Эрязденть арсезь (2010)/Сельведень каршо - моро!
| ←...Отведите в камеру! | Эрязденть арсезь (2010) by , edited by Разгуляева Т. В. Сельведень каршо — моро! |
Сэпей изнямочи→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 89—91 |
[89]
| Сельведень каршо — моро! |
К___В моли ломанесь? Мезес пачкоди садо, садонь садо иень ютазь?» — сакшныть-содавтнить лиясто кевкстематне. Эрямом перть, ванан, допрок ёмавтызе морамонь ёрокчинзэ — аволь морыцят, кирныцяткак эзть кадово! Емавтызе сонзэ ведьгемень-кодгемень иень перть. Велесэ ней а марят жой вайгель чокшнеяк. Чить — кортамскак а мезть. Виде, стопкадо мейле, мертяно, урнозевить. Ансяк те уш а морамо. Урнома. Теяк виде — велесь чамсь. Кадовсть эйзэнзэ сыре ломанть ды якстересэнь судот. А кинень серьгедемс моро. Те велесэ. Мекс сестэ ошкетне ды оштне кургозост ведь сайсть? Ломаньсэ, меремс, сынь эзть чуромо!
Морыцясь ней — телекесь ды сыре лелязо, радиось. Ломанентень кадовсь вейке — стявтомс, теке тандавтозь лишме, пилетнень, автемс кургонть ды нилемс сынст вельде венстезенть. Кунсолок-вант шлямсто, муськемстэ, ярсамсто, чить, веть... Бом-бом-тне ды гам-гам-тне, секень вант, пилеть раздесызь. Эли тонсь гам-гам-гам мартост рангозеват. Алкуксонь, ойме ёжодо ёвтниця музыкань кунсолыцятнедеяк, видькстамс, аламо. Сельмень конязь, марязь, седейсэ кунсолыця вастат чуросто.
Мекс истя? Мезе мартот теевсь, ломань? Ней ламо таркатнесэ, натой покш велетнесэяк, кирдевить музыкань школат, «ютыть» Бетховенэнь, Моцаргонь, Чайковскоень, «ютыть» Вердинь, Бизень, Листэнь, Глинкань... снартнить чарькодемс эрзянь умонь ды неень шкань моротнень мазычист. Эно мекс а серьгедеви эрзянь моро мик тейтерень чиявтомстояк?
Ах, седе ён а арсемскак! Секень вант, велязькадат.
* * *
...Аштемков. Тикшень ледема шка.
Ярсамс ней ули мезде. Тикшеде, кода лишме, порть зяро мелеть, киргакстнемазот, пекеть буякстомс. Ансяк вана лишмесь тикшеде валакады, касы-куялгады, ломанесь — ойме кирди. Теяк кеняркс, теяк паро, пильге лангсо тарнат! Чатьмонть уш, иля пеняця.
Кудонок икеле касыця каленть сэнь сулейтезэ венстявсь чилисема ёнов, пачкодсь кудотнень икельга ютыця кинть видьс.
Пичепень кувалт, алдо верев, эскели тейтерень ды авань ошкине. Лавтовост лангсо пелюмат, ангорькат ды чаво пешторт.
[90] Оршнезь «паксякс». Молить апак капша, прянь кепедезь. Молить моразь. Вейкест-вейкест кунсолозь. Секс истя гайги-жойни мелодиясь. Секс истя васолга сравтневи сон. Мерят, чинь-чоп эзть пансеяк стака пелюмаст, штемень штемеяк эзть кепсе капамсто, эзтьпсилгалеяк. Ярсамосткак, арсезеват, ульнесть ойть-сывельть. Морыть жойсэ! Инешкипаз, кодат тенк морамот?! Вачочиденть а содатадо ков кекшемс, ирдезэнк лововить, тынь оно мезе тейтядо.
Вай, пиже садсо, мазый садсо |
Моронь лувось, сонзэ чудемазо, лийканя ванькс вайгельтне а кельгить кавто ёнга педсек-педсек путозь кудотнень-латотнень юткс, бажить верев, менель сэньштенть ёнов. Косо, кие сынст, аватнень, тонавтынзе тенень? Зяро, содамс, вайгельсэ морыть? Ловик, азе.
Вай, пиже садсо, мазый садсо |
* * *
А кемеви?
Кемть-иля, ульнесь истя. Морось ульнесь эриця ялгакс. Сонзэ вельде ёвтневсь вечкемадо, олячинь кис аштемадо, эрямосонть мазычиде... Ней вана ашо кшись стуворонть лангсто а валгони, сывелеськак ламонь а маштни, кудосо кельменькаест эль пекстневить. Лавкатнес пелян совамонгак, ярсамопелень лемтнеде, секень вант, преветь велязкадыть. Морамс ды морамс эряволь! Морыцят... арасть.
[91] «Морыть нейгак, — мерсь ялгам ёвтнеминенть ловномадо мейле, — эрямось ней лия, моротнеяк лиятат. Ней ютавтневить конкурст, эрьва кодат фестивальть, морыть ансамблят. Мезе, тон тень каршо?» А молян, а молян, Чевгаж кирдажом, каршо! Те весе виде. Ансяк кортамось ёвтнеминесэнть моли аволь фестивальтнеде-ансамблятнеде, лиядо, ломанденть. Сонзэ икелечидензэ. Течи лоткась морамодо, чи-кавто ютыть — кортамо а карми. «Электрон» ялгась кардасы. Кие сон сестэ карми, ломанесь? Мукорь? Ботпрякал?
Моро, моро! Мезес, кодамо визьксэс меельце шкатнестэ пачкодить?! Урекс теевить! Кирдийтне-власттне моравтыть «Келу» эрзянь ды мокшонь ансамблянть промкссо-косо эрзянь ды мокшонь кельтнень беряндеяк берянь ёжост кекшеманть кис. Натой 2006-це иень ожоковсто пачколесь сон Франциянь Страсбургов — невтемс ЕС-нь (Европань Сюлмавксонтень — Европань Союзонтень) эрзянь келенть «шумбрачинзэ». «Сонзэ кувсемадо кортыть, сёрмадыть ятт, — идить пря «валдочис» ветицятне, прявттнэ, — ванодо кодат вайгельть, кода морыть!» Седееть тардезеви, истят яволявтоматнеде, истят пе а содыця кенгелематнеде.