Эрязденть арсезь (2010)/Конась седе тантей?
| ←Эрасто эрас | Эрязденть арсезь (2010) by , edited by Разгуляева Т. В. Конась седе тантей? |
Кодамокс карми валскень Чись?→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 343—346 |
[343]
| Конась седе тантей? |
Чачинь-касынь, сыречим самс эринь вейсэ эрямонь лувсо — социализмань, колхозонь-совхозонь, вельсоветэнь шкасто. Аволь ломанень пона, келей курго ды мейсэяк апештявиця капитализмадонть содытинь ансяк газетатнень-книгатнень ды школань-мезень тонавтыцятнень вельде-пельде. «Буржуй» валось ульнесь самай-самай тандавтницякс! Сёвнылинек эйсэнзэ. Текень кис Калдор Ваня лелянь лемдекшнызь Буржуй Ванякс.
Превскак эзь пачколе: сы шка ды сон, раужо чачо, очко пеке, утомшка курго капитализмась, рестедсы эрьва кода шназь-моразь социализманок, ды одс озы 1917-це иестэ саезь тарказонзо. Сась. Озась. Яжинзе колхозтнэнь, чамдынзе-[344]куловтынзе велетнень, прок бомбинзе аволь ве иень перть путозь питнейдеяк питней ферматнень-мезтнень. Тарказост кадовсть ловажакс ашолдыця бетонсто валозь «ирдезт». Ламо паксятнень кадынзе апак соксе. Лангсост покшокс путызе чудожовонть.
Истя эрямонь вейке лувсто понгинь омбоцес.
Кона «измась» седе ламбамо? Конась ризаня эли лажаня?
Сеске, ве валсо а ёвтави.
Эрьвась ломантнестэ эсензэкс эри, эсензэкс арси, эсензэкс питне максни «тосо-тесэ» эрямонтень. Веенстнэ, седе сыретне, кода эзть майсеве икеле, кода эзть нарьга лангсост, зяро карязт эзть яжа «трудочинь» кис, шныть «советскоенть», лиятне — неень коенть-ладонть. Чарькодить азё! Ламо-мезе полавтовсь, кияк а мери, вадря ёнов. Куш автобусонь учозь тарькстнемс а сави, туеват. Аволь кода икеле. Час тарнат, омбоце.. .Кшияк рамат, соват лавкас, шкань апак ёмавтне. Те паро.
Паксятне... Сыньгак, маряви, мизолкшномо кармасть.
Ломанесь вана... Оймензэ полавтызе доллар лангс! Лия мезеяк тензэ а эряви.
Урозт, бомжат...
Варштат — сельметь летькемить.
Истяяк меревлинь: эрьванень а савтсак. Мелезэнь кой-зярдо сакшны содавикс, видедеяк виде валмеревксэсь: «Вадря тосо, косо минь арастяно». Парсте ёвтазь, превейстэ! «Коммунизмас бажамо» шкастонть ломанесь, монень маряви, седе сюпаволь ойме ёжосо, кемемасо, стакаль — кеняркст эрямосонть ялатеке седе ламольть, кеняркссто пешксе покшчить ульнесть. Ней тень весе шлязь шлизь ярмактне, сельмень сявадоматне, апештявомась, сюпавчис кижнэзь лексезь правтомась! Ярмактнень теизь пазокс. Неть аванькс ёжотне-бажамотне совасть верезэнзэ. Ломанесь седе икеле седе ломанель, аволь кода ней — пешксе пекеденть башка мезеяк тензэ а эряви, мезеяк сонзэ а талновты, мезеяк а ловны. Библиотекатне чавот. Те лувсонть эрязь ютавтыть пингест ламот. Эрить — лемезэ. Каня те эрямо — сей пангокс ченгемс сём, певтеме чоподас туемазот? Каня теньсэ моданть лангс самонть смустезэ?
Икелень берянь-вадря культуранть, книганть, моронть, кинонть, седеень токновтыця чилисематнень таркас састь эрьва кодат ды эрьва мезде тыц пешксе лавкат, лавкат, лавкат. Ды певтеме ламо кенгелиця-манчагай, аволь тевде мокныця [345] «каналт». Церьковась васенце таркасо. Седееть човоряты лыйниця, сумань ёнов молиця раужо оршавкссо оршазетнень лангс ванозь! Нецяйть! Лиякс мерезь — тандавкст. Мезекс сынь? Мезень лезэст? Кинень эрявить? Ломанесь сонськак эзизе чарькоде-редя — таго теевсь «раб божийкс», велявтсь товарокс, понгсь долларонть коморс. Раужосо якицятненень те эрявияк. Седеяк пек вере-вере аштицятненень.
«Телекесь»... Мезес вети ваныцянзо! Чинек-венек сельмень апак пекстне невтни пельсштапо кирнявтницят, кирныця эли допрок вайгельтеме морыцят, «лопавтнемат», «дюниянь паксят», «миллионерт», «кадык кортыть», ярмак лангс налксемат... Аволь аламо шка максови «госарсицятненень». Экранонь откерекс-героекс теевсть бандитт, депутатт ды режиссёрт-актёрт. Лездыть салыцятненень-маштницятненень погононь кандтниця дошуз кундсицяст. Весе тортатне кепететсть лангс. Верепаз, каня а неят! Велень ломанденть, эрямодонзо, мелявкстонзо, паксянь тевтнеде, велень стакачитнеде, велень сыретнеде ды одтнэде — вал а марят. Арасть сынь. Ведьс ваясть. Те кода истя? Кода тень чарькодемс? Сыреж мода-модакай, тон, трицянок-аванок, мекс чатьмонят? Велесь — аволь ансяк веле. Аволь ансяк трицянок. Сон — культуранок, историянок, аванок. Сынтемест, сынст апак сода, сынст мелест апак вано масторось каназкады, вандычизэ а ули.
Паряк, «ящикесь» валнэ ёвты, мелензэ ёвтасы Россиясо эриця ламо лия раськетнеде, сынст кельдест, озномань койдест ды умонь шкадост-мородост? Учови-арась те шкась?
А кемеви.
Арасть сынь, неть раськетне, ёмасть. Тундонь юргозь-чаразь чудиця чадыведь, кода велень эрицятненьгак, салынзе. Лепиясть. Иля вешне. Эрзятнень, мокшотнень, маритнень, татартнэнь, чуважтнэнь, комитнень... полавтызь африкань эрицятнень лангс. Эрзятнень-лиятнень таркас экранс седе сеедьстэ лиснить — невтнить суликакс цитниця раужо киськест, мазычист — чикуншка ёнксонь цёратне ды аватне.
Телевидениянть теманзо, ламонь кувалт, тапить-калавтыть эрямонь чудильманть, ветить ваныцятнень чаулгавтыця палыця ведентень, тонавтыть сонзэ вечкеме. Те кой-кинень пек эряви. «Вечкицятне» вельть мендявикст ды потавтовикст — ветяк, кармавт, кучт ков ды зяро мелеть. Куш ков — [346] Авганов, Чечняв, Турцияв, Грецияв, Анголав... Сынстудемсэст ве программа — ялатеке.
Вана мезе «венстсь» тенек неень «измась» рынканзо-базаронзо марто. Коршак какставомазот.
Сыречинь музгордемат? Мунзамот?
Улевельгак...
Чачинь-кепетинь, эринь сыредемазом социализмань шкасто, меельце иень печтян капитализмань элякалиця «мазычисэ». Ламо-мезе неинь, маринь, варчнинь. Уцяскаван. Седе а ков. Сюпавангак.
Кодамо карми «чись-измась» Тоначив туемадон мейле?