Эрязденть арсезь (2010)/Якшамонть лангс апак вано
| ←Войнанть коензэ эсензэ | Эрязденть арсезь (2010) by , edited by Разгуляева Т. В. Якшамонть лангс апак вано |
Ильтемань вастома→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 32—33 |
[32]
| Якшамонть лангс апак вано |
1941-це иень сёксесь лембель. Тень кис телесь, цят якшамонзо кувалма, совась венельксэнть мельга ваныцятнень конёвс «чемпионокс». Аволь ве ковонь перть пукштяиця коське якшамотне азоркс якасть виртнева-паксятнева, велетнева-оштнева.
Веленек трокс кияванть, конава «служамо» саекшнизь «автомобиленек», седе икеле — пандошка «ЧТЗ»-нек, таргавсть [33] певтеме ламо улавт. Паркстнить лекшсэ «мазылгавтозь» лишметне, чикордыть-тыжныть нурдотне. Эйсэст лембестэ оршнезь зярыянь-зярыянь ломанть ды кой-кодат курмот-кармот. Лиятнесэ тикше. Ламот молить ялго. Ойсить ансяк зярскак оймсеме. Лишметнеяк седе а сизить. Ды озадо, мерема, а аштеваткак. Стят. Якшамось сеске куродтанзат. Стят молезь-чиезь эжнеме.
Лишметь, нурдт, ломанть — теке сулейть... Чуросто кайсевиця вайгельть. Молить, молить... Молить чикуншка ёнов.
Пе, маряви, арась те молемантень.
Пани лекшиязь лишметнень ды ветицяст «ойнась», Гитлер ды сонзэ, идемевсь трескавлинзе, «фрицензэ».
Пани Сурачирев. Тосо, Енгалыч веленть тона ёнга, чувови покштояк покш, келейдеяк келей ды кувака латко. Саиндерясы вардось Московонть, лоткавтомонзо кармить неть таркатнесэ, толось, чарькодеви, гувкади Эрзянь Масторсояк.
Эйстэнек аламнеде трокс-ушкс эрить Пронямезть. Икелест рацяня кальтнень ало нурдот. Перьгавтозь лишметнень ланга каязь тулупт, чапант, велькс нулат. Велькссэст сияждыть лекшсэ сыре кальтне. Сырк а мерить. Чикуншка ёнов васолдонь молицятне лоткасть удомо. Валске чоподава таго тов, войнань учовома таркав.
* * *
1941—1942-це иетнестэ, телень пшти пей якшамотнень лангс апак вано, Сурачирева вирьсэ копачазь сэрей пандтнэнь чувнокшнызь — илязт ютаво немецень танкатне — ламо-ламо вайгельпень тарка. Зяро вий путозель, зяро кельмсемат кирдсть ломантне, зяро шумбрачи ёмсевтсть, зяро сийть андсть...
Мезень кис? Мезень кис майсевсть тосо, васняяк, эрзятне?
Мекс ломанесь а арси превиямо, ломанекс теевеме? Мекс тензэ кодаяк а калмавить потсонзо кирдевикс кенгелемань, саламонь, саемань, нельгемань, габордамонь чопода мельтне-ёжотне? Мекс а арси, а мелявты валскень чидензэ? Мекс а соды пешкедема?
Кезэрень пингетнестэ саезь кортыть ломаненть азорксчидензэ, видечисэ эрямодо, демократиядо. Теке марто, ванькс оймедензэ ды питнейчидензэ. Те мазый ёвкс. Арасель истямо лув ды а улияк. Улевельгак истямось, Гитлер аволь уле, авольть са Кежей Ивангак Сталин марто, лиятнеяк; мода-масторонть лангсо аволь уле валозь зняро верь. Вий, конань рашты апештявомась, — вана кие алкуксонь азорось, аволь ламо тюссо шназь-артозь демократиясь.