Эрязденть арсезь (2010)/Васня чумондт эсеть
[237]
| Васня чумондт эсеть |
Прядовсть самстонок васенце чистэ саезь хозяйствань мелявкстнэ. Ушодовсть уроктне. Лекцият, лабораторкат, практикат, кевкстнемат ютазденть... Арасть сынь ансяк таргочистэ. Агрономонь курссонть сядо комсьветее од превть-седейть, вете курот-группат, эйстэст колмотне — тейтерень. Эйпаро ошкан. Лекциянь залонтень эль кельгтяно.
Бажамось — улемс артистэкс ды суронь пачк ваномс физикатнень-химиятнень, неть «наукатнень» лангс — кадсь тень сыявтыця сардо. Васняяк сэредьксэнь марязь пупимем химиясь. Ванан стенас понгавтозь раужо лазонть ланга порсо сёрмадовкстнэнь лангс, а вана зэмест мейсэяк а «лазовить». Мекс, мерян, H2SO4-ть «ашонзо» мельга путови «кавто», «О»-ть удалов — ниле. Эли: мезе тееви чапаськайстэнь сал марто човорямсто? НСЬ+ККОЗ=? Лия чапаськай ды лия сал?
А молить тевень. Течи таголь химия. Таго майсевинь а ёвтави кода. Сынь вейсэнь кудов, прынь апак кайсе, пиджаксо-мейсэ, коникенть кувалт ды эль а авардян. «Кадомс сави тонавтнемам, кадомс, а изняви те идемевсень наукась...» — чарыть-эвтить превсэнь седеень киртыця мельтне.
— ...Кадовт ванды урокто мейле, — мерсь Михаил Абрамо-
[238] Лекциянь залонтень эль кельгтяно... Ютко шка. Вить ёнов: Нуянь Видяз, Большаков Женя, Ивановский Олег, Павлова Рая
вич, лекциянь ловицясь ды минек группасо «лабораторкань» ветицясь, занятиятнень прядовомсто. Тонавтыцям корты састынестэ ды чевтинестэ. Аволь ламо.
— Паро, Михаил Абрамович, — алтынь самс ды чикорк пекстыя мельган кенкшенть.
Цётазь шкастонть сынь химиянь теке лабораториянтень.
— Вана мезе, од ломань, ушодтано мартот валентностнестэ, те тонь «варяв», илязо уле чаво, таркат, — стувор экшс стакасто озамсто, мария Михаил Абрамовичень вайгелензэ.
Тонавтыцям ёвтнесь валентносттенть, сёрмалесь формулат икеленек конёвтнес, кевкстнесь чарькодинь-эзинь, мезде ёвтнема. Макссь тень кудонь тев, мезе лангс явомс мель, мезе ловномс.
Уроконок прядовсь. Мольсь часошка.
— Ванды теке жо шкастонть, — мерсь моткодезь ладсо явовомстонок сиясо токазь прячерь тонавтыцям, эчке, аволь сэрей, акапшиця ломань.
Истя вастневинь паро ломань химикенек-неорганикенек марто кавтошка таргонь перть, вастневинь ды пештинь превпаргом асатыкс содамочитнесэ. Ютасть эзть марявояк. Истямо [239] тонавтыця марто лиякс а улевельгак. Корты Михаил Абрамович сэтьместэ, мелень ванозь, апак капша, секскак чарькодевиксстэ.
Мезе те макссь?
Мезе эрявсь.
Эесь аволь ансяк сыргась — уйсь. Химиянь уроктнесэ кодамояк лавшочи ялгань ютксо эзинь маря. Натой теевинь лездыцякс пупорькшницятненень. Ёжом вадрялгадсь. Валтнэ «кадомс сави» лиядсть ледстнемакс.
Сюкпря, Михаил Абрамович!
... Актонь залось тыц.
Дина Осиповна, «физколлоидэнь химиянь» тонавтыцянок, ёвтни тенек Европанть перька венчсэ-теплоходсо укшномадонзо. Авась сэрей, туторо рунго, черензэ сеедьстэ менчевезь, туст-туст, раужот-раужот. Вайгелезэ гайги залонть келес, ванькс-ванькс! Аволик нолда те эли тона валонзо пилезэть ды а кардасак — сонсь сови.
