Эрязденть арсезь (2010)/Войнанть коензэ эсензэ
| ←«Полуторка» | Эрязденть арсезь (2010) by , edited by Разгуляева Т. В. Войнанть коензэ эсензэ |
Якшамонть лангс апак вано→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 30—32 |
[30]
| Войнанть коензэ эсензэ |
Косо-бути васоло-васоло, чимадема ёно, зэрни верев тюрема. Война...
Эрямось ялатеке эскели, кадык шкань-шкань кувсезь, лайшезь-ризнэзь, лотксемань апак сода. Войнанть эсензэ коензэ, эрямонть — эсензэ.
Тедедень тунда ялганень, Эремкань Мишанень, топодсть кавксо. Сась, войнанть лангс апак вано, таштамковось, ды ушодсь якамо школав. Те монь «токимим», мелезэнь эзь туе. Кода истя? Ялгам — школав, мон — Веруш сазорнэм ваномо? А виде. Моньгак ули мелем тонавтнемс ловномо-сёрмадомо! Арась-арась, Мишадо а кадован.
Кудопотмарсо челькиякшныть тетянь агрономокс тонавтнема шкань книганзо-тетрадензэ. Кузинь кудыкеле келей-сэрей ларенть [31] лангс, венстия кедем ды таргинь тетянь «архивстэ» эчке, раужо коленкоронь лангакс тетрадь. Лопанзо ве ёндо сёрмадозь. Мезеяк, кажось аволь покш! Саия пазава удалдо икеле чистэнть анокстазь карандашом ды — Эремканень.
Миша учось кузтемпесэ. Ношкстынек школав.
Кода оршазелинь?
Кепе. Лангсон лавтовом трокс ве ведьмесэ кирдевиця коцтонь понкскеть, сёрмав панарнэ, пиджакке. Ялгамгак текекс.
Клавдия Ивановна однэ тонавтыцясь — эсенек велень Тюмань Клавдя — кудов эзимим ильте. Озавтымим икеле партанть экшс. Каршонзо. Сельмензэ икеле улезэ ёжова наразь пря сэнь сельме орголькай тонавтницязо.
Мезде корты Клавдия Ивановна, а марян. Весе мелень-арсеман велить классонь раужо «лазонть» велькссэ понгавтозь рисунканть перька... Лапужа вакан. Эйсэнзэ лангсек-лангсек путнезь якстере чама ветешка покш умарть. Умарть некшнинь. Ламо ды эрьва кодат. Якстеретькак. Тетямгак тень усксесь истят. Кода сынь кандовить, кода путовить конёв лангс?! Вана косо тюнихась! Венстик кедеть, сайть вейкешка ды порть сётор-сётор. Ули мелеть, каваник вакссот аштиця тейтернентькак. Потьмежат, тантейть. Солазь солыть кургсот. Эли, улиндеряй мелеть, вант лангозост чинь-чоп. Каня истят тевть тейневить, каня истя артовкшныть ломань мельсэ ды кедьсэ?! Прок мунязь-колдовазь ванан стенантень, косо рисункась.
Окойники гайгезевсь пилесэнь Клавдия Ивановнань вайгелезэ — ёвтнесь тетрадьс эрьва кодамо черькскень седе мазыйстэ ды ваньксстэ сёрмадомадо.
Тонавтнинь а кувать.
1941-це иень таштамковось лембель, прок кизэль. Классо аштинек ве панарсо. Ланга оршамонок, кинь ульнесь, понгавтнинек коридорс.
Ютко шкасто лисинь классто, муия лиятнень ютксто пиджаккем, нерьгстыя кедем зепес ды ноцковтыя мекев. Пачкан ютась пси налнэ. Пеельнем, конань тетям ускокшнызе тень казнекс Московсто, арасель! Кие саизе, кинь кедензэ кинететсть? Бувсо авардезь чиинь классос, автордынь партанть лангсто книган-тетрадень ды сельведь потсо, прянь-полдань синдезь ношкстынь кудов.
Истя 1941-це иень таштамковонь зярыя таргонь перть [32] прядыя школасо тонавтнемань васень классом. Истя васенце тонавтыцякс кадовсь тень Тюма Ванянь покш тейтерезэ, Клавдия Ивановна...
* * *
Ардан Орданьбуестэ Саранов. Вакссон Александр Иванович, эсенек велень атя. Сон монь кондямо шержей ды сормсевезь чама. Кись аволь нурькинетнеде. Кортнетяно. Ледстнетяно неень ды умонь шкатнень. Килангонь ялгам мондень колмо-ниле иеде сыре. Ялатеке эрямонь кинек малав вейкетельть, некетельть толтнэ-ведтне.
Озамо таркань коряс шабрам, зярс ардынек, педе-пес ёвтнизе тетянзо, 1938-це иестэ пекстазь «раськень ятонть», Дубинькань буень исполкомонь прявтонть, уцясканзо. «Умер от ностальгии», — сёрмадозель Якутиясто аванзо лемс кучозь сёрмасонть. «Ностальгиядо»... «Вана истя, — мерсь вакссон аштицясь ды аламос каштмолезевсь (паряк, ледсть мелезэнзэ сеть умонь шкатне, ризксэнь кандыця се сёрманть само чизэ). — А визькс, а ойме потсост арасель, сёрмадомс истя — «ностальгия». Сыненст весе ульнесть вардот, весе ятт. Эрзякс вал ёвтат — ят, сёрмадат стихке эсеть кельсэ — таго ят, таго учок тюрьмань нарат. Вана истят нулгодькс тевть ульнесть сеть иетнестэ. Тонсь содат».
Саранов пачкодемстэ кевкстия патядонзо. «Эрявлитькак велесэ, — кортазевсь, — содавлить. Ней косто теть содамс, пинге ошсат. — Аламос аштезь кувакасто таргизе оймензэ ды ёвтась: — Клавдия Ивановна кулось. Мелят калминек. Яла тонавтсь Циберьцинасо эйкакшт. Тоско калминекак. Вана истя...».
Пачкодинек коткудав пизэ ёнов молиця, свал эвтиця, ломанде пешксе Саранонь автовокзалс. Лисинек лиятнень марто вейсэ пси автобусстонть, сювордынек кеденек, ды эрьвась тусь эсь тевензэ яксевтеме.