Эрязденть арсезь (2010)/Пекшень кши
| ←Кие чумось? | Эрязденть арсезь (2010) by , edited by Разгуляева Т. В. Пекшень кши |
Сон а чумо→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 63—64 |
[63]
| Пекшень кши |
Панжиков. Чипаень пси вановтто чувтонь-балягань пижелгадома-панжома шка. Авань марто мольтяно вирьганть нешкепирень киява. Кутьмерьсэнек кескавт. Сынек лопас. Эскелятано апак капша, тей-тов ваннозь. Пижесэ оршазь пекшень од чувтынеть а неят. Сынь малав весе лопавтомот. Штапот. Ютынек уш пельвайгельпешка. Сельменек икелев понгон! шя пекшетне теке ирдезт. Ванат лангозост — эль сельведеть польдерь-польдерь а туить.
Те мекс истя? Мекс неявить ансяк раужо тарадт? Косот лопаст? Варма раздинзе? Сукст, паряк, поризь?
Аволь.
Аволь.
[64] Аволь.
Разедизь ды сэвизь од, аволь сэрей пекшинетнень лопаст-мазычист аволь сукст-унжат, аволь костояк Африкасто сазь жирафат — ломанть.
Аволь покш Петровка виресь ниле-вете иень перть теевсь андыця... паксякс. Каванясь Орданьбуень эрицятнень пештьсэ, пангосо, кстыйсэ, мастумарьсэ, тундонь само шкасто — пешксэнь пупорькасо... Пешксэнь костязь пупорькатнестэ, човарсо почтокс томбамодост мейле, панильть кши. Андсь виресь истямо кшисэ-прякасо минек, пакшатнень, майсиця аванок, сырькаенек, бодянок. Минь кода-бути цидярдынек, эзинек врадо, сыретнень вана виест эзть сато, ламот тусть калмазырень кияванть. 1944-це иень эйзюрковсто маштсть виензэ вечкевикс покштяньгак, сырькаень коряс седе од, дёкуш, седе алкине Митя атянь. Пурнызе-сэрнизе ёзнэнь пря «ойнась».
Пекшень лопань кши... Ансяк лемезэ кши. Пиже почтсто чапакс а теят. Эйсэнзэ арась а чине, а нарде. Иля учо, а кепети, кода товзюронсесь, каязь оргатнеде. Токасак — калады, тееви пиже чслькекс. Секскак авам пансесь истят почтнэстэ лапужа сюкорнэть. Куш аламодо, ды ульнесь нардест. Пешкелесь-эзь пекесь? Содазь, эцемс эцевкшнесь, ды лезэсь тень эйстэ аламоль. Вешсь текень: ярсамс, ярсамс, ярсамс...
* * *
Ютасть иеть, ютасть ламо-ламо иеть. Леди мелезэнь панжиковсто раужо тюссо тандавтниця лопавтомо виресь, ды тапардасамам апаро ёжо. Ломань, пертьпельксэнь инязор, Пазонь эйде, мезе теят? Лиясто кавтолдозеван: паряк, те эйденть тетязо аволь Пазоськак? Сонсь эвсесь, а? Телевидениясь чистэ невтни самолётт-ракетат ды ломанень лия маштнемапельть. Мекс а пуромить ве таркас масторпрявттнэ ды а мерить: весементь, мезе таштавсь ламо иень перть эрямонть маштоманзо туртов, тапамс-калавтомс? Тень апак тее, зярдо а зярдо таго сави совамс тенек штапо тарад марто кизэнь вирьс. Бульчом, зяро Планетасонть теезь-таштазь леднема ды сезнемапельть, виртнестэяк, маряви, мезеяк а кадови, прыця тештинекс палы сонсь Модаськак.