Эрямос совамо/Стака иетнестэ/3

From Wikisource
Jump to navigation Jump to search
Стака иетнестэ  (1935)  by Раптанов, Тимофей Алексеевич, edited by Лукьянов А.
III-це пелькс
Т. А. Раптанов. Эрямос совамо. Ёвтнемат. — Мокшэрзянь государственной издательствась, Саранск, 1936. — с. 8—16
[ 8 ]

III

Менелесь потмура. Чи валгома ендо неждясь раужо пель. Стенакс кузи менельганть. Летьке, экше вармась сувтнесь веленть велькссэ. „Пазось пиземе кучи“, кортнесть сокицятне ды кенярдозь ванность верев, [ 9 ]сыця пеленть лангс. Аломс аштезь прасть покш пиземе каплят. Аламонь-аламонь уставась корминецесь. Прок сеиде сувтемень пачк ушодсь сувтнеме.

Астакан ды Киря лелязо пизементь эйстэ неждясть кудо бокантень, кувать какшт мольсть Кортамост умок уш ульнесь ушодозь, ансяк ней пизементь марто сыньгак оймасть, вансть кизэнь лембе питней пизементь лангс.

Киря домкасто укстазевсь. Стамбарнэ, эсь судонзо пачк пшкадсь.

— Мейсь кильдемс кеж, тедиде сюронь шачума ие. Бути меля аволинек микшне мезе кадновсь, сестэ паряк живстэяк аволинек кадов. Эли бутим минсь лисевлинек, вакскак аволь видев тенек. Мезе ней учовлинек бу? — Киря сельгизе турвазонзо пурнавт слюнанть ды општ мольсь. Астакан видемсь, седейс сэредьксэнь токазь пшкадсь:

— Ванстомс эсь прясь вачодонть, лиятнеде овсе а арсемс, — те нать лома ладсо тейнема. Те ули-парось, конань тон бирдяик, аштесь монь лемсэ ды нажувазь тетянь авань вийсэ. Тон чаркодят, што монь грабимик: кадымик штапо, вачо. Кода теть а визькс честной ломанде? Тон монь кадымик Уфас емамо вачодо. Кадык родной тетянок куломо вачо. Кулось...

— Честностесь тапардавсь понгс гасникезэн. А неяви, — носкозь лабордсь Киря. Карь прясонзо сокарясь кудо бокасто валявксонть ды коське севоненть кучкорясь пизементь алов. Аламос аштезь Кирянь токась седейзэнзэ.

— Монь покорямс а мезть ды тонавтоман иля бажа. Бути мелет ули эрямс монь кедсэ ули парот кисэ — эряк. Кияк сускомонть кедьстэст а нельксы. Бути потмозот пийсь-палсь кеж, кежень пандома мель, сестэ азе тестэ ды иля появакшно сельмезэн!

— Тонь ули мелет эрямс, монь нать арась? Тонеть мезеяк арась, бути монь оймем лиси тонь кенкш порог лангс?

[ 10 ]— Мень монь тев? Кулок эли эряк кода маштат, ансяк иля меша монень.

— Ну, кода истя можна эрямс — а мешамс вейкенень-векенень, а лездамс вейкенень-вейкенень?

— Иля снартне лездамо, но мешамояк иля снартне, — Киря кежевстэ варштась братонть сельмс ды совась кардазов.

Астакан кадовсь кудо бокантень ськамонзо. Кода бути теевсь тензэ тошна, а паро. Лангстонзо марясь таго мень сталмо. Прязонзо эцесть эрьва кодат арьсемат, ледстнемат. Сон варштась веленть кувалт, нильтякац мик. Качадсь мень бути апаро киргакстома енов. Ледсь мелезэнзэ мелень вачо иесь. Истяжо сакшнось сторонасто — вачодо. Арьсесь получамс Арасто порция, эзть максо. Сывелень керьсемстэ ертовсь сускомо, каподизе сень ды арьсесь саеманзо. Се шканть Долгой рестедизе мастор вакс. Кувать аштемадо мейле, эзь повня, кода пачкодсь кудов. Ней истяжо сонзэ вачкодизе братозо.

Пизементь прядоманзо апак учо сон сыргась ульцянть кувалт. Ков? — сонськак эзь сода.