Дина Осиповна ёвтни Атлантикань чирева стявтнезь оштнень мазычидест, тосо эрицятнень кельдест, культурадост, койдест... Марязденть кодамояк книга а ёвтни. Секс ёвтнемазонзо таркань-таркань мик а кемеваткак. Кавто часонь перть вастомась ютась лип меремс.
Васенце тонавтыцям фамилиязо Этингер, омбоценть — Зейлигер. Кодамо раськень, кевкстнемс а мезть.
* * *
Лиясто савкшны марсемс вельть амазы валт еврейтнеде: ёжовт, ансяк эседест арсицяст, а вечкить важодеме... «Станок экшсэ аштиця, эмежпиресэ чупониця-котьмиця еврей некшнить? — сялдыцятнень васень аргументэст. — Тракторсо сокиця мукшныть?»
Вал а муян, мезе меремс, чумондыцятнень каршо! Улемс лишмекс, содамс вейкеде: ускомс, ускомс ды а содамс кинень, мезе, зяро, — те, арсить, тев. Ломаньсэнть сехте питней тешкс. Истямось, келя, — ломань. Сёрмадомс книга, музыка, теемс асодавикс машина, ловномс, улемс ламонь содыцякс, асимицякс — те сынст чартьчисэ тев ёновгак а моли, те — нузяксчинь пансемат ды шкань ютавтнемат.
Еврейтне макссть рузтнэнень ды лиятненень музыка (Рубинштейн, Шостакович, Мусоргский, Дунаевский, Блантер, Колмановский, Френкель, Фрадкин, Шаинский, Фельцман, Кальман...), мазый морыця вайгельть (Утёсов, Кобзон, [240] Александрович, Вишневская, Долина...), артомань искусства (Левитан, Перов, лелят-ялакст Брюлловтне...), тейсть атомонь бомба, «Катюшанень» порох...
Аламо?
Рангить: еврейтне саизь эстест Россиянь радионть, телевидениянть, газетатнень-журналтнэнь, кинонть ды театратнень. Мейле мезе? Сайть тонгак! Ансяк ульть тевень вечкицякс, седе превеекс ды вейкень-вейкень туртов лездыцякс. Весе. Лия мезеяк а эряви. Паряк, а нузялдомс — мизолкст казнемс? Ламонень эйстэнек теяк а тееви.
Ускизь Христианстванть?
Виде, ускизь. А мекс саизь рузтнэ? Васняяк, Якстере Чипай Олодя. Рузонь культуранть яжизе, тапизе, пултызе, кадсь эйстэнзэ куловт самай сон, Олодя, Владимир Красно Солнышко. Саизе тарказонзо евреенсенть. Мезе те макссь, неяви сельмень конязьгак.
Килеенть лопанзо таркас зярдояк а панжовить, а касыть пичень салмукст, товзюрось а каи пинемень тенстькеть. Христинствась эйзэнзэ совицятнень марто тейсь самай-самай а те лувонть коряс. Эсь лемест, тетялсмест, кудолемест рузтнэ ёртызь, тарказост сайсть ят евреень ды грекень лемть. Полавтовсь, лия лемень сайнезь, удеместкак. Оймеденть уш а мезть кортамс. Теевсть лия ломанекс. Кис чумось?
Шкань ютазь те резэма орманть Московиясь, леднезь-пултазь, совавтызе эрзятнень мештьс. Крестонть вельде теинзе сынст савтницякс-сюконякшныцякс, комазь якицякс, «пазонь урекс». Ёмавтызь аволь ансяк Пазонть пельде максозь лемест, ёмавтызь оймест, келест, гайгиця морост, ёжонь ваньксчист, визьксэст.
Чумот еврейтне?
Мон аволинь мере. Паряк, мейсэ-бути чумоткак. Ансяк чумондт, васняяк, эсь прянть. Лия лангс невтнемась — меельце тев, корты лавшочиде ды нузяксчиде.