Эрязденть арсезь (2010)/Пштить пеензэ...
| ←«Последний нонешний денёчек...» | Эрязденть арсезь (2010) by , edited by Разгуляева Т. В. Пштить пеензэ... |
Махан→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 37—38 |
[37]
| Пштить пеензэ... |
АЗАРГАЛИЦЯ войнась куроксто невтизе аволь авань, эвсень чачонзо минек велесэяк, эйстэнзэ тёжа вайгельпеде васоло. Ярсамопельтне — сюрось, ямкстнэ, модамартне — солазь соласть. Вачочись седеяк набойстэ эшксесь кенкштнес тундо ёнов — тандавтнесь, ледстневтсь эседензэ эрьва чистэ.
Пиренек пева таргавсь Кирданов чудикерьксэсь. Те кизна — «керькс», юты троксканзо сараз — пильгензэяк а начкить. Чадыведь шкава — лей. Вельксканзо а эскельдят. Те меленть ёртык превстэтькак! Иля арсеяк. Обуцязо — ой-ой-ой! Торны, лажны, чары... «Несынк кодаман!» — маряви, пря шны, тандавтни.
Мезе лиссь, кода ревенек пачкодсь Кирданов чирес ды понгсь ведьвелявксос, эзинек сода. Редизе те апаронть патям. Серьгедизе авань, ды кавонест олога вельде таргизь пайстомонть. Уш эзь лексеяк. Лепиясь.
Кучимизь Ёганень, покштянь тердеме. Ёвтния, мейсэ тевесь. Сась сон, Митя атя, мандонензэ лангс нежелезь, шкань апак таргсе. Ломанесь сон аволь сэрей, лавтовонзояк аволь маралянь. Цёкланя, алов теине сакало. Вайгелезэ, чевте, прок тетянь. Теизе покштям, мезе эрявсь теемс — печкизе-ванськавтызе кулозь ревенть, — ды тусь, кода авам ды патям эзть энялдо кадовомс, кудов.
Надяй патям ливтсь мацтсто ваканнэ салтонь капстат, мусь кавто-колмо модарькинеть, чурькапря. Авам пидесь сывель ям. Шказо чикуншкань. Озынек ярсамо. Ямось тусь мелезэнек. Кода а туи, сывелень, тантей!
Кияк мезе лангскак эзь пеняця. Монь мекс-бути куроксто куродымизь пштикст. Арсинь, юты. Манявинь. Пекем тороземсь, сэредсь а ёвтавияк кода. Кузинь каштлангс. Мерян, паряк, лембесь матрасы сэредьксэнть. Лепштия пекем лембе, истя вечкевикс кирьпецтнес. Арась, ормась седеяк пек «киштеме» кармась. «Ава-а-ай! — ранган. — Ава-а-ай!» Монсь чаран, кеверькшнян «лембе пандонь» кияксканть. Ёртневсть ков понгсь нулатне-валатнеяк.
Кузсть каштланго чирес авам ды патям. «Осподи, осподи! Мезе теевсь эйкакшонть марто, кодамо апаро стардызе?» — вайкстни авам, сонсь путни кедензэ конязон. Эйсэст а неянгак, гуекс яки сюлотнева ормась, прок уросо шоркаить пштикстнэ.
Дрягинь, кувсинь талай. Окойники сэредьксэсь аламонь-аламонь кармась потамо. Ланган тусь ливезь...
[38]
* * *
Зярыя чинь перть вачо аштемадо мейле сывель палнэсь эль эзимим мадсте сестэ кандолазс, эзимим сае «васоло масторов».
Ламо иень ютазь та-кодамо журналсто ловнокшнынь истямо нулгодькс тевде. Колымав морява усковиця репрссснровазтнень зярыя чить кирдсть вачодо. Мода лангс лисезь, макснесть тенст, кинень зяро сэвеви, салтозь селёдка. Теде мейле ломантне — «раськень яттнэ», «кулактне» — чи, кавто пек майсесть ды теке карвот кулсесть.
Пштить, керязь керить, идемевсь таргсевлинзе, войнанть пеензэ...