо. Соня бойкасто стясь, менчизе кавтов коневонть, пшкадсь:

— Те ячейкав, те правленияв, — мартост тусь.

* * *

Правлениясо васня яла эсть соглася туво левкстнэнь явомс вазтнэстэ. Карпунин кеместэ кирдсь:

— Арасть башка кардонок. Видематнень а кадсыть. Сексня уш, — сон озась. Вановтонзо нерькстызе столентень ды стукась сурсонзо.

Ячейкань секретаресь Батюшкин кежеявтнесь. Кирдсь Сонянь меленть, псистэ кортасть:

— Муемс шка. Эрявить явомс.

Спорясть. Тевесь эйстэст васоло ульнесь.

— Лоткадо, — кортазевсь Соня, — тень можна теемс пек шождынестэ, — сон сайсь конев панкс, карандаш, кармась тейнеме кикст. — Некеть картнэ. Ансяк улест башка ды кисэст отвечиця ломанть.

— Пелест арасть. Кулсить остаткатнеяк. Миненек эряви а куловтомс кейкеяк, — поладынзе секретаресь Сонянь валонзо.

— Истя, — Соня сезизе кортамонзо, — кучить комсомолтнэнь картнэнь урядамо. Мейле уш мон а кадсынь [ 79 ]истямокс. — Весе вансть лангозонзо ды эзть кеме тензэ. Сон кеместэ кортась. — А кадсынь.

Омбоце чистэнть теизь Соня ладсо. Комсомолецтнэ урядызь кардтнэнь. Сонянь аравтызь ваз мельга старший скотницакс. Осянь — туво левкс мельга. Скотницатне кувать кежеявтнесть лангозонзо.

Кода Соня кармась якамо кинишка марто зоотехникентень Прокаевнэнь, скотницатне лангозонзо берянь тевть ладсесть.

— Комсомолка, тонавтнек пельдензэ.

Соня содась эсинзэ тевензэ. Скотной кудос кантлесь кинишкат, газетат. Мейле сонсь кармась нолдамо стенгазета. Сеедьстэ скотницатненень ловнокшнось. Сынь а кунсолыть, сон яла ловны, евтни.

Весть сексь енов, кулось туво левкс. Уш покш ульнесь. Соня сермадызе тень газетас. Эсинзэ скотницатне пек вечкизь Сонянь. Сынь вейсэ вешсть, штобу бригадирэсь штраф путоволь Ося лангс. Истя лиськак. Васня Ося кежеявтнесь. Эрьва мень апаро кулят нолдтнесь Сонядо. Друк Ося лиякстомсь, прок алкалгадсь.

— Дугам, Соня, лездак, кода монень роботамс. Ванта, сексь сась. Тонь вазот целат. Пастухтнэяк кунсолыть эйсэть. Вазот лангс ванан, лиясто прок бояронь куят, шумбрат, веселат. Ды мик сынь содатадызь.

Сонянь мельс ледсть кулятне, конатнень нолдтнесь Ося велень келесь, — апаргадсь. Апаронть эзизе невть Осянень, пшкадсь:

— Дай тонавтнек. Эряви куть аламодо содамс зоотехниканть.

Ды Соня Осянь таргизе тонавтнема тевентень.

* * *

Весть Соня кижнэзь чийсь аванстэнь. Эщо кенкшка совамсто кортас:

— Авай, ней скалонокак карми улеме. Правлениясь премировимим. Ваз тенек макссть. Комсомолонь ячейкась пасиба тень ёвтамсь.

Соня радовазь кутморды аванзо.