Эрямос совамо/Стака иетнестэ/2
| ←I-це пелькс | Стака иетнестэ (1935) by , edited by Лукьянов А. II-це пелькс |
III-це пелькс→ |
| Т. А. Раптанов. Эрямос совамо. Ёвтнемат. — Мокшэрзянь государственной издательствась, Саранск, 1936. — с. 6—8 |
II
Игаев сонсь кильдизе серой, тоштя алашанзо, прянь шназь лиссь кардайстэнть. Чись аламонь-аламонь кепетедсь менельганть верев. Ульцятнесэ появась шалт. Кудо турбатнестэ лиссь кудонь явамо пиже, вецана качамо. Сеедстэ чикордсть лисьма увтиматне. Покш сэдь пестэ марявсь молоткань кальцкаима, — те Дубрув Иван вачкодизе наковальнянзо. Пирьудалга, скал мельга чии ава. Бульчом стадасто кадовсь. Косо бути ава-лемсэ кройсесь цера. Кинь бути кеместэ пушась мать-перематьсэ. Те шалтось човорявсь а чаркодевиця увтокс ды валовсь чинь роботань эрямонтень.
[ 7 ]Игаев ютыньзе уманзо. Розь паксясь морякс лымбакстнесь икелензэ. Курок кенериця розесь аштесь модантень сюконязь. Игаев лоткась эсь уманзо пес, алашанть нолдызе сголбникентень ды радовазь тусь сюронть пачк — уманть тона пев.
— Да-а. Пазось максы урожай. — Сонсь сэрей таркасто таргась сюро коморо, штобу невтемс козейкантень.
Уманть лангсто туемстэ, ламоксть варштась удалов — сюро паксянтень ды яла кортась: „Эно… корьмакаесь шачи“…
Кардазсонть нолдызе алашанть, капшазь совась кудов.
— Аганя, перьгавтык алашанть, — сонсь ютась икельце кудов. Аганя мик талакадсь. Кодаяк а чаркоди мекс истя: Чи юты, лия тевс аравтсы, яла стака тевс аравтсы. Ней вана алашанзояк перьгавтык.
Игаев веселасто кортазевсь:
— Эно… Пазось лезды, Нина… Истя, карматан лиякс эрямо. Бокас а токавдан. Тоск, паксясонть ловнынь, талай пурнави сюрось. Продразверсткась арась. Налогонть пандсынек. Велень прявтнэ эсинек — сельме а таргить. Ней ансяк кода вана видевтесь сепомс… а мейле! — Игаев општ молезевсь. Аламос арсезь пшкадсь.
— Каназат властительтне. Ну-у… минекак а сюват тесэ, — бильдядизе прянзо. — Эряви роботник. Мезе те эльде начкось, церань тев тензэ а тееви. Да-а…
Но мельс апарось керязь кери Игаевень эйсэ. Столыпинской колмо куторстонзо ней вейкеяк эзь кадов. Самай сехте покш сускомось прась коморстонзо. На вана, прок ведьс пры кев — бульк мольсь ды паро. Советэнь властесь а налкшке. А артнить косяксо алашанзо, ды гуртсо ревензэ келей паксятне ланга… Но пильге лангс стямс эряви. Самай те мелесь, тенень бажамось теи Игаевень эйсэ лангс ваном: чевте, паро ломанекс, потмо ендо — певтеме виензы кежензэ.
[ 8 ]Сон яла аштесь озадо нинзэ каршо. Сувонь нучк пачк икельганзо ютась икелень эрямозо. Яходсь кедсэнзэ прок карво лангс ды таго пейдезь пшкадсь:
— Витевдяно, Нина Ивановна, сэтьмелгадсь пертьпельга.
— Тон вант кода весе мекей лангт велявтсь… Мень бути нула-вала ашти прявтокс… Эно тон уш алкукскак кундака каршост. Паряк а кувать сави… Ды весе велявты мекей. Сестэ… — Нина Ивановна эзинзе прядо валонзо, кутмордызе мирдензэ ды палызе.
— Тесэ сыре, опытной ломанть, содасызь хозяйстванть, сынь жо на теть вана, бабань пеште. Те розбой, аволь правительства, мик вием а саты ледстямс, кода монь эсь ули-паром кис нарьгимизь.
Аганя капшазь панжизе икельце кудо кенкшенть. Кенкш лангонтень талакадозь чувтомсь.
— Кодамат, Аганя, совестьтемат! Фу! Нильтякадат лангозот ванозь, — Нина велявсь ендонзо.
Аганя прок тарканзо пачк тусь. Сонзэ виде килей, мазый рунгозо эзь чирька таркастонзо. Ожанзо ульнесть кенере-пакарь видс илештязь. Якстере виев кедензэ новольсть рунгонзо кувалт. Покордамодонть чаманзо валызе верь. Сиянь бисеркс цитнесть сельмензэ. Пелезь вайгельсэ пшкадезевсь:
— Алашантень човордамс, эли лугав налдаса? — Яла аштесь, нильнесь кодамо бути а вечкема, кежев меленть.
— Терьтик ды больше апак стука горьницяв иля совсе! — Игаев шаштызе ве пильгенть, Нина аламодо нолашсь. Игаев нать арьсесь стукадеме пильгсэнзэ, кода седикеле. Эзь стукать. Аганя покордавозь сыргавтызе рунгонзо.