Эрямос совамо/Стака иетнестэ/5
| ←IV-це пелькс | Стака иетнестэ (1935) by , edited by Лукьянов А. V-це пелькс |
VI-це пелькс→ |
| Т. А. Раптанов. Эрямос совамо. Ёвтнемат. — Мокшэрзянь государственной издательствась, Саранск, 1936. — с. 20—26 |
V
Обед. Чись пидезь пиди. Коське варма ялтось сувсо вельти паксянть.
Пандо чиреванть валги алаша. Псиденть рикстяи прянзо. Тарантассонть волисполкомонь председателенть полавтыцязо Молоканов. Якстере чамазо прок таргойсь. Штеканзо чаво мешок ладсо нурьгить панар сивенть ланга. Алашась яла молсь стамбарнэ. Пролкастонть Молоканов прок сыргойсь. Цямказевсь туравасонзо, ноцкавтынзе ождятнень, алашась пильгень ертнезь напустясь.
Игаев аштесь орта лангсо. Сормизе ве сельменть сельмень сявадовт вановтсо ильтясь айгоронть мельга кепедевть пуленть.
— Мигай! — Игаев рангстась роботникенстэнь, — Кильдить дрожкатнень! — сонсь совась кудов. Капшазь ертыньзе лангстонзо каргодезь одижанзо, оршась одт.
— Нина Иванова, молян снартса айгоронть бойка чинзэ. — Мельс паросо пшкадсь козейканстэнь.
Роботникесь сатстнесь кильдеманть. Эщо а соды косо мезе ашти. А умок сиведсь Игаевнень. Кода эзь капше, яла теке азоронть лисемс эзь кильдев айгорось. Игаев веляськавтыньзе сельмензэ, сянгора, пупиця вайгельсэ рангстась:
— Ваз, аволь ломань. Нувсят алашанть прясо! — Ноцковтызе роботнекенть кедстэ поводонть. Роботникесь обидявозь арась ве бокав.
Айгорось киштсь ажиятне ютксо, верев ертнесь прянзо. А аштема саизе. Яма чувсь пильгалонзо, прок коймесэ ерты моданть. Кежевстэ порсь панст удилатнень. Човт молить курго уголганзо.
[ 21 ]— Роботник... Эх, сивезь сельме, ливтидизь паро ломанть вачо иенть... Сестэ бу а истя роботавлить.
Игаев пижнесь ськамонзо, марявсть вете киргапарть. Мигай кунсолозь котьмась алашанть перька. Уш кадовсть сюлмамс ождятне, Игаев яходсь кедьсэнзэ, стамбарнэ, седейс чиевт валсо пшкадсь.
— Перьгавтык, — крутасто велявсь ды совась кудов.
Вельсоветсэнть Молоканов кеместе севнось. Сон нерькстнесь месть бути Макин икеле. Велявтнесь мень бути коневт ды трокс ванность перькаванзо аштиця ломантнень лангс. Макин комась икелензэ ды тошказь терди обидамо. Мейле весеменень марявикстэ пшкадсь:
— Вана, пожалыста комитет бедноты, минь государствасто получазь сюронть явшинек сехте ламо маломощной ломантненень, кеместэ кирьдинек явшемань установкатнень коряс, конань кучизь вере аштиця организациятнестэ.
— Кеман. Значит конат пеняцямотне ульнесть максозь волисполкомс, сеть а видеть. Вана эщо, кода, мезе теевсь кулыця гражданинэнть марто? — Молоканов кевкстизе Макинэнь.
— Да, — таргизе вайгелензэ Макин, — сон пек ламо симнесь винадо ды истя курок кулось.
— Может улеме, — чаравсь прясонзо Молоканов.
Лена аштесь кенкш лангсо. Кедьсэнсэ кирьдсь конев, конань максызе вельсоветэсь велестэнть ковгак молемс. Сон нардынзе чамастонзо сельведензэ, кеместэ чалгазь молсь столенть экшс.
— Кенгелят! — лотказевсь, — монь тетям шумбра чинзэ путызе гражданской войнань фронтонтень. Сонзэ туберкулез ульнесь. Наксадсь пильге лангс советской властенть кис! Тынь педлейть! Мон повняса ды седе ламо евтнить ломанть, кода тынь карбуж ладсо, норасонк ирныде беднотанть лангс.
— Тон месть сазор? Тесэ контрреволюционерт арасть. Месть ломанть а кортыть. Весе а кунсоловить. [ 22 ]Вана максть теть документ, вельсоветэнть кармавтсынек максомс аламошка почткеть ды эстеть ки лангс ярмакт. Советской властесь ломанть а кадны куломо, — Молоканов варштась Макин лангс. Макин чаркодсь, сермадсь конев, венстизе Ленанень.
— На, мон эщо исяк меринь, эряви пособлямс тенк.
