Эрязденть арсезь (2010)/Махан
[38]
| Махан |
Патям кандызе томбамаксо тюс, келькшев ды санов те сывель палонть талай чикуншкадо мейле. Вырк путызе стувор лангс ды, моргасто лисиця авань лангс варштазь, стакасто таргизе оймензэ:
— Визькс ульнесь саемскак, авай, ды ков молят, яла аволь кулозень... Мезе мартонзо тейтяно?
— Кисканень уш а ёртсынек. Мезеяк ды тейтяно, — оймавтызе авам тейтерензэ, сывеленть эрьва ёндо велявтнезь-ваннозь.
— Паряк, рестамс, а? — пшкадсь каршонзо стуворонть чиресэ аштиця патям.
— Монгак истя арсян. Улевельгак алкуксонь сывель, сатстневлинек ямнень пидсезь, — мартонзо вемельс прась авам.
— Аволь сывель — кшни, ой челькине а муят. Пароль каямс меньгак ойне пачалгонтень. Ансяк косто? — арсезевсь сывелень кандыцясь, ды совасть авань марто «цюланс».
...Ойсинек калдор-калдор стувор экшс. Учотано. Окойники авам путызе икеленек ведралаз лангс псисэ лексиця, тыжныця пачалгонть. Васенцекс венстизе кедензэ сывелень туицясь. Порсь-чевелясь ды ёвтызе мелензэ:
— Вельть уш калгодо, кодаяк а пореви. Танстезэ... яла аволь лопасто кшинь.
Пореви а пореви, нулгодят а нулгодят, пачалгось чаразь чарась икеленек. Палнэнь-палнэ, ды, вант, мезеяк уш эзь кадово. Кото кургт. Шка ламо эзь эряво.
Ярсамодо мейле, таркастонзо апак стя, патям ёвтась:
— Течи эзть карма учомо Тештярень прамонзо-куломанзо. «А [39] Эзть карма учомо Теигтярень куломанзо, — мерсь патям мезть майсевтемс ракшанть, — мерсь предэсь, — течи а врады, ванды пильгензэ венстьсынзе. Пикс лангсояк уш а кирдеви прязо. А мезть учнемс». Печкизь. Секскак, авай, сэвезь сывелесь аволь кулозь лишмень. Нулгодемс а мезде. Колмо чиде икеле вана эзть кенере. Косто, печкицятне ават... Чикуншкадо мейле мельцек-мельцек кавто прят Пильгест венстизь. Прасть — эзть стяво. Ды кода, видеяк, а врадомс? Андомс а мезде. Аволь тикше, олгояк сатомга арась. Кодаяк а учови од лугась... Чокшнеланга кулозь лишметнень ускизь Сёвонь латкс. Кедесткак эзизь ватка. Кинень? Ускизь салава. Илязт сода, келя, эрицятне. Кодат асодамот! Велень келес срадсь кулясь. Секе жо вестэнть Покшпень аватне... Вай, ёвтызь леместкак... А-а, вана кить: Критун Агай, Нуянь Зоя, Пайчань Проска, Иняй Олдай ды ламот лият калмамо тарканть сеске муизь. Кивекс кельмезь уловтнень керсизь узерьсэ. Вачкизь «товарост» салазкева, ды теке неевтест ульнесь. Верьгизтнэненьгак мезеяк эзь кадово. Бути ансяк чинесь... Нулгодемадо-мезде кияк эзь арсе.
Ды мезекс, авай, эрявсь «калмамотнень» тейнемс? А содан. Явшевлизь трудочинь кис вачо пекень кирдицятненень, ды весе. Мекс истя эзть тее? Сюкпря ёвтавольть. Мезень кис майсевтсть аватнень?! Веть, кумажава ловга, якшамова, кивтеме салазкетнень усксть. Истякак ломантне эль якавить... Кулытькак. Седеяк сыре атятне. Мезть кекшнемс?! Кулость ракшатне — кулость. Максыть ломантненень. А мезть лангсост нарьгамс!..
* * *
Махан, махан... Сеедьстэ марсевсь сеть шкатнестэ те валось. Кинь, кона ёндо пачкодсь, мезде корты — превскак эзь сакшно. Арсинь, татаронь. Аволь — карминь содамо. «Истя та-кодамо кельсэ, — маринь вейке татаронь пельде, — мерить печкемс тешкстазь лишмеде».
Минек чартьчисэ маханось ульнесь кулозь лишмень сывель.
[40] Эрьва мезде — пинеде, псакадо — ярсасть, ловнынь-марсинь, блокадас саезь, эрьва ёндо куродозь Ленинградсо. Мик ломанень сывельдеяк. Зяро тосо вачодо ды якшамодо кулость, соды весе мода-масторось. А вана зяро калмазельть наксадозь олгодо ды махандо-мезде ярснематнеде тесэ, васоло тылсэ, бажить а ёвтнемс. Тесэ, лисни, куломс шка арасель. Потяка эйкакшсто саезь эль якиця атятнес весе вийсэ, чинек-венек «чапсть» Изнямонть. Азярдоль венемемс эземпряс.
Махан, латосто валтозь наксадозь олго, пиципалакст, пекше лопат, пешксэнь пупоркат, умбравт... Мезде ансяк эзинек ярсне войнань шкасто! Ней соват лавкас — сельметь кадовить. Мик талакадат. Мезе ансяк арась лавсятнень лангсо! Валтнэяк сеске а муевить, этикеткатнестэ леместкак аловновить. Микшневить ярсамопельтне эрьва куросо, ужосо, кичиресэ. Микшницятне анокт кургозот тень-тонань нерьгстамс. Ламо-ламо пингеть, ламо тёжат иеть эрясь ломанесь мелявкссо, кода пештямс пекенть, а куломс, поладомс эрямонть, раськенть, Те мелявксось топавтовсь. Тарказонзо — абунгадат! — сась допрок лия: кода седе аламо сэвемс, кода а куялгадомс, а кандтнемс таштавиця кинотнень.
Содамс, кодамо мель карми топавтомо «пешксе пекесь» седе тов?.. Паряк, сюпав «магазейтнестэ» эскельди маханонь шкатнес? Озадо аштемадонть пуворькстнэ кармавтсызь.