Эрязденть арсезь (2010)/Сюронь тансть
[49]
| Сюронь тансть |
Окойники розесь, мельганзо тунда видезь товзюроськак ушодсть ожолгадомо. Кецнинек — иесь печтявсь. Кияк эйстэнек, Пичепень кепе чийницятнеде, вачочиденть куломань масторов эзь туе. Кияк эзь врадо. Ловтаня чаминетне лопань каланя лапужа кшитнеде мейле кармасть аламонь-аламонь мазылгадомо. Стинек, кода нармуньлевкст, пильге лангс.
...Немой Ваня, Эремкань Миша-Эрьмай, Теряень Коля... Котошканек. Налксетяно Немой Ванямезень кудо вакссо кекшнемасо. Одицянтень икельдяма эрьва муезенть. А кенер! шлсрят, сави кавксть-колмоксть улемс вешницякс, псилгадомазот чийнемс.
— Саты, адядо клюкамо! — лиссь апак учо кинь-бути кургсто налксеманть прядомсто.
— Адядо, мекс а молемс! — ёвтызе мелензэ Немой Ваня ды киньгак апак учо сайсь ёнкс Петровкав ветиця кинть ёнов.
Содатано: велестэнть лисезь, се кинть кавто ёнга, сравтови товзюронь пакся. Сырежди. Кенерсь. Кадовсь коськемс. Товонзо самай поремс. Сталмодонть прятне комавтозь. Кадовсь аволь ламо. Таргонь-кавтонь ютазь дирниця жнейкатне сыть нарамонзо, аватне — мельгаст пултонь сюлмсеме, копоняс сынст вачкамо.
Кекшнезь-кекшнезь совинек товзюронть потс. Ландинек, ойсинек — илязтано неяво.
Сезинь пря, човсия коморсон, пувсинь сюватнень ды кишк товтнень кургс. Чевтть, тантейть, пекень пештицят! Ярсан — яла ярсавлинь. Синдинь омбоце колоз, колмоце... Паро! Аволь кецни, моры седеем.
Каштмолезь текень теить лиятнеяк. Пешттяно пекенек. Лиясто пачколить пилезэнь тошказь ладсо ёвтазь ялгань валтнэ.
Тевенек моли. Кпюкатано.
[50] Апак учо каятотсь ардыця дрожкань-крандазкень дорнома. Кепедия прям — ды канкстоминь: крандазкестэнзэ кирнявтсь Павол Ваня, колхозонь прявтось, ды видьстэ-видьстэ товзюронть потмова эйзэнек. Ношкстынек кие-ков. Сасымим ды кундымим сиведе, мельган цопадизе Немой Ванянь.
Муюконзо предэнть раужот, теке казаконь. Раужот сельмензэяк. Варштавкссонзо сэвтянзат. Вить кедьсэнзэ гуекс менчеви раужо, дёготьсэ ламоксть ваднезь ногайка.
Паксянь ванстыцятне васняяк авторить эйкакштнень прясто картузнэст-мезест. Мон картузтомолинь, саемс пельдень ульнесь а мезе. Ялгам кенерсь пштидеме пилотканзо понкскензэ потс...
Кундыцянок локшо недьсэнзэ невтсь, цяк эзь нерьгста, раужо пря Ванянь рашко юткс.
— Те тонь мезе?
— Табаком, — эзь талакадо, снартызе манямс кевкстицянть.
* * *
Стакаль... Пансесть мельганок предтнэ-мезтне, пансесть паксянь ванстыцятне. Меельцетне — ласте. Кедьсэст ногайкат. Ялатеке пеняцямс эзь савкшно. Мекевланг, кой-зярдо савкшнось кецнемс. Аволизь полавтояк 1931-це иень «Вете товзюро прядо указонть», тевтне, секень вант, лиякс аравольть — пансицянок улевельть ружия марто. Кона ёнов тевтне увтявольть, превть яжамс а эряви... Сестэ, войнань шкасто, ды мейле зярыя иетнень перть, минек тандавтнесть-старясть ансяк прястонок картузтнэнь нельгемасо ды локшосо. Педилинек, чарькодеви. Тень кис содылинек кенериця товзюронь чевте, тантей чине товтнень танстест.