Эрязденть арсезь (2010)/"Последний нонешний денёчек..."

From Wikisource
Jump to navigation Jump to search
Эрязденть арсезь  (2010)  by Нуянь Видяз, edited by Разгуляева Т. В.
«Последний нонешний денёчек...»
Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 35—36

[35]

«Последний нонешний денёчек...»

ТЕЛЕНЬ сумборя чи. Пельтне варинеяк эзть кадо чипаентень варштамс майсевиця моданть лангс. Якшамось а ацирьгали. Арась вармаяк.

Талай уш ловажат яжи, верь валы «ойнань» машинась. Ледни, сезни, пулты... Мелезэ а топавтови мейсэяк. Цятордозь пори-нили мезе ды кие понги икелензэ. Яла тензэ аламо, аламо, аламо. Яла а пештяви.

Вальманок икельга кияванть прянь нолдазь ютыть нурдос кильдезь чопода-якстере пона лишметь. Кавто улавт. Келей, керьсэ ацазь нурдтнэсэ, олго лангсо, кой-кодат кептернеть, кансткеть, нуласо-валасо оршнезь эйкакшт. Меельце улавонть мельга кутмордазь, пупорькшнезь молить зярыя цёраломанть, ютксост допрок однэть. Кой-конатне копордавсть велькска, Пильгест теке левшень, тапавкшныть. Молить-эскелить верьга вайгельть моразь.



[36]

Последний нонешний денёчек
Гуляю с вами я, друзья,
А завтра рано, чем светочек,
Заплачет вся моя родня...

Мельгаст, ожапесэ чамаст салава нардтнезь, эскелить од ават, тейтерть, кукорьк-кукорьк молить, судосост носкить, бажить сельведест а невтемс, сыре ават. Покштятнестэ, ванан, эскели ансяк Пупор Олдынька атя. Кузтемпес лиссь, ваны покштям — Ёгань Митя атя.

Заплачут братья, мои сёстры,
Заплачут мать и мой отец.
Ещё заплачет дорогая,
С которой шел я под венец...

Моронь жойтенть пачк марсеви тейтерьэйкакшонь седейс пштиксэкс сялговиця вайгель:

— Те-тя-ай, те-тя-ай! Илямизь кадо, илямизь кадо!

Теке кармавтозь, ёртни кельме коштонтень секе валтнэнь:

— Те-тя-ай, те-тя-ай! Илямизь кадо!..

 

*  *  *

Сестэ Пичепесь ильтясь цёратнень тов, косто ламот-ла-мот эзть велявто. Пансть эйсэст сывелень керсема узеренть алов омбоцеде: 1914-це иестэ «Последний нонешний денё-чек» моронть марто мольсть Васень мировоентень — «За Царя, за Отечество!», мейле — Омбоцентень — «За Родину, за Сталина!»

Велесь ильтясь шумбратнень, одтнэнь, мазыйтнень... Лиятне тюрьган чивалгомантень эзть эряво.

Зярдо-бути умок-умок, школань прядома шкасто, историясо ёвтнезь войнатнеде арсекшнынь та-кода сельмень сявадозь. Кодат апелицят, виевть олячист кис тюрицятне! Ней, сыречисэм, прынь мельс: ломанесь мейсэяк а пештяви, ков ламо, тов седеяк ламо тензэ эряви. Сень кис ветявить певтеме, ламо верень валыця войнатне. Те кода пинетне. Вейкесь ирны, бажи амзордамс сывелев ловажанть, конань максызе азорозо, омбоцеськак сялгинзе пеензэ эйзэнзэ. Эх, война, война, эх, ломанть! Каня тынь алкукс истят малавикст ирныця пинетненень?!