Кинть лангсо каршонзо вастызе Макинэнь. Раужо, сюрдов-сярдов чамастонзо неявсь, прок эйсэнзэ пурназь весе ломантнень апарост, натой пейдемазояк неявсь авардемакс. Эрямось бульчом истямокс теизе. Сон кодак сась действительной военной службасто 1915 иестэ, арась роботамо велень кудос писэрекс. Сон ульнесь дива кодамо коськаня, човине, свал якась горбунгадозь ладсо. Сестэ пря черензэ ваднилиньзе скал ойсэ, валанясто судрилинзе, ды сыргиль сборняв. Мерьсынек, сыль старшина, кежеявтнезь пижни народонть лангс, мейсь а пандыть недоимкат, подушнойть. Писэресь, те самай Макинэсь, пильге сур лангсо чийни стольстэнть шкапс, шкапстонть столентень. Меньшеви старшинанть икеле. Но сонзэ вановтсонзо свал ульнесь мень бути кеж. Секс зярдо ансяк эщо ертызь инязоронть, сборнясонть ульнесь [ 11 ]промкс. Ташто старостась эзь макст печатенть. Народонть ютксто муевсть колмо ломанть ды Макин марто вейсэ правтызь старостанть, нельгизь зепстэнзэ печатенть. Макин кенярдозь кирнавтсь скамия лангс ды весемень пиньгстэ пижакадсь:

— Сась шка порядкат теемс велентень, — ды сонсь кепедизе печатенть.

Ней Астакан икеле ашти самай те Макинэсь ды ледсь мелезэнзэ весе, мезть тейнесь сон.

Истя Колчаконь армиянть панемадо мейле, кода уш лоткасть урномадо гражданской войнань пушкатне, Слободасо ульнесь мезе бути райононь коньдямо. Слободантень пурнавсь кулаконь бандитэнь отряд, кундсесть ды маштнесть коммуниснэнь. Меньшевикень группась кучсь ломань Трошкина велес ды энялдсь, штобу тесэнь меньшевиктнэ кепедевлизь веленть большевиктнэнь каршо, Слободантень лездамо. Макин Вася се шкастонть уш ульнесь меньшевик. Сон курок сюлмавсь кулактнэ марто ды велесь ульнесь пильге лангсо.

Тесэ Трошкина велесэнть Васянь приказонзо коряс, сянго, ухват, коцерьган, узере ды пешня марто велесь кепедсь кулаконь восстания ды сыргась Слободав. Слободась ульнесь кеместэ тапардазь Якстере армиянь боевой частьсэ. Ансяк неть пряст невтизь, пандо чамастонть сеске вастыньзе пулеметонь толось... Макин сестэ орголесь.

Ней, зярдо сынь васодсть, Астакан пшадсь:

— Шумбрат.

Вася стамбарнэ кепедизе картузкензэ, сюконязь ладсо, комавтызе прянзо ды истяжо пильгень путнезь тусь. Яхоесь кедьсэнзэ портфеленть. Велявсь Игаев енов. Астакан арсезь мольсь икелев.

Пиземесь лоткась. Лембестэ варштась чись. Модась симсь пиземе веденть ды радувакшнось. Радувакшность ломантнеяк.

Ульцянтень лажнозь листь эйкакшт. Конат чийнить [ 12 ]ведьганть, конат кундасть веденть брудямо, кантлесть элесэст мода, рудаз. Петя кармась брудямо.

— Иляк пиря веденть, Буйла! — Рангстасть чудикирьксэнть седе алдо эйкакштнэ.

— Монь селтось пешкеди, мейле тыненк валги ведесь, — отвечась Буйла. Курок Петя ваксс мольсть ещо ялгат ды нарошной кундасть веденть а нолдамо алов — Цю-цю теть ведь, Киляк! — пижнесть Петя ендо эйкакштнэ. Аляка сэрьс вишкине, лавтовонзо келейть, мокшнанзо покшт ды калгодот. Сон стамбарнэ, прок покш ломань, чиремкшнэзь мольсь Буйла Петянень, стясь икелензэ, цильцк сельксь пеензэ пачк.

— Мезть пижнят? — пшкадсь Аляка.

— Аволь мон, — отвечась Буйла.

— Мейсь брудик веленть?

— Селт ули, ведьгев тейдяно, — стамбарнэ, пелезь ладсо отвечас Буйла.

