Эрязденть арсезь (2010)/Содан лиядо...
| ←Аниська | Эрязденть арсезь (2010) by , edited by Разгуляева Т. В. Содан лиядо... |
Сюронь тансть→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 46—49 |
[46]
| Содан лиядо... |
ВАНДЫ сырган калс. Анокстама эрьва ёндо. Тевтне кирьгава. Тень теема, тонань. Течи эрьва ков кенериця Эрьмай ялгам та-косто мусь ульма кечказокс паро уське. Макссь моненьгак. Синдинь эйстэнзэ зяро эряви, мушкорсо тянкаезь лапуж-кавтыя ве пензэ, теинь оржине, омбоце пентень — суренень чоблыне. Кечказнэм, мерть. анок. Теинь омбоце. Седеяк парсте лиссь. Куш базаров ливтить. Сюкпря, Эрьмай, уськеть кис!
Чинзэ валгозь саинь койме ды лисинь кардаз удалов суксонь вешнеме. «Кудост» сынст, содан. — шукшпрясь. Тосто аволь кувать поксарямодо мейле кочкиньгак. Якстереть, аволь покшт ды куявт. Самай истят эрявитькак. Тапардынь, илязт орголе, рукшна лопа ды нулыне потс.
Ней мезе?
Суксон улить, жестьстэ «сувтемем» ды ульман кудыкельксэнь кенкш удалот. Кинь печтьке сюлман «сувтемезэнь» таркас пачкодезь. Кедьге, кедьге калнэнь анокстыть? То-та! Вант. Симемскак мейсэяк саема. Ведтеме рипакадат. Весемесь анок? Мезеяк эзить стувто? Вант. Весемесь, весемесь кедь маласо. Валске чоподава...
Чипаесь эзь кенере прянзо кепедеме — мон уш пильге лангсан. Ёрвалдыя лахань велькссэ чамам, эрязкалезь автордынь кудыкельде кундсемань кедьёнксон, ве таркас пурназь курмон-кармон ды лисинь ушов.
Велесь кармась сыргоземе. Аватне, кие лисьма лангс ведьс [47] капши, кие, маряви, кардазсо скал потявты, — цинькаи потявтома ведразо. Раздить кирьгапарест, морыть валскень морост — кинь седе мазый, жойниця вайгелезэ, — атякштне. Вармань аразденть сэнь палманькс стясть кудонь почкотнестэ лисиця качамотне.
Пронянь ды Ёгань, бо_ ____ умарьпирест юткова янганть, берть-берть чиезь, лисинь веленть удалга Веждей ёнов ветиця кинтень.
Чизэ лиссь. Зярс ялатеке экше. Панжиков. Кодамо лембе илязо уле, ялатеке аволь кизэ. Ветне, васняяк, якшамот. Оршамотнеяк лангсон аволь лембень кирдицят. Цидярдома, зярс ушось а эжи.
Эскелян капшазь. Таркань-таркань чиезь чиян. Перькан пижелдыть тундонь ды телень видевкст. Ютынь Покш Сельме лейненть трокс — кельме зярс ведезэ — ды керш чиреванзо, луганарсо вельтязь киванть, куроксто пачкодинь Веждейс. Кодамо сон келей, домка, кодамо капшиця! Каня улить косояк сондензэ покш-келей лейть? Зярс эзь пра, эзь сова чирезэнзэ. Секс ведезэяк аволь ванькс, тюжалт мери. Таркань-таркань, косо седе домка, чуди чаразь. Ков эрязкалят, кинень капшат, Веждей?!
Муинь аштиця ведь тарка, бакалда.
Каинь лавтовом лангсто ульман-мезень, путынь кедьгень. Васняяк нолдыя ведьс вариявтозь жесть лопам, «сувтемем». Недензэ нерьгстыя модас. Велявтынь-ютынь кундсема тарказон. Озынь. Кечказнэтнес тонгинь сукскеть, илань коряс весть-кавксть сельгинь лангозост ды каинь ведентень.
Чангодть, Верепаз!
Учан. Пичень керьстэ лаксезь ульма повнень теке кулость, сырк-сорк а теить. Ванан лангозост, сельменьгак полгарьгадсть. А токшить. Куш кулок а токшить! Теке матедевсть. Удомаст, бешоконь, явавтнить ведьсэ эрицятне. Цюр, цюр! Лыказевсь вейкесь, мельганзо, вантака, омбоцеськак. Лыказевсть ды... оймасть. Седейкельмевкст, стяко кецневтимизь!
