Эрязденть арсезь (2010)/Кодамокс карми валскень Чись?
| ←Конась седе тантей? | Эрязденть арсезь (2010) by , edited by Разгуляева Т. В. Кодамокс карми валскень Чись? |
Усковсь ускомам...→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 346—348 |
[346]
| Кодамокс карми валскень Чись? |
КАПШИ ломанесь, капши ломанень ошмось. Аволь кода чикуншка ёнов састо, сёлмосост эль юхаезь, мезде-бути нусманясто арсезь ливтиця карготне, ялатеке капши. Пиземе, лов, пачкат эзэльдиця пелевеёнксонь варма... Икелев, ансяк икелев! Ков? Кодамо вий эйсэть пани, ломань? Мезе теть а саты? Кие, мезе учи эйсэть валскень чинтень совамсто?
Аволь умок мезеньгак ловомсто, цифратнень «пансемстэ» сехте превей нежекс «превсэ важодицятненень», седеяк пек конторава аштицятненень, ульнесть ловомкайтне-счёттнэ, мейле лездыцякс тенст сась цирь-цирь пижниця арифмометрась. Ёндолк-ёндолк ютасть иеть, ды сынст чошкадинзе шукшпряс ламонь содыця-маштыця, ломандеяк превей компьютерэсь. Вишкапингстэнь, шкань ютазь уш од цёракс, Дубинькав-ков чийнинь модань, каладыця кевсэ ацазь киява, ней, ков а варштат, — асфальт. Эрьва велес. Ардт, ков седееть мери, ков арсят, ков сельметь неить! Истят тюнихат эзть ёвтневе ёвкссояк, эзь ёвтне тенек Пошань Аркай, Аркадий Иванович тонавтыцянокак.
Паро?
М-хы, кевкстнят!
Ужо, ялгинем, иля капша.
Умонь, ды уш аволь пек, шкатнеде ледстнезь, содавтнесамам кевкстема: мезес пачкодить минденек мейле эрицятне, мейсэ полавтсызь некеть жо течинь компьютертнэнь ды тешттнень ёнов ливтниця, ломаненть потмонзо неиця аппараттнэнь? Мейсэ кармить ардтнеме-ливтнеме? Паряк, [347] алкукскак, ламот туить эрямо Ков лангов? Эли кармить тов ливтнеме чайде симеме? А ношкстыть Марс ёнов? Келя, тосо седе вадря, седе мазыйть умарь чувттнэ!
Койсэнь, тов туемадо кортамоткак авольть верьгеле, а ормалгадовольтькак менельксэсь ды пертьпельксэсь. Моданть лангсо «весемеде превеесь», инязорось, кода эсь прянзо лемдизе ломанесь, сынст сэредьксэст а мари, апак арсе яла «вадрялгавты», яла шождалгавты, яла мазылгавты эрямонзо. Тень топавтомга, кардамонь апак сода, гайсэ пулты, ды тень эйсэ седеяк ормалгавты «вечкевикс» кудонзо — сэнь Осканть. Теде куштань пона, алга уиця пельсэ вельтязь менельсэнть чипаесь чуросто мукшны варя варштамс истямо мазый ды истя азордонзо майсевиця, истя нарьгазь Моданть лангс.
Медьков, кизэнть тёкшозо, самай пси шказо — ушосонть сёксь, лангсот свал улезэ лембе панар, кедьсэть — зонтик. Пиземетне, маряви, сиземаяк а содыть. Валыть чить, валыть веть. Молить сэтьместэ, пургсезь, молить цярахман ды варма марто... Куш кудостояк иля лисне! Ды истя, мерема, иестэ иес. Тельня — мекевланг. Ютась ацамковось, прядовома лангсо якшамков — ушосонть вете-кото градуст... лембе. Солавты. Эйзюрковонь менелькс. Зяроце уш ие моли те кежень пандомась Моданть лангсо нарьгамонок кис! Прявттнэ ды экрансто телелавтовтне яла чатьмонить, пря невтить а неицякс. Окойники, радиоськак, марян, ушодсь ветердеме «глобальнойденть». Цяк само кармась, сави ёвтнемс. Кемень иес лембелгадсь Модась, оно ёвтасть, 0,6 градусс!
Туемс Моданть перька нарыцянть лангов?
Пароль, ды билетэнть питнезэ цянавкс ливтни, а кундави. Косто... Кеветее-комсь иеть, келя, эрямо пенсиявтомо, таштамо ярмакт. А! талномс-мелявтомс а мезть. Се шкантень, ломань, билетэськак эрявомо теть а карми! Машинатнень марто эрязь, содов коштсост лексезь, кувать пиштеме а кармат. А мезть мунзамс. Кандолазот улезт анокт. Вана мезде мелявтома! Ков лангов ливтемадонть седе паро улевель велявтомс — аволь-аволь раужосто уштневиця кудотнес!!! — товзюронь нуемстэ жнейкань усксиця, карвотнеде пулосост юхаиця лишметнень ваксс, эрязасто ды ливезькалезь сюлмсемс жнейканть мельга пултт. Аволь ансяк берянь, стака, чопода ульнесь «лишмень «эрасонть». Аволь петнявкскень пес седей вити, аволь весе паро-шождыне «машинань эрасонтькак». Мекс, алкукскак, эрязкалиця, прянь-полдань синдезь икелев чииця, а варштнемс теть шкань-шкань удалов, ютазь китнень ды нуезь паксятнень лангс?
[348] Арась, истя, маряви, а лиси. Ломанесь пели псилгалезь важодемадонть, тевтнеде. Нузякс. Весе виензэ путы туемс стакачитнеде, бажи вачкамс рудазов, стака тевтнень, сталмотнень машинатнень ды автоматтнэнь сявдиксс. Мель путы шождалгавтомс эрямонзо лиясояк. Васняяк... саламосо. Те — зярдо истят тевть теить вейке эли зярыя ломанть. Зярдо салыцясь-агордыцясь государствась — тенень мерить война. Мезес те пачтясы, ды уш пачтизе, а арси. «Кадык ве таркасо аштезь, апак лыка таштазь куядонть, чапамо палыцядонть кулан, ялатеке озадо таркастон а стян, ялатеке карман истя эли лиякс саламо, — кирди сон мельсэнзэ, — озадо, озадо, оймень сайнезь!» Теке морозо.
Полавтовсь эрямось.
Ютыть иеть — кемень, комсь, сядо — ды полавтови таго. Кода? Мезень кувалма? Мезес атомонть ядранзо ды ДНК-сонть гентнэнь муемадо мейле пачкоди пертьпельксэнть лангсо инязорось? Мезе полавтсы течинь «мобильноенть»? Кодамокс кармить Модась ды Менелесь? Кодамокс карми Ломанесь лангс ванозь ды превсэ-мельсэ? Мезть, кодат сюрот, эмежть ды тикшеть кармить кецневтеме сельмть паксятнесэ?
Сыця эрямодонть, полавтовкстнэде, эсь шкадонзо, иля тално, кияк сёрмады те книганть кондямо, седе «эчке», мазый ды ламо фотография марто книга. Сёрмадомс сёрмады, ансяк...
Кодамо кельсэ?