— Кие ещо мери „Киляк“, сень сеске пеензэ потс прыть, — сонсь Буйлань кундызе сиведе. Се шканть кие бути пшкадсь.

— Аляка, дайте вейсэ ведьгев тейдяно.

Аляка эщо цильцькадсь пей юткованзо, мольсь седе малав. Ваннызе, брудень таркась алкукс вадря. Носкозь ушодсь роботамо. Бутрав ведесь яла пуромсь.

Астакан лоткась эйкакштнэнь ваксс ды покш паро мельсэ вансь дружна велув роботаст лангс. Мейле мольсь овсе малазост, пейдезь, веселасто пшкадсь.

— Истя-а, роботнички. Мезе строятадо?

— Ведьгев, — истяжо пейдезь отвечайсь Аляка ды вансь Астакан лангс кедензэ алдо.

— Кие азорось? — Астакан кундась мартост роботамо. Эйкакштнэ дивазь ваныть лангозонзо.

— Минек азор арась, старостанок ули Вана, — невсть Аляка лангс. Аляка кепедизе прянзо, мельс паросо пейдезевсь.

[ 13 ]— Ну, ну, тееде, — Астакан пильгсэнзэ тылкадсь мода брудентень. Смелчкадсь Алякаяк.

— Тезэнь срупонть чапсынек, иля калавт те тарканть, — сонсь пейдезевсь.

— Анокстадо, анокстадо сексентень. Сюро тедиде шачи ламо, — Астакан пейдезевсь ды тусь вакстост вельсоветэв.

Астакан вельсоветсэ аштесь кашт молезь. Кунсолось, мезть кортыть ломантне. Вельсоветэнь секретаресь прок терьневть поколь аштесь новолезь столенть экшсэ. Сонсь стамбарнэ, прок кекшезь ладсо сермадсь кодамо бути конев. Казямосто раздясь перась коневонть. Мейле ловкасто цяподизе подписензэ ды эчке, сянгора вайгельсэ, нурькинестэ мерсь:

— На, Макин подпишет, — венстизе нурькине, прок петькель эчке кедензэ, — ды... ды пожалой содат... — секретаресь аламодо а паро мельсэ коншстась сельмемнзэ ведьгевень арендаторонтень. Арендаторось комвась прясонзо, аламодо якстерьгадсь. Меньчизе коневонть, стамбарнэ тонгсь эйсэнзэ зепезэнзэ. Секретаренть сорновтневсь штеказо ды лапнозь новольсь алсе турвазо.

Те шканть ломантне музолдозь ванность карадо каршо. Чатьмонсть. Ансяк кие бути апаронь пачк раказевсь. Пувась цигарканзо лангс ды прок курго потсо пшкадсь:

— Лацинэнь кирга паресь коськсь, — ломанесь ноцкадсь цигаркадонть, пештизе кургонзо качамодо ды човинестэ нолдызе верев, прянзо каизе удалов. Арендаторось састо лиссь вельсоветстэнть.

— Тон фатить, Мотай ялгась, — пшкадсь кие бутим, — максыть — мекс а симемс, — поладызе секе вайгелесь.

— Мезе сынест, сынест куть веленть карензэ пракстанзояк иляст кадов, — пшкадсь Злодя. Злодя эзь пеедть, ансяк носксь судонзо пачк ды кежев вановтсо вансь пильгало лазтнэ лангс. Сон ульнесь сэрей, човине, [ 14 ]тоштя прок жерьдя. Чамазо прок сексень кельмень чавовт ожо лопа. Човине, сывельтеме чама кедесь таргавсь ловажатне ланга. Оймензэ тарксесь сеедьстэ ды ламо козсь. Мезеяк лангс апак кеме нежедсь галанкантень. Ансяк палсь потсонзо апаро, кеж, а вечкема мель.

Злодя сельгизе цигарка пенть, чиремкшнэзь мольсь Лацянь каршо, столь пентень. Коськаня кедензэ нежединьзе, соньсь сорнозь кармась козомо, аксорямо. Кургостонзо качадсь наксадомань, апаро чине. Аксордызе верь поколенть, кортазевсь.

