Эрязденть арсезь (2010)/"Лездась" кснавс якамоськак
| ←Сюронь тансть | Эрязденть арсезь (2010) by , edited by Разгуляева Т. В. «Лездась» кснавс якамоськак |
«Партизант»→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 50—52 |
[50]
| «Лездась» кснавс якамоськак |
АРАВТНЯН, стявтнян пирявксонть кувалт паксясто ускозь марч нетькст — седе курок коськест чипаенть каршо. Мейле пивсэмат. Нетькстнэ Якстерть мерить. Те «сортось», авань валонзо коряс, мекс-бути ловови весемеде вадрякс.
Эзия маря, рожодоминь. Эрьмаень самонзояк. Сеедьстэ вейсэ налксетяно, лытатано эрьва кува, ве тев мукшнотано. Ялгам...
— Адя кснавс, — тердимим лангозом аламос ваномадо мейле.
Аштесь удалон. Учось, мезе ёвтан.
Кол цёрынесь, эрьва ков кенери, прок каямо. Аволь умок [51] якинек аниськас, мейле саиксэлимим умбравс, ды эзинь молеве. Ней вана...
— Адя! — меринь лангозонзо апак варшта тевем прядомсто. Видемтия рунгом, велявтынь ёнонзо.
... Совхозонь паксясь Сёвонь латконть томбале. Ютасынек Калмоньчеенть, латконть ды листяно эйзэнзэ. Тов весемезэ колмошка вайгельпеть. Кува молезь, кува луньк-луньк чиезь, изнинек неть «петнень». Домка ды ватола Сёвонь латкодонть мейле панжовсь икеленек кснавонь паксясь. Телень дюм чопода веть патям, авам, шабрань аватне салазкесэ сакшныть тей сювань-олгонь саламо. Скалонть, реветнень кодаяк андомат.
Пекекиське лангсо ёзмолдозь, теке метьказт, лисинек латконть кувалт видезь розенть потсто кснавонь паксянть чирес. Кодат покшт ды ожолат, кодат пешксеть килькштне-кувтёлтнэ! Нурьгезь нурьгить нетькстнэсэ. Сынсь кургс эцить. Мелем — теске мендердамо ды поремс, седе курок пештямс тутманть. Арась, истя а маштови. Меленть лепштик. Шкась капшавты. Васняяк пештемат картузонть ды зепенть. Панар потмонтеньгак а берянь улевель зярыяк раздемс.
Каявинек, теке вачо реветь тикшес. Ноцор-ноцор сезнетяно. Седе курок, седе эрязасто!
Картузось пешкедсь. Пешкедсь зепемгак. Ней ков? Панар потс!
Рожодоминек. Эзинек нее-маря, мезе перьканок.
Апак учо каятотсь дубордома. Кепедия прям. Вай! Икеленек, теке мода потсто лиссь, ласте бурина од цёра. Кшнань локшонзо вешкезь юхадизе прянзо велькска — снартни аваждамс конаньгак эйстэнек кутьмерень трокс.
Тарск стинек ды налокс ювкадинек розенть потс. Миша ве ёнов, мон — лияв. Зярс-бути чиинь ды лекшкадынь, теке нумололевкске, модантень. Паксянь ванстыцясь каявсь Миша мельга. Сон, пинень седеесь, пансь Мишань, теке нумолонть, розенть потмова эль неявикс яннэванть Сёвонь латконть ёнов.
...Кодак пачкодинь кудов, сеске чиинь Эремканень.
Миша кардазсоль. Ве панарнэсэ, понкстомо. Лангозон ванозь, лып-лып кончтась раужо сельмсэнзэ ды нолдызе прянзо, прок вешсь нолдамс чумонзо.
— Ардсь мельган розенть потмова, рангсь «богамать» валсо. Ага... Зярыяксть эзэльдимим локшосонзо. Неят мезе кутьмерьсэнь? — мерсь, панарнэнзэ кепедезь. — Сюкпря Сёвонь [52] Кулось Миша сёксня, иенть ожосо оршамо шкастонзо латконтень. Ватолат чирензэ. Ласте кодаяк а валговат... Сон, те идемевсесь, модердявлимим. Ага...
— Тон мекс «гулькат» невтнят? — кевкстия пельсштапо ёвтницянть.
— Ды те, теня, — визделгадсь Миша, — васня чуравинь понксон потс, мейле... Ведьс оно каинь. Кадык лоподить...
* * *
Кулось Миша сёксня, иенть ожосо оршамо шкастонзо. Арасельть тензэ кодгеменьгак. Аштесь цёрась кудынесэнзэ, ды мезеяк уш тензэ эзь эряво — а пенгть, а тикше ракшатненень, а кши кочом стувор лангс. Весе, Эрьмай, прядовсть эрямонь кить-янот, прядовсть майсемат. Улевельгак эйсэть аламошка сёрмадомань тол, кундавлитькак ожо лазтнэнь юткс мадемадо икеле майсемадот ды пандонь пандошка теезь паро тевдеть ёвтнеме, лисевельть зярыя книгат. Эрямонь стака кись ветинзитькак, Миша ялгинем, шкадо икеле Орданьбуень калмазырьс. «Лездась» тенень, а мезть кавтолдомс, мартот вейсэ кснавс якамоськак.
Шныть кой-кить сеть шкатнень, мукшновить истят.
Мезень кис?