Таго учомат. Учан, учан... «Тынь мезе, калт-калнэть, стувтымизь? Аволь лытамо ковгак туиде?» — содавтымизь нусманя мельть. Те шкастонть — шил-ши-ил, шил-ши-ил — кекшсь ве повнесь ведентень. Ноцковтозь ноцковтыя ёлонть! Суренть песэ сиякс цивтёрдсь покш човарка. Ушодовсь! Менстия кундазенть ды нолдыя вакссон ведте пешксе балакирентень. Вития сукскеть ды ёртыя кечказнэнть седе васов.
Стинь, ютынь «сувтемем» варштамо. Састо-састо, а лексянгак, тарган-кепедян эйсэнзэ недентень сюлмазь карькстнэнь [48] вельде. «Улить-арасть, улить-арасть?..» — кивчкаи прясон, талнан. «Понгсть, тезэньгак понгсть!» — сеерян эськан. Колмо-ниле раужо кутьмере покш човаркат, кавто гуйкалт ды вейке сэрьгине бизмолдыть-менчевить начко жестенть лангсо.
Тевем моли.
Леенть ватола ды сэрей сёвонень чирензэ экшсэ вармась а токи. Удалон мерят стена. Велькскан пувиця вармась экше, пелевеёнксонь, тесэ — пси. Лангозон ваныця чипаесь калязь кали, ченти штадо прям, чамам ды ципкав пильгень. Кадык ченти! Монень натой вечкеви. Мельтне сюлмавозь кундсеманть марто. Псиськак а маряви. Шкань-шкань калнэтне истя токшить, ансяк кенерть таргсеме. Лиясто... уликскак а теить. «Паряк, весе кундсевсть?» — сакшныть превзэнь нувара мельть. Учан, учан...
Чипаесь тёкшкесэнзэ. Псиденть конямгак ливезькадсь. Саия бутылканть ды начтынь турван. Пекенть вана пештямс а мейсэ. Эряволь кудов... Кудов? Арась, ялгакай, арась! Зярыя ульмама. Авань кецневтемга. Те кодамо кундсиця, зярдо штюрьбаскак а сатыть калонзо? Пароль рестамскак! Визькс карми совамс кудос пельсчаво балакирь марто. Ялганень, Эрьмайнень, мезе мерян? Мерян, эзть токше? Вармаль? Ведесь кельмель? Шкадо мейле сынь? А туи, ялгинем, истя, а туи... Улезэ нардеть...
Шказо, чинзэ лангс ванозь, чикуншкадо мейлень. Чипаесь састыне-састыне ушодсь кевереме аловпандт. Окойники кедьгем стакалгадсь, байтяк ульминь. Сан кудов — якстерьгалемс а сави. Стинь, выр-выр тапардынь ульман, таргия «сувтемем», пурнынь курмон-кармон ды сыргинь кудов, чивалгома пелев...
* * *
Зяро мельспарот, зяро талномат ульнесть калс якамотнеде, чинь-чоп лейчиресэ сеть аштематнеде! Мезе лангскак сынст а полавтсынь. Сынь — монь! Ней ламот бажить таштамс сюпавчить — машинат, квартират, ярмакт... — арсить, уцяскась сынст эйсэ. Аонкставикс ильведькс! Сестэ а лангс оршамс седе вадринестэ мезеяк арасель, а потс каямс — ялатеке эринек, кадык стакальгак, кенярксов масторсо.
Абунгавтни эйкакшпингстэ ашолгадома ланга стякшномам. Монсь, кияк эзимим пувтне, кияк эзизе сезне тантей удомам.
[49] Монсь ды ансяк монсь. Кодамо потмовий эрявсь! Неень эйкакштнень лангс ванозь а кемевияк.
Соласть ламо ловт, ламоксть сакшнось инжекс тундось, ламо ведь нолдась чирензэ юткова Веждеесь. Тень лангс апак вано, лейтурвасо ульмине марто аштиця валдо прячерь цёрынесь течис содавтнесамам онстон.
Кодат, каня, онт кармить нееме кодгемень-сизьгемень иень ютазь лавсьсэ неень нурсевицятне?..