— Мон роботан вельсоветэнь членкс, — таго козкстась. — Микшнитяд законтнэнь. Те коневось, конатань ансяк сермадык, фальш. Думинк тынсь, — велявсь ломантнень пелев, — те арендаторонть кавто кевсэ ведьгевезэ. Зняро сутканть яжи? Бути аволь сядо ведьгемень, сестэ кавто сядт, те малав зняро! Тон жо, — нерькстась човине, кувака сурсонзо секретаренть лангс, — волостьс сермадат ведьгемень пондт. Ледстинка мелень вачо иенть...

— Муик бозат! аха-ха-ха-ха! — Киря лиссь киякс куншкас ды кедензэ чави боказонзо, сонсь паметьстеме раки. Киря истя машты нарошной ракамо. Коть чинь-чоп кармавтык ракамо — раки.

Злодя варштась чопуда сэнь сельме керензэ алга ды эль-эль евтавсть валтнэ:

— Эх... лездатад эсь прянк грабамо, — сельгсь коське турвасонзо, стамбарнэ тусь.

Мотай кувакасто таргизе оймензэ, ды лиссь мельганзо.

— Чаво пря, — пшкадсь секретаресь. Капшезь сезсь конев. Цирь цирь сермадсь акт покордамонть лангс.

— Подпишитесь свидетельть, — нерькстызе коневонть. Киря истяжо раказь сермадсь. Сермадсть лиятнеяк.

— Тон, Астакан, — секретаресь веньстизе коневонть Астакан чаравтызе прянзо.

[ 15 ]— Бузотеронь кисэ? — конянзо алга ванозь пшкадсь Лаця.

Астакан стясь. Свистиньзе мокшнанзо, якстерьгадсь. Келей, кеме мештезэнзэ бойкасто чавсь седеезэ. Лавтовсонзо пиризе кенкшенть ды пшкадсь.

— Арсят вешнеме алсто сардт, виденть а вечксак? — Астакан хлопадизе кенкшенть. Келейстэ эськельдязь тусь.

Омбоце чинть волостьстэ сась милиционер, терьтниньзе допросс весень, кить ульнесть вельсоветсэнть.

— Бузотер, ванта месть тапари властенть лангс. Не позволю! Наксадат острогс. Пенчес ломанесь а ваявтови, тон жо штюпасак советэнь властенть виензэ, бандит!.. — Макин якась ды валаськавтнесь смоль раужо черензэ.

Милиционерэсь сермадсь: „Злодя, кона гражданской войнастонть дезертирничась, пурнакшнось бандитэнь шайкат, ней истяжо снартни каявомс советской роботниктнень лангс.

Бандитэнь кадовкикстнэ, Злодя ды лият, эщо эзть муев, арьсить кепедеме бунт. Тень кисэ арестовазь“... Милиционерэсь стясь. Сайсь кавто исполнительть ды Макинэнь.

Злодянь вишка кудынесь эл-эль калады. Кудо уголтнэстэ макшонть канды вармась. Рудазов, потомтнезь вальматнень пачк мезеяк а неят. Удалсе заборось каладсь, тей-тов ертнезь аштить жердятне. Каладо кардынестэнть лиссь кемсисемге иесэ тейтерезэ. Пангсов панарсонть сон неявсь прок тандавкс. Мазый, кругловой чамазо, куратной рунгось ёмасть нулатне потс. Менель пона сельминензэ нусмакадсть сельведьтне потс. Тандадозь таймаскадсь кардазонть куншкас.

— Мейсь пелят? — Кежейстэ кевкстизе милициясь мазый паморькскенть. — Кудосо тетят?

— Эзем прясо... никнитезь отвечась Лена Макин трокс варштась лангозонзо ды панжизе кудонть.

Злодя алкукс аштесь эзем прясо умок уш [ 16 ]чувтомозь. Ашо одратне новольсть эзем чиреванть. Каштом икеле авардсь козейказо. Пильге песэнзэ авардсь церинезэ. Сонсь Злодя аштесь сэтьместэ, апак черька.

Кудосонть ульнесь минень сюнонь а паро чине. Лисемадо мейле милициясь кувать сельгенесь.

Вельсоветэнть икеле аштесь подвода, конань эйсэ арьсесть ускомо Злодянь. Мольсь Макин ускицянть малас ды кежевстэ пшкадсь.

— Кулось... азе кудов.

Ускицясь велявтызе алашанть.