— Ну, вот. Мейсь стяко чавомс чаво чалгамось. Тетясь симнесь, а месть сепомс, — яла чевстэ кортась Молоканов. Лена аштесь чувтомозь, нузяксто велявтнесь меньчесь конев пангсонть. Сон арьсесь цяподемс чамазост, снартыка, кодамо а паро вачодо аштемась, ярмактомо сторонав сыргамось. Тейтересь сэтьместэ нолдызе пранзо.
— Ванат, — кортасть вельсоветсэ аштиця ломантне, — чийть кудов.
Молоканов ды Макин тусть айгорсонть обидамо.
Макинэнь кедьсэ Молоканов иредезь прянь шназь кортась.
— Чапинк эстенк, ней роботамс эряви пек прянь ванстозь. Советской властесь ансяк ушодовсь. Ансяк ушодовсь, мерян, ламо оля чи! Ванодо, волостенть келес эщо арасть большевикень организацият. Улить башка идолт — большевикт, те ерунда, те мезеяк арась. Кемеде, сынь кеместэ саизь коморозост Россиянть ды кодамояк восстаниянь организовамо илядо снартне. Те тевесь аволь минек ды а мейсь. Минь ней аштитян лездыцякс, бути костояк кепети пель. — Молоканов кепедизе цярканть, прянзо каизе удалов ды жаднойстэ нилизе винанть. Кувать кашт молезь ярсась.
Макин нуднезь кунсолось. Мейле кепедизе прок уголия, раужо прянзо ды чевлязь кортазевсь:
— Кода теемс вана те марто, вачо иенть фунт почтонь кисэ рамсинек кудот-чить. Сестэ христаради энялдсь — рамик. Ней апаргалить, арьсить максомо судс.
[ 23 ]Молоканов казямосто порьсь пеензэ. Бозакадозь сельметнесэ ваннось лангозонзо.
— Сави молемс кой кодамо уступкас, невтемс эсь прясь, што минь лездатан бедняктнэнень. Ведь ней, конат тусть велестэнть вачо иенть, сыть велентень штапо, вачо. Штобу иляст сюдо, теемс законной документ. Терьдемс ломанесь, евтнемс тензэ, ризнамс мартонзо ды меремс, на теть брат эщо пондо кавто, ансяк иля обидяв. Каршо валонь апак евта сайсы. Мейле теемс вельсоветсэ кавто ендонь конев.
— Те виде, — пшкадсь Макин, — яла теке ламонень сави а паро теемс.
— Мезеяк а теят, конань-конань кедьстэ сави саемскак ды велявтомс. Тень кисэ миненек кармить кемеме ды ванстсынек тарканок, седе тов карми неявомо мезть тейнемс, — Молоканов тонавтыця ладсо прядызе кортамонзо ды уш апак учо нурьтнесь сонсь.
Иредезь Макин сявордсь коник лангс, слюнав кургозо лабордсь:
— Маштнемс, се паро средствась. Сюлост урядамс! Отрядт, саблят эрявить!
— Оймавт. Те поздаясь, ды ней а мезть ледстнемс, — кортась эйсэнзэ Молоканов. Макин яла пижнесь.
— Верь, верь эряви!
Молоканов матрызе Микинэнь, мик лексемс ульнесь стака ды кавнест матидевсть.
* * *
Ушосонть ашти истямо жо маней. Чизэ прок зеркала, венельксэсь гайгезь гайги, весела. Велесэнть марявсь роботамонь увт. Узерень цяпоемась глухойстэ кайсетевсь коштсонть. Ламо розорявсть кардаст вачо иенть, ней эйсэст тейсть одов. Веенст ускить чеерень керявт олгт кудонь кардазонь вельтямс, омбонст подрубасть макшов кудо уголост, чапсть од кудот, плетясть од плетенть.
Меля, эщо ансяк меля велесь ульнесь чаво, [ 24 ]кадновсть ансяк эрикстнэ. Киненьгак мезеяк эзь эряв. Тельня ульцяванть ульнесь ансяк ялго якамо кине. Ней ламанесь варшты паксянтень, куть видевтезэ аламо, яла теке сырежди, — ули мезе учомс.
Мотай орта лангсо сергедсь Ленанень:
— Сака тей.
Лена варштась эсь перьканзо ды молсь Мотайнень,
— Адя Астаканнэнь, — терьдсь Мотай.
— Адя, — а веселасто отвечась Лена.
Мотай кашт молемадо мейле одов кортазевсь:
— Эрямс эряви, Лена. Педе пес ютавтыя гражданской войнанть. Властенть саинек, неждясь вана вачо ие. Кадовомаль тоск служамо, коммуникстэкс улевлинь бу... — арсезевсь. — Арась, жальть марявдад тетянк аванк туртов. Охота эйкакштнэнь сельмест икеле улемс. Истя тетяткак. Эрямс эряви, строямс эряви. Стака эрямось, эрямо меленть каршо а молят. Витния кудонть, кардазске эряви, эряви алаша, скал...
