Эрязденть арсезь (2010)/Од ие
| ←Васня чумондт эсеть | Эрязденть арсезь (2010) by , edited by Разгуляева Т. В. Од ие |
Диамат Сура чиресэ→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 240—245 |
[240]
| Од ие |
Од ие... Орданьбуесэ, кепе-штапо чийнема шкастон, школасо тонавтнемстэнь, та-кода паро покшчикс эзь ловово. Истяк... Ули, арась... Кузонь мазылгавтомадо мельтькак эзть сакшно. Седе вановсь мелезэ Ташто Од иенть. Кудосо ды ялга ютксо сон ульнесь седе учовицякс. Паро коекс ульнесь Таштонть [241] вастомсто толпандянь кирвазтнемась. Те тенек вечкевсь.
Пелевенть, кода ней, эзинек учне. Мезекс? Сы чокшнесь, чопоти — куринкань эйкакштне, кодамо якшамо илязо уле, листяно ушов, кудотнень юткова ютыця кинть лангс, кие косто муи-канды зярыя олгинеть, канстень калгот, модамарень нетькст.
...Пурнавозь штеминесь аламонь-аламонь кирвазсь чугуннэсэ кудосто ливтезь якстере седнетнеде. Тусь качамо, чаразь-велязь кепети сон цивтёркай тешттнень ёнов. Толось кирнявтни, цётор-цётор пори олгтнень-мезтнень. Элякалезь, цирнезь-пижнезь, кирнявтнетяно, секень вант, киртават, толпандянть велькска. Паро!.. Якшамодонть, толдонть чамаумаренек палозь палыть, сельмесэнек кенярксонь сяткинеть кивчкаезь кивчкаить. Перьканок валдо. Варштат седе васов — сём чопода. Ансяк кой-кинь вальмасо цивтёрды ожо валдыне. Яла элякалетяно, яла кирнявтнетяно, кие седе верев. Чийнетяно. Вадря! Псиденть, якшамодонть ды качамодонть эйзэть ормань сэлинеяк а кадови.
...Толсо ормань пансема коесь — кезэрень. Покштянок ды сынст покштяст кемсть: лембень максыцясь, толось, нарды куш кодамо Сэредькс, лезды ванстомс шумбрачинть. А стяко сеть умонь шкатнестэ эрьва тунда, ловонть соламодо мейле веленек ютавтнесть Од толонь чи. Мелявксонь а содыця шказон те сыредеяк сыре кемемадонть кадовкшнось ансяк штелькске.
...Ацамков. Меельце чинзэ пешксеть мелявксто: тонавтнемадо башка карточка-мезе вельде пачтневиця шумбрачинь арсемат, концертт, казнеть, талномат... Кинень мезе. Эрьванть канстозо эсензэ. Монь, икелень «клубаренть», пря сэредьксэнь — стенас понгавтневиця «Мичуринец» ды «За урожай» газетатне. Лангсост покштне — партбюрось ды комсбюрось. Тексттнэнь пурныть-анокстыть лиятат, монь тевем — оршневтемс сынст сельмс каятыця мазый палясо: рисовамс лемть, кузнэть-пичинеть, кузалнэть, нумолнэть, тештинеть.
Лекциятнеде ды лабораторкатнеде мейле ялган умок кудосот: шлить-нардыть, вадяшить понкст-панарт, анокстыть чокшнень балонтень. Минь вана институтонь Художникенть, аволь сэрей, коськана, валдо кувака черь цёранть марто, псилгалетяно газетань лопатнень велькссэ. Ваднетяно эрьва кодамо тюссо. Ков молят, эряви. Од ие! Газетаськак улезэ од иень: стихть, раксемкат, пейдевтиця, паро ёжонь сыремтиця рисункат...
[242] Аламо кадовсь: прядомс «почтань ящикенть», конань ланга сёрмадома «Пишите, пишите, пишите», ды «Мичуринец» валсонть «чапомс» меельце кавто букватнень.
Косто муимизь «бюротне»? Кие ёвтась артомань ёрокчидень?
Кие илязо уле, артовкстнэнь ваднемась тень вечкеви, те тевесь — монь. Акварель, гуашь... Путат истямо тюс — паро, омбоце — седеяк мазый...
— Весе, Иван Серафимович, прядовсь! — серьгединь, эзь кирдеве келем кеняркстонть, шеф-художникем туртов.
— Пек паро, чийть кудов! Учить, содан, эйсэть! — варштась якстерьстэ кувтолдыця букван лангс ды мизолгадсь.
