Эрямос совамо/Стака иетнестэ/4
| ←III-це пелькс | Стака иетнестэ (1935) by , edited by Лукьянов А. IV-це пелькс |
V-це пелькс→ |
| Т. А. Раптанов. Эрямос совамо. Ёвтнемат. — Мокшэрзянь государственной издательствась, Саранск, 1936. — с. 16—20 |
IV
Кизэнь лембе чокшне. Аганя лиссь кудосто, ризназь седейть, тошна, горя марто, стамбарнэ сыргась виренть енов. Мольсь прянзо нолдазь, арьсезь. Тошна ульнесь Астаканонь кисэ, апаро ульнесь ломанень коронь кирьдемадонть.
Вирь чиресэнть Аганянь тапардызе экше, чевте вирь коштось. Сэтьме, сэтьме. А каштордыть тумо лопатне, а черькить тумотне. Аганя ней марясь, што ашти алкуксонь пуста степсэ цецякс ды ансяк сон, ськамонзо эри лембе вень чопудасонть.
Сон кувакасто укстазевсь ды стамбарнэ серьгедсь моро. Васня марявсь аварьдевть, сорныця сельведев вайгель. Мейле аламонь-аламонь лиссь седе пштистэ, гайгезь пештясь сэтьме чаво коштонть ды валковойстэ кайсетедсь вирьганть.
Мерезь шкасто, евтазь таркав сыргась виренть енов Астакан Аганя марто вастомо. Велестэнть лисемстэ Астаканонь пилес каятодсь Аганянь морось.
— Те Аганя, — арьсезевсь Астакан ды седе капшезевсь.
Астакан мольсь овси малав, но Аганя эзь фатя. Сон ульнесь пенька лангсо озадо, куманжанзо лангс кенерепакарьсэ неждясь.
Астакан ютась икелензэ, штобу а тандавтомс, ды стамбарнэ, седейс токиця вайгельсэ пшкадсь:
[ 17 ]— Тесэ паро...
Аганя чатьмонсь.
— Мекс нусманят, Аганя? — састо кевкстизе Астакан.
— Тесэ арась эрямо. Вана мон беряньстэ чаркодян, мезе моли перькан, но седеем мезе бути мари... Вана кода лиякстомтомс эрямонть. Тон вант: кадовсть секеть жо педлейть, кендялт, конат истяжо, кода икелеяк, саить кенжест алов ды... саимизь уш, — Аганя седеень аирдазь нолдызе прянзо.
Астакан кашт молезь новолезь озась летьке, пиже тикшенть лангс. Аганя стамбарнэ шаштсь малазонзо, лавтовост токасть вейс, лексема лембе коштост васодсть карадо каршо. Астакан саизе Аганянь вить кеденть, жалязь дроцнесь эйсэнзэ, мейле кортазевсь:
— Стака... туремась эзь прядов... Эряви беднотантень, средняктнэнень икеле валстамс лангстост рогожанть, сестэ карми неявомо потмозо, сестэ лисить лангс врагонть тевензэ. Сави зярс цидярдомскак, кирдемс кор... Чаркодть, Аганя, што советэнь властесь минек кисэ. Виде, тесэ минек советсэ улить аволь минек ломанть. Но те а кувать... — Пеень сускозь Астакан сювордызе кедензэ, вансь ков бути веленть трокс ды шождынестэ оймензэ таргазь нолдызе прянзо Аганянь кумажанзо лангс.
Аганя стамбарнэ сезнесь перьканзо тикшенть, ды мейсь бути вачкась элезэнзэ.
Виресь кашт молсь. Сэтьме, а куш а каш. Мезеяк костояк а маряви, ансяк чуросто-чуросто лия таркав ливти вирь сараз, эли васолдо костояк ве ендо лайшезеви покш пря корш. Кавто од ломанень седейть мельс паросо лексесть чевте коштсонть. Виренть чирева тумо роштятне алдо ландыш тикшесь васов ертнесь тантей чинензэ.
