Эрязденть арсезь (2010)/Усковсь ускомам...
| ←Кодамокс карми валскень Чись? | Эрязденть арсезь (2010) by , edited by Разгуляева Т. В. Усковсь ускомам... |
Валкске→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 348—350 |
[348]
| Усковсь ускомам... |
Вирьчиресэ кудынесэнек вастовомадонть мейле ютасть, прок тундонь чадыведь, кото иеть. Аволь весть вакссонок кувака пильге, якстере чама пичетне пелькстневсть тестэ-тосто пувиця варматнень марто, аволь весть кунсолынь сынст кувака лужаня морост.
Кизэнь се чокшнестэнть сакшность тенек Московсто инжеть: нинь ялгазо Шура. ды сонзэ полазо Куксо Леонид. Васенцесь эйстэст важодсь сестэ Опереттань Театрасо, пианистка. омбоцесь, Леонид Куксо — циркень клоун, литератор, музыкант, раксевтиця. Мартонзо, кода кортыть, а нусмакадат.
Кода-бути эзь редянгак, цярканть кепедемадо мейле пургондась сестэ кортамо литературадо, книгань ловномадо, сонзэ эрявиксчидензэ, ловныцятнень аламолгадомадост. Эзинь [349] кирдеве, видькстынь: кирдян мель сёрмадомс книга эседень, эсь эрямодон эйкакшпингстэ саезь.
Лиссь, карминь содамо, истя: Леонид — Лёняяк превть яжась истямо жанрань книга лангсо. Атя. Умок уш. Секскак эрямонь канстозо пешксе, ули мезде ёвтнемс. Паряк, секскак истя шождасто кортась кодамокс, кинень алтазь ды мезде улезэ истямо книгась.
Ютасть се чокшнестэнть стувор экшсэ кортнемадонок мейле, эзть марявгак, зярыя иеть. Таго кизна сась тенек варштамо Московсто Леонидэнь низэ Шура. Кузтемпесэлинек. Шумбракстнинек. Шура комась, панжизе юдманзо ды Венсть тень келей-сэрей форматонь... книга.
— Те тонеть Леонидэнь пельде, — видемтизе рунгонзо ды мерсь мизолдозь нурькинестэ наразь прячерь аволь сыре авась.
— Сюкпря Тонеть, Шура, ды полать туртов! — сюконинь ды, книганть «чамас» ванозь, поладынь валон. — Кода ёжозо Лёня атянь?
— Сыре ломанень, — эрязасто, апак кавтолгадо ёвтынзе валтнэнь.
— Лемдизе ёнсто-видестэ — «Молодые мои москвичи», Москва, 2006-це ие. Паро лемесь!
Совинь кудос. Озынь диванс ды путыя казненть кумажан лангс. Кундынь мартонзо содавиксэкс теевеме. Паро оформлениязо (ёролдовксозо), эйсэнзэ ламо фотографият, «эчкеяк». Кецневтимим лиятась: монекс, кода монгак, авторось ёвтнезь ёвтни эсь аволь нурькине, аволь шождыне эрямодонзо, вастневемадонзо «покш» ломань, ламо содавикс артисттнэнь-режиссёртнэнь марто. Юрий Никулин, Леонид Утёсов, Аркадий Райкин, Евгений Моргунов...
Те казненть каземадо мейле шкадонть, эзть редявгак, ютась байтяк. Весемезэ, лиси, стувор экшсэ аштезь валонть ёвтамодо мейле кадовсть удалов кото телеть-кизэть. Зняро ютасть «Эрязденть арсезь» книгадонть ёвтазь валтнэде мейле.
«Сестэ эно мезть тей-тов кайсевемс? Илештить ожат ды — ажиятнень юткс», — мерекшнесь тень, превть максокшнось умонь шкань клоунось, свалшкань раксевтицясь Куксо Леонид.
Сюконян теть, мельвановикс Леонид, превс путомат кис. Ажиятнень юткс а стяко совсинь, кадык кувакальгак кись, ускомам уския.
[350] 1929-1930 иетне. Орданьбуень цёратне стявтсть «Уралмаш» заводонть. Керш ёндо васенцесь од покштям, Четвергов Евдоким Дмитриевич, тетям куншкасо, кедьсэнзэ книга. Вить ёно Четвергов Терентий Тимофеевич, покштянь ялаксозо. Малав весе маштовсть 1941-1945 иень войнасонть