Нардтнинь нулынесэ кедень ды ношкстынь...
— У-у, — ансяк панжия нупалень кенкшенть ды лавсадия мельган, шалнозевсть ялган, — тон таго учовтат! Минек, тонь учозь, сельгенекак чудить. Сюлотнеяк урныть. Озак, озак седе курок! Художник...
Аштить цёратне стувор экшсэ, кургост а пекстневить. Турваст цимбельдить. Ёжост-кайксэст од иень. Эрьвантень комсь малава — нусмакалемс а зярдо. Учицян икеле рестазь модамарть, печтень-печть керсезь розень ды товзюронь кши, салтонь куярт, натой колбасынеяк. Студентт... Седе сюпав стувор а таргат. Теяк уш... ков седе паро. Неявсь суликинеяк. Истяк. Тешксэнь кис.
— Учоват-арась зярдояк?! Свал текень содат, тонь свал тевть, — цякскадсть учомадонть, музгордить лангозон сы шкань агрономтне.
...Васенце курс. Студентэкс эрямосон васенцеде вастан Од ие. Стувор экшсэ аволь кувать аштемадо мейле молинек тонавтнема корпусов. Сэрей, келей-кувака актовой залось пешксе. Мик пси. Тесэ цивтёрды институтонь, вейсэнь, весемеде сэрей-покш кузось. Чувтоминь: сон — чары! Лампочкатне кувтолдозь кувтолдыть эрьва кодамо тюссо. «Чарыця куз!» — лемдия эсь пачкан. Аштян таймазкадозь. Ванан. Мезе-мезе, истямо мазычи, истят кивчкаемат, тюсонь истят налксемат эзинь некшне! Сельмень а саевить «нарыцянть» эйстэ. Сондензэ башка, шкань ютазь карминь содамо, теке корпуссонть пря шныть мазычисэст факультетэнсетне. Ансяк нарыцянть ваксс сынст а путсыть.
Ламот чамакссот. Лангсост минень-сюнонь оршамопельть. Вейкесь, муюконзо вадяшазь, грузинэкс невтни прянзо, омбоцесь — Дон Кихотокс, се оно — гусарокс, тона — псакакс... Кие-бути [243] тейтертнестэ прясто пильгс оршась цыганавакс. Сёрмав якстере ковта, келей-кувака, эйсэнзэ кудо копачави, юбка, якстере парсеень лехинесэ сюлмазь цивтёрдыця раужо черть. Сельмензэ, илизь сода, кекшезь ёроковсто теезь-артозь конёвонь сельмукшсо. Кие те муницясь-ведувицясь? Кодамо факультетэнь? Содык азё!
Стясь «цыганавась» каршон ды пшкадсь наянсто, пеедькшнезь-раксезь — эль эзинь аймельгадо! — эрзякс:
— Шумбрат, цёра-парочи!
— Шумбрат, шумбрат, цыганава! Од ие марто! — арсинь прянзо наянсто ветицянтень. — Казезэ теть Якшаматясь пси вечкема, кутморямот-палсемат!
— Мон содан: эрзятне цыгантнэнь кондямокс мунямо а маштыть. Ялатеке икелечить ёвтаса. Туи, цёра-парочи? — кирмалавкс педясь эйзэнь ядамицясь, пеедькшни-цильни икелень.
— Туи! — текекс серьгединь тензэ.
— Кунсолок эно, цёра-парочи: урьвакстат институтонть прядомадо мейле. Велесэ. Нить карми мазый-мазый! Сельмензэ — чопода веть. Кода ламот аватне — казямо обуця. Чачты теть кавто тейтерть.
— Мекс аламо? — прясон чиремтнезь, кевкстия.
— Кавто, цёра-парочи. Ансяк кавто. Вансак вана.
— А кеман.
— Те тонь тевесь. Учи тонь, цёра-парочи, кувака-келей ки. Агрономсто, велестэ, сайтядызь верев. Тееват, цёра-парочи, покштояк покш прявтокс. Вансак вана.
— Вельть, цыганава, верьга саят, — меринь безардезь, лавтовонзо трокслия ёнга ваннозь.
— Вансак вана, вансак ва, цёра-парочи! — серьгедсь тень уцяскань содыцясь, юхадсь кедьсэнзэ ды ёмась икельдень.
