Эрязденть арсезь (2010)/Сон а чумо
| ←Пекшень кши | Эрязденть арсезь (2010) by , edited by Разгуляева Т. В. Сон а чумо |
Вачочинь пейть→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 65 |
[65]
| Сон а чумо |
КУДЫКЕЛЕНЕК ларь. Покш, домка ды келей-кувака. Тетям теекшнизе. Тень коряс, мерема, сырнень кедь ульнесь. Сюронь-почтонь кирдема те «утомонть» «чапокшнызе» мелень путозь. Лазонзо келейть, инзэдезь валанясто-валанясто. Мик цитнить. Потмова сон явозь-пирязь кавтов. Ней седе покш ёнксонтень авам путни аэрявикс курмот-кармот: варяв сувтеметь, чакшт, ташто чугунт... Седе вишкинесь чаво. Ансяк вить ёно ужинесэнть неяви сюпавчинек — ашо кескавнесэ колмо-ниле килот розень почт. Кото кургс...
Совинь ушосто кудыкелев. Ларь вельксэсь, ванан, панжадо. Мезень тюниха? Кудосонть азортнэ минь, вишкинетне. Кие панжизе? Мезекс?
Эскельдинь «утомонть» ваксс, варштынь эйзэнзэ. Тосо, кескавненть вакссо, ландядо ашти Коля ялаксом. Кода тензэ панжовсь-кепедевсь ларень стака вельксэсь? Кода валговсь тозонь, истямо домка «латконтень»? Сонсь содась.
Коля сурпрясо таргсесь кескавнестэнть почт. Пеке пештясь. Варштась верев. Вастовсть вановтонок. Турванзо, судозо, чамаумарензэ почт потсот. Ваны лангозон, лип а теи. «Нолдык чумом», — энялды вановтозо. Стясь, видемтизе рунгинензэ. Венстинь тензэ кедь ды лездынь менемс «тантей таркастонть».
Аванень эзинек ёвта...
* * *
Се шкане истямо тевенть кис эйкакшонть киськензэ, секень вант, ваткавлизь. Авам истя зярдояк эзь тейне, содась: пешксе пеке нилькскезэ истя зярдояк аволь тее. Содась лиядояк: пакшанть истямос пачтизь покштне, войнань толонть кирвазтицятне. Эйденть мезень чумозо?..