Эрязденть арсезь (2010)/Шумбрат, Пенза!
[235]
| Шумбрат, Пенза! |
Орданьбуенсетнестэ колмонек палынек од вийсэ кепедемс колхозтнэнь, теемс сынст панжовиця балягань пусмокс. Кить ансяк эзть педсе те тевентень, кить ды косто ансяк эзть сакшно велетнес! Эрьва кодат превей тысячникть, седеяк — робочейть, лиятаткить... Мелест — стявтомс пильге лангс вейсэнь хозяйстватнень ды сюпалгавтомс эрицяст — мекс-бути эзть топавтово. Пачкодсь шкась-кирдась минек эйс: Арсяй Пашас, Поньке Васяс ды моньс. Те покш тевенть изнямга, содави, васняяк эрявсь тонавтнемс. Энялдомань конёвонтень Саранов самодонок икеле сёрмадокшнынек: бажатано улемс агрономокс, паксянь коень содыцякс.
Арсезь — теезь. Саранонь «сувтемеденть» мейле монь кучимизь Пензав, Пашань — Горькоев, Васянь — Рязанев. Истя 1954-це иень умарьковонть прядовомсто путынь пе клубонь тевезэнь ды васенцеде понгинь эрзякс лемдезь те ошонтень — Пензав. Покш?
Мазый? Ванькс? Ошось — кода ломанесь. Полавтневить ёжозо, оршамопелензэ, иензэ. Лиясто урядозо мазый, лиясто — эсь мельганзо а якиця альбагай авань эли ськамонзо кадовикс ризкстэ рипакадозь цёрань. Саранонть коряс, сеске редявсь, седе покш.
Институтось Пензанть эйстэ зярыя вайгельпеть чикуншка ёнов, Ахуны посёлкасо. Ваксканзо састо-састо чуди ташто-сыре чудильмаванзо Сурась.
Ведезэ — сельведь. Потмаксозо ацазь човине ашо чуварсо. Соват кирьгава, веденть пачк неявить пильгесурот. А уш виртне, виртне Ахунанть перька! Мазычидест зярдояк а нильтякадат, натой тундаяк. А ушод кс, а пе тенст. А стяко минек институтонть панжомадо икеле таркасонзо ульнесь вирень техникум. Эседензэ ледстнемакс кадсь сон тонавтнема корпусонть икельга-перька ойсевтезь эрьва кодат чувтт. Тарканть мазычидензэ, шумбра кошттонзо ды ваньксчидензэ корты теяк: тесэ колмо (колмо!) оймсема кудот, пионерэнь лагерь, санатория. Пенза, ош... Мейле мезе? Мезекс сон?
Саранонь «сувтемеденть» мейле кучимизь Пензав. 1955 ие
[236] Лексемс челькев кошттонзо? Никсемс кизэнь перть судос эциця асфальтонь сод чинензэ? Секс ламот, седеяк пек оймсема читнестэ, капшить Ахунав, лейлангов, пиже лато алов.
Сура чирев Мордовиясто «нацкадратнснь» серьгедизь таргошкадо икеле. Тевть. Тень витнема-петнема, тонань. Курок ушодови тонавтнемась. Пурнавить студенттнэ. Эрьванень эряви эрямо тарка. Секскак инсп путонь «квартирмейстерэсь» кармавтымизь кой пеень витнеме, пичень эчке чочкосто чапозь вейсэнь кудотнева сынст кандтнеме ды аравтнеме. Теде мейле од кармавтома: кандтнемс ды ацамс кониктнева кендеть.
Сёксенть лексеманзо лангс апак вано, кизэнь гай чи. Чинь-чоп панартомо, карксамга штапо котьматано — топавттано мерезенть. Пурнынек-сэрнинек эрямо пизэ Эстенекак. Кевейкее цёрас. Весе Мордовиясто. Эрзят ды мокшот. Седе ламотне сы шкань агрономт, кавтошка механикть.
Истя вана, коникень кандтнемасто, институтонтень лездамосто, совинь «пензань» эрямозон. Истя ушодовсь паксянь койтнень вете иень кувалмосо тонавтнемам, аволь шождыне ды теке марто од шкань кеняркссто пешксе ким.
Колмоце эли уш нилеце курссо эрясь мартонок ве нупальсэ «зоотехнияиь» прядыця цёра. Весть чокшне ланга мекс-бути талайс арасель валдо. Теваразде колмонек калякннек факультетэнек прядомадо мейлень мелявкстонок. Лёша, «зоотехнияиь» прядыцясь, видькстась:
— Путан кудо, карман кирдеме скалт-реветь, кудосон улезэ электричества, газ...
— Я! А кода колхозось?! — абунгадсь Москвин Саша, Мордовиясто, кода Лёшаяк, ялгам.
— Колхозось — те колхоз. Ков сон моли? Кудосон улезэ паро, — содась эсензэнть, эзь кавтолдо «валскень зоотехникесь», — эрятано весть!
— Те кода истя? Тосо тевтне аволь шождынетнеде, алов ваныть... Эрявить кепедемс. Ломантне оно кода майсевить... Мезень кис эно сынек тонавтнеме? — арьшь Саша ёнов.
— Мон мезе? Кадык а майсевить! — ацирьгадсь зоотехникесь.
— Эх тон, Лёха-Лёха! Канятень кис, кудосонок электричсстванть кис, минь тонавтнетяно? — сялдызе Москвин Саша ансяк эсь кисэнзэ мелявтыцянть. — Кияк а мери, теяк эряви, ансяк...
— Ха! Эно мезень кис?! — пря эзь максо ялганок. Сон эзь маря [237] мезде моли кортамось, валтнэ эзть соваво пекстазь мештезэнзэ.
— Ульнесть романтикть ды реалистт, — стакасто лекстясь ды арсезевезь мерсь Саша, — аволь реалистткак, эгоистт, рузокс — шкурникть.
— Ульнесть, улить ды кармить улеме, — поладынь ялгань валонзо-мелензэ. — Оймак, Москвин. Саты теть псилгалемс. Каня а содат, ломантне аволь вейкеть? Вейкесь арси-мелявты ламонь кис, омбоцесь — ансяк эстензэ лембе улезэ, лиятне кадык куш врадыть.
... Макссть валдо, ды пелькстамонок прядовсь. Эрьвась кундась тевезэнзэ — валскень уроктнес анокстамо.
* * *
Чопода нупальсэ чокшнень се нурькине кортамось-пелькстамось кадовсь превзэнь, эзь изняво иетненень, кадовсь эрий картинынекс. Питне тензэ ялатеке тень эзь максово. Лисни, эрьвась эйстэнек ульнесь виде, эрьванть эсензэ видечизэ.