Эскелян-эцян стядо аштиця, тей-тов эвтиця цёратнень-тейтертнень юткова, вешнян вановтсон «Русланованок», раужо шукшторов сельме Нинань. Сон минек курсонь тейтерень куросто. Варштан тей, варштан тов... А неяви Нинам. Ёмась. «Мезеяк эзь лисе, вадов эзизе сала? Улить истят минек курссо, улить!» Ды оно, оно косо! Икеле, сценанть маласо. «Икелев, студент, икелев!» — меринь эстень ды саинь ёнкс чарыця кузонть вакска сонзэ пелев.
Каятотсь вальсэнь-моронь мелодия. Венстия кедем Нинанень, сон мизолдозь путызе ве кедензэ монь панжадо коморс, омбоценть — лавтовом лангс, ды вальсэнь даволось весе вийсэнзэ саимизь [244] чарамо. Кирькс, омбоце, колмоце... Чаратано музыкань лымбакснематнень кунсолозь, чары-кивчкаи якстере, сэнь, пиже, ожо толсонзо кузось, чары од шканок. Маряви, пе а ули «Студентэнь вальс» моронтень, онсо улемантень. «Содак, содак, Ниныне, — велить превсэнь мельтне, — те чокшнесь, те Вальсэсь, неть толтнэ, тонь сельметь — весе кадовить тенек ледстнемакс тоначив туемазонок!»
Звёзды на небе зажглись, |
Коридортнэсэ, кой-кона аудиториятнесэ лотереят, налксемат, буфетт. Од шкась чадыведекс шалны. Сон эрьва косо. Иля пеле, а тошнакадат. Мизолдыця турват, кенярксто пешксе сельметь... Кие сынст ловсынзе? Покш ды вишка залтнэсэ эвтезь эвтить, сизема а содыть, кандтнить сёрмат «почтальонт». Ламотнень мештьсэ — номер. Те — адрес. Ули мелеть теевемс содавиксэкс тейтертнень эйстэ киньгак марто, кучт тензэ сёрмине. Кемть, «почтальонось» пачтясы. Кучи теть каршо кулине, а кучи — те уш тевесь лия.
«Авань вальс», — яволявтсь радиось цёрань вайгельсэ. Учок, цёра-парочи! Учан. Эскельдясь, ванан, ёнон, кургозо цимбельди мизолкстонть, Рая. Сон Нинань группасто-куросто. Вечкса те валдо черь, чольдеркай кель тейтеренть? Видькстан. Те Од иень вестэнть вечксынь, палсевлинь весень: Валянь, Нинань, Раянь... весень-весень! Вечкса чарыця кузонть, вайгельтнень, якстере атямарь турватнень, кузонть перька чарыця-якиця Якшаматянть. Вечктян, кутмордатан, Од ие!
Рая мондень алкине. Човине виде рунго. Аламнеде моли васень вечкемам, Бозань Рая ёнов. Чарамс мартонзо вальссэ — эрьведема. Рунгонзо кирди эйстэть аламнеде потазь, секскак велямс мартонзо шождыне. Теке толгине ливтни музыкань лымбавкснэнь лувсо. А маряви пилес лексемазояк. Истя кирдть, Рая!
Я видел берёзку: сломалась она, |
Гайги нусманя-нусманя «Берёзка» Вальсэсь. Иля тално, Рая-Раине, седе чевтестэ, седе музыканть кунсолозь путнек пильгеть! Эх, Рая-Рая, мекс тон аволь Орданьбуень, тонь ёнов молиця Раясь! Бозань Рая...
Вальс, фокстрот, таго вальс, почтасо-мейсэ налксемат. Балось кишти, моры, кецни. Ды истя карми вень перть.
[245]
* * *
А стяко мерезь: Пазонть кинзэ а содавить. Минденек, мода ланга якицятнеде, кортамскак а мезть. Кинь мезе учи, кияк а соды. Тень эйсэ, асодамосонть, эрямонть поладомат виезэяк. Исяк эзинь сода течинь тевдень, а содан, зярдо, кода, косо сайсамам Кулаесь эсь певтеме, чатьмониця ды шкань а содыця масторозонзо. Содавлиньгак... Паро, а содан.
...Од иень балсо вастовозь «цыганавась», «ведьс ваныцясь», видестэ ёвтакшнызе, кие ды кодамо карми улеме ним, зяро улить эйкакшон. Вана неень тевдень — эрзятнень лезэс мелявкстон — эзь ёвтакшно вал панкскеяк. «Верев», кода мерекшнэсь, эзинь пачколе, эзь лисе эйстэнь «прявткак». Мезде тунь а янксян.