Эрязденть арсезь (2010)/Вачочинь пейть
[65]
| Вачочинь пейть |
Эйзюрков. Годдорк мерсь кудо кенкшесь, ды эрязасто, илязо сова якшамось, поровтонть трокс эскельдясть Надяй ды Раюш патянок. Састь вирьстэ. Чинь-чоп пивтсть кумажадо верьга ловонть потсо — якасть куросто курос, сезнесть пешкс пилекст.
— Каштлангс, каштлангс седе курок! — ютась кудо куншкас, [66] вастынзе тейтерензэ авам. — Вельть уш кувать якиде!
Карксамга начкт, сынь каизь лавтовост лангсто стака кескавост, ёртнизь нулав фуфайкаст, юксизь карест-пракстаст ды — шкань апак таргсе тов, лембе, эрьва кодамо ормадо идиця каштлангонь кирьпецтнень ёжос.
— Пекенк вачсть? — таго пшкадсь авам, прок эзь сода: шказо умок чикуншкадо мейлень. Совась каштомикелев.
— Эжнетяно васня, — каятотсь каштлангсто.
Авам ливтсь моргасто жестень зярыя лопат. Уцорсо чамдынзе эйзэст ансяк кандозь валдо-тюжа пилекстнэнь. Лездатано, кода машттано, миньгак, вишкинетне. Сравтнетяно эйсэст жесттнень ланга.
Анокт. Авам мельга-мельцек тонгинзе каштомс коськеме.
...Чипаень валдосо артозь валске.
Кудось пешксе тюжала сувдо. Надяй ды Раюш патянок човарсо томбить исень кандовт пилекстнэнь. Вензэ перть сеть коськсть кошксекс. Каштордыть. Томбавить вадрясто. Вийламо а эряви. Пух-пух-пух лиси човарстонть сувось ды сравтови кудонть келес.
— Тантейть сюкоротне лисить, тантейть! — ракси Надяй патям, сонсь састыне, ёжонь марязь варсои петькельсэнть.
— Кодат уш лисить, сюлотне яла а педить вейкест-вейкест эйс, яла пекень пештямо, — поладынзе валонзо Рая.
Чадыков. Модамарь пиретне, паксятне штадсть ловдонть. Ансяк ашолгады, невтьсызь пряст, вередемить солазь модастонть мезень-бути вешнеме саразтнэ ды Атяй прявтост. Мейле, зярдо чипаесь кузи каршонок кудонть вельксс, листяно пирев миньгак, эйкакштне. Саразтнэ вешнить видьминеть ды сукскеть, минь — сёксня тия-тува кадовозь кельмезь модамарнеть. Ней сынь соласть, ведянят. Мертяно тенст «трахмал».
Кедьсэнь ведрыне. Якан пиренек трокс-кувалт. Муинь ансяк ниле-вете кельмакайть. Аламо. Уш зяроцеде саинь ёнкс пире пев, Кардолей чудикерькскенть пелев. Мелем топавтовсь! Ве таркастонть рединь апак тарга кавто нетькст. Муинь пшти мандоне. Сокаринь-карынь ды таргинь гулькань алдо покш кеменьшка модамарнеть. Паро! Авань кецневтьса. Пани, со7 дан. пачалгсо лапужа каймакт-прякинеть. Тантейть!..
Панжиков. Пирень-модань чупонема шка. Те тевенть [67] шождакс а ловсак. Комсьветее соткатнень чувомат-чупонемат коймсэ. Тень а тейсак — модамарть а путат. Сынтемест — анокстак кандолазт.
Псилгалетяно чентиця чинть ало котонек, покштне ды вишкинетне. Покшокс ловтано кавксо иесэ Коляньгак. Сонгак кирди, кадык седе шождыне, койме. Верушнень сон зярс а кепсеви. Иензэ эзть топоде. Кото тензэ. Эряви учомс. Сонзэ тевезэ лия — пурнамс ведрынес муезь «трахмалтнэнь»: муеви — тозонь, муеви — тозонь...
Валске марто, «сокамо» лисемадонок икеле, авам путсь икеленек исень пурнавт модамартнестэ пидезь ям. Та-кодамо навола тортав ведь. Лия, кодамо дошузокс иля уле, а теят.
— Авай, сукскеть! — серьгедсь Веруш кургозонзо пенченть пачтямсто.
— Тон иля вано, ярсак сельмень конязь, — пеедькшнезь путызе превс ламонь неицянть авам.
— Те кода — сельмень конязь? Сокорсто? — эзь ойма сазоронок.
— Истя, истя, Веракай, сокорсто, — омбоксть ёвтызе мелензэ авам ды каясь ямонтень петямонь кис зяро-бути ловсо. — Варштака, ней неят куш вейке сукске?
— Арась!
— Ну и вадря.
Коршатано. Чатьмонезь пешттяно пекеть.
Чикорк панжовсь кенкшесь. Тарчксонть трокс каинзе пильгензэ Калдор Олдай баба, эсенек буень сыре ломань. Сэрей, теке олога. Чамазо сыявкс потсо. Те вачочиде таргоземадонть мейле. Истя свал эрси таргозькстнэнь матрамсто. Сельмензэ палозь палыть. Кедензэ сорныть.
Инжесь шаштызе Верушонь — тона эль эзь пра — автордызе кедьстэнзэ пенченть, лоцьк озась тарказонзо ды чатьмонезь кармась ямдонть амолямо. Истя эрязасто, прок пансть мельганзо! Минь пенченекак путнинек. Вантано, мезеяк а чарькодтяно. Содасынек таргоземас вачодо аштеманть, ансяк теевемс истямокс...
— Пештик, пештик пекинеть, Олдай пати, — каванясь авам апак терде инженть, явсь тензэ мель. Путсь икелензэ лопань «пиже кши».
Кадовинеквачо.
— Авай, мекс истя парсте вастык Олдай сырькаень? — [68] пшкалинь тонань туемадо мейле стувор экшстэ лисемстэ.
— Каня, эйкакшт, а нетядо: Олдай вачочиденть превстэ лиссь...