Эрязденть арсезь (2010)/Сувтеме

From Wikisource
Jump to navigation Jump to search
Эрязденть арсезь  (2010)  by Нуянь Видяз, edited by Разгуляева Т. В.
Шумбрат, Пенза! Шумбрат, мазычи! Сувтеме
Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 232—234

[232]

ШУМБРАТ, ПЕНЗА! ШУМБРАТ, МАЗЫЧИ!
Сувтеме

ШКАНТЬ кедькоморо асювордаеак, а правтсак, прячерде а кундасак. Весень изни. А вана мелем — улемс «агрокс», паксянь коень-кирдань содыцякс — ялатеке тензэ эзь лепштяво.

Клубонь тевень кувалма якинь Дубинькав. Тосто маринь: пурныть институтов тонавтнеме эрзят ды мокшот — анокстамс эйстэст «национальной кадрат». Экзаментнэ Сарансо. Берянесь — ёвтызь тень те кулянть кочкамонь коволонть прядовома малава. Ялатеке кедень эзинь нолда. Ве чис чийневтинъэрявикс конёвтнень ды ильтинь почта вельде ков эрявсть. «Мезентень улема — се улезэяк», — меринь эсь пачкан ящикс каямстост.

Куроксто, истя эзинь учояк. Сась... тердема. Истя-истя, сёрмадозель конёвсонть, сак, цёра, Саранов, онкстасынек содамочинь кансткеть сталмонзо, вансынек, туят-арась мелезэнек.

Сынь. Монь кондятнэде МАССР-нь весе буетнестэ-районтнэстэ пурнавсть байтяк. Эрьва тонавтнема таркантень, карминь содамо, бажить понгомо ниледе ламо. Пелькстамот. Ды аволь лавшот. Максомс эрявсь ниле предметт. Тевесь, чарькодеви, аволь шождынетнеде.

Прявттнэ свал превейть. Мик чаулатнеяк. Нилетнень юткс васень таркас путызь рузонь кельсэ сёрмадомань экзаменэнть. Сонзэ вельде «ваявтсть» весемеде ламо. Тень эйсэ шождалгавтсть тевест физиктнень-химиктнень. Макссак рузонсенть — улят, ловт, агрономокс эли врачокс; а макссак — куш кемень тештть конясот питнест, куш Эдиесондояк ульть превей, институтонь кенкшесь теть а панжови.

Содан: сочинения, анок сочинениясто апак «ватка», тень, кода малав весеменень, а сёрмадови. Секскак аудиторияс совамодо икеле анокстынь эрьва ёндо. Пиджаконь потмо зепезэнь нерьгстынь зярыя тонавтыцянь кедьсэ витнезь-петнезь анок [233] сёрмадовкст. Зяро-бути шокадинь понкс карксамом аловгак. «Ну-у, — арсян, — эсенсенть а менстяса! А ёман».

...Мельганок ваныцякс аравтозь тонавтыцясь, раужо черь-сельме аволь сыре авась, ютавтызе вановтонзо ланганок ды мерсь: «Стувортнэнь лангсо мезеяк илязо уле. Урядынк! Кодаткак сёрмадомань колсемат-салсемат илязт уле». Прядынзе превс путоманзо ды эскельдясь аудиториянь стенас понгавтозь раужо лазонть икелев. Сайсь пор, варштась омбоце кедьсэнзэ кирдевикс конёвненть лангс ды ушодсь тешкстамо темань лемтнень. Сёрмадызе васенценть. «Вакска, монь утомсо истямо арась», — ютась пряван. Ванан седе тов. «Истямояк эзинь анокста». П-ту! — сельгинь эсь пачкан. — Таго вакска». Раужо черь эчкела сэрей авась яволявтынзе весе тематнень мельцек-мельцек. А зепсэнь, а понкс потсон эйстэст вейкеяк арась.

Вай, авакай! Вана теть «а ёман»!

Мезе теемс? Кода улемс?

«Ужо, ужо, цёра, иля новоле! Канжамот шкадо икеле илязт сорнозеве!»

Ванан, пек кардамот мельганок ваныцянть ёндо а неявить.

— Лисян? — стинь ды пшкадинь, кадык пек эзинь кемеяк — нолдасамам, — стувор экшсэ аштиця тонавтыцянтень.

— Листь, — кецневтимим, топавтызе мелем. Ков ды мекс — эзимим кевкстеяк, «сюк-сюк, ава!» — меринь эськан.

