Эрязденть арсезь (2010)/Эрасто эрас
| ←«Ёртык!... Ёртовиндеряй» | Эрязденть арсезь (2010) by , edited by Разгуляева Т. В. Эрасто эрас |
Конась седе тантей?→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 341—343 |
[341]
| Эрасто эрас |
Вана сизьгемень вете иеде ламонь перть эрямодон ды Эрямодонть ёвтнеминестэ стазь ёвтнемам. Кувака китнева эскелязь, эрьва козонь пачколинь, эрьва мезес эртневинь. Даволтнэ, кежтнеде вешкезь, чаравтсть эйсэнь эрьва кода. Эзимим стувтне, сюкпря, чипаеськак. Лембе мизолкссонзо стака, асатыкстэ пешксе, сюмора шкатнестэ макснесь тень вий марямс эрямонть танстензэ, неемс кувтолдыця тюсонзо.
Кеман, ловныцям, совсить мартон умонь ды неень шкань тевтнес, чопода ды валдо читнес, кеман, мартон кецнить, ризныть, мелявтыть, арсить, неик-марик вейке ломанень, седе келейстэ уцясканзо невтезь, велень эрямонть эрямонзо. Кеман, ютыть монь малавиксэнь ды оян-ялгань марто сеть латкотнень-[342]пандотнень трокс, конатнень потмакска-тёкшка лайшезь, пейдезь, тюрезь ютась Эрзянь раськесь ды Чачома Масторонок.
Савсь тень эрямс Эрямосонть — шнан пря — покштояк покш полавтневематнень пингстэ. Стардыя, кадык аволь «ваньксстэ», «лишмень-крандазонь моронь эранть», шканть, зярдо велень весе, ды аволь ансяк сонзэ, тевтне — сокамось-изамось, видемась, нуемась, оень чавомась, эрьва мезень усксемась... — топавтовсть лишмень вийсэ. Мельсэнь, вень шкава, илязт певере товтне, копоняс пултонь усксемась, пивсэмстэ молотилканть эйстэ капамо таркас олгонь «нардамось». Машинанть «пулонзо алга» лишмесэть ювк ютамсто певерить прят-лавтовот лангс олгт, сюват... Вечкеви! О-о-о, кода те умок ульнесь! Неявить неть картинатне тусто сувонь пачка, вельтямс вана допрок эзть вельтяво. Эрить превсэнь, эрить оймесэнь.
Лишмесь ульнесь кудораськень ванстыцякс-андыцякс, кудонь-кардазонь эрьмечикс. Сондензэ весе аштесь. Арась сон — тон чаво, пайстомо ломань. Каяк лавтовот трокс сядоксть пандтнезь кескав, сайть — а пелемс пинетнеде — мандо ды ушодт кудосто-кудос кедень венстезь якамо, пурнамо.
Те моданть лангс самодон икеле, малав эрьвань кардсо-кардазсо ульнесь айгор, эльде эли лоншак. Мейле састь колоньгеменце иетне ды... Сынст ушодовомсто сокань усксицятне крандазнэк-мезнек пурназельть ве таркас ды кирдевсть келей-покш вейсэнь кардсо, ве лато ало, колхозсо. Эрьва «бригадас» теезельть олгсо вельтязь зярыя кувака кардот. Ней меревлинек те таркадонть ЛКП — лишмень-крандазонь парк.
Эзинь юта вакска, неинь ды ламо-мезе теинь кедьсэ, сурсо-коморсо теевиця тевть: тикшень ледемат, нуемат, пивсэмат, понжавтомат, капамот, пенгень пилямот, керсемат, лазномат, пазень ды канстень таргамот-ваявтомат... Аволь аламо кодынь карть. Мик кезэрекс савкшнось чаравтомс эйкакшонь вийсэнь ведьгевень кевне-чарыне — яжавтомс коморо-кавто почткеть.
Зяро эрьва кодат тевть! Ламот эйстэст ваясть эрямонь — лиясто лажныця, лиясто чатьмонезь чудиця — шкань леентень. Кодат састь лиятат, мейсэ сынст полавтынзе? Мейсэ, кодамо тевсэ пештявить течинь пакшатнень ды од ломантнень чист? Удомасо? Компьютер, телевизор икеле чоп аштемасо? Те уш, мерема, лия кортамо.
Аламонь-аламонь, апак редя, лишменть менстизе ды ливтизе сокань ажиятнень ютксто трактор, сюронь нетькстнэнь юткова [343] кивчкаиця тарвазонть таркас сась васня «жнейка», мельганзо — тракторсо усксевиця комбайна. Зярс-бути лишметне ды машинатне тейсть тевест, видсть-урядасть сюро вейсэ. Мейле... Ней «жнейканть» ды ялганзо «лобогрейканть» а несыть музейстэяк. Велезэнек васенцекс сазь американь «Фордзон» тракторонть эзия некшне. Лавсьсэ эрицялинь. Сень кис натой ардтниньгак СССР-сэ нолдазь «СТЗ»-сэ, «Коммунар» комбайнасо, шкань ютазь ливтнезь ливтнинь «полуторка» машинасо. Вечкевсь! Седееть витевиль. Содамс, кодат ёжот марить течинь вете-кото иесэ Петинетне ды Танинетне эрьва чистэ «иномаркасо» школав ардтнезь? Вечкеви-арась тенст?
Пурьгинекс зэрнезь, урнозь-увнозь, качамонь нолдазь трактортнэ-мезтне совасть эрямонтень, понгавтызь пулозост, лишменть таркас, сокатнень-крандазтнэнь ды полавтызь ламо пингень перть чапозь эрямонь лувонть, ломаненть, сонзэ оймензэ. Весе стака, виень саиця ды налкставиця тевтнень ёлаксынзе-вачкинзе машинатнень лангс. Сась кшнинь эра.
Икелень пек эрявикс ламо кедьёнкстнэ — тарвазось, пивсэмась, пелюмась, сокась, чувтонь изамось, цёканзюрось, вигинетне, сурбунатне... — каня весе лововить? — умокуштеевсть музеень каштмолиця эрицякс. Ве лем тенст макссть — «экспонатт».
Лишмень-тарвазонь эрась прядовсь.
Сонзэ полавтызе кшнинь эрась. Ваксозонзо стясь электрокомпьютеренсесь.
Вейкестэ совинь омбоцес. Мельганзо колмоцесь.
Кодамо карми, те уш мондень мейле, нилецесь?