Эрязденть арсезь (2010)/"Разгром немцев под Москвой"
| ←«Партизант» | Эрязденть арсезь (2010) by , edited by Разгуляева Т. В. «Разгром немцев под Москвой» |
«Советской информбюронть пельде...»→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 54—56 |
[54]
| «Разгром немцев под Москвой» |
Якшамо клубонть куншкасо тырдазокс чикорды кинонь невтема аппаратось. Чэ-чэ-чэ.., — маряви залонть келес. Те гайтенть лисемга чаравтома аппаратонть моторонзо, «чиевтемс» лентанть. Чаравтома недесь — прок сывелень нолдамкаень. Ансяк седе в! (шкине. Тёнь теи сонсь кинонь невтницясь, Отяжелень тейтересь Дуся. Вакссонзо кинос питневтеме нолдазь цёрыне. Сон кирди линза. Пачканзо кесакокс лиси ды эртсы 1 ашо коцтсто стазь-теезь экранонтень валдось. Электричествань. Сондензэ ловнынек ансяк букварьстэ, неинек «Ильичень лампочка» артовксстонть. Ульнесь те валдодонть морояк. Ансяк марсицянзо аламольть. Радиовтомо косто? Патефонткак велесэнть, паряк, вейке-кавто ульнесть.
Вдоль деревии, от избы до избы, |
Косто саеви аппаратстонть пултокс лисиця валдось?
Кинонь невтема курмотнень-кармотнень марто усксеви динамо-[55]машина. Сталмозо пондо, паряк, кавтояк. Аравтсызь эземс. Озыть карадо-каршо кавто цёрат ды, вейкест-вейкест полавтнезь, важодевтить динамонть. Недезэ покш. Ськамот кувать а чаравтат. Сизят. Чаравтомс ды теке шкане ваномс кино а ён, ды ков молят — совасть питневтеме. Эль лотказеват нежедемадо, валдось лавшоми, лиясто мади. Чоподасонть эрьва ёндо каятыть вайгельть: «Сапожник!», «Чапакс!», «Латякарь!». Вельми сэнь толось, ды тееви општ, рангицятне таго педявтсызь нерест икельгаст сравтозь ашо коцтонтень. Мезе тосо невтеви, ламот а чарькодить: кинотне немойть, ломантнень кортамост максневить алга сёрмадовкссо. Рузонь келеськак ламонень а чарькодеви. Эйкакштне ансяк автнить курго.
Кинонь невтицянь тевесь аволь шождыне. Цыганонь. Течи крандазсо эли нурдсо пачтятадызь ве велес, ванды... Якама кавто буева — Дубинькань ды Отяжелень. Кизна, лембе шкава, эно кодаяк. Варчика тельня! Бурят, кандыловт... Якшамо ушосонть, седеяк якшамо апак ушто клубсонть. А тон невть! Тень кис аравтозят. Теньсэ тон лездат фронтонтень.
Весть тельня Дуся пачкодсь минек велескак. Патям клубонь прявтоль, саизе миненек удомо. Тарчксонть трокс эскельдясь алкине, покш сельме, кирьксала чама тейтерь. Кинонь невтиця! Паряк, неень эйкакштненень космонавтоськак истямокс а маряви. Миненек сестэ... Кинозо Дусянь се чокшнестэнть эзь невтеве: палсь кодамо-бути лампочка. Ансяк кенерсь тейтересь совамо, сокарясь-тейсь юдминесэнзэ ды таргизе, чарькодинь, палозенть.
— На, кирдть, монь пельде казне! — важовсто варштась лангозон ды венстизе монень.
Талакадынь. Саемс а саемс?.. Саия. Истямо цивтёркай, пачк невтиця «дулине» онстонгак эзинь некшне! Эрьмайгак эзь некшне. Косто...
— Вана теяк тонеть, — мизолдозь мерсь инженек ды макссь тень кинолентань сезевкске.
Мизолкстонть тейтеренть чамаумарьсэнзэ кивчкадсть яндавинеть.
— Саик, саик! Иля визде, — поладынзе валонзо.
Кецнемадонть сюкпряяк стувтынь ёвтамс. Кудонь экшеденть
псакакс кузинь казнень марто каштлангс. Ванкшныя, пекекиське лангс мадезь, лента пенть. Эрьва кода токшия-велявтния, ванныя лампочканть. Путынь прялксом алов ды матедевинь.
Омбоце чистэ «сырнень» казнетнень саинь мартон школав.
[56] Эрьвась классонь цёрынетнестэ бажась кирдемс кедькоморсонзо цивтёркай «дулиненть», варштамс, вальмань каршо аравтозь, лентанть лангс — мезе эйсэнзэ снимазь? А-а, кодамо-бути штадо пря пейдиця ава!
Чокшне клубонтень пурнавсть покшнек-вишканск. Арасельть ансяк фрицтнэнь-ганстнэнь каршо васоло-васоло тюрицятне ды ёкол-ёкол якиця сыретне. Оршнезь, содави, телекс. Неявсть зярыя тулупсояк. Якшамо залсонть сорность-вансть 1941-це иень ацамковсто Москов маласо немецтнень каршо тюремадонть картина. Сонзэ лемезэль «Разгром немцев под Москвой».