Эрязденть арсезь (2010)/"Партизант"

From Wikisource
Jump to navigation Jump to search
Эрязденть арсезь  (2010)  by Нуянь Видяз, edited by Разгуляева Т. В.
«Партизант»
Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 52—54

[52]

«Партизант»

Пси. Коштось коське. Менелень прявтось сыртезь сырти. Сёксенть самодонзо а ледстнияк. Якан гай чаво паксяванть штадонь прят, кепе. Сапонень аразденть пильгень полдадо верьга ципушка потсот, лазнотозь верьс. Нуемадо мейле кадовозь олго сэльгетнень пупавксосткак а марян. Ловсто ловс — кепе. Тонадовсь. Теке истя эрявияк. Куш суликань штелькс ланга якак.

Ломанесь эрьва мезес тонады.

Войнантеньгак?..

[53] Сявдиксэзэнь карькс вельде понгавтозь коцтонь кескавне. Апак эрязкале якан урядазь паксяванть — пурнан нуемадо мейле тия-тува кадовозь товзюронь прят. Кепедян ниле-вете — элес, кепедян вейке — сеньгак тов. Таштавить зярояк — чу-кадьсынь кескавнезэнь. Ваннат-ваннат — сельметькак полгарьгадыть. Кирьгаськак та-кода каназкады. Онстоткак, содан, карман нееме паксява неть азгондематнень, модасто товзюронь, шужонь, суронь прянь кепсематнень.

Шказо чикуншкадо мейлень. Мелем мольсь. Кудов терди седеем. Кескавнесь вана а нолды. Эзь пешкеде. Ведьмензэ зярс лавтовт а керить. Весемеде вересь, бешоконь, маримим. Эртевинь таркинес, косо седе сеедьстэ кармасть «кирнявтнеме» элезэнь-кескавнезэнь товзюркайтне. Кансткем, маряви, стакалгадсь. Кудовгак сыргамс а визькс. Авань кецневтьса. Ванды валске стувор лангс путы товзюронь каша чакш. Чинезэ срады — пекеть пешкеди — кудонь келес.

Те аволь тундонь аразьчинь шкатне. Вачодо а кулотано. Паксясь анды, ды карми андомонок, зярс а прядовить нуематне, зярс а нолдыть ланганзо ракшань стадат-жабардат.

Весть «судринек» Красина велев ветиця кинть чирева таргавозь паксянть. Тевенек мольсь. Нуицятне «вадряльть». Прятнеде кадсть байтяк. Миненек те эрявськак. «Нолсинек» пакся-пенть колмонек: мон, Немой Ваня ды Пронянь Коля. Апак учо Коля, юткстонок «сехте одось», сэрьс седе сэреесь, рангстась граж вайгельсэ: «Латков!».

Ёнонок вармакс ливтясь ласте паксянь ванстыцясь — Дильдя Ваня. Кежей, содатано, алясь! Цитниця раужо сельмедензэ тандадат. Нурька, кшнань локшодонзо седеяк.

Домка латкось а васололь. Минь — эйзэнзэ! Оскакс кеверинек тикшесэ вельтязь ватола чиреванзо. Потмакссонзо кассть ломанень сэрьсэ пиципалакст ды кирмалавт. Эцинек сехте тусто таркантень. Пицевкстнэнь пицемасткак эзть маряво. Кукшкадынек, теке саразкеть, вейке омбоцес. Тук-тук-тук... — чави, мештезэнь а кельги седеем. Латкочиресь алдо, нетькстнэнь пачка, неяви. Минь прок велькс потсотано. Вантано: латконть чирес ласте ардсь пансицянок, вешни эйсэнек вановтсо. А куш а каш. А соракады ве лопинеяк. Теке ведьс ваинек.

Чарась-тейсь Дильдя лишместэнзэ апак валгоне, ды тусь. Каня а кинь пансемс минденек башка? Паксятнеде оно зяро!

[54] Лисинек «окопстонок» ды таго кундынек эсь тевезэнек. Чопоньпелев кандынь кудов тыц пешксе кескавне...

 

*  *  *

Арась, те ульнесь аволь партизансо налксема. Те ульнесь чапамо, сэпей тансть сонсь эрямось. Сонзэ кисэ, пеень сускозь, сэредькстнэде рангозь, тюринек эрьва чи. А мезде ярсамс, а мезе лангат каямс, те арась, тона... Кие сестэ арсесь: сы шка, ды вастовтано седеяк верень валыця стакачи марто? Допрок одсто «палыця ведентень» ван Немой Ваня, мельганзо текень кувалма туить тоначив Пронянь Коля. Ёгань Миша, Теряень Коля... Кодамо-бути кежей-казямо згилямо: изнямс эйкакшпингстэнек истят майсемат, а мейле... Мезе теевсь ломаненть марто? Каня алкукс сюпавчинть, нужачинть коряс, изнямс седе стака? А кемевияк: самай сон, эрьмезесь, вети ломаненть отьмас.