Эрязденть арсезь (2010)/Сокиця бурлакт
| ←Свал чийнезь | Эрязденть арсезь (2010) by , edited by Разгуляева Т. В. Сокиця бурлакт |
...Отведите в камеру!→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 84—86 |
[84]
| Сокиця бурлакт |
ВЕЛЕНЬ сехте стака тевтнестэ вейкесь — модамарь пирень чупонемась. А чувносыть кудот удало «соткатнень», а кавша-кавтнесак триця-андыця модыненть — паро иля учо. Эрьвась велень эрицятнеде тедеяк содась ды кирдсь мельсэнзэ: модамаресь — кшинть полавтыцязо.
Весть сундерьгадома ланга апак учо совась тенек Элина патям, [85] тетянь сазорозо, авань парыязо. Чумора, од, мазый ава.
— Уряж, ванды тынк сокамонь паймесь. Мезе тонь пельде теема, анокстык. Минсь нилешканек: Наста пенерьвась, Марфа патям, кеман, шабранк Катяяк сы, — каштлангс чалгамо вакссо аштезь, ловсь Элина патям кить, зяро «лишмень вийть» савить-кильдевить лездамо.
— Тон эно ютак... — терди сыцянть авам, — ютак икелев.
— Шкам арась, уряж. Сисемненек усксеви, а? — арсезевсь, нолдызе прянзо паро кулянь кандыцясь. — Кевкстнян... Колмо пиреть уш «усксинек»! Изнясынек.
— Сюк паро валозот, парыинем! — мерсь авам, аванть каршо аштезь, сонсь нардтнесь начко кедькоморонзо икельць пацясонзо. — Ультяно анокт. Лездазо Инешкипазось. Чангодезэ.
— Эно валскес, уряж, — мерсь сокамо тердицясь ды потазь панжизе кудонь стака кенкшенть.
— Валскес, Элина...
...Панжиковонь маней чи. Пси. Коське. Те шкас эряволь аволь ансяк сокамотнень прядомс, модамарень путомантькак. Эряволь... Ламо мезе эряволь... Лишмеяк эряволь совавтомс ажиятнень юткс. Тень таркас...
Соканть вети Элина патям. Эно кие сондензэ башка? Вий ды вий эряви! Авась сон самай истямо, эчке ловажа. Лиянень сокань мендявозь «сюротне»-недтне а кирдевить.
Шкань-шкань перьгавтни-кепси те эли тона кедензэ «сюростонть» ды ахоли сельмс эциця салов ливезенть.
Куншкасо, ажиятнень ютксо — лишмень таркас — Эремкань Катя. Эрьмай ялгань авазо, Сонгак авась аволь лавшотнеде, крежа. Васень ускиця. Кавто ёнганзо лиятне. Сынь ускить пикссэ. Ускить зяро виест, мерят, конасткак, модас мендявомадонть, пупорди ды пры. Лексить сеедьстэ. Вана-вана истямо кувака икелькс песькак. Окойники! Элина патям ды лиятне аравтызь соканть мекев, од молевксс. Лоткасть, ойметнень эряви витемс. Сельмс эциця салов ливезентькак мейсэяк нардамс чамастот.
Зярыя минутат, ды «лишметнестэ» вейкесь совась ды кундась ажиятнес, лиятне каизь лавтовост ланга пикстнэнь.
— Но-о, войнань эльдть! — пшкадсь згилязь сокань прявтось-ветицясь, — учотадо локшо? Но-о...
Стака сокась састыне, коське моданть лазозь-кавшакавтозь, стамбаро сыргась таркастонзо. «Уи» пестэ пев пиренть [86] кувалт удалганок чудиця Кирданов лейненть видьс. Моли мельгаст кепе пилысэ теевиця-кепедевиця челькень сувось.
Пси, ливезь, сеедьстэ лексема... «Зяро?.. Мекс истямо кувака икельксэсь? Васоло тона песь... — кепедьсы прянзо, салавине варшты те эли тона ускицясь пенть пелев ды арсезеви. — Кодаяк, кодаяк... уск, содак уск, уск модас мендявозь, прамозот».
* * *
Илья Репинэнь «Бурлаки на Волге» картинанть асодыцянзо, маряви, арасть. Ванан лангозонзо, ды пивтевить прясон арсематне: «Арась, бурлакт, тынь оймень лисемс а усктадо. Лавшотадо. Лавтовонк ланга коцтонь лехатне истя, кода аватнень пиксэст ютазь пингень 40-це иетнестэ, эзть таргаво. Мольтядо малав стядо, аволь сокицятнекс, эль мендявозь. Вейкесь натой, Вантакая, теи таргамопель».
Седеем китны, мекс течис арась «Пирень сокиця бурлакт-ават» картина? Ули а ули сон зярдояк сёрмадозь? Муеви-арась истямо ломань? Кирдевельгак кедьсэнь седе ёнсто артыцянь цёкинесь, сёрмадовлия сонзэ васняяк. Ансяк вана Пазось истямо ёрокчи тень эзь казе.