Эрязденть арсезь (2010)/"Полуторка"
| ←Войнань толсо киртазь. Ушодкс | Эрязденть арсезь (2010) by , edited by Разгуляева Т. В. «Полуторка» |
Войнанть коензэ эсензэ→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 29—30 |
[29]
| «Полуторка» |
Войнась усксь-потясь раужо-якстере кургозонзо мезе понгсь: кшнить, чувтт, кевть, визькс ёвтамскак, ломанень прят-пильгть... Нулгодемат, седеймарямот ды визькст сон эзь сода. Весементь порсь цёторсо. Война...
Колхозонок кандтнесь Весе Союзонь старостанть М.И. Калининэнь лемензэ. Ульнесь, ёвтамга, ташто машинынезэяк. «Полуторка» мерсть тензэ. Иетнеде эли, паряк, лиядо мезде, чинек-венек оймсесь сон сёвоньстэ-олгсто валозь гаражсонзо. Ярсамс эзь веше, аштесь ды аштесь: ков сыргат, а сыргавиндерят.
Весть Эремка Миша марто салава совинек «полуторканть» кудос колазь вальмава. Миша вечксь кшнить-мезть. Монь обуцясояк, видькстан, ульнесь истямо сэльгине. Мучкинек-вешнинек весе пштидема таркатнень. Мезеяк, куш кодамояк чеменев болт муевлинек! Машинанть вакскаяк эзинек юта. Совсинек кабиназонзо. Мезеяк эйстэнзэ эзинек тарга. Мелезэнек тукшность кенкшсэнзэ вальма суликань кепедема неднетне. Ванынек лангозост сельмень сявадозь. Кода валдосто цивтёрдсть!
...Кизэнь маней валске. Чипаесь апак эрязкале кенерсь куземе кудотнеде ды икельгаст почаня пря кальтнеде верев. Налксян вальмало «кузницясо». Эзь юта Мишань «кшнинь вечкемазо» вакскан. Мушкорсо жой-гай вачкоян кшни ланга. Лапуж-кавтнян, кода алкуксонь кузницясо, «сока пенч». Видемтия [30] рунгом, варштынь Алопе ёнов ды чувтоминь: веленек трокс Дубинькав ветиця челькев кияванть — аволь арды, аволь! — молезь моли вечкевикс «полуторканок». Ускить сонзэ эйсэ... кильдезь лишметь. Седеем тоцк мерсь. Сельведень анокольть лисемс. Те ков, ков истя ускить машинанок? Мезекс маштови каладо крандазось? Кевкстнят?! А мезть кевкстнемс?! Гурсо палыця войнань кежтне пекень пешкедема а содыть. Санган ютась нусманя ёжонь пси. Ванынь, зярс эзть ёма сельмень икельде...
* * *
...Сестэ тень, сисем иесэ цёрынентень, эзь чарькодевкшне, а костоль содамс, мезе ули иень, кавтонь... ветень ютазь. Цыганава-неньгак аволь содаво: вете иень ютазь, пандтнезь, пижесэ артозь-ваднезь «полуторканок» велявты фронтсто мекев кудов, Калинин лемсэ колхозов. Велявты, ды монень, кемгавтово иесэ «велень Художникентень», максыть «правительствань пельде покш кармавтома» — сёрмадомс «фронтовикенть» номерэнзэ. Макссть тень раужосо артозь жестьпе, ашо артома, цёкине, ды кундынь тевентень. Кармавтомась топавтозель шкастонзо ды, монь коряс, вельть вадрясто. Исень солдатось — Оксянь Семок — снарядонь таркас кармась усксеме эйсэнзэ комбайна алдо сюро.
Теней «Камазт» ды «ГАЗЕЛЬ»-ть, «ВАЗ»-т ды «Форд» марто «Мерседест», сестэ...