Эрязденть арсезь (2010)/...Отведите в камеру!
| ←Сокиця бурлакт | Эрязденть арсезь (2010) by , edited by Разгуляева Т. В. ...Отведите в камеру! |
Сельведень каршо — моро!→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 86—88 |
[86]
| ...Отведите в камеру! |
Паксянть пезэ а неяви. Эйсэнзэ сурось тикше потсо. Кочкт ды кочкт. Тень тееме лиссь течи весе бригадась, ведьгеменьшка ават ды тейтерть. Эрьвась «пани» эсь икельксэнзэ. Кува-а-касон, кувака... Комадо аштемадонть карязтнэ чикордыть. Сеске, сэредьксэнь апак маря, рунгот а витьсак. Прят кепедьсак — сельметь чополгадыть. Стака-шождыне, кармавтозенть топавтома. Тень кис кши кочомне максыть. Лиясто кусляткак. Совхозсо истят пандомань койтне. Колхозсо теде иля ледстиея. Паро куш те хозяйствась маласо. Коллективизациянть ютавтомадо икеле сонзэ модатне ульнесть Орданьбуень.
Чикуншка малава апак учо сась — кочкицятне абунгадсть — ласте милиция. Те таго мезень тюниха? Алянть чамазо, лангс ванозь, аволь шумбра, та-кодамо пиже-ожо, секс, бешоконь, «товгак» эзизь сае. Камбразстонзо эзь валго. Ве кедьсэнзэ панстведьмесь, омбоцесэнть — кшнань локшине. Серьгедсь весенень марямга:
— Эй, народ. Кто из вас Четвергова?
Каштмолема.
[87] Паксясто милицияв саезь тейтересь ульнесь веженсь патям
— Вы чё, оглохли что ли? — сергедсь омбоцеде кежень сазь.
— Мо-о-н, — васоло пестэнть каятотсь тейтерень сорныця вайгель.
— Поди сюда! — кармавтсь ластесь, видькстыцянть ёнов ванозь.
Ласте кармавтыцянть ваксс ютась кеветее-кемготово иесэ сэрей, човине рунго, мазый чама тейтерне. Прясонзо ашо паця, лангсонзо сёрмав тюс платия.
— Пойдём в милицию. И не вздумай бежать! Вот видишь, — мерсь «якстере» картузонь кандтницясь икелензэ аштицянтень ды тандавтомга кепедизе ногайканзо.
Суронь кочкицясь бувсо авардезевсь. Модас ванозь, прок чумонь мариця эйкакш, сювордазь рудазов кедьсэнзэ, снартнесь нардамс сельведензэ. Теде вадневсь чамазояк.
— Нечего реветь, пошли! — кармавтсь «якстере картузось» ды ноцковтызе панстведьменть.
...Кизэнь валдодонть гайгиця чистэ паксянь кияванть райононь веле ёнов молить кавто: полгаря, тей-тов чийниця тюжа сельме, камбразсонть мукорькс аштиця, уш аволь од цёра, ды лишменть пряпесэнзэ, теке нувара килейне, од тейтерь. Чатьмонсь, эсь арсеманзо арсесь ластесь, чатьмонсь чопода-якстере пона лишмезэ, чатьмонсь, нильнесь салов сельведензэ вакссонзо ялго эскелицяськак. Прясонзо мекев-васов автевсть нусманя мельть. Кодаяк эзть айгеве эйстэст, эзть изняво «пекстасамизь» ды «тюрьма» валтнэ. Теке сёксень куяв карвот, эцить ды эцить.
Молицятнеде, сынст мельдест-арсемадост эзть сода, марикскак эзть тейне норовжорчтне. Секе тев кепсевсть кичирестэнть менелень сэняжантень, ды тосто нурьгсть сиякс чольдердиця, ансяк эстест чарькодевиця валост. А стяко лемдизь менель горниповнекс. Чи-ри-ри-ри, чи-ри-ри... Вадря эрямост! А тюремат, а олячинь саемат! Содыть, паряк, ансяк вачочитнеде, вейкеде — пештямс тутмаст.
Прядызь сэнь морост «горниповнетне», мерсть општ, вете вайгельпень ютазь, буень покш велентень совамсто. Прядовсть паксятне, прядовсть моросткак.
Вана веленть пачка ютыця, кавто ёнга топольсэ пирязь, [88] Отяж-велев ветиця келей кись. Чиреванзо райкомт-исполкомт ды лия ламонь содыця «превей» покш кудот.
«Районное отделение...» — Четвергова кенерсь ловномо крандазонь келесэ панжадо кенкшканть совамсто стенас понгавтозь якстере суликастонть. «Весе, тюрьма, пекстасамизь, — мерсь эськанзо тейтересь тандадозь, — мезень кис, каня истямо уш чумом?»
Совасть кардазс. Куншкасонзо крандаз. Перьканзо пиже тикше порнить чопода-тюжа пона зярыя лишметь. Сындест тона ёно — эчке чочксто чапозь вальмавтомо кавто кудынеть. Вельтязь лазсо. Кенкшсэст панжомат. Эйзэст вети яннэ. Вейкень пряс валгсь раужо варака ды кижнэзь рангстась: «Кар-кар». Тей-тов варштась ды рангстась омбоцеде. «Апарос...» — ютась тейтеренть прява.
Кардазс валгиця кузтемантень сыцятнень каршо лиссь, прок учось, раужосэнь оршамкасо, картузтомо, сэрей, теке олога, милиция.
Ластесь, камбразстонзо апак стя, кепедизе вить кедькоморонзо пилезэнзэ ды рангстась азоронстэнь:
— Задание выполнено, товарищ начальник, гражданку Четвергову задержал.
— Отведи в камеру, завтра на допрос, — мерсь авань вайгель вастыця «ологась», валгсь кузтемаванть ды ютась лишметнень ёнов.
* * *
Паксясто милицияв саезь тейтересь ульнесь веженсь патям, Рая. Сеть иетнестэ кеветее-кемготово иесэ цёрынетнень вень-веть кундсесть, прок ракшатнень, банява-кува ды ильтясть ФЗУ-в. Тейтернетнень тундонь-кизэнь самга — Горький ёнов торфонь таргамо. Патям тосто, аздан кодамоль тувталось, оргодекшнесь. Сень кис «дезерп (рэнть» совавтнизьгак панжома экшс, кудынентень, конань лемезэ КПЗ. Паро куш идевкшнесь, кирдекшнызь чопода таркасонть ансяк чи ды ве. Иензэ эзть топодекшнэ. Истяко...
«Социализмань казарма», «административно-командной система», — лемдизь ней се шкатнень превсэ превейтне. Кодамокс, сы шка, яволявтсызь «казарманть» сявордомадонзо мейле теезь од «измантъ»? Кода идизь лемде, танстест сынст вейкеть: царИЗМАСЬ порезь порсь лия. аволь рузонь раськетнень, КОММУНИЗМАСЬ вейке раськень кис яжась эйсэст, ней демократИЗМАСЬ ожань илештязь кундась калмамонь тевентень. Секс тюрьмаст сынст, «изматнень», чаво зярдояк эзть эрсе, кирдсть эйсэст седе ламо чумовтомот, — тейтернеть, тейтерть, одт, сыреть...