Эрязденть арсезь (2010)/Сэпей изнямочи
| ←Сельведень каршо — моро! | Эрязденть арсезь (2010) by , edited by Разгуляева Т. В. Сэпей изнямочи |
Эрьва шканть казнензэ эсензэ→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 91—93 |
[91]
| Сэпей изнямочи |
Панжиковонь лембе, сэтьме чи.
«Бригаданек» чупонетяно пирень мода. «Кепедтяно» сонзэ аволь бурлаконь лувсо — ломанень вийсэ усксевиця сокасо, кода мелят, аволь лишмесэ, аволь тракторсо — коймесэ. Коймесэ колоньгемень малава «соткатнень»! Э-э-э, те меремс шожда. Ве-рушто башка те кедьёнксось эрьвань кедьсэ. Тейтернесь чары-вели перьканок. Кедьсэнзэ ваканнэ. Ансяк вастови-таргави моданть потсто сёксня та-кода кадовозь модамарне, сеске кедьгезэнзэ. Таргави — кедьгезэнзэ. Таргави — ... Истя аламонь-аламонь пурнавить чинзэ перть сюкорнэнь панемань туро. Мертяно неть тельня кельмезь, ней наксадомо ушодыця муевкстнэнень «трахмал». Истя-аволь — лезэ эйстэст улезэ, пеке пештяст.
Чупонетяно чатьмонезь. Кодат кортамот, пси, стака.
Авань ды патянь пилысэ карть, минь — пельскарсезь. Вить пильгсэнек — нежедемс коймень «лавтовонть» лангс—кодамояк усксевиця варяв колоша эли кота. Кепе кшнинть лангс а чалгат. [92] Чалгсицятнеяк... Вейкенень кевейкее, омбоценень — вейксэ. Кинень кармат пеняцямо?! Кадык сеськень, яла вий.
Каштмольтяно. Шкань-шкань марсеви «о-о-й» кувакасто таргазь ойме. Авам лотказевсь. Вить кедензэ кепедизе чамазонзо, нардызе сурсонзо сельведенть. Одс кундась койме недентень. Шлёрькаить судосост, носкить веженсь ды покш патямгак. Сыньгак нардтнить чамастост сельведень эрьгтнень.
Модась коськсь. Тия-тува вастневить чеерень карьксэнь, модас васов туиця, ды чудожовонь сынст кондят безарькс ундокст. Сынст таргсетяно, кона видьс таргавить, кедьсэ.
Течи велесь явовсь кавтов.
Кулядонть — прядовсь войнась — веенстнэ ливтнезь ливтнить, морыть, ламотне — лайшить-ниреждить, сельведть нардтнить. Весе. Учоматне прядовсть — мирдть, тетят, лелят, ялакст... зярдояк уш кудов, чачома элезэст а велявтыть. А сыть чачома масторозост велень шумбра, од, виев цёратнестэ пелест. Арсить-арась сыця «изницятне», кодамо Масторонь кис сезевсь эрямост ламодояк ламотнень? Маштовозтне а ёвтыть валгак. Эрийтне? Шумбрасто сыцятне?
— Весе, эйкакшт, учоманок прядовсть, — нусманясто, ансяк а лайшезевемс, мерсь авам коймензэ модас сялгомсто, — тетянок зярдояк уш а несынек. Весе, прядовсь учома шканок. Улевельгак Паз... Арась, те ансяк кортыть!
— Паряк... — мезе-бути мериксэль покш патям.
— Арась-арась, тейтерем, кемеманок прядовсть, — седе марявиця, эль аволь «кшнинь» вайгельсэ мерсь патянень,—чупонесынек пиренть, путтано эмежть-модамарть ды поладсынек эрямонок сонтемензэ. Эно ков молят? А ёматано, эйкакшт!
Ёвтынзе авам арсеманзо ды капшазь, седе курок панемс нусманя мельтнень, мик аламнеде кежень сазь, ушодсь коймесэнзэ коське, ялатеке стака моданть кепсеме-велявтнеме.
* * *
Чачома таркат, кода тетят-ават, а кочксить: ошсо, велесэ, паксясо, океансо... Мезеяк а теят тень каршо. Сынь мон те моданть лангс ды эрия эрямом кельместэ лексиця, седеень раздиця масторсо. Масторсо, косо нарьгамотне, стакачитне, свалшкань майсематне, кенгелематне, саламось ды салсематне... лововить эрямонь коекс, сонзэ «зэмекс». Мерят, [93] сюмора ёжот ды мелень колыця арсемат? Мезе теят, ков молят, ветиндеряйть эйзэст перькат топавтовиця тевтне?! Кода лиякс карман арсеме мастордонть, кона маштызе а мезень кисэ весемеде малавиксэм, тетянь?