Ютынь стувортнэнь юткова ды юрк лисинь. Чамдынь, васняяк, ней уш аэрявикс конёвтнеде зепень. Кенкшенть удало вейке аштицянть кедьстэ автордыя пиже ланго «Советская литература» книганть, курокке, стенас нежедезь, стядо, теке басом мелень путозь-арсезь, ловныя Лениндэ Алексей Максимовичень «человечищанзо», велявтыя книганть азоронстэнь ды совинь аудиторияс.

Апак тално кундынь сёрмадомо лазсонть тешкстазь «Образ Ленина в произведениях Горького» теманть коряс эсь мелем. Шпаргалкавтомо. «Мезе ули, се ули», — кирдян превсэнь. «Ардтнинь» лопине. Ловныя. Витния-петния. Сёрмадыя омбоцеде. Таго ютынь ланганзо, таго ванныя эрьва ёндо. Совавтынь кой-кодат од мельть. Лиссть аволь кувака арсемат. Шныя Ильичень истяяк, лиякскак. Окойники одс, колмоцеде, «рисовия» Ленин лангс вановтом ваньксстэ. Ловныя, муинь кавто ильведькст, витинь ды кандынь «арсеман» тонавтыцянтень.

Кемема — путыть тень «колмошка» — арась. Кодат кемемат — сёрмадомс апак сала, превстэ! Эзинь марсеяк истямодо.

[234] Сы экзаменэсь таго рузонь келень коряс, ансяк ёвтнезь. Анокстан эйзэнзэ мельде-валдо. Кемема арась. Книгатнень велькссэ аштеманть таркас якан паркка, лытан Саранонь куротнева. Шкань ютавтомга спортзалсо, косо минь, цёратне, удсинек-эринек ды косо кендень таркас ульнесть матг, ужос аравтозь ташто ды амаштовикс пианинасо ве сурсо бринцяинь эрьва кодат моронь мелодият. Седямопелентень педязь пединь, кодаяк а лутаван клавишатнестэ. Истя «ризнан-мелявтан» учовикс экзамендэнть.

Превсэньгак арась: «глыбам», кода Горький лемдекшнизе Ленинэнь, «человечищам» кадови Дорофеевань, раужо черь аванть, чуро сувтемес. Секскак ветян прям ольной азгун казакокс.

Сась «рузонь келень чись». Содамочим невтеме совинь васенцекс. А вечкса кенкш удало тарноманть. Аламолгадыть превсэть. Мезень лезэсь раздемс нерватнень?

Экзаменэнь ветицясь, эчке, кавто уло марто авась, невтсь нурькине ашо сурсонзо икелензэ билеттнэнь лангс ды нерьгстызе вановтонзо эсь конёвозонзо.

«Вай, Верепаз, — арсезевинь невтезденть-марязденть, — те, лисни, коридорс «Советская литература» книганть ловномо лиснеман кис кавтодо ламо педявтсть?! Лисни, тон. аля, аволь чаво пря?!»

«Ашо кеднесь» озавтымим каршонзо. Кой-мезе сёрмадынь, арсия ёвтнема лувом. Аштек-иля, мезе содат — ёвтнема.

«Устноень» кис кавто улонь кандтницясь цяпадсь «колмо». Лисинь. Пильгень мельспародонть кияксонтеньгак а токшить. «Кавтонь» трокс эскельдинь!

— Мезе, мезе сочиненият кис? — серьгедсть, мелявтсть кисэнь совамодо икеле коридорсонть сорныцятне.

— Мезе, мезе — «колмо», — пшкадинь мельде-валдо каршост.

Кие-бути ноцковтызе кед ьстэнь экзаменэнь лот шем ды серьгедсь:

— Тонь тесэ, цёра, аволь «колмо» — «ниле»!

Пек паро! Алексей Максимович лездась тень. Кода а кода — эрзяль!

 

*  *  *

Пурнавкшность эйстэнек нилесядодо ламо. Кадовсть сядошка. Ламот ансяк «колмо» марто. «Национальной кадратненень», механиктненень-кинень, мекс-бути седе пек эрявсь содамс аволь математикат-физикат, аволь чачома келест — рузонсенть. Те сувтемеденть мейле эрзянь ламо цёрат ды тейтерть эзть тееве агрономокс, инженерэкс, врачокс.