— Тон цера ломанят. Минь, минь ков? — аварьдевть вейгельсэ кортазевсь Лена.
— Тедиде сюрось шачи. Роботамо карматадо. Трясынк прянк.
— Мон туян велестэнть. А цидярдан истя. Тетям алтнесь паро эрямо. Эзь учов. Ней седеяк а косто... — Лена стакасто укстазевсь.
— Парось тыненк учови. Одтад, верь ловсо марто эйсэнк. Вант вана веленть кувалт. Эрямось лаки. Ломантне поксарить юртост эйсэ, те юртось уш — паро эрямонь юрт.
Сынь кавонест општ мольсть ды чатьмонезь мольсть ульцяванть.
— Масторонть лангсо пек ламо истятнэде. А содан мезе лиси тень эйстэ. Тонавтнеме келя тынк ялгатнень примить. Панжсть ошотнэва мень бути Ракфакт, — сонсь салава ладсо варштазевсь Ленань рунгонть кувалт, арьсезевсь: „Моли теть улемс курсантокс“...
— Лисят сазор ломанькс. Пек ламонь сельметь [ 25 ]прыть эрямот лангс, — Мотай кедьсэнзэ токизе Ленань лавтов ланга. Кедезэ стамбарнэ нолаштсь тейтеренть рунгова. Лена весела, мызолдозь варштамосо варштась сакалов чамазонзо. Сон арьсесь мезе бути евтамо, но Мотай велявтсь ортатненень.
Астакан удось кудыкеле конек лангсо. Сон ертызе лангстонзо вельтямонть ды пшкадсь:
— Сейчас, оршан.
Мотай мольсь Пилай вакс, коната кепсесь козейканзо марто утом сруб.
— Мезе бути котлят? — пшкадсь Мотай.
— Утом, — амельсэ отвечась Пилай ды цяподизе узеренть чувтонтень. Мольсь Мотай вакс ды ушодсь цигаркань тееме. Козейкась неждясь утом уголонтень, Лена аштесь озадо кустим песэ.
— Эрямс эряви, кудот чить пурнамс эрявить.
— Астакан а лезды?
— Арась. Пеняци яла лангозон, — кашт молезевсь. — Алаша омбоце арьсян рамамо. Сон эстензэ тарги, — Пилай нерькстызе кургозонзо цигарканть ды кирвастизе. Козейказо Астаканонь ледьстямсто полавтызе пильгензэ ды кежев вановтсо варштась кортыцятне лангс.
Астакан оршнесь, шлясь ды лиссь. Сон пейдевть вановтсо вастызе Ленань. Озась Лена вакс.
— Маринь арьсят велестэнть туеме? — А смелстэ пшкадсь Астакан.
— Эрямс эряви. Ломанть пурныть кудот-кардазт. Минек а мезес кундамс. Туемс сави, — Лена кекшизе весела мызолдовтонзо. Друг нурьгамс, сэпей лопакс ацавсь вановтозо. Бисернэкс листь сельведензэ. Салава нардынзе ожасонзо. Кирга парьсэнзэ а нилевимашка ал.
— Ризнамс пек а мезень кисэ... — Астакан арьсезь кармась кортамо. — Ней шкась аволь седикелень. Монгак кадса веленть. Монь истяжо ули эрямо мелем. Тень теемс вием саты. Ули прям, улить кеден, — Астакан келемтинзе кедензэ. — Могу роботамс ломанде а [ 26 ]беряньстэ — Лена мельсь паросо варштась Астакан лангс, прянзо нолдазь пшкадсь:
— Кодамо ладсо кармат парсте эрямо? — Сон штерекс пезнавтызе сельме вановтонзо Астаканонь вановтонтень ды чатьмонезь таго нолдызе прянзо.
Астакан эзь кенерь отвечамо, ваксозост мольсть Пилай ды Мотай. Озасть сыньгак. Мотай пшкадсь:
— Асатыкстнэнэ бокав, мерят?
Шкась истямо. Видинь зярыя. Пурнамс пурнавить. Ней паряк крестьянствась сти пильге лангс. Оймить.
— Виде.
— Кода а виде! Ванат велесь кода кундась хозяйствань пурнамо.
— Минек ялгантень аканя. Видьстесь эзь сато. Моданок эзть видев.
— Миить парина алов, — пшкадсь Пилай.
Мотай арьсезевсь, мейле пшкадсь:
— Можна миемскак, — ды велявсь Астакан енов.
— Астакан, Обрей максни тейнемс кирьпецть. Сайсынек? Сюродо.
— Ламо эрявить тензэ?
— Вете тыщат.
— Паро заработкась, — пшкадсь Пилай. Астакан думазевсь.
„Заработка“, — Астакан ловны эсь потмованзо. Весе кашт молить.
— Монь койсэ, тевесь магарычсэнть. Адя, тейнесынек...