Аганя друг велявсь Астаканонь енов ды коштозо токась видстэ штеказонзо, пшкадсь:
— Мезес, кода кундамс? Мезе минь чаркодьтяно властень тевсэ? Мезе миненек толковави, мезе пес [ 18 ]евтневи? Минь чопода потомкст. Косо варя, — минек эйсэ потомдасызь. Косо сезевкс, минек вийсэ поладсызь... Вана те тунда, тон араселить. Получакшность видьмекст сетненень, кинь арасть видьмензэ, Игаев усксь кавто улавт. Монгак пиштяка чисэ молинь энялдомо — отказасть. Паро ломанть авань путызь превс: „Азе, келя, олостев“. Мольсь тозонь. Тосто конев, келя, кучтан. Авам эщо удыль, омбоце чинть исполнитель сась. „Азе, келя, вете пондт теть сермадсть“. Кува миненек якавтовить не китьне, путной ломаньтеме? Арась уш, а косто учомс...
Аганя саизе Астаканонь коморсто кедензэ ды озась. Аламос аштезь пшкадсь:
— Адя кудов. Ата таго кармить севноман. Улкояк, кода мартот якинь, сонсь Игаев кройсесь. Мери, кува злыдарьдят... Ведь вана кодамо эрямом... — Аганя чиремтизе прянзо Астакан енов, чевте черензэ варма ялтось лыйкадинзе Астаканонь чамас. Астакан прок удомсто сыргойсь:
— Адя, — каршо апак моль отвечась Астакан.
Сынь стамбарнэ тусть велентень.
Игаевень орта лангсо Астакан кундызе Аганянь кеденть. Астаканонь седеесь китэрдсь прок чомболкс, но снартомс мезеяк евтамс вечкемадо, мекс бути виздсь. Сон кирдсь кеденть, вешнесь кортамо валт, штобу эщо коть аламос кирьдемс вакссонзо Аганя Но прясонзо арасель мезеяк путной. Пря потмонтень эцесть ки соды мезть Яла нурьцесь Аганянь кеденть ды вансь менельсэнть палы тештне лангс. Аганя прок фатясь, кортазевсь:
— Течи Игаев айгор рамась. Вальске пурны-сэрьни базаров: эщо кавто алашат-робочейть арси рамамо.
Астакан эзь пшкаде. Сон кашт молезь ков бути яла вансь.
— Мезе мартот теевсь? — кевкстизе Аганя. Астакан прок тандадсь.
[ 19 ]— Мелем мольсь весемеде. Муемс бу парсте сермас содыця ломань ды кучомс серма Лениннэнь. Тев лисевель бу, содан...
Аганя яла чатьмонсь. Мейле чевтестэ варштась Астаканонь сельмс ды пшкадсь:
— Урьвакст, Астакан.
— Мезть мерить. — Тандадозь кевкстизе одов.
— Урьвакст, мерян.
— Мезе мейле?
— Кармат улинь-паронь пурнамо.
— Тонетькак а мерян.
— Мекс?
— Истяк... — општ мольсь. Теде башка эзь муе валт. Сон арьсесь кода бу ледстямс вечкемадо. Мейле мирьденень лисемадонть. Ней на вана. Лиссь мекев лангт. Те лангс апак вано поладызе кортамонзо:
— Алашадо икеле ашко а рамсить... Ништейдяно, Аганя.
— Нать тон а урьвакстат, знярс ули-парот а карми улеме?
Астакан нузяксто пшкадсь.
— Да.
Кавонест кашт мольсть. Шкась мольсь, моразевсть пелевень атякшт. Вайгелест кайсевсь кардайс. Вачо иесь ламонь кардайс эзь кадт саразгак. Лейстэнть кепететсь туман. Кизэнь нурькине весь эзь кенерь чопотеме, вирь удалксось уш таго кармась ашолгадомо.
Астакан сювордызе Аганянь кеденть ды а мельсэ тусь кудов. Аганя вансь мельганзо покордавозь. Сон знярдояк пря потмозонзо эзизе сайне, што Астакан а вечксы ды а урьваксты лангозонзо.
Тарка лангсо озадо кувать арьсесь Астаканонь евтазь валтнэде. Аравтнесь истя, аравтсы мекев ланг. Остаткадо прок чаркодсь: «алкукс лисят мирьдинень, — а сонзэ, а монь, — конаньгак мезеяк арась. Улеме кармить эйкакшт. Кармить пиштеме вачо пеке, штапо ланго... Эх уш, эрямо... Алкукскак видеть [ 20 ]Астаканонь валонзо... Аганя аварьдезь нерькстызе прянзо олгонь, пулев тодовонтень. Но эзь матедеве сеске. Сонзэ эйсэ муцясь: „Вечксы ли сонзэ Астакан“?